১. ৰিভঙ্গৰারো

নহেতুপচ্চযো

৩২৩. অজ্ঝত্তিকং ধম্মং পটিচ্চ অজ্ঝত্তিকো ধম্মো উপ্পজ্জতি নহেতুপচ্চযা – অহেতুকপটিসন্ধিক্খণে চিত্তং পটিচ্চ অজ্ঝত্তিকং কটত্তারূপং. (১)

অজ্ঝত্তিকং ধম্মং পটিচ্চ বাহিরো ধম্মো উপ্পজ্জতি নহেতুপচ্চযা – অহেতুকং চিত্তং পটিচ্চ সম্পযুত্তকা খন্ধা চিত্তসমুট্ঠানঞ্চ রূপং; অহেতুকপটিসন্ধিক্খণে চিত্তং পটিচ্চ সম্পযুত্তকা খন্ধা বাহিরং কটত্তা চ রূপং, ৰিচিকিচ্ছাসহগতং উদ্ধচ্চসহগতং চিত্তং পটিচ্চ ৰিচিকিচ্ছাসহগতো উদ্ধচ্চসহগতো মোহো. (২)

অজ্ঝত্তিকং ধম্মং পটিচ্চ অজ্ঝত্তিকো চ বাহিরো চ ধম্মা উপ্পজ্জন্তি নহেতুপচ্চযা – অহেতুকপটিসন্ধিক্খণে চিত্তং পটিচ্চ সম্পযুত্তকা খন্ধা অজ্ঝত্তিকঞ্চ বাহিরঞ্চ কটত্তারূপং. (৩)

৩২৪. বাহিরং ধম্মং পটিচ্চ বাহিরো ধম্মো উপ্পজ্জতি নহেতুপচ্চযা – অহেতুকং বাহিরং একং খন্ধং পটিচ্চ দ্ৰে খন্ধা চিত্তসমুট্ঠানঞ্চ রূপং, দ্ৰে খন্ধে…পে… অহেতুকপটিসন্ধিক্খণে …পে… (যাৰ অসঞ্ঞসত্তা) ৰিচিকিচ্ছাসহগতে উদ্ধচ্চসহগতে খন্ধে পটিচ্চ ৰিচিকিচ্ছাসহগতো উদ্ধচ্চসহগতো মোহো. (১)

বাহিরং ধম্মং পটিচ্চ অজ্ঝত্তিকো ধম্মো উপ্পজ্জতি নহেতুপচ্চযা – অহেতুকে বাহিরে খন্ধে পটিচ্চ চিত্তং; অহেতুকপটিসন্ধিক্খণে বাহিরে খন্ধে পটিচ্চ চিত্তং অজ্ঝত্তিকং কটত্তা চ রূপং, অহেতুকপটিসন্ধিক্খণে ৰত্থুং পটিচ্চ চিত্তং. (২)

বাহিরং ধম্মং পটিচ্চ অজ্ঝত্তিকো চ বাহিরো চ ধম্মা উপ্পজ্জন্তি নহেতুপচ্চযা – অহেতুকং বাহিরং একং খন্ধং পটিচ্চ দ্ৰে খন্ধা চিত্তঞ্চ চিত্তসমুট্ঠানঞ্চ রূপং, দ্ৰে খন্ধে …পে… অহেতুকপটিসন্ধিক্খণে বাহিরং একং খন্ধং পটিচ্চ দ্ৰে খন্ধা চিত্তঞ্চ অজ্ঝত্তিকঞ্চ বাহিরঞ্চ কটত্তারূপং, অহেতুকপটিসন্ধিক্খণে ৰত্থুং পটিচ্চ চিত্তং সম্পযুত্তকা চ খন্ধা. (৩)

৩২৫. অজ্ঝত্তিকঞ্চ বাহিরঞ্চ ধম্মং পটিচ্চ অজ্ঝত্তিকো ধম্মো উপ্পজ্জতি নহেতুপচ্চযা – অহেতুকপটিসন্ধিক্খণে চিত্তঞ্চ সম্পযুত্তকে চ খন্ধে পটিচ্চ অজ্ঝত্তিকং কটত্তারূপং. (১)

