১৭. সত্তরসমৰগ্গো

(১৬৬) ১. অরহতো পুঞ্ঞূপচযকথা

৭৭৬. অত্থি অরহতো পুঞ্ঞূপচযোতি? আমন্তা. অত্থি অরহতো অপুঞ্ঞূপচযোতি? ন হেৰং ৰত্তব্বে…পে… নত্থি অরহতো অপুঞ্ঞূপচযোতি? আমন্তা. নত্থি অরহতো পুঞ্ঞূপচযোতি? ন হেৰং ৰত্তব্বে…পে….

৭৭৭. অত্থি অরহতো পুঞ্ঞূপচযোতি? আমন্তা. অরহা পুঞ্ঞাভিসঙ্খারং অভিসঙ্খরোতি, আনেঞ্জাভিসঙ্খারং অভিসঙ্খরোতি, গতিসংৰত্তনিযং কম্মং করোতি, ভৰসংৰত্তনিযং কম্মং করোতি, ইস্সরিযসংৰত্তনিযং কম্মং করোতি, অধিপচ্চসংৰত্তনিযং [আধিপচ্চসংৰত্তনিকং (?)] কম্মং করোতি, মহাভোগসংৰত্তনিযং কম্মং করোতি, মহাপরিৰারসংৰত্তনিযং কম্মং করোতি, দেৰসোভগ্যসংৰত্তনিযং কম্মং করোতি, মনুস্সসোভগ্যসংৰত্তনিযং কম্মং করোতীতি? ন হেৰং ৰত্তব্বে…পে….

৭৭৮. অত্থি অরহতো পুঞ্ঞূপচযোতি? আমন্তা. অরহা আচিনাতীতি? ন হেৰং ৰত্তব্বে…পে… অরহা অপচিনাতীতি? ন হেৰং ৰত্তব্বে …পে… অরহা পজহতীতি…পে… অরহা উপাদিযতীতি…পে… অরহা ৰিসিনেতীতি…পে… অরহা উস্সিনেতীতি…পে… অরহা ৰিধূপেতীতি …পে… অরহা সন্ধূপেতীতি? ন হেৰং ৰত্তব্বে…পে… ননু অরহা নেৰাচিনাতি ন অপচিনাতি অপচিনিত্ৰা ঠিতোতি? আমন্তা. হঞ্চি অরহা নেৰাচিনাতি নাপচিনাতি অপচিনিত্ৰা ঠিতো, নো চ ৰত রে ৰত্তব্বে – ‘‘অত্থি অরহতো পুঞ্ঞূপচযো’’তি.

ননু অরহা নেৰ পজহতি ন উপাদিযতি পজহিত্ৰা ঠিতো, নেৰ ৰিসিনেতি ন উস্সিনেতি ৰিসিনেত্ৰা ঠিতো, নেৰ ৰিধূপেতি ন সন্ধূপেতি ৰিধূপেত্ৰা ঠিতোতি? আমন্তা. হঞ্চি অরহা নেৰ ৰিধূপেতি ন সন্ধূপেতি ৰিধূপেত্ৰা ঠিতো, নো চ ৰত রে ৰত্তব্বে – ‘‘অত্থি অরহতো পুঞ্ঞূপচযো’’তি.

৭৭৯. নত্থি অরহতো পুঞ্ঞূপচযোতি? আমন্তা. অরহা দানং দদেয্যাতি? আমন্তা. হঞ্চি অরহা দানং দদেয্য, নো চ ৰত রে ৰত্তব্বে – ‘‘নত্থি অরহতো পুঞ্ঞূপচযো’’তি.

অরহা চীৰরং দদেয্য…পে… পিণ্ডপাতং দদেয্য… সেনাসনং দদেয্য… গিলানপচ্চযভেসজ্জপরিক্খারং দদেয্য… খাদনীযং দদেয্য… ভোজনীযং দদেয্য… পানীযং দদেয্য… চেতিযং ৰন্দেয্য… চেতিযে মালং আরোপেয্য… গন্ধং আরোপেয্য… ৰিলেপনং আরোপেয্য…পে… চেতিযং অভিদক্খিণং [পদক্খিণং (?)] করেয্যাতি? আমন্তা. হঞ্চি অরহা চেতিযং অভিদক্খিণং করেয্য, নো চ ৰত রে ৰত্তব্বে – ‘‘নত্থি অরহতো পুঞ্ঞূপচযো’’তি.

অত্থি অরহতো পুঞ্ঞূপচযোতিকথা নিট্ঠিতা.

