১. সুদ্ধব্রহ্মচরিযকথা

২৬৯. নত্থি দেৰেসু ব্রহ্মচরিযৰাসোতি? আমন্তা. সব্বে দেৰা জল়া এলমূগা [এল়মূগা (স্যা.)] অৰিঞ্ঞূ হত্থসংৰাচিকা নপ্পটিবলা সুভাসিতদুব্ভাসিতানং অত্থমঞ্ঞাতুং, সব্বে দেৰা ন বুদ্ধে পসন্না ন ধম্মে পসন্না ন সঙ্ঘে পসন্না, ন বুদ্ধং ভগৰন্তং পযিরুপাসন্তি, ন বুদ্ধং ভগৰন্তং পঞ্হং পুচ্ছন্তি, ন বুদ্ধেন ভগৰতা পঞ্হে ৰিস্সজ্জিতে অত্তমনা, সব্বে দেৰা কম্মাৰরণেন সমন্নাগতা কিলেসাৰরণেন সমন্নাগতা ৰিপাকাৰরণেন সমন্নাগতা অস্সদ্ধা অচ্ছন্দিকা দুপ্পঞ্ঞা অভব্বা নিযামং ওক্কমিতুং কুসলেসু ধম্মেসু সম্মত্তং, সব্বে দেৰা মাতুঘাতকা পিতুঘাতকা অরহন্তঘাতকা রুহিরুপ্পাদকা সঙ্ঘভেদকা, সব্বে দেৰা পাণাতিপাতিনো অদিন্নাদাযিনো কামেসুমিচ্ছাচারিনো মুসাৰাদিনো পিসুণৰাচা ফরুসাৰাচা সম্ফপ্পলাপিনো অভিজ্ঝালুনো ব্যাপন্নচিত্তা মিচ্ছাদিট্ঠিকাতি? ন হেৰং ৰত্তব্বে…পে….

ননু অত্থি দেৰা অজল়া অনেলমূগা ৰিঞ্ঞূ ন হত্থসংৰাচিকা পটিবলা সুভাসিতদুব্ভাসিতানং অত্থমঞ্ঞাতুং, অত্থি দেৰা বুদ্ধে পসন্না ধম্মে পসন্না সঙ্ঘে পসন্না, বুদ্ধং ভগৰন্তং পযিরুপাসন্তি, বুদ্ধং ভগৰন্তং পঞ্হং পুচ্ছন্তি, বুদ্ধেন ভগৰতা পঞ্হে ৰিস্সজ্জিতে অত্তমনা হোন্তি, অত্থি দেৰা ন কম্মাৰরণেন সমন্নাগতা ন কিলেসাৰরণেন সমন্নাগতা ন ৰিপাকাৰরণেন সমন্নাগতা সদ্ধা ছন্দিকা পঞ্ঞৰন্তো ভব্বা নিযামং ওক্কমিতুং কুসলেসু ধম্মেসু সম্মত্তং, অত্থি দেৰা ন মাতুঘাতকা ন পিতুঘাতকা ন অরহন্তঘাতকা ন রুহিরুপ্পাদকা ন সঙ্ঘভেদকা, অত্থি দেৰা ন পাণাতিপাতিনো ন অদিন্নাদাযিনো ন কামেসুমিচ্ছাচারিনো ন মুসাৰাদিনো ন পিসুণাৰাচা ন ফরুসাৰাচা ন সম্ফপ্পলাপিনো ন অভিজ্ঝালুনো অব্যাপন্নচিত্তা সম্মাদিট্ঠিকাতি? আমন্তা.

হঞ্চি অত্থি দেৰা অজল়া অনেলমূগা ৰিঞ্ঞূ ন হত্থসংৰাচিকা পটিবলা সুভাসিতদুব্ভাসিতানং অত্থমঞ্ঞাতুং…পে… অত্থি দেৰা বুদ্ধে পসন্না…পে… সম্মাদিট্ঠিকা, নো চ ৰত রে ৰত্তব্বে – ‘‘নত্থি দেৰেসু ব্রহ্মচরিযৰাসো’’তি.

