১. ৰিভঙ্গৰারো

হেতুপচ্চযো

১৭০. সুখসহগতো ধম্মো সুখসহগতস্স ধম্মস্স হেতুপচ্চযেন পচ্চযো… চত্তারি. (আরম্মণেপি অধিপতিযাপি সপ্পীতিকদুকসদিসা, সুখন্তি নানাকরণং.)

অনন্তরপচ্চযাদি

১৭১. সুখসহগতো ধম্মো সুখসহগতস্স ধম্মস্স অনন্তরপচ্চযেন পচ্চযো – পুরিমা পুরিমা সুখসহগতা খন্ধা পচ্ছিমানং পচ্ছিমানং সুখসহগতানং খন্ধানং অনন্তরপচ্চযেন পচ্চযো. (মূলং কাতব্বং.) পুরিমা পুরিমা সুখসহগতা খন্ধা পচ্ছিমস্স পচ্ছিমস্স সুখস্স অনন্তরপচ্চযেন পচ্চযো. সুখসহগতং চুতিচিত্তং নসুখসহগতস্স উপপত্তিচিত্তস্স… সুখসহগতং ভৰঙ্গং আৰজ্জনায… সুখসহগতং কাযৰিঞ্ঞাণং ৰিপাকমনোধাতুযা… সুখসহগতা ৰিপাকমনোৰিঞ্ঞাণধাতু কিরিযমনোৰিঞ্ঞাণধাতুযা… সুখসহগতং ভৰঙ্গং নসুখসহগতস্স ভৰঙ্গস্স… সুখসহগতং কুসলাকুসলং নসুখসহগতস্স ৰুট্ঠানস্স… কিরিযং ৰুট্ঠানস্স… ফলং ৰুট্ঠানস্স অনন্তরপচ্চযেন পচ্চযো. (মূলং কাতব্বং.) পুরিমা পুরিমা সুখসহগতা খন্ধা পচ্ছিমানং পচ্ছিমানং সুখসহগতানং খন্ধানং সুখস্স চ অনন্তরপচ্চযেন পচ্চযো. (১)

নসুখসহগতো ধম্মো নসুখসহগতস্স ধম্মস্স অনন্তরপচ্চযেন পচ্চযো – পুরিমা পুরিমা নসুখসহগতা…পে…. (মূলং. তীণিপি সপ্পীতিকদুকসদিসা.)

১৭২. সুখসহগতো চ নসুখসহগতো চ ধম্মা সুখসহগতস্স ধম্মস্স অনন্তরপচ্চযেন পচ্চযো – পুরিমা পুরিমা সুখসহগতা খন্ধা চ সুখঞ্চ পচ্ছিমানং পচ্ছিমানং সুখসহগতানং খন্ধানং অনন্তরপচ্চযেন পচ্চযো. (মূলং কাতব্বং.) পুরিমা পুরিমা সুখসহগতা খন্ধা চ সুখঞ্চ পচ্ছিমস্স পচ্ছিমস্স সুখস্স অনন্তরপচ্চযেন পচ্চযো; সুখসহগতং চুতিচিত্তঞ্চ সুখঞ্চ নসুখসহগতস্স উপপত্তিচিত্তস্স সুখসহগতং ভৰঙ্গঞ্চ সুখঞ্চ আৰজ্জনায … সুখসহগতং কাযৰিঞ্ঞাণঞ্চ সুখঞ্চ ৰিপাকমনোধাতুযা… সুখসহগতা ৰিপাকমনোৰিঞ্ঞাণধাতু চ সুখঞ্চ কিরিযমনোৰিঞ্ঞাণধাতুযা… সুখসহগতং ভৰঙ্গঞ্চ সুখঞ্চ নসুখসহগতস্স ভৰঙ্গস্স… সুখসহগতং কুসলাকুসলঞ্চ সুখঞ্চ নসুখসহগতস্স ৰুট্ঠানস্স… কিরিযং ৰুট্ঠানস্স… ফলং ৰুট্ঠানস্স অনন্তরপচ্চযেন পচ্চযো. (মূলং কাতব্বং.) পুরিমা পুরিমা সুখসহগতা খন্ধা চ সুখঞ্চ পচ্ছিমানং পচ্ছিমানং সুখসহগতানং খন্ধানং সুখস্স চ অনন্তরপচ্চযেন পচ্চযো. (৩)

সমনন্তরপচ্চযেন পচ্চযো… সহজাতপচ্চযেন পচ্চযো… অঞ্ঞমঞ্ঞপচ্চযেন পচ্চযো… নিস্সযপচ্চযেন পচ্চযো.