১৭. সত্তরসমৰগ্গো

(১৬৭) ২. নত্থি অরহতো অকালমচ্চূতিকথা

৭৮০. নত্থি অরহতো অকালমচ্চূতি? আমন্তা. নত্থি অরহন্তঘাতকোতি? ন হেৰং ৰত্তব্বে…পে… অত্থি অরহন্তঘাতকোতি? আমন্তা. অত্থি অরহতো অকালমচ্চূতি? ন হেৰং ৰত্তব্বে…পে… নত্থি অরহতো অকালমচ্চূতি? আমন্তা. যো অরহন্তং জীৰিতা ৰোরোপেতি, সতি জীৰিতে জীৰিতাৰসেসে জীৰিতা ৰোরোপেতি, অসতি জীৰিতে জীৰিতাৰসেসে জীৰিতা ৰোরোপেতীতি? সতি জীৰিতে জীৰিতাৰসেসে জীৰিতা ৰোরোপেতীতি. হঞ্চি সতি জীৰিতে জীৰিতাৰসেসে জীৰিতা ৰোরোপেতি, নো চ ৰত রে ৰত্তব্বে – ‘‘নত্থি অরহতো অকালমচ্চূ’’তি. অসতি জীৰিতে জীৰিতাৰসেসে জীৰিতা ৰোরোপেতীতি, নত্থি অরহন্তঘাতকোতি? ন হেৰং ৰত্তব্বে…পে….

৭৮১. নত্থি অরহতো অকালমচ্চূতি? আমন্তা. অরহতো কাযে ৰিসং ন কমেয্য, সত্থং ন কমেয্য, অগ্গি ন কমেয্যাতি? ন হেৰং ৰত্তব্বে…পে… ননু অরহতো কাযে ৰিসং কমেয্য, সত্থং কমেয্য, অগ্গি কমেয্যাতি? আমন্তা. হঞ্চি অরহতো কাযে ৰিসং কমেয্য, সত্থং কমেয্য, অগ্গি কমেয্য, নো চ ৰত রে ৰত্তব্বে – ‘‘নত্থি অরহতো অকালমচ্চূ’’তি.

অরহতো কাযে ৰিসং ন কমেয্য, সত্থং ন কমেয্য, অগ্গি ন কমেয্যাতি? আমন্তা. নত্থি অরহন্তঘাতকোতি? ন হেৰং ৰত্তব্বে…পে….

৭৮২. অত্থি অরহতো অকালমচ্চূতি? আমন্তা. ননু ৰুত্তং ভগৰতা – ‘‘নাহং, ভিক্খৰে, সঞ্চেতনিকানং কম্মানং কতানং উপচিতানং অপ্পটিসংৰেদিত্ৰা ব্যন্তীভাৰং ৰদামি; তঞ্চ খো দিট্ঠেৰ ধম্মে উপপজ্জং ৰা অপরে ৰা পরিযাযে’’তি. অত্থেৰ সুত্তন্তোতি? আমন্তা. তেন হি নত্থি অরহতো অকালমচ্চূতি.

নত্থি অরহতো অকালমচ্চূতিকথা নিট্ঠিতা.

১৭. সত্তরসমৰগ্গো

(১৬৮) ৩. সব্বমিদং কম্মতোতিকথা

৭৮৩. সব্বমিদং কম্মতোতি? আমন্তা. কম্মম্পি কম্মতোতি? ন হেৰং ৰত্তব্বে…পে… সব্বমিদং কম্মতোতি? আমন্তা. সব্বমিদং পুব্বেকতহেতূতি? ন হেৰং ৰত্তব্বে…পে… সব্বমিদং কম্মতোতি? আমন্তা. সব্বমিদং কম্মৰিপাকতোতি? ন হেৰং ৰত্তব্বে…পে….

৭৮৪. সব্বমিদং কম্মৰিপাকতোতি? আমন্তা. কম্মৰিপাকেন পাণং হনেয্যাতি? আমন্তা. পাণাতিপাতো সফলোতি? আমন্তা. কম্মৰিপাকো সফলোতি? ন হেৰং ৰত্তব্বে…পে… কম্মৰিপাকো অফলোতি? আমন্তা. পাণাতিপাতো অফলোতি? ন হেৰং ৰত্তব্বে…পে….

কম্মৰিপাকেন অদিন্নং আদিযেয্য…পে… মুসা ভণেয্য… পিসুণং ভণেয্য… ফরুসং ভণেয্য… সম্ফং পলপেয্য… সন্ধিং ছিন্দেয্য… নিল্লোপং হরেয্য… একাগারিকং করেয্য… পরিপন্থে তিট্ঠেয্য… পরদারং গচ্ছেয্য… গামঘাতকং করেয্য… নিগমঘাতকং করেয্য… কম্মৰিপাকেন দানং দদেয্য… চীৰরং দদেয্য … পিণ্ডপাতং দদেয্য… সেনাসনং দদেয্য… গিলানপচ্চযভেসজ্জপরিক্খারং দদেয্যাতি? আমন্তা. গিলানপচ্চযভেসজ্জপরিক্খারো সফলোতি? আমন্তা. কম্মৰিপাকো সফলোতি? ন হেৰং ৰত্তব্বে…পে… কম্মৰিপাকো অফলোতি? আমন্তা. গিলানপচ্চযভেসজ্জপরিক্খারো অফলোতি? ন হেৰং ৰত্তব্বে…পে….

