৯. নৰমৰগ্গো

(৯৩) ১০. ন যথাচিত্তস্স কাযকম্মন্তিকথা

৫৬৬. ন যথাচিত্তস্স কাযকম্মন্তি? আমন্তা. অফস্সকস্স কাযকম্মং…পে… অচিত্তকস্স কাযকম্মন্তি? ন হেৰং ৰত্তব্বে…পে… ননু সফস্সকস্স কাযকম্মং…পে… সচিত্তকস্স কাযকম্মন্তি? আমন্তা. হঞ্চি সফস্সকস্স কাযকম্মং…পে… সচিত্তকস্স কাযকম্মং, নো চ ৰত রে ৰত্তব্বে – ‘‘ন যথাচিত্তস্স কাযকম্ম’’ন্তি.

ন যথাচিত্তস্স কাযকম্মন্তি? আমন্তা. অনাৰট্টেন্তস্স কাযকম্মং…পে… অপ্পণিদহন্তস্স কাযকম্মন্তি? ন হেৰং ৰত্তব্বে…পে… ননু আৰট্টেন্তস্স কাযকম্মং…পে… পণিদহন্তস্স কাযকম্মন্তি? আমন্তা. হঞ্চি আৰট্টেন্তস্স কাযকম্মং…পে… পণিদহন্তস্স কাযকম্মং, নো চ ৰত রে ৰত্তব্বে – ‘‘ন যথাচিত্তস্স কাযকম্ম’’ন্তি.

ন যথাচিত্তস্স কাযকম্মন্তি? আমন্তা. ননু কাযকম্মং চিত্তসমুট্ঠানং চিত্তেন সহজাতং চিত্তেন সহ একুপ্পাদন্তি? আমন্তা. হঞ্চি কাযকম্মং চিত্তসমুট্ঠানং চিত্তেন সহজাতং চিত্তেন সহ একুপ্পাদং, নো চ ৰত রে ৰত্তব্বে – ‘‘ন যথাচিত্তস্স কাযকম্ম’’ন্তি.

ন যথাচিত্তস্স কাযকম্মন্তি? আমন্তা. ন অভিক্কমিতুকামো অভিক্কমতি, ন পটিক্কমিতুকামো পটিক্কমতি, ন আলোকেতুকামো আলোকেতি, ন ৰিলোকেতুকামো ৰিলোকেতি, ন সমিঞ্জিতুকামো সমিঞ্জেতি, ন পসারেতুকামো পসারেতীতি? ন হেৰং ৰত্তব্বে…পে…. ননু অভিক্কমিতুকামো অভিক্কমতি, পটিক্কমিতুকামো পটিক্কমতি, আলোকেতুকামো আলোকেতি, ৰিলোকেতুকামো ৰিলোকেতি, সমিঞ্জিতুকামো সমিঞ্জেতি, পসারেতুকামো পসারেতীতি? আমন্তা. হঞ্চি অভিক্কমিতুকামো অভিক্কমতি…পে… পসারেতুকামো পসারেতি, নো চ ৰত রে ৰত্তব্বে – ‘‘ন যথাচিত্তস্স কাযকম্ম’’ন্তি.

৫৬৭. ন ৰত্তব্বং – ‘‘ন যথাচিত্তস্স কাযকম্ম’’ন্তি? আমন্তা. ননু অত্থি কোচি ‘‘অঞ্ঞত্র গচ্ছিস্সামী’’তি অঞ্ঞত্র গচ্ছতি…পে… ‘‘অঞ্ঞং পসারেস্সামী’’তি অঞ্ঞং পসারেতীতি? আমন্তা. হঞ্চি অত্থি কোচি ‘‘অঞ্ঞত্র গচ্ছিস্সামী’’তি অঞ্ঞত্র গচ্ছতি…পে… ‘‘অঞ্ঞং পসারেস্সামী’’তি অঞ্ঞং পসারেতি, তেন ৰত রে ৰত্তব্বে – ‘‘ন যথাচিত্তস্স কাযকম্ম’’ন্তি.

ন যথাচিত্তস্স কাযকম্মন্তিকথা নিট্ঠিতা.