১. ৰিভঙ্গৰারো

হেতুপচ্চযো

১০. কিলেসং ধম্মং পচ্চযা কিলেসো ধম্মো উপ্পজ্জতি হেতুপচ্চযা… তীণি (পটিচ্চসদিসা).

নোকিলেসং ধম্মং পচ্চযা নোকিলেসো ধম্মো উপ্পজ্জতি হেতুপচ্চযা – নোকিলেসং একং খন্ধং পচ্চযা তযো খন্ধা…পে… (যাৰ অজ্ঝত্তিকা মহাভূতা) ৰত্থুং পচ্চযা নোকিলেসা খন্ধা. (১)

নোকিলেসং ধম্মং পচ্চযা কিলেসো ধম্মো উপ্পজ্জতি হেতুপচ্চযা – নোকিলেসে খন্ধে পচ্চযা কিলেসা, ৰত্থুং পচ্চযা কিলেসা. (২)

নোকিলেসং ধম্মং পচ্চযা কিলেসো চ নোকিলেসো চ ধম্মা উপ্পজ্জন্তি হেতুপচ্চযা – নোকিলেসং একং খন্ধং পচ্চযা তযো খন্ধা কিলেসা চ চিত্তসমুট্ঠানঞ্চ রূপং…পে… দ্ৰে খন্ধে…পে… ৰত্থুং পচ্চযা কিলেসা, মহাভূতে পচ্চযা চিত্তসমুট্ঠানং রূপং, ৰত্থুং পচ্চযা কিলেসা চ সম্পযুত্তকা চ খন্ধা. (৩)

১১. কিলেসঞ্চ নোকিলেসঞ্চ ধম্মং পচ্চযা কিলেসো ধম্মো উপ্পজ্জতি হেতুপচ্চযা – লোভঞ্চ সম্পযুত্তকে চ খন্ধে পচ্চযা মোহো দিট্ঠি থিনং উদ্ধচ্চং অহিরিকং অনোত্তপ্পং (চক্কং). লোভঞ্চ ৰত্থুঞ্চ পচ্চযা কিলেসা. (১)

কিলেসঞ্চ নোকিলেসঞ্চ ধম্মং পচ্চযা নোকিলেসো ধম্মো উপ্পজ্জতি হেতুপচ্চযা – নোকিলেসং একং খন্ধঞ্চ কিলেসঞ্চ পচ্চযা তযো খন্ধা চিত্তসমুট্ঠানঞ্চ রূপং…পে… দ্ৰে খন্ধে চ…পে… কিলেসে চ মহাভূতে চ পচ্চযা চিত্তসমুট্ঠানং রূপং, কিলেসে চ ৰত্থুঞ্চ পচ্চযা নোকিলেসা খন্ধা. (২)

কিলেসঞ্চ নোকিলেসঞ্চ ধম্মং পচ্চযা কিলেসো চ নোকিলেসো চ ধম্মা উপ্পজ্জন্তি হেতুপচ্চযা – নোকিলেসং একং খন্ধঞ্চ লোভঞ্চ পচ্চযা তযো খন্ধা মোহো দিট্ঠি থিনং উদ্ধচ্চং অহিরিকং অনোত্তপ্পং চিত্তসমুট্ঠানঞ্চ রূপং…পে… দ্ৰে খন্ধে চ…পে… (চক্কং). লোভঞ্চ ৰত্থুঞ্চ পচ্চযা মোহো দিট্ঠি থিনং উদ্ধচ্চং অহিরিকং অনোত্তপ্পং সম্পযুত্তকা চ খন্ধা (চক্কং). (৩)

(আরম্মণপচ্চযে নোকিলেসমূলে পঞ্চ ৰিঞ্ঞাণা কাতব্বা.)