৭৮৫. ন ৰত্তব্বং – ‘‘সব্বমিদং কম্মতো’’তি? আমন্তা. ননু ৰুত্তং ভগৰতা –

‘‘কম্মুনা ৰত্ততী [ৰত্ততি (পী. ক., ম. নি. ২.৪৬০), ৰত্ততে (?)] লোকো, কম্মুনা ৰত্ততী [ৰত্ততি (পী. ক., ম. নি. ২.৪৬০), ৰত্ততে (?)] পজা;

কম্মনিবন্ধনা সত্তা, রথস্সাণীৰ যাযতো [ম. নি. ২.৪৬০; সু. নি. ৬৫৯].

‘‘কম্মেন কিত্তিং লভতে পসংসং,

কম্মেন জানিঞ্চ ৰধঞ্চ বন্ধং;

তং কম্মং নানাকরণং ৰিদিত্ৰা,

কস্মা ৰদে নত্থি কম্মন্তি লোকে’’তি.

অত্থেৰ সুত্তন্তোতি? আমন্তা. তেন হি ‘‘সব্বমিদং কম্মতো’’তি.

সব্বমিদং কম্মতোতিকথা নিট্ঠিতা.

১৭. সত্তরসমৰগ্গো

(১৬৯) ৪. ইন্দ্রিযবদ্ধকথা

৭৮৬. ইন্দ্রিযবদ্ধঞ্ঞেৰ দুক্খন্তি? আমন্তা. ইন্দ্রিযবদ্ধঞ্ঞেৰ অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং ৰিপরিণামধম্মন্তি? ন হেৰং ৰত্তব্বে…পে… ননু অনিন্দ্রিযবদ্ধং অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং ৰিপরিণামধম্মন্তি? আমন্তা. হঞ্চি অনিন্দ্রিযবদ্ধং অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং ৰিপরিণামধম্মং, নো চ ৰত রে ৰত্তব্বে – ‘‘ইন্দ্রিযবদ্ধঞ্ঞেৰ দুক্খ’’ন্তি.

অনিন্দ্রিযবদ্ধং অনিচ্চং সঙ্খতং পটিচ্চসমুপ্পন্নং…পে… ৰিপরিণামধম্মং, তঞ্চ ন দুক্খন্তি? আমন্তা. ইন্দ্রিযবদ্ধং অনিচ্চং সঙ্খতং…পে… ৰিপরিণামধম্মং, তঞ্চ ন দুক্খন্তি? ন হেৰং ৰত্তব্বে…পে….

ইন্দ্রিযবদ্ধং অনিচ্চং সঙ্খতং…পে… ৰিপরিণামধম্মং, তঞ্চ দুক্খন্তি [ইদং-পুচ্ছাদ্ৰযেন পুরিমপুচ্ছাদ্ৰযস্স পুরতো ভৰিতব্বং]? আমন্তা. অনিন্দ্রিযবদ্ধং অনিচ্চং সঙ্খতং…পে… ৰিপরিণামধম্মং, তঞ্চ দুক্খন্তি [ইদং-পুচ্ছাদ্ৰযেন পুরিমপুচ্ছাদ্ৰযস্স পুরতো ভৰিতব্বং]? ন হেৰং ৰত্তব্বে…পে….

৭৮৭. ইন্দ্রিযবদ্ধঞ্ঞেৰ দুক্খন্তি? আমন্তা. ননু যদনিচ্চং তং দুক্খং [সং. নি. ৩.১৫] ৰুত্তং ভগৰতা – ‘‘অনিন্দ্রিযবদ্ধং অনিচ্চ’’ন্তি? আমন্তা. হঞ্চি যদনিচ্চং তং দুক্খং [সং. নি. ৩.১৫] ৰুত্তং ভগৰতা – অনিন্দ্রিযবদ্ধং অনিচ্চং, নো চ ৰত রে ৰত্তব্বে – ‘‘ইন্দ্রিযবদ্ধঞ্ঞেৰ দুক্খ’’ন্তি.

৭৮৮. ন ৰত্তব্বং – ‘‘ইন্দ্রিযবদ্ধঞ্ঞেৰ দুক্খ’’ন্তি? আমন্তা. যথা ইন্দ্রিযবদ্ধস্স দুক্খস্স পরিঞ্ঞায ভগৰতি ব্রহ্মচরিযং ৰুস্সতি, এৰমেৰং অনিন্দ্রিযবদ্ধস্স দুক্খস্স পরিঞ্ঞায ভগৰতি ব্রহ্মচরিযং ৰুস্সতীতি? ন হেৰং ৰত্তব্বে…পে… যথা ইন্দ্রিযবদ্ধং দুক্খং পরিঞ্ঞাতং ন পুন উপ্পজ্জতি, এৰমেৰং অনিন্দ্রিযবদ্ধং দুক্খং পরিঞ্ঞাতং ন পুন উপ্পজ্জতীতি? ন হেৰং ৰত্তব্বে. তেন হি ইন্দ্রিযবদ্ধঞ্ঞেৰ দুক্খন্তি.

