২. সংসন্দনব্রহ্মচরিযকথা

২৭৩. অনাগামী পুগ্গলো ইধ ভাৰিতেন মগ্গেন তত্থ ফলং সচ্ছিকরোতীতি? আমন্তা. সোতাপন্নো পুগ্গলো তত্থ ভাৰিতেন মগ্গেন ইধ ফলং সচ্ছিকরোতীতি? ন হেৰং ৰত্তব্বে.

অনাগামী পুগ্গলো ইধ ভাৰিতেন মগ্গেন তত্থ ফলং সচ্ছিকরোতীতি? আমন্তা. সকদাগামী পুগ্গলো ইধ পরিনিব্বাযিপুগ্গলো [ইধপরিনিব্বাযী (?)] তত্থ ভাৰিতেন মগ্গেন ইধ ফলং সচ্ছিকরোতীতি? ন হেৰং ৰত্তব্বে.

সোতাপন্নো পুগ্গলো ইধ ভাৰিতেন মগ্গেন ইধ ফলং সচ্ছিকরোতীতি? আমন্তা. অনাগামী পুগ্গলো তত্থ ভাৰিতেন মগ্গেন তত্থ ফলং সচ্ছিকরোতীতি? ন হেৰং ৰত্তব্বে.

সকদাগামী পুগ্গলো ইধ পরিনিব্বাযিপুগ্গলো ইধ ভাৰিতেন মগ্গেন ইধ ফলং সচ্ছিকরোতীতি? আমন্তা. অনাগামী পুগ্গলো তত্থ ভাৰিতেন মগ্গেন তত্থ ফলং সচ্ছিকরোতীতি? ন হেৰং ৰত্তব্বে…পে….

ইধ ৰিহায নিট্ঠস্স পুগ্গলস্স মগ্গো চ ভাৰীযতি, ন চ কিলেসা পহীযন্তীতি? আমন্তা. সোতাপত্তিফলসচ্ছিকিরিযায পটিপন্নস্স পুগ্গলস্স মগ্গো চ ভাৰীযতি, ন চ কিলেসা পহীযন্তীতি? ন হেৰং ৰত্তব্বে…পে….

ইধ ৰিহায নিট্ঠস্স পুগ্গলস্স মগ্গো চ ভাৰীযতি, ন চ কিলেসা পহীযন্তীতি? আমন্তা. সকদাগামিফলসচ্ছিকিরিযায পটিপন্নস্স পুগ্গলস্স…পে… অরহত্তসচ্ছিকিরিযায পটিপন্নস্স পুগ্গলস্স মগ্গো চ ভাৰীযতি, ন চ কিলেসা পহীযন্তীতি? ন হেৰং ৰত্তব্বে…পে….

সোতাপত্তিফলসচ্ছিকিরিযায পটিপন্নস্স পুগ্গলস্স অপুব্বং অচরিমং মগ্গো চ ভাৰীযতি, কিলেসা চ পহীযন্তীতি? আমন্তা. ইধ ৰিহায নিট্ঠস্স পুগ্গলস্স অপুব্বং অচরিমং মগ্গো চ ভাৰীযতি, কিলেসা চ পহীযন্তীতি? ন হেৰং ৰত্তব্বে.

সকদাগামিফলসচ্ছিকিরিযায পটিপন্নস্স পুগ্গলস্স…পে… অরহত্তসচ্ছিকিরিযায পটিপন্নস্স পুগ্গলস্স অপুব্বং অচরিমং মগ্গো চ ভাৰীযতি, কিলেসা চ পহীযন্তীতি? আমন্তা. ইধ ৰিহায নিট্ঠস্স পুগ্গলস্স অপুব্বং অচরিমং মগ্গো চ ভাৰীযতি, কিলেসা চ পহীযন্তীতি? ন হেৰং ৰত্তব্বে.

অনাগামী পুগ্গলো কতকরণীযো ভাৰিতভাৰনো তত্থ উপপজ্জতীতি? আমন্তা. অরহা উপপজ্জতীতি? ন হেৰং ৰত্তব্বে.

অরহা উপপজ্জতীতি? আমন্তা. অত্থি অরহতো পুনব্ভৰোতি? ন হেৰং ৰত্তব্বে.

অত্থি অরহতো পুনব্ভৰোতি? আমন্তা. অরহা ভৰেন ভৰং গচ্ছতি, গতিযা গতিং গচ্ছতি, সংসারেন সংসারং গচ্ছতি, উপপত্তিযা উপপত্তিং গচ্ছতীতি? ন হেৰং ৰত্তব্বে.

অনাগামী পুগ্গলো কতকরণীযো ভাৰিতভাৰনো অনোহটভারো তত্থ উপপজ্জতীতি? আমন্তা. ভারোহরণায পুন মগ্গং ভাৰেতীতি? ন হেৰং ৰত্তব্বে.

অনাগামী পুগ্গলো কতকরণীযো ভাৰিতভাৰনো অপরিঞ্ঞাতদুক্খো অপ্পহীনকিলেসো অসচ্ছিকতনিরোধো অপ্পটিৰিদ্ধাকুপ্পো তত্থ উপপজ্জতীতি? আমন্তা. অকুপ্পপটিৰেধায পুন মগ্গং ভাৰেতীতি? ন হেৰং ৰত্তব্বে.

অনাগামী পুগ্গলো কতকরণীযো ভাৰিতভাৰনো অনোহটভারো তত্থ উপপজ্জতি, ন চ ভারোহরণায পুন মগ্গং ভাৰেতীতি? আমন্তা. অনোহটভারো চ তত্থ পরিনিব্বাযতীতি? ন হেৰং ৰত্তব্বে.

অনাগামী পুগ্গলো কতকরণীযো ভাৰিতভাৰনো অপরিঞ্ঞাতদুক্খো অপ্পহীনকিলেসো অসচ্ছিকতনিরোধো অপ্পটিৰিদ্ধাকুপ্পো তত্থ উপপজ্জতি, ন চ অকুপ্পপটিৰেধায পুন মগ্গং ভাৰেতীতি? আমন্তা. অপ্পটিৰিদ্ধাকুপ্পো চ তত্থ পরিনিব্বাযতীতি? ন হেৰং ৰত্তব্বে. যথা মিগো সল্লেন ৰিদ্ধো দূরম্পি গন্ত্ৰা কালং করোতি, এৰমেৰং অনাগামী পুগ্গলো ইধ ভাৰিতেন মগ্গেন তত্থ ফলং সচ্ছিকরোতীতি.

যথা মিগো সল্লেন ৰিদ্ধো দূরম্পি গন্ত্ৰা সসল্লোৰ কালং করোতি, এৰমেৰং অনাগামী পুগ্গলো ইধ ভাৰিতেন মগ্গেন তত্থ সসল্লোৰ পরিনিব্বাযতীতি? ন হেৰং ৰত্তব্বে…পে….

ব্রহ্মচরিযকথা নিট্ঠিতা.