১. ৰিভঙ্গৰারো

হেতুপচ্চযো

৩০. উপাদিন্নুপাদানিযং ধম্মং পচ্চযা উপাদিন্নুপাদানিযো ধম্মো উপ্পজ্জতি হেতুপচ্চযা – উপাদিন্নুপাদানিযং একং খন্ধং পচ্চযা তযো খন্ধা…পে… পটিসন্ধিক্খণে…পে… খন্ধে পচ্চযা ৰত্থু, ৰত্থুং পচ্চযা খন্ধা; একং মহাভূতং পচ্চযা তযো মহাভূতা…পে… মহাভূতে পচ্চযা কটত্তারূপং উপাদারূপং; ৰত্থুং পচ্চযা উপাদিন্নুপাদানিযা খন্ধা. (১)

উপাদিন্নুপাদানিযং ধম্মং পচ্চযা অনুপাদিন্নুপাদানিযো ধম্মো উপ্পজ্জতি হেতুপচ্চযা – উপাদিন্নুপাদানিযে খন্ধে পচ্চযা চিত্তসমুট্ঠানং রূপং; ৰত্থুং পচ্চযা অনুপাদিন্নুপাদানিযা খন্ধা. (২)

উপাদিন্নুপাদানিযং ধম্মং পচ্চযা অনুপাদিন্নঅনুপাদানিযো ধম্মো উপ্পজ্জতি হেতুপচ্চযা – ৰত্থুং পচ্চযা অনুপাদিন্নঅনুপাদানিযা খন্ধা. (৩)

উপাদিন্নুপাদানিযং ধম্মং পচ্চযা উপাদিন্নুপাদানিযো চ অনুপাদিন্নুপাদানিযো চ ধম্মা উপ্পজ্জন্তি হেতুপচ্চযা – উপাদিন্নুপাদানিযং একং খন্ধং পচ্চযা তযো খন্ধা চিত্তসমুট্ঠানঞ্চ রূপং…পে…. (৪)

৩১. অনুপাদিন্নুপাদানিযং ধম্মং পচ্চযা অনুপাদিন্নুপাদানিযো ধম্মো উপ্পজ্জতি হেতুপচ্চযা… একা.

অনুপাদিন্নঅনুপাদানিযং ধম্মং পচ্চযা অনুপাদিন্নঅনুপাদানিযো ধম্মো উপ্পজ্জতি হেতুপচ্চযা… তীণি.

উপাদিন্নুপাদানিযঞ্চ অনুপাদিন্নঅনুপাদানিযঞ্চ ধম্মং পচ্চযা অনুপাদিন্নঅনুপাদানিযো ধম্মো উপ্পজ্জতি হেতুপচ্চযা – অনুপাদিন্নঅনুপাদানিযং একং খন্ধঞ্চ ৰত্থুঞ্চ পচ্চযা তযো খন্ধা…পে… দ্ৰে খন্ধে চ ৰত্থুঞ্চ পচ্চযা দ্ৰে খন্ধা. (১)

অনুপাদিন্নুপাদানিযঞ্চ অনুপাদিন্নঅনুপাদানিযঞ্চ ধম্মং পচ্চযা অনুপাদিন্নুপাদানিযো ধম্মো উপ্পজ্জতি হেতুপচ্চযা – অনুপাদিন্নঅনুপাদানিযে খন্ধে চ মহাভূতে চ পচ্চযা চিত্তসমুট্ঠানং রূপং. (১)

উপাদিন্নুপাদানিযঞ্চ অনুপাদিন্নুপাদানিযঞ্চ ধম্মং পচ্চযা অনুপাদিন্নুপাদানিযো ধম্মো উপ্পজ্জতি হেতুপচ্চযা – উপাদিন্নুপাদানিযে খন্ধে চ মহাভূতে চ পচ্চযা চিত্তসমুট্ঠানং রূপং; অনুপাদিন্নুপাদানিযং একং খন্ধঞ্চ ৰত্থুঞ্চ পচ্চযা তযো খন্ধা…পে… দ্ৰে খন্ধে চ ৰত্থুঞ্চ পচ্চযা দ্ৰে খন্ধা. (১)

আরম্মণপচ্চযো

৩২. উপাদিন্নুপাদানিযং ধম্মং পচ্চযা উপাদিন্নুপাদানিযো ধম্মো উপ্পজ্জতি আরম্মণপচ্চযা – উপাদিন্নুপাদানিযং একং খন্ধং পচ্চযা তযো খন্ধা…পে… দ্ৰে খন্ধে পচ্চযা দ্ৰে খন্ধা; পটিসন্ধিক্খণে উপাদিন্নুপাদানিযং একং খন্ধং পচ্চযা তযো খন্ধা…পে… দ্ৰে খন্ধে পচ্চযা দ্ৰে খন্ধা; ৰত্থুং পচ্চযা খন্ধা; চক্খাযতনং পচ্চযা চক্খুৰিঞ্ঞাণং…পে… কাযাযতনং পচ্চযা কাযৰিঞ্ঞাণং; ৰত্থুং পচ্চযা উপাদিন্নুপাদানিযা খন্ধা. (১)

