১২. দ্ৰাদসমৰগ্গো

(১১৮) ৩. সদ্দো ৰিপাকোতিকথা

৬৩৬. সদ্দো ৰিপাকোতি? আমন্তা. সুখৰেদনিযো দুক্খৰেদনিযো অদুক্খমসুখৰেদনিযো, সুখায ৰেদনায সম্পযুত্তো, দুক্খায ৰেদনায সম্পযুত্তো, অদুক্খমসুখায ৰেদনায সম্পযুত্তো, ফস্সেন সম্পযুত্তো, ৰেদনায সম্পযুত্তো, সঞ্ঞায সম্পযুত্তো, চেতনায সম্পযুত্তো, চিত্তেন সম্পযুত্তো, সারম্মণো; অত্থি তস্স আৰট্টনা আভোগো সমন্নাহারো মনসিকারো চেতনা পত্থনা পণিধীতি? ন হেৰং ৰত্তব্বে…পে… ননু ন সুখৰেদনিযো ন দুক্খৰেদনিযো…পে… অনারম্মণো, নত্থি তস্স আৰট্টনা…পে… পণিধীতি? আমন্তা. হঞ্চি ন সুখৰেদনিযো…পে… অনারম্মণো, নত্থি তস্স আৰট্টনা…পে… পণিধি, নো চ ৰত রে ৰত্তব্বে – ‘‘সদ্দো ৰিপাকো’’তি.

ফস্সো ৰিপাকো, ফস্সো সুখৰেদনিযো…পে… সারম্মণো, অত্থি তস্স আৰট্টনা…পে… পণিধীতি? আমন্তা. সদ্দো ৰিপাকো, সদ্দো সুখৰেদনিযো…পে… সারম্মণো, অত্থি তস্স আৰট্টনা…পে… পণিধীতি? ন হেৰং ৰত্তব্বে…পে….

সদ্দো ৰিপাকো, সদ্দো ন সুখৰেদনিযো…পে… অনারম্মণো, নত্থি তস্স আৰট্টনা…পে… পণিধীতি? আমন্তা. ফস্সো ৰিপাকো, ফস্সো ন সুখৰেদনিযো, ন দুক্খৰেদনিযো…পে… অনারম্মণো, নত্থি তস্স আৰট্টনা…পে… পণিধীতি? ন হেৰং ৰত্তব্বে…পে….

৬৩৭. ন ৰত্তব্বং – ‘‘সদ্দো ৰিপাকো’’তি? আমন্তা. ননু ৰুত্তং ভগৰতা – ‘‘সো তস্স কম্মস্স কতত্তা উপচিতত্তা উস্সন্নত্তা ৰিপুলত্তা ব্রহ্মস্সরো হোতি করৰিকভাণী’’তি [দীঘনিকাযে]! অত্থেৰ সুত্তন্তোতি? আমন্তা. তেন হি সদ্দো ৰিপাকোতি.

সদ্দো ৰিপাকোতিকথা নিট্ঠিতা.