অজ্ঝত্তিকঞ্চ বাহিরঞ্চ ধম্মং পটিচ্চ বাহিরো ধম্মো উপ্পজ্জতি নহেতুপচ্চযা – অহেতুকং বাহিরং একং খন্ধঞ্চ চিত্তঞ্চ পটিচ্চ দ্ৰে খন্ধা চিত্তসমুট্ঠানঞ্চ রূপং, দ্ৰে খন্ধে…পে… অহেতুকং চিত্তঞ্চ মহাভূতে চ পটিচ্চ চিত্তসমুট্ঠানং রূপং; অহেতুকপটিসন্ধিক্খণে বাহিরং একং খন্ধঞ্চ চিত্তঞ্চ পটিচ্চ দ্ৰে খন্ধা বাহিরং কটত্তা চ রূপং; অহেতুকপটিসন্ধিক্খণে চিত্তঞ্চ মহাভূতে চ পটিচ্চ বাহিরং কটত্তারূপং, অহেতুকপটিসন্ধিক্খণে চিত্তঞ্চ ৰত্থুঞ্চ পটিচ্চ বাহিরা খন্ধা, ৰিচিকিচ্ছাসহগতে উদ্ধচ্চসহগতে খন্ধে চ চিত্তঞ্চ পটিচ্চ ৰিচিকিচ্ছাসহগতো উদ্ধচ্চসহগতো মোহো. (২)

অজ্ঝত্তিকঞ্চ বাহিরঞ্চ ধম্মং পটিচ্চ অজ্ঝত্তিকো চ বাহিরো চ ধম্মা উপ্পজ্জন্তি নহেতুপচ্চযা – অহেতুকপটিসন্ধিক্খণে বাহিরং একং খন্ধঞ্চ চিত্তঞ্চ পটিচ্চ দ্ৰে খন্ধা অজ্ঝত্তিকঞ্চ বাহিরঞ্চ কটত্তারূপং, দ্ৰে খন্ধে চ…পে…. (৩)

নআরম্মণপচ্চযো

৩২৬. অজ্ঝত্তিকং ধম্মং পটিচ্চ অজ্ঝত্তিকো ধম্মো উপ্পজ্জতি নআরম্মণপচ্চযা – পটিসন্ধিক্খণে চিত্তং পটিচ্চ অজ্ঝত্তিকং কটত্তারূপং. (১)

অজ্ঝত্তিকং ধম্মং পটিচ্চ বাহিরো ধম্মো উপ্পজ্জতি নআরম্মণপচ্চযা – চিত্তং পটিচ্চ চিত্তসমুট্ঠানং রূপং; পটিসন্ধিক্খণে চিত্তং পটিচ্চ বাহিরং কটত্তারূপং. (২)

অজ্ঝত্তিকং ধম্মং পটিচ্চ অজ্ঝত্তিকো চ বাহিরো চ ধম্মা উপ্পজ্জন্তি নআরম্মণপচ্চযা; পটিসন্ধিক্খণে চিত্তং পটিচ্চ অজ্ঝত্তিকঞ্চ বাহিরঞ্চ কটত্তারূপং. (৩)

বাহিরং ধম্মং পটিচ্চ বাহিরো ধম্মো উপ্পজ্জতি নআরম্মণপচ্চযা – বাহিরে খন্ধে পটিচ্চ চিত্তসমুট্ঠানং রূপং; পটিসন্ধিক্খণে বাহিরে খন্ধে পটিচ্চ বাহিরং কটত্তারূপং, বাহিরে খন্ধে পটিচ্চ ৰত্থু, একং মহাভূতং…পে… (যাৰ অসঞ্ঞসত্তা). (১)

বাহিরং ধম্মং পটিচ্চ অজ্ঝত্তিকো ধম্মো উপ্পজ্জতি নআরম্মণপচ্চযা – পটিসন্ধিক্খণে বাহিরে খন্ধে পটিচ্চ অজ্ঝত্তিকং কটত্তারূপং. (২)

