১-৪. পচ্চযানুলোমাদি

৬২. উপাদানসম্পযুত্তং ধম্মং সংসট্ঠো উপাদানসম্পযুত্তো ধম্মো উপ্পজ্জতি হেতুপচ্চযা – উপাদানসম্পযুত্তং একং খন্ধং সংসট্ঠা… তীণি.

উপাদানৰিপ্পযুত্তং ধম্মং সংসট্ঠো উপাদানৰিপ্পযুত্তো ধম্মো উপ্পজ্জতি হেতুপচ্চযা (পটিচ্চসদিসং, অরূপংযেৰ কাতব্বং).

উপাদানৰিপ্পযুত্তং ধম্মং সংসট্ঠো উপাদানসম্পযুত্তো ধম্মো উপ্পজ্জতি হেতুপচ্চযা (পটিচ্চসদিসং, অরূপংযেৰ কাতব্বং).

উপাদানসম্পযুত্তঞ্চ উপাদানৰিপ্পযুত্তঞ্চ ধম্মং সংসট্ঠো উপাদানসম্পযুত্তো ধম্মো উপ্পজ্জতি হেতুপচ্চযা (পটিচ্চসদিসং, অরূপংযেৰ কাতব্বং).

হেতুযা ছ, আরম্মণে ছ, অধিপতিযা ছ (সব্বত্থ ছ), ৰিপাকে একং…পে… অৰিগতে ছ.

অনুলোমং.

উপাদানৰিপ্পযুত্তং ধম্মং সংসট্ঠো উপাদানৰিপ্পযুত্তো ধম্মো উপ্পজ্জতি নহেতুপচ্চযা (সংখিত্তং).

নহেতুযা একং, নঅধিপতিযা ছ, নপুরেজাতে ছ, নপচ্ছাজাতে ছ, নআসেৰনে ছ, নকম্মে চত্তারি, নৰিপাকে ছ, নঝানে একং, নমগ্গে একং, নৰিপ্পযুত্তে ছ.

পচ্চনীযং.