১৩. তেরসমৰগ্গো

(১২৭) ২. কুসলপটিলাভকথা

৬৫৮. কপ্পট্ঠো কুসলং চিত্তং ন পটিলভেয্যাতি? আমন্তা. কপ্পট্ঠো দানং দদেয্যাতি? আমন্তা. হঞ্চি কপ্পট্ঠো দানং দদেয্য, নো চ ৰত রে ৰত্তব্বে – ‘‘কপ্পট্ঠো কুসলং চিত্তং ন পটিলভেয্যা’’তি.

কপ্পট্ঠো কুসলং চিত্তং ন পটিলভেয্যাতি? আমন্তা. কপ্পট্ঠো চীৰরং দদেয্য…পে… পিণ্ডপাতং দদেয্য…পে… সেনাসনং দদেয্য…পে… গিলানপচ্চযভেসজ্জপরিক্খারং দদেয্য … খাদনীযং দদেয্য… ভোজনীযং দদেয্য… পানীযং দদেয্য… চেতিযং ৰন্দেয্য… চেতিযে মালং আরোপেয্য… গন্ধং আরোপেয্য… ৰিলেপনং আরোপেয্য…পে… চেতিযং অভিদক্খিণং [পদক্খিণং (পী.)] করেয্যাতি? আমন্তা. হঞ্চি কপ্পট্ঠো চেতিযং অভিদক্খিণং করেয্য, নো চ ৰত রে ৰত্তব্বে – ‘‘কপ্পট্ঠো কুসলং চিত্তং ন পটিলভেয্যা’’তি…পে….

৬৫৯. কপ্পট্ঠো কুসলং চিত্তং পটিলভেয্যাতি? আমন্তা. ততো ৰুট্ঠানং কুসলং চিত্তং পটিলভেয্যাতি? আমন্তা. রূপাৰচরং…পে… অরূপাৰচরং…পে… লোকুত্তরং কুসলং চিত্তং পটিলভেয্যাতি? ন হেৰং ৰত্তব্বে…পে….

কুসলপটিলাভকথা নিট্ঠিতা.