উপাদিন্নুপাদানিযং ধম্মং পচ্চযা অনুপাদিন্নুপাদানিযো ধম্মো উপ্পজ্জতি আরম্মণপচ্চযা – ৰত্থুং পচ্চযা অনুপাদিন্নুপাদানিযা খন্ধা. (২)

উপাদিন্নুপাদানিযং ধম্মং পচ্চযা অনুপাদিন্নঅনুপাদানিযো ধম্মো উপ্পজ্জতি আরম্মণপচ্চযা – ৰত্থুং পচ্চযা অনুপাদিন্নঅনুপাদানিযা খন্ধা. (৩)

অনুপাদিন্নুপাদানিযং ধম্মং পচ্চযা অনুপাদিন্নুপাদানিযো ধম্মো উপ্পজ্জতি আরম্মণপচ্চযা – অনুপাদিন্নুপাদানিযং একং খন্ধং পচ্চযা তযো খন্ধা…পে… দ্ৰে খন্ধে পচ্চযা দ্ৰে খন্ধা. (১)

অনুপাদিন্নঅনুপাদানিযং ধম্মং পচ্চযা অনুপাদিন্নঅনুপাদানিযো ধম্মো উপ্পজ্জতি আরম্মণপচ্চযা – অনুপাদিন্নঅনুপাদানিযং একং খন্ধং পচ্চযা তযো খন্ধা…পে… দ্ৰে খন্ধে পচ্চযা দ্ৰে খন্ধা. (১)

উপাদিন্নুপাদানিযঞ্চ অনুপাদিন্নঅনুপাদানিযঞ্চ ধম্মং পচ্চযা অনুপাদিন্নঅনুপাদানিযো ধম্মো উপ্পজ্জতি আরম্মণপচ্চযা – অনুপাদিন্নঅনুপাদানিযং একং খন্ধঞ্চ ৰত্থুঞ্চ পচ্চযা তযো খন্ধা…পে… দ্ৰে খন্ধে চ ৰত্থুঞ্চ পচ্চযা দ্ৰে খন্ধা. (১)

উপাদিন্নুপাদানিযঞ্চ অনুপাদিন্নুপাদানিযঞ্চ ধম্মং পচ্চযা অনুপাদিন্নুপাদানিযো ধম্মো উপ্পজ্জতি আরম্মণপচ্চযা – অনুপাদিন্নুপাদানিযং একং খন্ধঞ্চ ৰত্থুঞ্চ পচ্চযা তযো খন্ধা…পে… দ্ৰে খন্ধে চ ৰত্থুঞ্চ পচ্চযা দ্ৰে খন্ধা. (১)

অধিপতিপচ্চযো

৩৩. উপাদিন্নুপাদানিযং ধম্মং পচ্চযা অনুপাদিন্নুপাদানিযো ধম্মো উপ্পজ্জতি অধিপতিপচ্চযা – ৰত্থুং পচ্চযা অনুপাদিন্নুপাদানিযা খন্ধা. (১)

উপাদিন্নুপাদানিযং ধম্মং পচ্চযা অনুপাদিন্নঅনুপাদানিযো ধম্মো উপ্পজ্জতি অধিপতিপচ্চযা – ৰত্থুং পচ্চযা অনুপাদিন্নঅনুপাদানিযা খন্ধা. (২)

অনুপাদিন্নুপাদানিযং ধম্মং পচ্চযা অনুপাদিন্নুপাদানিযো ধম্মো উপ্পজ্জতি অধিপতিপচ্চযা… একা.

অনুপাদিন্নঅনুপাদানিযং ধম্মং পচ্চযা… তিস্সো.

উপাদিন্নুপাদানিযঞ্চ অনুপাদিন্নঅনুপাদানিযঞ্চ ধম্মং পচ্চযা…পে… অধিপতিপচ্চযা…পে…. (১)

অনুপাদিন্নুপাদানিযঞ্চ অনুপাদিন্নঅনুপাদানিযঞ্চ ধম্মং পচ্চযা…পে… অধিপতিপচ্চযা. (১)

উপাদিন্নুপাদানিযঞ্চ অনুপাদিন্নুপাদানিযঞ্চ ধম্মং পচ্চযা অনুপাদিন্নুপাদানিযো ধম্মো উপ্পজ্জতি অধিপতিপচ্চযা – অনুপাদিন্নুপাদানিযং একং খন্ধঞ্চ ৰত্থুঞ্চ পচ্চযা তযো খন্ধা…পে… দ্ৰে খন্ধে চ ৰত্থুঞ্চ পচ্চযা দ্ৰে খন্ধা. (১)

অনন্তরপচ্চযো

৩৪. উপাদিন্নুপাদানিযং ধম্মং পচ্চযা উপাদিন্নুপাদানিযো ধম্মো উপ্পজ্জতি অনন্তরপচ্চযা.

(চতুৰীসতিপচ্চযা ৰিত্থারেতব্বা, অৰিগতপচ্চযা.)