ইন্দ্রিযবদ্ধকথা নিট্ঠিতা.

১৭. সত্তরসমৰগ্গো

(১৭০) ৫. ঠপেত্ৰা অরিযমগ্গন্তিকথা

৭৮৯. ঠপেত্ৰা অরিযমগ্গং অৰসেসা সঙ্খারা দুক্খাতি? আমন্তা. দুক্খসমুদযোপি দুক্খোতি? ন হেৰং ৰত্তব্বে…পে… দুক্খসমুদযোপি দুক্খোতি? আমন্তা. তীণেৰ অরিযসচ্চানীতি? ন হেৰং ৰত্তব্বে…পে… তীণেৰ অরিযসচ্চানীতি? আমন্তা. ননু চত্তারি অরিযসচ্চানি ৰুত্তানি ভগৰতা – দুক্খং, দুক্খসমুদযো, দুক্খনিরোধো, দুক্খনিরোধগামিনী পটিপদাতি? আমন্তা. হঞ্চি চত্তারি অরিযসচ্চানি ৰুত্তানি ভগৰতা – দুক্খং, দুক্খসমুদযো, দুক্খনিরোধো, দুক্খনিরোধগামিনী পটিপদা; নো চ ৰত রে ৰত্তব্বে – ‘‘তীণেৰ অরিযসচ্চানী’’তি.

দুক্খসমুদযোপি দুক্খোতি? আমন্তা. কেনট্ঠেনাতি? অনিচ্চট্ঠেন. অরিযমগ্গো অনিচ্চোতি? আমন্তা. অরিযমগ্গো দুক্খোতি? ন হেৰং ৰত্তব্বে…পে….

অরিযমগ্গো অনিচ্চো, সো চ ন দুক্খোতি? আমন্তা. দুক্খসমুদযো অনিচ্চো, সো চ ন দুক্খোতি? ন হেৰং ৰত্তব্বে…পে… দুক্খসমুদযো অনিচ্চো, সো চ দুক্খোতি? আমন্তা. অরিযমগ্গো অনিচ্চো, সো চ দুক্খোতি? ন হেৰং ৰত্তব্বে…পে….

৭৯০. ন ৰত্তব্বং – ‘‘ঠপেত্ৰা অরিযমগ্গং অৰসেসা সঙ্খারা দুক্খা’’তি? আমন্তা. ননু সা দুক্খনিরোধগামিনী পটিপদাতি? আমন্তা. হঞ্চি সা দুক্খনিরোধগামিনী পটিপদা, তেন ৰত রে ৰত্তব্বে – ‘‘ঠপেত্ৰা অরিযমগ্গং অৰসেসা সঙ্খারা দুক্খা’’তি.

ঠপেত্ৰা অরিযমগ্গন্তিকথা নিট্ঠিতা.

১৭. সত্তরসমৰগ্গো

(১৭১) ৬. ন ৰত্তব্বং সঙ্ঘো দক্খিণং পটিগ্গণ্হাতিকথা

৭৯১. ন ৰত্তব্বং – ‘‘সঙ্ঘো দক্খিণং পটিগ্গণ্হাতী’’তি? আমন্তা. ননু সঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সাতি? আমন্তা. হঞ্চি সঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স, তেন ৰত রে ৰত্তব্বে – ‘‘সঙ্ঘো দক্খিণং পটিগ্গণ্হাতী’’তি.

ন ৰত্তব্বং – ‘‘সঙ্ঘো দক্খিণং পটিগ্গণ্হাতী’’তি? আমন্তা. ননু চত্তারো পুরিসযুগা অট্ঠপুরিসপুগ্গলা দক্খিণেয্যা ৰুত্তা ভগৰতাতি? আমন্তা. হঞ্চি চত্তারো পুরিসযুগা অট্ঠ পুরিসপুগ্গলা দক্খিণেয্যা ৰুত্তা ভগৰতা, তেন ৰত রে ৰত্তব্বে – ‘‘সঙ্ঘো দক্খিণং পটিগ্গণ্হাতী’’তি.

