১৪. চুদ্দসমৰগ্গো

(১৩৭) ২. সল়াযতনুপ্পত্তিকথা

৬৯১. সল়াযতনং অপুব্বং অচরিমং মাতুকুচ্ছিস্মিং সণ্ঠাতীতি? আমন্তা. সব্বঙ্গপচ্চঙ্গী অহীনিন্দ্রিযো মাতুকুচ্ছিস্মিং ওক্কমতীতি? ন হেৰং ৰত্তব্বে…পে….

উপপত্তেসিযেন চিত্তেন চক্খাযতনং সণ্ঠাতীতি? আমন্তা. উপপত্তেসিযেন চিত্তেন হত্থা সণ্ঠন্তি, পাদা সণ্ঠন্তি, সীসং সণ্ঠাতি, কণ্ণো সণ্ঠাতি, নাসিকা সণ্ঠাতি, মুখং সণ্ঠাতি, দন্তা সণ্ঠন্তীতি? ন হেৰং ৰত্তব্বে…পে….

উপপত্তেসিযেন চিত্তেন সোতাযতনং…পে… ঘানাযতনং…পে… জিৰ্হাযতনং সণ্ঠাতীতি? আমন্তা. উপপত্তেসিযেন চিত্তেন হত্থা সণ্ঠন্তি, পাদা সণ্ঠন্তি, সীসং সণ্ঠাতি, কণ্ণো সণ্ঠাতি, নাসিকা সণ্ঠাতি, মুখং সণ্ঠাতি, দন্তা সণ্ঠন্তীতি? ন হেৰং ৰত্তব্বে…পে….

৬৯২. মাতুকুচ্ছিগতস্স পচ্ছা চক্খাযতনং উপ্পজ্জতীতি? আমন্তা. মাতুকুচ্ছিস্মিং চক্খুপটিলাভায কম্মং করোতীতি? ন হেৰং ৰত্তব্বে…পে… মাতুকুচ্ছিগতস্স পচ্ছা সোতাযতনং…পে… ঘানাযতনং…পে… জিৰ্হাযতনং উপ্পজ্জতীতি? আমন্তা. মাতুকুচ্ছিস্মিং জিৰ্হাপটিলাভায কম্মং করোতীতি? ন হেৰং ৰত্তব্বে…পে….

মাতুকুচ্ছিগতস্স পচ্ছা কেসা লোমা নখা দন্তা অট্ঠী উপ্পজ্জন্তীতি? আমন্তা. মাতুকুচ্ছিস্মিং অট্ঠিপটিলাভায কম্মং করোতীতি? ন হেৰং ৰত্তব্বে…পে….

ন ৰত্তব্বং – ‘‘মাতুকুচ্ছিগতস্স পচ্ছা কেসা লোমা নখা দন্তা অট্ঠী উপ্পজ্জন্তী’’তি? আমন্তা. ননু ৰুত্তং ভগৰতা –

‘‘পঠমং কললং হোতি, কললা হোতি অব্বুদং;

অব্বুদা জাযতে পেসি [পেসী (স্যা. কং. পী.)], পেসি নিব্বত্ততে [নিব্বত্ততী (সী. স্যা., সং. নি. ১.২৩৫), নিব্বত্ততি (পী. ক.)] ঘনো;

ঘনা পসাখা জাযন্তি, কেসা লোমা নখাপি চ.

‘‘যঞ্চস্স ভুঞ্জতি মাতা, অন্নং পানঞ্চ ভোজনং;

তেন সো তত্থ যাপেতি, মাতুকুচ্ছিগতো নরো’’তি [সং. নি. ১.২৩৫].

অত্থেৰ সুত্তন্তোতি? আমন্তা. তেন হি মাতুকুচ্ছিগতস্স পচ্ছা কেসা লোমা নখা দন্তা অট্ঠী উপ্পজ্জন্তীতি.

সল়াযতনুপ্পত্তিকথা নিট্ঠিতা.