৩. পঞ্হাপুচ্ছকং

৬৩৮. চত্তারি ঝানানি – ইধ ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি…পে… ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি…পে… পীতিযা চ ৰিরাগা উপেক্খকো চ ৰিহরতি সতো চ সম্পজানো সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘‘উপেক্খকো সতিমা সুখৰিহারী’’তি ততিযং ঝানং উপসম্পজ্জ ৰিহরতি…পে… সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি.

৬৩৯. চতুন্নং ঝানানং কতি কুসলা, কতি অকুসলা, কতি অব্যাকতা…পে… কতি সরণা, কতি অরণা?

১. তিকং

৬৪০. সিযা কুসলা, সিযা অব্যাকতা. তীণি ঝানানি – এত্থুপ্পন্নং সুখং ৰেদনং ঠপেত্ৰা সুখায ৰেদনায সম্পযুত্তা, চতুত্থং ঝানং – এত্থুপ্পন্নং অদুক্খমসুখং ৰেদনং ঠপেত্ৰা অদুক্খমসুখায ৰেদনায সম্পযুত্তং. সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা. সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা. সিযা অসংকিলিট্ঠসংকিলেসিকা, সিযা অসংকিলিট্ঠঅসংকিলেসিকা. পঠমং ঝানং – এত্থুপ্পন্নে ৰিতক্কৰিচারে ঠপেত্ৰা সৰিতক্কং সৰিচারং, তীণি ঝানানি অৰিতক্কঅৰিচারা. দ্ৰে ঝানানি – এত্থুপ্পন্নং পীতিং ঠপেত্ৰা পীতিসহগতা, তীণি ঝানানি – এত্থুপ্পন্নং সুখং ঠপেত্ৰা সুখসহগতা, চতুত্থং ঝানং – এত্থুপ্পন্নং উপেক্খং ঠপেত্ৰা উপেক্খাসহগতং. নেৰ দস্সনেন ন ভাৰনায পহাতব্বা. নেৰ দস্সনেন ন ভাৰনায পহাতব্বহেতুকা. সিযা আচযগামিনো, সিযা অপচযগামিনো, সিযা নেৰাচযগামিনাপচযগামিনো. সিযা সেক্খা, সিযা অসেক্খা, সিযা নেৰসেক্খনাসেক্খা. সিযা মহগ্গতা, সিযা অপ্পমাণা. তীণি ঝানানি ন ৰত্তব্বা পরিত্তারম্মণাতিপি, মহগ্গতারম্মণাতিপি, সিযা অপ্পমাণারম্মণা, সিযা ন ৰত্তব্বা অপ্পমাণারম্মণাতি; চতুত্থং ঝানং সিযা পরিত্তারম্মণং, সিযা মহগ্গতারম্মণং, সিযা অপ্পমাণারম্মণং; সিযা ন ৰত্তব্বং পরিত্তারম্মণন্তিপি, মহগ্গতারম্মণন্তিপি, অপ্পমাণারম্মণন্তিপি. সিযা মজ্ঝিমা, সিযা পণীতা. সিযা সম্মত্তনিযতা, সিযা অনিযতা. তীণি ঝানানি ন মগ্গারম্মণা, সিযা মগ্গহেতুকা, সিযা মগ্গাধিপতিনো, সিযা ন ৰত্তব্বা মগ্গহেতুকাতিপি, মগ্গাধিপতিনোতিপি; চতুত্থং ঝানং সিযা মগ্গারম্মণং, সিযা মগ্গহেতুকং, সিযা মগ্গাধিপতি, সিযা ন ৰত্তব্বং মগ্গারম্মণন্তিপি, মগ্গহেতুকন্তিপি মগ্গাধিপতীতিপি. সিযা উপ্পন্না, সিযা অনুপ্পন্না, সিযা উপ্পাদিনো. সিযা অতীতা, সিযা অনাগতা, সিযা পচ্চুপ্পন্না. তীণি ঝানানি ন ৰত্তব্বা অতীতারম্মণাতিপি, অনাগতারম্মণাতিপি, পচ্চুপ্পন্নারম্মণাতিপি; চতুত্থং ঝানং সিযা অতীতারম্মণং, সিযা অনাগতারম্মণং, সিযা পচ্চুপ্পন্নারম্মণং, সিযা ন ৰত্তব্বং অতীতারম্মণন্তিপি, অনাগতারম্মণন্তিপি, পচ্চুপ্পন্নারমণন্তিপি. সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা. তীণি ঝানানি বহিদ্ধারম্মণা, চতুত্থং ঝানং সিযা অজ্ঝত্তারম্মণং, সিযা বহিদ্ধারম্মণং, সিযা অজ্ঝত্তবহিদ্ধারম্মণং, সিযা ন ৰত্তব্বং অজ্ঝত্তারম্মণন্তিপি, বহিদ্ধারম্মণন্তিপি, অজ্ঝত্তবহিদ্ধারম্মণন্তিপি. অনিদস্সনঅপ্পটিঘা.