২৭০. অত্থি দেৰেসু ব্রহ্মচরিযৰাসোতি? আমন্তা. অত্থি তত্থ পব্বজ্জা মুণ্ডিযং কাসাৰধারণা পত্তধারণা, দেৰেসু সম্মাসম্বুদ্ধা উপ্পজ্জন্তি, পচ্চেকসম্বুদ্ধা উপ্পজ্জন্তি, সাৰকযুগং উপ্পজ্জতীতি? ন হেৰং ৰত্তব্বে…পে….

দেৰেসু পব্বজ্জা নত্থীতি, নত্থি দেৰেসু ব্রহ্মচরিযৰাসোতি? আমন্তা. যত্থ অত্থি পব্বজ্জা তত্থেৰ ব্রহ্মচরিযৰাসো, যত্থ নত্থি পব্বজ্জা নত্থি তত্থ ব্রহ্মচরিযৰাসোতি? ন হেৰং ৰত্তব্বে…পে… যত্থ অত্থি পব্বজ্জা তত্থেৰ ব্রহ্মচরিযৰাসো, যত্থ নত্থি পব্বজ্জা নত্থি তত্থ ব্রহ্মচরিযৰাসোতি? আমন্তা. যো পব্বজতি তস্সেৰ ব্রহ্মচরিযৰাসো, যো ন পব্বজতি নত্থি তস্স ব্রহ্মচরিযৰাসোতি? ন হেৰং ৰত্তব্বে…পে….

দেৰেসু মুণ্ডিযং নত্থীতি, নত্থি দেৰেসু ব্রহ্মচরিযৰাসোতি? আমন্তা. যত্থ অত্থি মুণ্ডিযং তত্থেৰ ব্রহ্মচরিযৰাসো, যত্থ নত্থি মুণ্ডিযং নত্থি তত্থ ব্রহ্মচরিযৰাসোতি? ন হেৰং ৰত্তব্বে…পে… যত্থ অত্থি মুণ্ডিযং তত্থেৰ ব্রহ্মচরিযৰাসো, যত্থ নত্থি মুণ্ডিযং নত্থি তত্থ ব্রহ্মচরিযৰাসোতি? আমন্তা. যো মুণ্ডো হোতি তস্সেৰ ব্রহ্মচরিযৰাসো, যো মুণ্ডো ন হোতি নত্থি তস্স ব্রহ্মচরিযৰাসোতি? ন হেৰং ৰত্তব্বে…পে….

দেৰেসু কাসাৰধারণা নত্থীতি, নত্থি দেৰেসু ব্রহ্মচরিযৰাসোতি? আমন্তা. যত্থ অত্থি কাসাৰধারণা তত্থেৰ ব্রহ্মচরিযৰাসো, যত্থ নত্থি কাসাৰধারণা নত্থি তত্থ ব্রহ্মচরিযৰাসোতি? ন হেৰং ৰত্তব্বে…পে… যত্থ অত্থি কাসাৰধারণা তত্থেৰ ব্রহ্মচরিযৰাসো, যত্থ নত্থি কাসাৰধারণা নত্থি তত্থ ব্রহ্মচরিযৰাসোতি? আমন্তা. যো কাসাৰং ধারেতি তস্সেৰ ব্রহ্মচরিযৰাসো, যো কাসাৰং ন ধারেতি নত্থি তস্স ব্রহ্মচরিযৰাসোতি? ন হেৰং ৰত্তব্বে…পে….

