১. ৰিভঙ্গৰারো

হেতুপচ্চযো

৫৫. গন্থসম্পযুত্তং ধম্মং পচ্চযা গন্থসম্পযুত্তো ধম্মো উপ্পজ্জতি হেতুপচ্চযা… তীণি (পটিচ্চসদিসা).

গন্থৰিপ্পযুত্তং ধম্মং পচ্চযা গন্থৰিপ্পযুত্তো ধম্মো উপ্পজ্জতি হেতুপচ্চযা – গন্থৰিপ্পযুত্তং একং খন্ধং পচ্চযা…পে… পটিসন্ধিক্খণে…পে… খন্ধে পচ্চযা ৰত্থু, ৰত্থুং পচ্চযা খন্ধা, একং মহাভূতং…পে… ৰত্থুং পচ্চযা গন্থৰিপ্পযুত্তা খন্ধা. (১)

গন্থৰিপ্পযুত্তং ধম্মং পচ্চযা গন্থসম্পযুত্তো ধম্মো উপ্পজ্জতি হেতুপচ্চযা – ৰত্থুং পচ্চযা গন্থসম্পযুত্তকা খন্ধা, দিট্ঠিগতৰিপ্পযুত্তং লোভং পচ্চযা সম্পযুত্তকা খন্ধা, পটিঘং পচ্চযা সম্পযুত্তকা খন্ধা. (২)

গন্থৰিপ্পযুত্তং ধম্মং পচ্চযা গন্থসম্পযুত্তো চ গন্থৰিপ্পযুত্তো চ ধম্মা উপ্পজ্জন্তি হেতুপচ্চযা – ৰত্থুং পচ্চযা গন্থসম্পযুত্তকা খন্ধা, মহাভূতে পচ্চযা চিত্তসমুট্ঠানং রূপং, দিট্ঠিগতৰিপ্পযুত্তং লোভং পচ্চযা সম্পযুত্তকা খন্ধা চিত্তসমুট্ঠানঞ্চ রূপং, পটিঘং পচ্চযা সম্পযুত্তকা খন্ধা চিত্তসমুট্ঠানঞ্চ রূপং, ৰত্থুং পচ্চযা দিট্ঠিগতৰিপ্পযুত্তলোভসহগতা খন্ধা চ লোভো চ, ৰত্থুং পচ্চযা দোমনস্সসহগতা খন্ধা চ পটিঘঞ্চ. (৩)

৫৬. গন্থসম্পযুত্তঞ্চ গন্থৰিপ্পযুত্তঞ্চ ধম্মং পচ্চযা গন্থসম্পযুত্তো ধম্মো উপ্পজ্জতি হেতুপচ্চযা – গন্থসম্পযুত্তং একং খন্ধঞ্চ ৰত্থুঞ্চ পচ্চযা তযো খন্ধা…পে… দ্ৰে খন্ধে…পে… দিট্ঠিগতৰিপ্পযুত্তলোভসহগতং একং খন্ধঞ্চ ৰত্থুঞ্চ লোভঞ্চ পচ্চযা তযো খন্ধা …পে… দ্ৰে খন্ধে…পে… দোমনস্সসহগতং একং খন্ধঞ্চ ৰত্থুঞ্চ পটিঘঞ্চ পচ্চযা তযো খন্ধা…পে… দ্ৰে খন্ধে…পে…. (১)

গন্থসম্পযুত্তঞ্চ গন্থৰিপ্পযুত্তঞ্চ ধম্মং পচ্চযা গন্থৰিপ্পযুত্তো ধম্মো উপ্পজ্জতি হেতুপচ্চযা – গন্থসম্পযুত্তে খন্ধে চ মহাভূতে চ পচ্চযা চিত্তসমুট্ঠানং রূপং, দিট্ঠিগতৰিপ্পযুত্তলোভসহগতে খন্ধে চ লোভঞ্চ পচ্চযা চিত্তসমুট্ঠানং রূপং, দোমনস্সসহগতে খন্ধে চ পটিঘঞ্চ পচ্চযা চিত্তসমুট্ঠানং রূপং, দিট্ঠিগতৰিপ্পযুত্তলোভসহগতে খন্ধে চ ৰত্থুঞ্চ পচ্চযা লোভো, দোমনস্সসহগতে খন্ধে চ ৰত্থুঞ্চ পচ্চযা পটিঘং. (২)

গন্থসম্পযুত্তঞ্চ গন্থৰিপ্পযুত্তঞ্চ ধম্মং পচ্চযা গন্থসম্পযুত্তো চ গন্থৰিপ্পযুত্তো চ ধম্মা উপ্পজ্জন্তি হেতুপচ্চযা – গন্থসম্পযুত্তং একং খন্ধঞ্চ ৰত্থুঞ্চ পচ্চযা তযো খন্ধা…পে… দ্ৰে খন্ধে…পে… গন্থসম্পযুত্তে খন্ধে চ মহাভূতে চ পচ্চযা চিত্তসমুট্ঠানং রূপং, দিট্ঠিগতৰিপ্পযুত্তলোভসহগতং একং খন্ধঞ্চ লোভঞ্চ পচ্চযা তযো খন্ধা চিত্তসমুট্ঠানঞ্চ রূপং…পে… দ্ৰে খন্ধে…পে… দোমনস্সসহগতং একং খন্ধঞ্চ পটিঘঞ্চ পচ্চযা তযো খন্ধা চিত্তসমুট্ঠানঞ্চ রূপং…পে… দ্ৰে খন্ধে…পে… দিট্ঠিগতৰিপ্পযুত্তলোভসহগতং একং খন্ধঞ্চ ৰত্থুঞ্চ পচ্চযা তযো খন্ধা লোভো চ…পে… দ্ৰে খন্ধে…পে… দোমনস্সসহগতং একং খন্ধঞ্চ ৰত্থুঞ্চ পচ্চযা তযো খন্ধা পটিঘঞ্চ…পে… দ্ৰে খন্ধে…পে… (সংখিত্তং). (৩)