১২. দ্ৰাদসমৰগ্গো

(১২৩) ৮. জীৰিতা ৰোরোপনকথা

৬৪৮. দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্যাতি? আমন্তা. দিট্ঠিসম্পন্নো পুগ্গলো সঞ্চিচ্চ মাতরং জীৰিতা ৰোরোপেয্য…পে… পিতরং জীৰিতা ৰোরোপেয্য …পে… অরহন্তং জীৰিতা ৰোরোপেয্য…পে… দুট্ঠেন চিত্তেন তথাগতস্স লোহিতং উপ্পাদেয্য…পে… সঙ্ঘং ভিন্দেয্যাতি? ন হেৰং ৰত্তব্বে…পে….

দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্যাতি? আমন্তা. দিট্ঠিসম্পন্নো পুগ্গলো সত্থরি অগারৰোতি? ন হেৰং ৰত্তব্বে…পে… ধম্মে…পে… সঙ্ঘে…পে… সিক্খায অগারৰোতি? ন হেৰং ৰত্তব্বে…পে….

ননু দিট্ঠিসম্পন্নো পুগ্গলো সত্থরি সগারৰোতি? আমন্তা. হঞ্চি দিট্ঠিসম্পন্নো পুগ্গলো সত্থরি সগারৰো, নো চ ৰত রে ৰত্তব্বে – ‘‘দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্যা’’তি. ননু দিট্ঠিসম্পন্নো পুগ্গলো ধম্মে…পে… সঙ্ঘে…পে… সিক্খায সগারৰোতি? আমন্তা. হঞ্চি দিট্ঠিসম্পন্নো পুগ্গলো সিক্খায সগারৰো, নো চ ৰত রে ৰত্তব্বে – ‘‘দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্যা’’তি.

৬৪৯. দিট্ঠিসম্পন্নো পুগ্গলো সত্থরি অগারৰোতি? আমন্তা. দিট্ঠিসম্পন্নো পুগ্গলো বুদ্ধথূপে ওহদেয্য ওমুত্তেয্য নিট্ঠুভেয্য বুদ্ধথূপে অপব্যামতো [অসব্যাকতো (সী. ক.)] করেয্যাতি? ন হেৰং ৰত্তব্বে…পে….

দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্যাতি? আমন্তা. ননু ৰুত্তং ভগৰতা – ‘‘সেয্যথাপি, ভিক্খৰে, মহাসমুদ্দো ঠিতধম্মো ৰেলং নাতিৰত্ততি; এৰমেৰ খো, ভিক্খৰে, যং মযা সাৰকানং সিক্খাপদং পঞ্ঞত্তং তং মম সাৰকা জীৰিতহেতুপি নাতিক্কমন্তী’’তি [চূল়ৰ. ৩৮৫; অ. নি. ৮.২০; উদা. ৪৫]! অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্যা’’তি.

জীৰিতা ৰোরোপনকথা নিট্ঠিতা.