দেৰেসু পত্তধারণা নত্থীতি, নত্থি দেৰেসু ব্রহ্মচরিযৰাসোতি? আমন্তা. যত্থ অত্থি পত্তধারণা তত্থেৰ ব্রহ্মচরিযৰাসো, যত্থ নত্থি পত্তধারণা নত্থি তত্থ ব্রহ্মচরিযৰাসোতি? ন হেৰং ৰত্তব্বে…পে… যত্থ অত্থি পত্তধারণা তত্থেৰ ব্রহ্মচরিযৰাসো, যত্থ নত্থি পত্তধারণা নত্থি তত্থ ব্রহ্মচরিযৰাসোতি? আমন্তা? যো পত্তং ধারেতি তস্সেৰ ব্রহ্মচরিযৰাসো, যো পত্তং ন ধারেতি নত্থি তস্স ব্রহ্মচরিযৰাসোতি? ন হেৰং ৰত্তব্বে…পে….

দেৰেসু সম্মাসম্বুদ্ধা নুপ্পজ্জন্তীতি, নত্থি দেৰেসু ব্রহ্মচরিযৰাসোতি? আমন্তা. যত্থ সম্মাসম্বুদ্ধা উপ্পজ্জন্তি তত্থেৰ ব্রহ্মচরিযৰাসো, যত্থ সম্মাসম্বুদ্ধা নুপ্পজ্জন্তি নত্থি তত্থ ব্রহ্মচরিযৰাসোতি? ন হেৰং ৰত্তব্বে…পে… যত্থ সম্মাসম্বুদ্ধা উপ্পজ্জন্তি তত্থেৰ ব্রহ্মচরিযৰাসো, যত্থ সম্মাসম্বুদ্ধা নুপ্পজ্জন্তি নত্থি তত্থ ব্রহ্মচরিযৰাসোতি? আমন্তা. লুম্বিনিযা ভগৰা জাতো, বোধিযা মূলে অভিসম্বুদ্ধো, বারাণসিযং ভগৰতা ধম্মচক্কং পৰত্তিতং; তত্থেৰ ব্রহ্মচরিযৰাসো, নত্থঞ্ঞত্র ব্রহ্মচরিযৰাসোতি? ন হেৰং ৰত্তব্বে…পে….

দেৰেসু পচ্চেকসম্বুদ্ধা নুপ্পজ্জন্তীতি, নত্থি দেৰেসু ব্রহ্মচরিযৰাসোতি? আমন্তা. যত্থ পচ্চেকসম্বুদ্ধা উপ্পজ্জন্তি তত্থেৰ ব্রহ্মচরিযৰাসো, যত্থ পচ্চেকসম্বুদ্ধা নুপ্পজ্জন্তি নত্থি তত্থ ব্রহ্মচরিযৰাসোতি? ন হেৰং ৰত্তব্বে…পে… যত্থ পচ্চেকসম্বুদ্ধা উপ্পজ্জন্তি তত্থেৰ ব্রহ্মচরিযৰাসো, যত্থ পচ্চেকসম্বুদ্ধা নুপ্পজ্জন্তি নত্থি তত্থ ব্রহ্মচরিযৰাসোতি? আমন্তা. মজ্ঝিমেসু জনপদেসু পচ্চেকসম্বুদ্ধা উপ্পজ্জন্তি, তত্থেৰ ব্রহ্মচরিযৰাসো, নত্থঞ্ঞত্র ব্রহ্মচরিযৰাসোতি? ন হেৰং ৰত্তব্বে…পে….

দেৰেসু সাৰকযুগং নুপ্পজ্জতীতি, নত্থি দেৰেসু ব্রহ্মচরিযৰাসোতি? আমন্তা. যত্থ সাৰকযুগং উপ্পজ্জতি তত্থেৰ ব্রহ্মচরিযৰাসো, যত্থ সাৰকযুগং নুপ্পজ্জতি নত্থি তত্থ ব্রহ্মচরিযৰাসোতি? ন হেৰং ৰত্তব্বে…পে… যত্থ সাৰকযুগং উপ্পজ্জতি তত্থেৰ ব্রহ্মচরিযৰাসো, যত্থ সাৰকযুগং নুপ্পজ্জতি নত্থি তত্থ ব্রহ্মচরিযৰাসোতি? আমন্তা. মগধেসু সাৰকযুগং উপ্পন্নং, তত্থেৰ ব্রহ্মচরিযৰাসো, নত্থঞ্ঞত্র ব্রহ্মচরিযৰাসোতি? ন হেৰং ৰত্তব্বে…পে….

২৭১. অত্থি দেৰেসু ব্রহ্মচরিযৰাসোতি? আমন্তা. সব্বদেৰেসু অত্থি ব্রহ্মচরিযৰাসোতি? ন হেৰং ৰত্তব্বে…পে….

অত্থি মনুস্সেসু ব্রহ্মচরিযৰাসোতি? আমন্তা. সব্বমনুস্সেসু অত্থি ব্রহ্মচরিযৰাসোতি? ন হেৰং ৰত্তব্বে…পে….

অত্থি দেৰেসু ব্রহ্মচরিযৰাসোতি? আমন্তা. অসঞ্ঞসত্তেসু দেৰেসু অত্থি ব্রহ্মচরিযৰাসোতি? ন হেৰং ৰত্তব্বে…পে….

অত্থি মনুস্সেসু ব্রহ্মচরিযৰাসোতি? আমন্তা. পচ্চন্তিমেসু জনপদেসু অত্থি ব্রহ্মচরিযৰাসো মিলক্খেসু [মিলক্খূসু (স্যা. ক.)] অৰিঞ্ঞাতারেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানন্তি? ন হেৰং ৰত্তব্বে.

অত্থি দেৰেসু ব্রহ্মচরিযৰাসোতি? অত্থি যত্থ অত্থি, অত্থি যত্থ নত্থীতি. অসঞ্ঞসত্তেসু দেৰেসু অত্থি যত্থ অত্থি, অত্থি যত্থ নত্থি ব্রহ্মচরিযৰাসো, সঞ্ঞসত্তেসু [অসঞ্ঞসত্তেসু (ক.)] দেৰেসু অত্থি যত্থ অত্থি, অত্থি যত্থ নত্থি ব্রহ্মচরিযৰাসোতি? ন হেৰং ৰত্তব্বে.

দেৰেসু অত্থি যত্থ অত্থি, অত্থি যত্থ নত্থি ব্রহ্মচরিযৰাসোতি? আমন্তা. কত্থ অত্থি, কত্থ নত্থীতি? অসঞ্ঞসত্তেসু দেৰেসু নত্থি ব্রহ্মচরিযৰাসো, সঞ্ঞসত্তেসু [অসঞ্ঞসত্তেসু (ক.)] দেৰেসু অত্থি ব্রহ্মচরিযৰাসোতি. অসঞ্ঞসত্তেসু দেৰেসু নত্থি ব্রহ্মচরিযৰাসোতি? আমন্তা. সঞ্ঞসত্তেসু [অসঞ্ঞসত্তেসু (ক.)] দেৰেসু নত্থি ব্রহ্মচরিযৰাসোতি? ন হেৰং ৰত্তব্বে.

সঞ্ঞসত্তেসু দেৰেসু অত্থি ব্রহ্মচরিযৰাসোতি? আমন্তা. অসঞ্ঞসত্তেসু দেৰেসু অত্থি ব্রহ্মচরিযৰাসোতি? ন হেৰং ৰত্তব্বে.

অত্থি মনুস্সেসু ব্রহ্মচরিযৰাসোতি? অত্থি যত্থ অত্থি, অত্থি যত্থ নত্থীতি. পচ্চন্তিমেসু জনপদেসু অত্থি যত্থ অত্থি, অত্থি যত্থ নত্থি ব্রহ্মচরিযৰাসো মিলক্খেসু অৰিঞ্ঞাতারেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানং, মজ্ঝিমেসু জনপদেসু অত্থি যত্থ অত্থি, অত্থি যত্থ নত্থি ব্রহ্মচরিযৰাসোতি? ন হেৰং ৰত্তব্বে.