উপনিস্সযপচ্চযো

১৭৩. সুখসহগতো ধম্মো সুখসহগতস্স ধম্মস্স উপনিস্সযপচ্চযেন পচ্চযো… তীণি.

নসুখসহগতো ধম্মো নসুখসহগতস্স ধম্মস্স উপনিস্সযপচ্চযেন পচ্চযো – আরম্মণূপনিস্সযো, অনন্তরূপনিস্সযো, পকতূপনিস্সযো…পে…. পকতূপনিস্সযো – নসুখসহগতং সদ্ধং উপনিস্সায নসুখসহগতেন চিত্তেন দানং দেতি, সীলং…পে… সমাপত্তিং উপ্পাদেতি, মানং জপ্পেতি, দিট্ঠিং গণ্হাতি; নসুখসহগতং সীলং…পে… পঞ্ঞং… রাগং…পে… পত্থনং… কাযিকং সুখং… কাযিকং দুক্খং… উতুং… ভোজনং… সেনাসনং সুখং উপনিস্সায নসুখসহগতেন চিত্তেন দানং দেতি…পে… সমাপত্তিং উপ্পাদেতি, পাণং হনতি…পে… সঙ্ঘং ভিন্দতি; নসুখসহগতা সদ্ধা…পে… সেনাসনং সুখঞ্চ নসুখসহগতায সদ্ধায…পে… পঞ্ঞায… রাগস্স… দোসস্স…পে… পত্থনায… কাযিকস্স সুখস্স, কাযিকস্স দুক্খস্স, মগ্গস্স, ফলসমাপত্তিযা সুখস্স চ উপনিস্সযপচ্চযেন পচ্চযো. (১)

নসুখসহগতো ধম্মো সুখসহগতস্স ধম্মস্স উপনিস্সযপচ্চযেন পচ্চযো – আরম্মণূপনিস্সযো, অনন্তরূপনিস্সযো, পকতূপনিস্সযো…পে…. পকতূপনিস্সযো – নসুখসহগতং সদ্ধং উপনিস্সায সুখসহগতেন চিত্তেন দানং দেতি…পে… সমাপত্তিং উপ্পাদেতি, মানং জপ্পেতি, দিট্ঠিং গণ্হাতি; নসুখসহগতং সীলং…পে… পঞ্ঞং… রাগং…পে… পত্থনং… কাযিকং সুখং… কাযিকং দুক্খং… উতুং… ভোজনং… সেনাসনং সুখং উপনিস্সায সুখসহগতেন চিত্তেন দানং দেতি…পে… সমাপত্তিং উপ্পাদেতি; সুখসহগতেন চিত্তেন অদিন্নং আদিযতি; মুসা…পে… পিসুণং…পে… সম্ফং…পে… সন্ধিং…পে… নিল্লোপং…পে… একাগারিকং…পে… পরিপন্থে…পে… পরদারং…পে… গামঘাতং…পে… নিগমঘাতং করোতি; নসুখসহগতা সদ্ধা…পে… সেনাসনং সুখঞ্চ সুখসহগতায সদ্ধায…পে… পঞ্ঞায… রাগস্স… মানস্স… দিট্ঠিযা… পত্থনায… কাযিকস্স সুখস্স… মগ্গস্স ফলসমাপত্তিযা উপনিস্সযপচ্চযেন পচ্চযো. (২)

নসুখসহগতো ধম্মো সুখসহগতস্স চ নসুখসহগতস্স চ ধম্মস্স উপনিস্সযপচ্চযেন পচ্চযো – আরম্মণূপনিস্সযো, অনন্তরূপনিস্সযো, পকতূপনিস্সযো…পে…. পকতূপনিস্সযো – নসুখসহগতং সদ্ধং উপনিস্সায সুখসহগতেন চিত্তেন দানং দেতি…পে… (দুতিযগমনসদিসং) মানং জপ্পেতি, দিট্ঠিং গণ্হাতি; নসুখসহগতং সীলং…পে… সেনাসনং সুখং উপনিস্সায দানং দেতি…পে… সমাপত্তিং উপ্পাদেতি, সুখসহগতেন চিত্তেন অদিন্নং আদিযতি…পে… নসুখসহগতা সদ্ধা…পে… সেনাসনং সুখঞ্চ সুখসহগতায … সদ্ধায…পে… পত্থনায … কাযিকস্স সুখস্স, মগ্গস্স, ফলসমাপত্তিযা সুখস্স চ উপনিস্সযপচ্চযেন পচ্চযো. (৩)

সুখসহগতো চ নসুখসহগতো চ ধম্মা সুখসহগতস্স ধম্মস্স উপনিস্সযপচ্চযেন পচ্চযো… তীণি.

