৯. নৰমৰগ্গো

(৯১) ৮. ৰিতক্কৰিপ্ফারসদ্দকথা

৫৬৩. সব্বসো ৰিতক্কযতো ৰিচারযতো ৰিতক্কৰিপ্ফারো সদ্দোতি? আমন্তা. সব্বসো ফুসযতো ফস্সৰিপ্ফারো সদ্দো, সব্বসো ৰেদযতো ৰেদনাৰিপ্ফারো সদ্দো, সব্বসো সঞ্জানতো সঞ্ঞাৰিপ্ফারো সদ্দো, সব্বসো চেতযতো চেতনাৰিপ্ফারো সদ্দো, সব্বসো চিন্তযতো চিত্তৰিপ্ফারো সদ্দো, সব্বসো সরতো সতিৰিপ্ফারো সদ্দো, সব্বসো পজানতো পঞ্ঞাৰিপ্ফারো সদ্দোতি? ন হেৰং ৰত্তব্বে…পে….

সব্বসো ৰিতক্কযতো ৰিচারযতো ৰিতক্কৰিপ্ফারো সদ্দোতি? আমন্তা. ৰিতক্কৰিপ্ফারো সদ্দো সোতৰিঞ্ঞেয্যো সোতস্মিং পটিহঞ্ঞতি সোতস্স আপাথং আগচ্ছতীতি? ন হেৰং ৰত্তব্বে…পে…. ননু ৰিতক্কৰিপ্ফারো সদ্দো ন সোতৰিঞ্ঞেয্যো ন সোতস্মিং পটিহঞ্ঞতি ন সোতস্স আপাথং আগচ্ছতীতি? আমন্তা. হঞ্চি ৰিতক্কৰিপ্ফারো সদ্দো ন সোতৰিঞ্ঞেয্যো ন সোতস্মিং পটিহঞ্ঞতি ন সোতস্স আপাথং আগচ্ছতি, নো চ ৰত রে ৰত্তব্বে – ‘‘সব্বসো ৰিতক্কযতো ৰিচারযতো ৰিতক্কৰিপ্ফারো সদ্দো’’তি.

ৰিতক্কৰিপ্ফারসদ্দকথা নিট্ঠিতা.