ন ৰত্তব্বং – ‘‘সঙ্ঘো দক্খিণং পটিগ্গণ্হাতী’’তি? আমন্তা. ননু অত্থি কেচি সঙ্ঘস্স দানং দেন্তীতি? আমন্তা. হঞ্চি অত্থি কেচি সঙ্ঘস্স দানং দেন্তি, তেন ৰত রে ৰত্তব্বে – ‘‘সঙ্ঘো দক্খিণং পটিগ্গণ্হাতী’’তি. ননু অত্থি কেচি সঙ্ঘস্স চীৰরং দেন্তি…পে… পিণ্ডপাতং দেন্তি… সেনাসনং দেন্তি… গিলানপচ্চযভেসজ্জপরিক্খারং দেন্তি… খাদনীযং দেন্তি… ভোজনীযং দেন্তি…পে… পানীযং দেন্তীতি? আমন্তা. হঞ্চি অত্থি কেচি সঙ্ঘস্স পানীযং দেন্তি, তেন ৰত রে ৰত্তব্বে – ‘‘সঙ্ঘো দক্খিণং পটিগ্গণ্হাতী’’তি.

ন ৰত্তব্বং – ‘‘সঙ্ঘো দক্খিণং পটিগ্গণ্হাতী’’তি? আমন্তা. ননু ৰুত্তং ভগৰতা –

‘‘আহুতিং জাতৰেদোৰ, মহামেঘংৰ মেদনী;

সঙ্ঘো সমাধিসম্পন্নো, পটিগ্গণ্হাতি দক্খিণ’’ন্তি.

অত্থেৰ সুত্তন্তোতি? আমন্তা. তেন হি সঙ্ঘো দক্খিণং পটিগ্গণ্হাতীতি.

৭৯২. সঙ্ঘো দক্খিণং পটিগ্গণ্হাতীতি? আমন্তা. মগ্গো পটিগ্গণ্হাতি, ফলং পটিগ্গণ্হাতীতি? ন হেৰং ৰত্তব্বে…পে….

ন ৰত্তব্বং সঙ্ঘো দক্খিণং পটিগ্গণ্হাতীতিকথা নিট্ঠিতা.

১৭. সত্তরসমৰগ্গো

(১৭২) ৭. ন ৰত্তব্বং সঙ্ঘো দক্খিণং ৰিসোধেতীতিকথা

৭৯৩. ন ৰত্তব্বং – ‘‘সঙ্ঘো দক্খিণং ৰিসোধেতী’’তি? আমন্তা. ননু সঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সাতি? আমন্তা. হঞ্চি সঙ্ঘো আহুনেয্যো…পে… অনুত্তরং পুঞ্ঞক্খেত্তং লোকস্স, তেন ৰত রে ৰত্তব্বে – ‘‘সঙ্ঘো দক্খিণং ৰিসোধেতী’’তি.

ন ৰত্তব্বং – ‘‘সঙ্ঘো দক্খিণং ৰিসোধেতী’’তি? আমন্তা. ননু চত্তারো পুরিসযুগা অট্ঠ পুরিসপুগ্গলা দক্খিণেয্যা ৰুত্তা ভগৰতাতি? আমন্তা. হঞ্চি চত্তারো পুরিসযুগা অট্ঠ পুরিসপুগ্গলা দক্খিণেয্যা ৰুত্তা ভগৰতা, তেন ৰত রে ৰত্তব্বে – ‘‘সঙ্ঘো দক্খিণং ৰিসোধেতী’’তি.

ন ৰত্তব্বং – ‘‘সঙ্ঘো দক্খিণং ৰিসোধেতী’’তি? আমন্তা. ননু অত্থি কেচি সঙ্ঘস্স দানং দত্ৰা দক্খিণং আরাধেন্তীতি? আমন্তা. হঞ্চি অত্থি কেচি সঙ্ঘস্স দানং দত্ৰা দক্খিণং আরাধেন্তি, তেন ৰত রে ৰত্তব্বে – ‘‘সঙ্ঘো দক্খিণং ৰিসোধেতী’’তি.

ননু অত্থি কেচি সঙ্ঘস্স চীৰরং দত্ৰা…পে… পিণ্ডপাতং দত্ৰা…পে… সেনাসনং দত্ৰা… গিলানপচ্চযভেসজ্জপরিক্খারং দত্ৰা… খাদনীযং দত্ৰা… ভোজনীযং দত্ৰা…পে… পানীযং দত্ৰা দক্খিণং আরাধেন্তীতি? আমন্তা. হঞ্চি অত্থি কেচি সঙ্ঘস্স পানীযং দত্ৰা দক্খিণং আরাধেন্তি, তেন ৰত রে ৰত্তব্বে – ‘‘সঙ্ঘো দক্খিণং ৰিসোধেতী’’তি.

৭৯৪. সঙ্ঘো দক্খিণং ৰিসোধেতীতি? আমন্তা. মগ্গো ৰিসোধেতি, ফলং ৰিসোধেতীতি? ন হেৰং ৰত্তব্বে…পে….

ন ৰত্তব্বং সঙ্ঘো দক্খিণং ৰিসোধেতীতিকথা নিট্ঠিতা.

