১২. দ্ৰাদসমৰগ্গো

(১২০) ৫. সত্তক্খত্তুপরমকথা

৬৪১. সত্তক্খত্তুপরমো পুগ্গলো সত্তক্খত্তুপরমতানিযতোতি? আমন্তা. মাতা জীৰিতা ৰোরোপিতা… পিতা জীৰিতা ৰোরোপিতো… অরহা জীৰিতা ৰোরোপিতো… দুট্ঠেন চিত্তেন তথাগতস্স লোহিতং উপ্পাদিতং… সঙ্ঘো ভিন্নোতি? ন হেৰং ৰত্তব্বে…পে….

সত্তক্খত্তুপরমো পুগ্গলো সত্তক্খত্তুপরমতানিযতোতি? আমন্তা. অভব্বো অন্তরা ধম্মং অভিসমেতুন্তি? ন হেৰং ৰত্তব্বে…পে…. অভব্বো অন্তরা ধম্মং অভিসমেতুন্তি? আমন্তা. মাতা জীৰিতা ৰোরোপিতা… পিতা জীৰিতা ৰোরোপিতো… অরহা জীৰিতা ৰোরোপিতো… দুট্ঠেন চিত্তেন তথাগতস্স লোহিতং উপ্পাদিতং… সঙ্ঘো ভিন্নোতি? ন হেৰং ৰত্তব্বে…পে….

৬৪২. সত্তক্খত্তুপরমো পুগ্গলো সত্তক্খত্তুপরমতানিযতোতি? আমন্তা. অত্থি সো নিযমো যেন নিযমেন সত্তক্খত্তুপরমো পুগ্গলো সত্তক্খত্তুপরমতানিযতোতি? ন হেৰং ৰত্তব্বে…পে… অত্থি তে সতিপট্ঠানা…পে… সম্মপ্পধানা… ইদ্ধিপাদা… ইন্দ্রিযা… বলা… বোজ্ঝঙ্গা যেহি বোজ্ঝঙ্গেহি সত্তক্খত্তুপরমো পুগ্গলো সত্তক্খত্তুপরমতানিযতোতি? ন হেৰং ৰত্তব্বে…পে….

৬৪৩. নত্থি সো নিযমো যেন নিযমেন সত্তক্খত্তুপরমো পুগ্গলো সত্তক্খত্তুপরমতানিযতোতি? আমন্তা. হঞ্চি নত্থি সো নিযমো যেন নিযমেন সত্তক্খত্তুপরমো পুগ্গলো সত্তক্খত্তুপরমতানিযতো, নো চ ৰত রে ৰত্তব্বে – ‘‘সত্তক্খত্তুপরমো পুগ্গলো সত্তক্খত্তুপরমতানিযতো’’তি.

নত্থি তে সতিপট্ঠানা… বোজ্ঝঙ্গা যেহি বোজ্ঝঙ্গেহি সত্তক্খত্তুপরমো পুগ্গলো সত্তক্খত্তুপরমতানিযতোতি? আমন্তা. হঞ্চি নত্থি তে বোজ্ঝঙ্গা যেহি বোজ্ঝঙ্গেহি সত্তক্খত্তুপরমো পুগ্গলো সত্তক্খত্তুপরমতানিযতো, নো চ ৰত রে ৰত্তব্বে – ‘‘সত্তক্খত্তুপরমো পুগ্গলো সত্তক্খত্তুপরমতানিযতো’’তি.

৬৪৪. সত্তক্খত্তুপরমো পুগ্গলো সত্তক্খত্তুপরমতানিযতোতি? আমন্তা. সকদাগামিনিযমেনাতি? ন হেৰং ৰত্তব্বে…পে… অনাগামিনিযমেনাতি? ন হেৰং ৰত্তব্বে…পে… অরহত্তনিযমেনাতি? ন হেৰং ৰত্তব্বে…পে….

কতমেন নিযমেনাতি? সোতাপত্তিনিযমেনাতি. সত্তক্খত্তুপরমো পুগ্গলো সত্তক্খত্তুপরমতানিযতোতি? আমন্তা. যে কেচি সোতাপত্তিনিযামং ওক্কমন্তি, সব্বে তে সত্তক্খত্তুপরমতানিযতাতি? ন হেৰং ৰত্তব্বে…পে….

৬৪৫. ন ৰত্তব্বং – ‘‘সত্তক্খত্তুপরমো পুগ্গলো সত্তক্খত্তুপরমতানিযতো’’তি? আমন্তা. ননু সো সত্তক্খত্তুপরমোতি? আমন্তা. হঞ্চি সো সত্তক্খত্তুপরমো, তেন ৰত রে ৰত্তব্বে – ‘‘সত্তক্খত্তুপরমো পুগ্গলো সত্তক্খত্তুপরমতানিযতো’’তি.

সত্তক্খত্তুপরমকথা নিট্ঠিতা.