৭. পঞ্হাৰারো

পচ্চযচতুক্কং

হেতু-আরম্মণপচ্চযা

৫৪. আসৰৰিপ্পযুত্তো সাসৰো অব্যাকতো ধম্মো আসৰৰিপ্পযুত্তস্স সাসৰস্স অব্যাকতস্স ধম্মস্স হেতুপচ্চযেন পচ্চযো.

আসৰৰিপ্পযুত্তো অনাসৰো অব্যাকতো ধম্মো আসৰৰিপ্পযুত্তস্স অনাসৰস্স অব্যাকতস্স ধম্মস্স হেতুপচ্চযেন পচ্চযো. আসৰৰিপ্পযুত্তো অনাসৰো অব্যাকতো ধম্মো আসৰৰিপ্পযুত্তস্স সাসৰস্স অব্যাকতস্স ধম্মস্স হেতুপচ্চযেন পচ্চযো. আসৰৰিপ্পযুত্তো অনাসৰো অব্যাকতো ধম্মো আসৰৰিপ্পযুত্তস্স সাসৰস্স অব্যাকতস্স চ আসৰৰিপ্পযুত্তস্স অনাসৰস্স অব্যাকতস্স চ ধম্মস্স হেতুপচ্চযেন পচ্চযো. (৩)

আসৰৰিপ্পযুত্তো সাসৰো অব্যাকতো ধম্মো আসৰৰিপ্পযুত্তস্স সাসৰস্স অব্যাকতস্স ধম্মস্স আরম্মণপচ্চযেন পচ্চযো. (১)

আসৰৰিপ্পযুত্তো অনাসৰো অব্যাকতো ধম্মো আসৰৰিপ্পযুত্তস্স অনাসৰস্স অব্যাকতস্স ধম্মস্স আরম্মণপচ্চযেন পচ্চযো. আসৰৰিপ্পযুত্তো অনাসৰো অব্যাকতো ধম্মো আসৰৰিপ্পযুত্তস্স সাসৰস্স অব্যাকতস্স ধম্মস্স আরম্মণপচ্চযেন পচ্চযো. (২) (সংখিত্তং.)

৫৫. হেতুযা চত্তারি, আরম্মণে তীণি, অধিপতিযা চত্তারি, অনন্তরে চত্তারি, সমনন্তরে চত্তারি, সহজাতে পঞ্চ, অঞ্ঞমঞ্ঞে দ্ৰে, নিস্সযে সত্ত, উপনিস্সযে চত্তারি, পুরেজাতে দ্ৰে, আসেৰনে একং, কম্মে চত্তারি, ৰিপাকে চত্তারি, আহারে চত্তারি…পে… অৰিগতে সত্ত (সংখিত্তং).

পচ্চনীযুদ্ধারো

৫৬. আসৰৰিপ্পযুত্তো সাসৰো অব্যাকতো ধম্মো আসৰৰিপ্পযুত্তস্স সাসৰস্স অব্যাকতস্স ধম্মস্স আরম্মণপচ্চযেন পচ্চযো… সহজাতপচ্চযেন পচ্চযো… উপনিস্সযপচ্চযেন পচ্চযো… পুরেজাতপচ্চযেন পচ্চযো… পচ্ছাজাতপচ্চযেন পচ্চযো… আহারপচ্চযেন পচ্চযো… ইন্দ্রিযপচ্চযেন পচ্চযো (সংখিত্তং).

৫৭. নহেতুযা সত্ত, নআরম্মণে সত্ত (সংখিত্তং).

হেতুপচ্চযা নআরম্মণে চত্তারি (সংখিত্তং).

নহেতুপচ্চযা আরম্মণে তীণি (সংখিত্তং).

(যথা কুসলত্তিকে পঞ্হাৰারস্স অনুলোমম্পি পচ্চনীযম্পি অনুলোমপচ্চনীযম্পি পচ্চনীযানুলোমম্পি গণিতং, এৰং গণেতব্বং.)

আসৰৰিপ্পযুত্তসাসৰদুককুসলত্তিকং নিট্ঠিতং.

আসৰগোচ্ছকং নিট্ঠিতং.