১৭. সত্তরসমৰগ্গো

(১৭৩) ৮. ন ৰত্তব্বং সঙ্ঘো ভুঞ্জতীতিকথা

৭৯৫. ন ৰত্তব্বং – ‘‘সঙ্ঘো ভুঞ্জতি পিৰতি খাদতি সাযতী’’তি? আমন্তা. ননু অত্থি কেচি সঙ্ঘভত্তানি করোন্তি, উদ্দেসভত্তানি করোন্তি, যাগুপানানি করোন্তীতি? আমন্তা. হঞ্চি অত্থি কেচি সঙ্ঘভত্তানি করোন্তি, উদ্দেসভত্তানি করোন্তি, যাগুপানানি করোন্তি, তেন ৰত রে ৰত্তব্বে – ‘‘সঙ্ঘো ভুঞ্জতি পিৰতি খাদতি সাযতী’’তি.

ন ৰত্তব্বং – ‘‘সঙ্ঘো ভুঞ্জতি পিৰতি খাদতি সাযতী’’তি? আমন্তা. ননু ৰুত্তং ভগৰতা – ‘‘গণভোজনং পরম্পরভোজনং অতিরিত্তভোজনং অনতিরিত্তভোজন’’ন্তি? আমন্তা. হঞ্চি ৰুত্তং ভগৰতা – ‘‘গণভোজনং পরম্পরভোজনং অতিরিত্তভোজনং অনতিরিত্তভোজনং’’, তেন ৰত রে ৰত্তব্বে – ‘‘সঙ্ঘো ভুঞ্জতি পিৰতি খাদতি সাযতী’’তি.

ন ৰত্তব্বং – ‘‘সঙ্ঘো ভুঞ্জতি পিৰতি খাদতি সাযতী’’তি? আমন্তা. ননু অট্ঠ পানানি ৰুত্তানি ভগৰতা – অম্বপানং, জম্বুপানং, চোচপানং, মোচপানং, মধুকপানং, [মধুপানং (সী. স্যা. কং. পী.) মহাৰ. ৩০০ পন পস্সিতব্বং] মুদ্দিকপানং, সালুকপানং, ফারুসকপানন্তি? আমন্তা. হঞ্চি অট্ঠ পানানি ৰুত্তানি ভগৰতা – অম্বপানং, জম্বুপানং, চোচপানং, মোচপানং, মধুকপানং, মুদ্দিকপানং, সালুকপানং, ফারুসকপানং, তেন ৰত রে ৰত্তব্বে – ‘‘সঙ্ঘো ভুঞ্জতি পিৰতি খাদতি সাযতী’’তি.

৭৯৬. সঙ্ঘো ভুঞ্জতি পিৰতি খাদতি সাযতীতি? আমন্তা. মগ্গো ভুঞ্জতি পিৰতি খাদতি সাযতি, ফলং ভুঞ্জতি পিৰতি খাদতি সাযতীতি? ন হেৰং ৰত্তব্বে…পে….

ন ৰত্তব্বং সঙ্ঘো ভুঞ্জতীতিকথা নিট্ঠিতা.

১৭. সত্তরসমৰগ্গো

(১৭৪) ৯. ন ৰত্তব্বং সঙ্ঘস্সদিন্নং মহপ্ফলন্তিকথা

৭৯৭. ন ৰত্তব্বং – ‘‘সঙ্ঘস্স দিন্নং মহপ্ফল’’ন্তি? আমন্তা. ননু সঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সাতি? আমন্তা. হঞ্চি সঙ্ঘো আহুনেয্যো…পে… অনুত্তরং পুঞ্ঞক্খেত্তং লোকস্স, তেন ৰত রে ৰত্তব্বে – ‘‘সঙ্ঘস্স দিন্নং মহপ্ফল’’ন্তি.

ন ৰত্তব্বং – ‘‘সঙ্ঘস্স দিন্নং মহপ্ফল’’ন্তি? আমন্তা. ননু চত্তারো পুরিসযুগা অট্ঠ পুরিসপুগ্গলা দক্খিণেয্যা ৰুত্তা ভগৰতাতি? আমন্তা. হঞ্চি চত্তারো পুরিসযুগা অট্ঠ পুরিসপুগ্গলা দক্খিণেয্যা ৰুত্তা ভগৰতা, তেন ৰত রে ৰত্তব্বে – ‘‘সঙ্ঘস্স দিন্নং মহপ্ফল’’ন্তি.

৭৯৮. ন ৰত্তব্বং – ‘‘সঙ্ঘস্স দিন্নং মহপ্ফল’’ন্তি? আমন্তা. ননু ৰুত্তং ভগৰতা – ‘‘সঙ্ঘে, গোতমি, দেহি, সঙ্ঘে তে দিন্নে অহঞ্চেৰ পূজিতো ভৰিস্সামি সঙ্ঘো চা’’তি [ম. নি. ৩.৩৭৬]. অত্থেৰ সুত্তন্তোতি? আমন্তা. তেন হি সঙ্ঘস্স দিন্নং মহপ্ফলন্তি.

