(৪৪) ২. অসেখঞাণকথা

৪২১. সেখস্স অসেখং ঞাণং অত্থীতি? আমন্তা. সেখো অসেখং ধম্মং জানাতি পস্সতি, দিট্ঠং ৰিদিতং সচ্ছিকতং উপসম্পজ্জ ৰিহরতি, কাযেন ফুসিত্ৰা ৰিহরতীতি? ন হেৰং ৰত্তব্বে…পে… ননু সেখো অসেখং ধম্মং ন জানাতি ন পস্সতি, অদিট্ঠং অৰিদিতং অসচ্ছিকতং ন উপসম্পজ্জ ৰিহরতি, ন কাযেন ফুসিত্ৰা ৰিহরতীতি? আমন্তা. হঞ্চি সেখো অসেখং ধম্মং ন জানাতি ন পস্সতি, অদিট্ঠং অৰিদিতং অসচ্ছিকতং ন উপসম্পজ্জ ৰিহরতি, ন কাযেন ফুসিত্ৰা ৰিহরতি, নো চ ৰত রে ৰত্তব্বে – ‘‘সেখস্স অসেখং ঞাণং অত্থী’’তি.

অসেখস্স অসেখং ঞাণং অত্থি, অসেখো অসেখং ধম্মং জানাতি পস্সতি, দিট্ঠং ