১. ৰিভঙ্গৰারো

হেতুপচ্চযো

১০. আসৰং ধম্মং পচ্চযা আসৰো ধম্মো উপ্পজ্জতি হেতুপচ্চযা (আসৰমূলকং তীণি, পটিচ্চসদিসা).

নোআসৰং ধম্মং পচ্চযা নোআসৰো ধম্মো উপ্পজ্জতি হেতুপচ্চযা – নোআসৰং একং খন্ধং পচ্চযা তযো খন্ধা চিত্তসমুট্ঠানঞ্চ রূপং…পে… দ্ৰে খন্ধে…পে… পটিসন্ধিক্খণে…পে… খন্ধে পচ্চযা ৰত্থু, ৰত্থুং পচ্চযা খন্ধা, মহাভূতে পচ্চযা চিত্তসমুট্ঠানং রূপং কটত্তারূপং উপাদারূপং, ৰত্থুং পচ্চযা নোআসৰা খন্ধা. (১)

নোআসৰং ধম্মং পচ্চযা আসৰো ধম্মো উপ্পজ্জতি হেতুপচ্চযা – নোআসৰে খন্ধে পচ্চযা আসৰা, ৰত্থুং পচ্চযা আসৰা. (২)

নোআসৰং ধম্মং পচ্চযা আসৰো চ নোআসৰো চ ধম্মা উপ্পজ্জন্তি হেতুপচ্চযা – নোআসৰং একং খন্ধং পচ্চযা তযো খন্ধা আসৰা চ চিত্তসমুট্ঠানঞ্চ রূপং…পে… দ্ৰে খন্ধে…পে… ৰত্থুং পচ্চযা আসৰা সম্পযুত্তকা চ খন্ধা. (৩)

১১. আসৰঞ্চ নোআসৰঞ্চ ধম্মং পচ্চযা আসৰো ধম্মো উপ্পজ্জতি হেতুপচ্চযা – কামাসৰঞ্চ সম্পযুত্তকে চ খন্ধে পচ্চযা দিট্ঠাসৰো অৰিজ্জাসৰো (চক্কং). কামাসৰঞ্চ ৰত্থুঞ্চ পচ্চযা দিট্ঠাসৰো অৰিজ্জাসৰো (চক্কং). (১)

আসৰঞ্চ নোআসৰঞ্চ ধম্মং পচ্চযা নোআসৰো ধম্মো উপ্পজ্জতি হেতুপচ্চযা – নোআসৰং একং খন্ধঞ্চ আসৰে চ পচ্চযা তযো খন্ধা চিত্তসমুট্ঠানঞ্চ রূপং…পে… দ্ৰে খন্ধে…পে… আসৰঞ্চ ৰত্থুঞ্চ পচ্চযা নোআসৰা খন্ধা. (২)

আসৰঞ্চ নোআসৰঞ্চ ধম্মং পচ্চযা আসৰো চ নোআসৰো চ ধম্মা উপ্পজ্জন্তি হেতুপচ্চযা – নোআসৰং একং খন্ধঞ্চ কামাসৰঞ্চ পচ্চযা তযো খন্ধা দিট্ঠাসৰো অৰিজ্জাসৰো চিত্তসমুট্ঠানঞ্চ রূপং…পে… দ্ৰে খন্ধে…পে… (চক্কং). কামাসৰঞ্চ ৰত্থুঞ্চ পচ্চযা দিট্ঠাসৰো অৰিজ্জাসৰো সম্পযুত্তকা চ খন্ধা (চক্কং. সংখিত্তং). (৩)