ন ৰত্তব্বং – ‘‘সঙ্ঘস্স দিন্নং মহপ্ফল’’ন্তি? আমন্তা. ননু সক্কো দেৰানমিন্দো ভগৰন্তং এতদৰোচ –

‘‘যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, কত্থ দিন্নং মহপ্ফলন্তি.

‘‘চত্তারো চ পটিপন্না, চত্তারো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

‘‘যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, সঙ্ঘে দিন্নং মহপ্ফল’’ন্তি [সং. নি. ১.২৬২; ৰি. ৰ. ৬৪২, ৭৫১].

‘‘এসো হি সঙ্ঘো ৰিপুলো মহগ্গতো,

এসপ্পমেয্যো উদধীৰ সাগরো;

এতে হি সেট্ঠা নরৰীরসাৰকা [নরসীহসাৰকা (ক.)],

পভঙ্করা ধম্মমুদীরযন্তি.

‘‘তেসং সুদিন্নং সুহুতং সুযিট্ঠং,

যে সঙ্ঘমুদ্দিস্স দদন্তি দানং;

সা দক্খিণা সঙ্ঘগতা পতিট্ঠিতা,

মহপ্ফলা লোকৰিদূন ৰণ্ণিতা.

‘‘এতাদিসং যঞ্ঞমনুস্সরন্তা,

যে ৰেদজাতা ৰিচরন্তি [ৰিহরন্তি (সী. ক.)] লোকে;

ৰিনেয্য মচ্ছেরমলং সমূলং,

অনিন্দিতা সগ্গমুপেন্তি ঠান’’ন্তি [ৰি. ৰ. ৬৪৫, ৭৫৪].

অত্থেৰ সুত্তন্তোতি? আমন্তা. তেন হি সঙ্ঘস্স দিন্নং মহপ্ফলন্তি.

ন ৰত্তব্বং সঙ্ঘস্স দিন্নং মহপ্ফলন্তিকথা নিট্ঠিতা.

১৭. সত্তরসমৰগ্গো

(১৭৫) ১০. ন ৰত্তব্বং বুদ্ধস্সদিন্নং মহপ্ফলন্তিকথা

৭৯৯. ন ৰত্তব্বং – ‘‘বুদ্ধস্স দিন্নং মহপ্ফল’’ন্তি? আমন্তা. ননু ভগৰা দ্ৰিপদানং অগ্গো, দ্ৰিপদানং সেট্ঠো, দ্ৰিপদানং পমোক্খো, দ্ৰিপদানং উত্তমো, দ্ৰিপদানং পৰরো অসমো অসমসমো অপ্পটিসমো অপ্পটিভাগো অপ্পটিপুগ্গলোতি? আমন্তা. হঞ্চি ভগৰা দ্ৰিপদানং অগ্গো, দ্ৰিপদানং সেট্ঠো, দ্ৰিপদানং পমোক্খো, দ্ৰিপদানং উত্তমো, দ্ৰিপদানং পৰরো অসমো অসমসমো অপ্পটিসমো অপ্পটিভাগো অপ্পটিপুগ্গলো, তেন ৰত রে ৰত্তব্বে – ‘‘বুদ্ধস্স দিন্নং মহপ্ফল’’ন্তি.

ন ৰত্তব্বং – ‘‘বুদ্ধস্স দিন্নং মহপ্ফল’’ন্তি? আমন্তা. অত্থি কোচি বুদ্ধেন সমসমো – সীলেন সমাধিনা পঞ্ঞাযাতি? নত্থি. হঞ্চি নত্থি কোচি বুদ্ধেন সমসমো – সীলেন সমাধিনা পঞ্ঞায, তেন ৰত রে ৰত্তব্বে – ‘‘বুদ্ধস্স দিন্নং মহপ্ফল’’ন্তি.

ন ৰত্তব্বং – ‘‘বুদ্ধস্স দিন্নং মহপ্ফল’’ন্তি? আমন্তা. ননু ৰুত্তং ভগৰতা –

‘‘নযিমস্মিং ৰা লোকে পরস্মিং ৰা পন,

বুদ্ধেন সেট্ঠো চ সমো চ ৰিজ্জতি;

যমাহুনেয্যানং অগ্গতং গতো,

পুঞ্ঞত্থিকানং ৰিপুলপ্ফলেসিন’’ন্তি [ৰি. ৰ. ১০৪৭].

অত্থেৰ সুত্তন্তোতি? আমন্তা. তেন হি বুদ্ধস্স দিন্নং মহপ্ফলন্তি.

ন ৰত্তব্বং বুদ্ধস্স দিন্নং মহপ্ফলন্তিকথা নিট্ঠিতা.

