২. পচ্চযপচ্চনীযং

৪২. সিযা কুসলং ধম্মং পটিচ্চ কুসলো ধম্মো উপ্পজ্জেয্য নহেতুপচ্চযা.

(যথা অনুলোমে হেতুপচ্চযো ৰিত্থারিতো, এৰং পচ্চনীযেপি নহেতুপচ্চযো ৰিত্থারেতব্বো.)

৪৩. সিযা কুসলং ধম্মং পটিচ্চ কুসলো ধম্মো উপ্পজ্জেয্য নআরম্মণপচ্চযা… নঅধিপতিপচ্চযা… নঅনন্তরপচ্চযা… নসমনন্তরপচ্চযা… নসহজাতপচ্চযা… নঅঞ্ঞমঞ্ঞপচ্চযা… ননিস্সযপচ্চযা… নউপনিস্সযপচ্চযা… নপুরেজাতপচ্চযা… নপচ্ছাজাতপচ্চযা … নআসেৰনপচ্চযা… নকম্মপচ্চযা… নৰিপাকপচ্চযা… নআহারপচ্চযা… নইন্দ্রিযপচ্চযা… নঝানপচ্চযা… নমগ্গপচ্চযা… নসম্পযুত্তপচ্চযা… নৰিপ্পযুত্তপচ্চযা… নোঅত্থিপচ্চযা… নোনত্থিপচ্চযা… নোৰিগতপচ্চযা… নোঅৰিগতপচ্চযা.

৪৪. সিযা কুসলং ধম্মং পটিচ্চ কুসলো ধম্মো উপ্পজ্জেয্য নহেতুপচ্চযা নআরম্মণপচ্চযা….

(যথা অনুলোমে একেকস্স পদস্স একমূলকং, দুমূলকং, তিমূলকং, চতুমূলকং, যাৰ তেৰীসতিমূলকং এৰং পচ্চনীযেপি ৰিত্থারেতব্বং. )

(খ) তিকঞ্চ পট্ঠানৰরং দুকুত্তমং,

দুকং তিকঞ্চেৰ তিকং দুকঞ্চ;

তিকং তিকঞ্চেৰ দুকং দুকঞ্চ,

ছ পচ্চনীযম্হি নযা সুগম্ভীরাতি.