মনুস্সেসু অত্থি যত্থ অত্থি, অত্থি যত্থ নত্থি ব্রহ্মচরিযৰাসোতি? আমন্তা. কত্থ অত্থি, কত্থ নত্থীতি? পচ্চন্তিমেসু জনপদেসু নত্থি ব্রহ্মচরিযৰাসো মিলক্খেসু অৰিঞ্ঞাতারেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানং, মজ্ঝিমেসু জনপদেসু অত্থি ব্রহ্মচরিযৰাসোতি. পচ্চন্তিমেসু জনপদেসু নত্থি ব্রহ্মচরিযৰাসো মিলক্খেসু অৰিঞ্ঞাতারেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানন্তি? আমন্তা. মজ্ঝিমেসু জনপদেসু নত্থি ব্রহ্মচরিযৰাসোতি? ন হেৰং ৰত্তব্বে.

মজ্ঝিমেসু জনপদেসু অত্থি ব্রহ্মচরিযৰাসোতি? আমন্তা. পচ্চন্তিমেসু জনপদেসু অত্থি ব্রহ্মচরিযৰাসো মিলক্খেসু অৰিঞ্ঞাতারেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানন্তি? ন হেৰং ৰত্তব্বে.

অত্থি দেৰেসু ব্রহ্মচরিযৰাসোতি? আমন্তা. ননু ৰুত্তং ভগৰতা – ‘‘তীহি, ভিক্খৰে, ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে! কতমেহি তীহি? সূরা, সতিমন্তো, ইধ ব্রহ্মচরিযৰাসো’’তি [অ. নি. ৯.২১]. অত্থেৰ সুত্তন্তোতি? আমন্তা. তেন হি নত্থি দেৰেসু ব্রহ্মচরিযৰাসোতি.

সাৰত্থিযং ৰুত্তং ভগৰতা – ‘‘ইধ ব্রহ্মচরিযৰাসো’’তি? আমন্তা. সাৰত্থিযংযেৰ ব্রহ্মচরিযৰাসো, নত্থি অঞ্ঞত্র ব্রহ্মচরিযৰাসোতি? ন হেৰং ৰত্তব্বে.

২৭২. অনাগামিস্স পুগ্গলস্স পঞ্চোরম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স কুহিং ফলুপ্পত্তীতি? তত্থেৰ. হঞ্চি অনাগামিস্স পুগ্গলস্স পঞ্চোরম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স তহিং ফলুপ্পত্তি; নো চ ৰত রে ৰত্তব্বে – ‘‘নত্থি দেৰেসু ব্রহ্মচরিযৰাসো’’তি.

অনাগামিস্স পুগ্গলস্স পঞ্চোরম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স কুহিং ভারোহরণং, কুহিং দুক্খপরিঞ্ঞাতং, কুহিং কিলেসপ্পহানং, কুহিং নিরোধসচ্ছিকিরিযা, কুহিং অকুপ্পপটিৰেধোতি? তত্থেৰ. হঞ্চি অনাগামিস্স পুগ্গলস্স পঞ্চোরম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স তহিং অকুপ্পপটিৰেধো; নো চ ৰত রে ৰত্তব্বে – ‘‘নত্থি দেৰেসু ব্রহ্মচরিযৰাসো’’তি.

অনাগামিস্স পুগ্গলস্স পঞ্চোরম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স তহিং ফলুপ্পত্তি, তহিং ভারোহরণং, তহিং দুক্খপরিঞ্ঞাতং, তহিং কিলেসপ্পহানং, তহিং নিরোধসচ্ছিকিরিযা, তহিং অকুপ্পপটিৰেধো; কেনট্ঠেন ৰদেসি – ‘‘নত্থি দেৰেসু ব্রহ্মচরিযৰাসো’’তি? হন্দ হি অনাগামী পুগ্গলো ইধ ভাৰিতেন মগ্গেন তত্থ ফলং সচ্ছিকরোতীতি [সচ্ছিকরোতি (বহূসু)].