(৭৮) ৬. অরূপধাতুকথা

৫১৭. অরূপিনো ধম্মা অরূপধাতূতি? আমন্তা. ৰেদনা ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? ন হেৰং ৰত্তব্বে…পে… অত্থি ৰেদনূপগং কম্মন্তি? ন হেৰং ৰত্তব্বে…পে… অত্থি ৰেদনূপগা সত্তাতি? ন হেৰং ৰত্তব্বে…পে… ৰেদনায সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে… ৰেদনায অত্থি ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে… ৰেদনা চতুৰোকারভৰোতি? ন হেৰং ৰত্তব্বে…পে….

অরূপধাতু ভৰো গতি…পে… অত্তভাৰপটিলাভোতি? আমন্তা. ৰেদনা ভৰো গতি…পে… অত্তভাৰপটিলাভোতি? ন হেৰং ৰত্তব্বে…পে… অত্থি অরূপধাতূপগং কম্মন্তি? আমন্তা. অত্থি ৰেদনূপগং কম্মন্তি? ন হেৰং ৰত্তব্বে…পে… অত্থি অরূপধাতূপগা সত্তাতি? আমন্তা. অত্থি ৰেদনূপগা সত্তাতি? ন হেৰং ৰত্তব্বে…পে….

অরূপধাতুযা সত্তা জাযন্তি জীযন্তি মীযন্তি চৰন্তি উপপজ্জন্তীতি? আমন্তা. ৰেদনায সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে… অরূপধাতুযা অত্থি ৰেদনা সঞ্ঞা সঙ্খারা ৰিঞ্ঞাণন্তি? আমন্তা. ৰেদনায অত্থি ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে… অরূপধাতু চতুৰোকারভৰোতি? আমন্তা. ৰেদনা চতুৰোকারভৰোতি? ন হেৰং ৰত্তব্বে…পে….

৫১৮. অরূপিনো ধম্মা অরূপধাতু, কামধাতুযা অত্থি ৰেদনা সঞ্ঞা সঙ্খারা ৰিঞ্ঞাণন্তি? আমন্তা. সাৰ কামধাতু, সা অরূপধাতূতি? ন হেৰং ৰত্তব্বে…পে… সাৰ কামধাতু, সা অরূপধাতূতি? আমন্তা. কামভৰেন সমন্নাগতো পুগ্গলো দ্ৰীহি ভৰেহি সমন্নাগতো হোতি – কামভৰেন চ অরূপভৰেন চাতি? ন হেৰং ৰত্তব্বে…পে….

রূপিনো ধম্মা রূপধাতু, অরূপিনো ধম্মা অরূপধাতু, কামধাতুযা অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? আমন্তা. সাৰ কামধাতু, সা রূপধাতু, সা অরূপধাতূতি? ন হেৰং ৰত্তব্বে…পে… সাৰ কামধাতু, সা রূপধাতু, সা অরূপধাতূতি? আমন্তা. কামভৰেন সমন্নাগতো পুগ্গলো তীহি ভৰেহি সমন্নাগতো হোতি – কামভৰেন চ রূপভৰেন চ অরূপভৰেন চাতি? ন হেৰং ৰত্তব্বে…পে….

অরূপধাতুকথা নিট্ঠিতা.