১৭. সত্তরসমৰগ্গো

(১৭৬) ১১. দক্খিণাৰিসুদ্ধিকথা

৮০০. দাযকতোৰ দানং ৰিসুজ্ঝতি, নো পটিগ্গাহকতোতি? আমন্তা. ননু অত্থি কেচি পটিগ্গাহকা আহুনেয্যা পাহুনেয্যা দক্খিণেয্যা অঞ্জলিকরণীযা অনুত্তরং পুঞ্ঞক্খেত্তং লোকস্সাতি? আমন্তা. হঞ্চি অত্থি কেচি পটিগ্গাহকা আহুনেয্যা পাহুনেয্যা দক্খিণেয্যা অঞ্জলিকরণীযা অনুত্তরং পুঞ্ঞক্খেত্তং লোকস্স, নো চ ৰত রে ৰত্তব্বে – ‘‘দাযকতোৰ দানং ৰিসুজ্ঝতি, নো পটিগ্গাহকতো’’তি.

দাযকতোৰ দানং ৰিসুজ্ঝতি, নো পটিগ্গাহকতোতি? আমন্তা. ননু চত্তারো পুরিসযুগা অট্ঠ পুরিসপুগ্গলা দক্খিণেয্যা ৰুত্তা ভগৰতাতি? আমন্তা. হঞ্চি চত্তারো পুরিসযুগা অট্ঠ পুরিসপুগ্গলা দক্খিণেয্যা ৰুত্তা ভগৰতা, নো চ ৰত রে ৰত্তব্বে – ‘‘দাযকতোৰ দানং ৰিসুজ্ঝতি, নো পটিগ্গাহকতো’’তি.

দাযকতোৰ দানং ৰিসুজ্ঝতি, নো পটিগ্গাহকতোতি? আমন্তা. ননু অত্থি কেচি সোতাপন্নে দানং দত্ৰা দক্খিণং আরাধেন্তীতি? আমন্তা. হঞ্চি অত্থি কেচি সোতাপন্নে দানং দত্ৰা দক্খিণং আরাধেন্তি, নো চ ৰত রে ৰত্তব্বে – ‘‘দাযকতোৰ দানং ৰিসুজ্ঝতি, নো পটিগ্গাহকতো’’তি.

ননু অত্থি কেচি সকদাগামিস্স…পে… অনাগামিস্স…পে… অরহতো দানং দত্ৰা দক্খিণং আরাধেন্তীতি? আমন্তা. হঞ্চি অত্থি কেচি অরহতো দানং দত্ৰা দক্খিণং আরাধেন্তি, নো চ ৰত রে ৰত্তব্বে – ‘‘দাযকতোৰ দানং ৰিসুজ্ঝতি, নো পটিগ্গাহকতো’’তি.

৮০১. পটিগ্গাহকতো দানং ৰিসুজ্ঝতীতি? আমন্তা. অঞ্ঞো অঞ্ঞস্স কারকো, পরকতং সুখদুক্খং, অঞ্ঞো করোতি অঞ্ঞো পটিসংৰেদেতীতি? ন হেৰং ৰত্তব্বে…পে….

দাযকতোৰ দানং ৰিসুজ্ঝতি, নো পটিগ্গাহকতোতি? আমন্তা. ননু ৰুত্তং ভগৰতা – ‘‘চতস্সো খো ইমা, আনন্দ, দক্খিণা ৰিসুদ্ধিযো! কতমা চতস্সো? অত্থানন্দ, দক্খিণা দাযকতো ৰিসুজ্ঝতি, নো পটিগ্গাহকতো; অত্থানন্দ, দক্খিণা পটিগ্গাহকতো ৰিসুজ্ঝতি, নো দাযকতো; অত্থানন্দ, দক্খিণা দাযকতো চেৰ ৰিসুজ্ঝতি পটিগ্গাহকতো চ; অত্থানন্দ, দক্খিণা নেৰ দাযকতো ৰিসুজ্ঝতি, নো পটিগ্গাহকতো. ইমা খো, আনন্দ, চতস্সো দক্খিণা ৰিসুদ্ধিযো’’তি [ম. নি. ৩.৩৮১]. অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘দাযকতোৰ দানং ৰিসুজ্ঝতি, নো পটিগ্গাহকতো’’তি.

দক্খিণাৰিসুদ্ধিকথা নিট্ঠিতা.

সত্তরসমৰগ্গো.

তস্সুদ্দানং –

অত্থি অরহতো পুঞ্ঞূপচযো, নত্থি অরহতো অকালমচ্চু, সব্বমিদং কম্মতো, ইন্দ্রিযবদ্ধঞ্ঞেৰ দুক্খং, ঠপেত্ৰা অরিযমগ্গং অৰসেসা সঙ্খারা দুক্খা, সঙ্ঘো দক্খিণং পটিগ্গণ্হাতি, সঙ্ঘো দক্খিণং ৰিসোধেতি, সঙ্ঘো ভুঞ্জতি পিৰতি খাদতি সাযতি, সঙ্ঘস্স দিন্নং মহপ্ফলং, অত্থি দানং ৰিসুদ্ধিযাতি [ৰিসুজ্ঝতীতি (স্যা.)].