পুরেজাতপচ্চযাদি

১৭৪. নসুখসহগতো ধম্মো নসুখসহগতস্স ধম্মস্স পুরেজাতপচ্চযেন পচ্চযো – আরম্মণপুরেজাতং, ৰত্থুপুরেজাতং. আরম্মণপুরেজাতং – চক্খুং…পে… ৰত্থুং নসুখসহগতেন চিত্তেন অনিচ্চতো…পে… ৰিপস্সতি অস্সাদেতি অভিনন্দতি, তং আরব্ভ নসুখসহগতো রাগো উপ্পজ্জতি…পে… দোমনস্সং উপ্পজ্জতি, সুখং উপ্পজ্জতি, দিব্বেন চক্খুনা রূপং পস্সতি…পে… ফোট্ঠব্বাযতনং কাযৰিঞ্ঞাণস্স…পে…. ৰত্থুপুরেজাতং – চক্খাযতনং চক্খুৰিঞ্ঞাণস্স…পে… কাযাযতনং কাযৰিঞ্ঞাণস্স…পে… ৰত্থু নসুখসহগতানং খন্ধানং সুখস্স চ পুরেজাতপচ্চযেন পচ্চযো. (১)

নসুখসহগতো ধম্মো সুখসহগতস্স ধম্মস্স পুরেজাতপচ্চযেন পচ্চযো – আরম্মণপুরেজাতং, ৰত্থুপুরেজাতং. আরম্মণপুরেজাতং – চক্খুং…পে… ৰত্থুং সুখসহগতেন চিত্তেন অনিচ্চতো…পে… ৰিপস্সতি, অস্সাদেতি অভিনন্দতি, তং আরব্ভ সুখসহগতো রাগো উপ্পজ্জতি, দিট্ঠি উপ্পজ্জতি. ৰত্থুপুরেজাতং – ৰত্থু সুখসহগতানং খন্ধানং পুরেজাতপচ্চযেন পচ্চযো. (২)

নসুখসহগতো ধম্মো সুখসহগতস্স চ নসুখসহগতস্স চ ধম্মস্স পুরেজাতপচ্চযেন পচ্চযো – আরম্মণপুরেজাতং, ৰত্থুপুরেজাতং. আরম্মণপুরেজাতং – চক্খুং…পে… ৰত্থুং সুখসহগতেন চিত্তেন অনিচ্চতো…পে… ৰিপস্সতি, অস্সাদেতি অভিনন্দতি, তং আরব্ভ সুখঞ্চ সম্পযুত্তকা খন্ধা চ উপ্পজ্জন্তি. ৰত্থুপুরেজাতং – ৰত্থু সুখসহগতানং খন্ধানং সুখস্স চ পুরেজাতপচ্চযেন পচ্চযো. (৩)

পচ্ছাজাতপচ্চযেন পচ্চযো… তীণি… আসেৰনপচ্চযেন পচ্চযো… নৰ.

কম্মপচ্চযাদি

১৭৫. সুখসহগতো ধম্মো সুখসহগতস্স ধম্মস্স কম্মপচ্চযেন পচ্চযো – সহজাতা, নানাক্খণিকা. (ছ কম্মানি চত্তারি সহজাতাপি নানাক্খণিকাপি কাতব্বা, দ্ৰে নানাক্খণিকা.)… ৰিপাকপচ্চযেন পচ্চযো… নৰ… আহারপচ্চযেন পচ্চযো… চত্তারি… ইন্দ্রিযপচ্চযেন পচ্চযো… নৰ… ঝানপচ্চযেন পচ্চযো… নৰ… মগ্গপচ্চযেন পচ্চযো… চত্তারি… সম্পযুত্তপচ্চযেন পচ্চযো… ছ… ৰিপ্পযুত্তপচ্চযেন পচ্চযো… পঞ্চ… অত্থিপচ্চযেন পচ্চযো… নৰ… নত্থিপচ্চযেন পচ্চযো… নৰ… ৰিগতপচ্চযেন পচ্চযো… নৰ… অৰিগতপচ্চযেন পচ্চযো… নৰ.