১. ৰিভঙ্গৰারো

নহেতুপচ্চযো

৫. নীৰরণং ধম্মং পটিচ্চ নীৰরণো ধম্মো উপ্পজ্জতি নহেতুপচ্চযা – ৰিচিকিচ্ছানীৰরণং পটিচ্চ অৰিজ্জানীৰরণং, উদ্ধচ্চনীৰরণং পটিচ্চ অৰিজ্জানীৰরণং. (১)

নোনীৰরণং ধম্মং পটিচ্চ নোনীৰরণো ধম্মো উপ্পজ্জতি নহেতুপচ্চযা – অহেতুকং নোনীৰরণং একং খন্ধং পটিচ্চ তযো খন্ধা চিত্তসমুট্ঠানঞ্চ রূপং…পে… দ্ৰে…পে… অহেতুকপটিসন্ধিক্খণে…পে… (যাৰ অসঞ্ঞসত্তা). (১)

নোনীৰরণং ধম্মং পটিচ্চ নীৰরণো ধম্মো উপ্পজ্জতি নহেতুপচ্চযা – ৰিচিকিচ্ছাসহগতে উদ্ধচ্চসহগতে খন্ধে পটিচ্চ অৰিজ্জানীৰরণং. (২)

৬. নীৰরণঞ্চ নোনীৰরণঞ্চ ধম্মং পটিচ্চ নীৰরণো ধম্মো উপ্পজ্জতি নহেতুপচ্চযা – ৰিচিকিচ্ছানীৰরণঞ্চ সম্পযুত্তকে চ খন্ধে পটিচ্চ অৰিজ্জানীৰরণং, উদ্ধচ্চনীৰরণঞ্চ সম্পযুত্তকে চ খন্ধে পটিচ্চ অৰিজ্জানীৰরণং. (১)

নআরম্মণপচ্চযাদি

৭. নীৰরণং ধম্মং পটিচ্চ নোনীৰরণো ধম্মো উপ্পজ্জতি নআরম্মণপচ্চযা – নীৰরণে পটিচ্চ চিত্তসমুট্ঠানং রূপং. (১)

নোনীৰরণং ধম্মং পটিচ্চ নোনীৰরণো ধম্মো উপ্পজ্জতি নআরম্মণপচ্চযা – নোনীৰরণে খন্ধে পটিচ্চ চিত্তসমুট্ঠানং রূপং; পটিসন্ধিক্খণে…পে… (যাৰ অসঞ্ঞসত্তা). (১)

নীৰরণঞ্চ নোনীৰরণঞ্চ ধম্মং পটিচ্চ নোনীৰরণো ধম্মো উপ্পজ্জতি নআরম্মণপচ্চযা – নীৰরণে চ সম্পযুত্তকে চ খন্ধে পটিচ্চ চিত্তসমুট্ঠানং রূপং (সংখিত্তং)… নঅধিপতিপচ্চযা… নঅনন্তরপচ্চযা… নসমনন্তরপচ্চযা… নঅঞ্ঞমঞ্ঞপচ্চযা… নউপনিস্সযপচ্চযা.

নপুরেজাতপচ্চযো

৮. নীৰরণং ধম্মং পটিচ্চ নীৰরণো ধম্মো উপ্পজ্জতি নপুরেজাতপচ্চযা – অরূপে কামচ্ছন্দনীৰরণং পটিচ্চ থিনমিদ্ধনীৰরণং উদ্ধচ্চনীৰরণং অৰিজ্জানীৰরণং, অরূপে কামচ্ছন্দনীৰরণং পটিচ্চ উদ্ধচ্চনীৰরণং অৰিজ্জানীৰরণং, অরূপে ৰিচিকিচ্ছানীৰরণং পটিচ্চ উদ্ধচ্চনীৰরণং অৰিজ্জানীৰরণং, অরূপে উদ্ধচ্চনীৰরণং পটিচ্চ অৰিজ্জানীৰরণং. (১)

নীৰরণং ধম্মং পটিচ্চ নোনীৰরণো ধম্মো উপ্পজ্জতি নপুরেজাতপচ্চযা – অরূপে নীৰরণে পটিচ্চ সম্পযুত্তকা খন্ধা, নীৰরণে পটিচ্চ চিত্তসমুট্ঠানং রূপং. (অৰসেসা পঞ্হা সব্বে ৰিত্থারেতব্বা. অরূপং পঠমং কাতব্বং, রূপং পচ্ছা যথা লভতি.)

৯. নীৰরণঞ্চ নোনীৰরণঞ্চ ধম্মং পটিচ্চ নীৰরণো ধম্মো উপ্পজ্জতি নপুরেজাতপচ্চযা – অরূপে নোনীৰরণে খন্ধে চ কামচ্ছন্দনীৰরণঞ্চ পটিচ্চ থিনমিদ্ধনীৰরণং উদ্ধচ্চনীৰরণং (চক্কং). (১)

নীৰরণঞ্চ নোনীৰরণঞ্চ ধম্মং পটিচ্চ নোনীৰরণো ধম্মো উপ্পজ্জতি নপুরেজাতপচ্চযা – অরূপে নোনীৰরণং একং খন্ধঞ্চ নীৰরণে চ পটিচ্চ তযো খন্ধা…পে… দ্ৰে খন্ধে চ…পে… নীৰরণে চ সম্পযুত্তকে চ খন্ধে পটিচ্চ চিত্তসমুট্ঠানং রূপং, নীৰরণে চ মহাভূতে চ পটিচ্চ চিত্তসমুট্ঠানং রূপং. (২)

নীৰরণঞ্চ নোনীৰরণঞ্চ ধম্মং পটিচ্চ নীৰরণো চ নোনীৰরণো চ ধম্মা উপ্পজ্জন্তি নপুরেজাতপচ্চযা – অরূপে নোনীৰরণং একং খন্ধঞ্চ কামচ্ছন্দনীৰরণঞ্চ পটিচ্চ তযো খন্ধা থিনমিদ্ধনীৰরণং উদ্ধচ্চনীৰরণং অৰিজ্জানীৰরণং (চক্কং. সংখিত্তং). (৩)