৯. নৰমৰগ্গো

(৮৭) ৪. অনুসযা অনারম্মণকথা

৫৫৪. অনুসযা অনারম্মণাতি? আমন্তা. রূপং নিব্বানং চক্খাযতনং…পে… ফোট্ঠব্বাযতনন্তি? ন হেৰং ৰত্তব্বে…পে….

কামরাগানুসযো অনারম্মণোতি? আমন্তা. কামরাগো কামরাগপরিযুট্ঠানং কামরাগসংযোজনং কামোঘো কামযোগো কামচ্ছন্দনীৰরণং অনারম্মণন্তি? ন হেৰং ৰত্তব্বে…পে… কামরাগো কামরাগপরিযুট্ঠানং কামরাগসংযোজনং কামোঘো কামযোগো কামচ্ছন্দনীৰরণং সারম্মণন্তি? আমন্তা. কামরাগানুসযো সারম্মণোতি? ন হেৰং ৰত্তব্বে…পে….

কামরাগানুসযো অনারম্মণোতি? আমন্তা. কতমক্খন্ধপরিযাপন্নোতি? সঙ্খারক্খন্ধপরিযাপন্নোতি. সঙ্খারক্খন্ধো অনারম্মণোতি? ন হেৰং ৰত্তব্বে…পে… সঙ্খারক্খন্ধো অনারম্মণোতি? আমন্তা. ৰেদনাক্খন্ধো সঞ্ঞাক্খন্ধো ৰিঞ্ঞাণক্খন্ধো অনারম্মণোতি? ন হেৰং ৰত্তব্বে…পে….

কামরাগানুসযো সঙ্খারক্খন্ধপরিযাপন্নো অনারম্মণোতি? আমন্তা. কামরাগো সঙ্খারক্খন্ধপরিযাপন্নো অনারম্মণোতি? ন হেৰং ৰত্তব্বে…পে… কামরাগো সঙ্খারক্খন্ধপরিযাপন্নো সারম্মণোতি? আমন্তা. কামরাগানুসযো সঙ্খারক্খন্ধপরিযাপন্নো সারম্মণোতি? ন হেৰং ৰত্তব্বে…পে….

কামরাগানুসযো সঙ্খারক্খন্ধপরিযাপন্নো অনারম্মণো, কামরাগো সঙ্খারক্খন্ধপরিযাপন্নো সারম্মণোতি? আমন্তা. সঙ্খারক্খন্ধো একদেসো সারম্মণো একদেসো অনারম্মণোতি? ন হেৰং ৰত্তব্বে…পে… সঙ্খারক্খন্ধো একদেসো সারম্মণো একদেসো অনারম্মণোতি? আমন্তা. ৰেদনাক্খন্ধো সঞ্ঞাক্খন্ধো ৰিঞ্ঞাণক্খন্ধো একদেসো সারম্মণো একদেসো অনারম্মণোতি? ন হেৰং ৰত্তব্বে…পে….

৫৫৫. পটিঘানুসযো মানানুসযো দিট্ঠানুসযো ৰিচিকিচ্ছানুসযো ভৰরাগানুসযো অৰিজ্জানুসযো অনারম্মণোতি? আমন্তা. অৰিজ্জা অৰিজ্জোঘো অৰিজ্জাযোগো অৰিজ্জানুসযো অৰিজ্জাপরিযুট্ঠানং অৰিজ্জাসংযোজনং অৰিজ্জানীৰরণং অনারম্মণন্তি? ন হেৰং ৰত্তব্বে…পে… অৰিজ্জা অৰিজ্জোঘো…পে… অৰিজ্জানীৰরণং সারম্মণন্তি? আমন্তা. অৰিজ্জানুসযো সারম্মণোতি? ন হেৰং ৰত্তব্বে…পে….

অৰিজ্জানুসযো অনারম্মণোতি? আমন্তা. কতমক্খন্ধপরিযাপন্নোতি? সঙ্খারক্খন্ধপরিযাপন্নোতি. সঙ্খারক্খন্ধো অনারম্মণোতি? ন হেৰং ৰত্তব্বে…পে… সঙ্খারক্খন্ধো অনারম্মণোতি? আমন্তা. ৰেদনাক্খন্ধো সঞ্ঞাক্খন্ধো ৰিঞ্ঞাণক্খন্ধো অনারম্মণোতি? ন হেৰং ৰত্তব্বে…পে….

অৰিজ্জানুসযো সঙ্খারক্খন্ধপরিযাপন্নো অনারম্মণোতি? আমন্তা. অৰিজ্জা সঙ্খারক্খন্ধপরিযাপন্না অনারম্মণাতি? ন হেৰং ৰত্তব্বে…পে… অৰিজ্জা সঙ্খারক্খন্ধপরিযাপন্না সারম্মণাতি? আমন্তা. অৰিজ্জানুসযো সঙ্খারক্খন্ধপরিযাপন্নো সারম্মণোতি? ন হেৰং ৰত্তব্বে…পে….

অৰিজ্জানুসযো সঙ্খারক্খন্ধপরিযাপন্নো অনারম্মণো, অৰিজ্জা সঙ্খারক্খন্ধপরিযাপন্না সারম্মণাতি? আমন্তা. সঙ্খারক্খন্ধো একদেসো সারম্মণো একদেসো অনারম্মণোতি? ন হেৰং ৰত্তব্বে…পে… সঙ্খারক্খন্ধো একদেসো সারম্মণো একদেসো অনারম্মণোতি? আমন্তা. ৰেদনাক্খন্ধো সঞ্ঞাক্খন্ধো ৰিঞ্ঞাণক্খন্ধো একদেসো সারম্মণো একদেসো অনারম্মণোতি? ন হেৰং ৰত্তব্বে…পে….

৫৫৬. ন ৰত্তব্বং – ‘‘অনুসযা অনারম্মণা’’তি? আমন্তা. পুথুজ্জনো কুসলাব্যাকতে চিত্তে ৰত্তমানে সানুসযোতি ৰত্তব্বোতি? আমন্তা. অত্থি তেসং অনুসযানং আরম্মণন্তি? ন হেৰং ৰত্তব্বে…পে… তেন হি অনুসযা অনারম্মণাতি. পুথুজ্জনো কুসলাব্যাকতে চিত্তে ৰত্তমানে সরাগোতি ৰত্তব্বোতি? আমন্তা. অত্থি তস্স রাগস্স আরম্মণন্তি? ন হেৰং ৰত্তব্বে…পে…. তেন হি রাগো অনারম্মণোতি.

অনুসযা অনারম্মণাতিকথা নিট্ঠিতা.