বাহিরং ধম্মং পটিচ্চ অজ্ঝত্তিকো চ বাহিরো চ ধম্মা উপ্পজ্জন্তি নআরম্মণপচ্চযা – পটিসন্ধিক্খণে বাহিরে খন্ধে পটিচ্চ অজ্ঝত্তিকঞ্চ বাহিরঞ্চ কটত্তারূপং. (৩)

৩২৭. অজ্ঝত্তিকঞ্চ বাহিরঞ্চ ধম্মং পটিচ্চ অজ্ঝত্তিকো ধম্মো উপ্পজ্জতি নআরম্মণপচ্চযা – পটিসন্ধিক্খণে চিত্তঞ্চ সম্পযুত্তকে চ খন্ধে পটিচ্চ অজ্ঝত্তিকং কটত্তারূপং. (১)

অজ্ঝত্তিকঞ্চ বাহিরঞ্চ ধম্মং পটিচ্চ বাহিরো ধম্মো উপ্পজ্জতি নআরম্মণপচ্চযা – বাহিরে খন্ধে চ চিত্তঞ্চ পটিচ্চ চিত্তসমুট্ঠানং রূপং, চিত্তঞ্চ মহাভূতে চ পটিচ্চ চিত্তসমুট্ঠানং রূপং (পটিসন্ধিক্খণে দ্ৰে কাতব্বা).

অজ্ঝত্তিকঞ্চ বাহিরঞ্চ ধম্মং পটিচ্চ অজ্ঝত্তিকো চ বাহিরো চ ধম্মা উপ্পজ্জন্তি নআরম্মণপচ্চযা – পটিসন্ধিক্খণে চিত্তঞ্চ সম্পযুত্তকে চ খন্ধে পটিচ্চ অজ্ঝত্তিকঞ্চ বাহিরঞ্চ কটত্তারূপং (সংখিত্তং). (৩)

নঝানপচ্চযো

৩২৮. অজ্ঝত্তিকং ধম্মং পটিচ্চ বাহিরো ধম্মো উপ্পজ্জতি নঝানপচ্চযা – চক্খুৰিঞ্ঞাণং পটিচ্চ সম্পযুত্তকা খন্ধা…পে… কাযৰিঞ্ঞাণং…পে….

বাহিরং ধম্মং পটিচ্চ বাহিরো ধম্মো উপ্পজ্জতি নঝানপচ্চযা – চক্খুৰিঞ্ঞাণসহগতং একং খন্ধং পটিচ্চ দ্ৰে খন্ধা, দ্ৰে খন্ধে…পে… কাযৰিঞ্ঞাণসহগতং…পে… বাহিরং… আহারসমুট্ঠানং… উতুসমুট্ঠানং… অসঞ্ঞসত্তানং…পে…. বাহিরং ধম্মং পটিচ্চ অজ্ঝত্তিকো ধম্মো উপ্পজ্জতি নঝানপচ্চযা – চক্খুৰিঞ্ঞাণসহগতে খন্ধে পটিচ্চ চক্খুৰিঞ্ঞাণং…পে… কাযৰিঞ্ঞাণসহগতে খন্ধে পটিচ্চ কাযৰিঞ্ঞাণং. বাহিরং ধম্মং পটিচ্চ অজ্ঝত্তিকো চ বাহিরো চ ধম্মা উপ্পজ্জন্তি নঝানপচ্চযা – চক্খুৰিঞ্ঞাণসহগতং একং খন্ধং পটিচ্চ দ্ৰে খন্ধা চক্খুৰিঞ্ঞাণঞ্চ, দ্ৰে খন্ধে…পে… কাযৰিঞ্ঞাণসহগতং একং খন্ধং…পে…. (৩)

অজ্ঝত্তিকঞ্চ বাহিরঞ্চ ধম্মং পটিচ্চ বাহিরো ধম্মো উপ্পজ্জতি নঝানপচ্চযা – চক্খুৰিঞ্ঞাণসহগতং একং খন্ধঞ্চ চক্খুৰিঞ্ঞাণঞ্চ পটিচ্চ দ্ৰে খন্ধা, দ্ৰে খন্ধে…পে… কাযৰিঞ্ঞাণং (চক্কং).