২. দুকং

৬৪১. ন হেতূ, সহেতুকা, হেতুসম্পযুত্তা, ন ৰত্তব্বা ‘‘হেতূ চেৰ সহেতুকা চা’’তি, সহেতুকা চেৰ ন চ হেতূ, ন ৰত্তব্বা ‘‘হেতূ চেৰ হেতুসম্পযুত্তা চা’’তি, হেতুসম্পযুত্তা চেৰ ন চ হেতূ, ন হেতূ সহেতুকা.

সপ্পচ্চযা, সঙ্খতা, অনিদস্সনা, অপ্পটিঘা, অরূপা, সিযা লোকিযা, সিযা লোকুত্তরা, কেনচি ৰিঞ্ঞেয্যা, কেনচি ন ৰিঞ্ঞেয্যা.

নো আসৰা, সিযা সাসৰা, সিযা অনাসৰা, আসৰৰিপ্পযুত্তা, ন ৰত্তব্বা ‘‘আসৰা চেৰ সাসৰা চা’’তি, সিযা সাসৰা চেৰ নো চ আসৰা, সিযা ন ৰত্তব্বা ‘‘সাসৰা চেৰ নো চ আসৰা’’তি. ন ৰত্তব্বা ‘‘আসৰা চেৰ আসৰসম্পযুত্তা চাতি’’পি, আসৰসম্পযুত্তা চেৰ নো চ আসৰাতিপি. সিযা আসৰৰিপ্পযুত্তা সাসৰা, সিযা আসৰৰিপ্পযুত্তা অনাসৰা.

নো সংযোজনা…পে… নো গন্থা…পে… নো ওঘা…পে… নো যোগা…পে… নো নীৰরণা…পে… নো পরামাসা…পে… সারম্মণা, নো চিত্তা, চেতসিকা, চিত্তসম্পযুত্তা, চিত্তসংসট্ঠা, চিত্তসমুট্ঠানা, চিত্তসহভুনো, চিত্তানুপরিৰত্তিনো, চিত্তসংসট্ঠসমুট্ঠানা, চিত্তসংসট্ঠসমুট্ঠানসহভুনো, চিত্তসংসট্ঠসমুট্ঠানানুপরিৰত্তিনো, বাহিরা, নো উপাদা, সিযা উপাদিন্না, সিযা অনুপাদিন্না.

নো উপাদানা…পে… নো কিলেসা…পে… ন দস্সনেন পহাতব্বা, ন ভাৰনায পহাতব্বা, ন দস্সনেন পহাতব্বহেতুকা, ন ভাৰনায পহাতব্বহেতুকা. পঠমং ঝানং – এত্থুপ্পন্নং ৰিতক্কং ঠপেত্ৰা সৰিতক্কং, তীণি ঝানানি অৰিতক্কা. পঠমং ঝানং – এত্থুপ্পন্নং ৰিচারং ঠপেত্ৰা সৰিচারং, তীণি ঝানানি অৰিচারা. দ্ৰে ঝানানি – এত্থুপ্পন্নং পীতিং ঠপেত্ৰা সপ্পীতিকা, দ্ৰে ঝানানি অপ্পীতিকা. দ্ৰে ঝানানি – এত্থুপ্পন্নং পীতিং ঠপেত্ৰা পীতিসহগতা, দ্ৰে ঝানানি ন পীতিসহগতা. তীণি ঝানানি – এত্থুপ্পন্নং সুখং ঠপেত্ৰা সুখসহগতা, চতুত্থং ঝানং ন সুখসহগতং. চতুত্থং ঝানং – এত্থুপ্পন্নং উপেক্খং ঠপেত্ৰা উপেক্খাসহগতং, তীণি ঝানানি উপেক্খাসহগতা, ন কামাৰচরা, সিযা রূপাৰচরা, সিযা ন রূপাৰচরা, তীণি ঝানানি ন অরূপাৰচরা, চতুত্থং ঝানং সিযা অরূপাৰচরং, সিযা ন অরূপাৰচরং, সিযা পরিযাপন্না, সিযা অপরিযাপন্না, সিযা নিয্যানিকা, সিযা অনিয্যানিকা, সিযা নিযতা, সিযা অনিযতা, সিযা সউত্তরা, সিযা অনুত্তরা, অরণাতি.

পঞ্হাপুচ্ছকং.

ঝানৰিভঙ্গো নিট্ঠিতো.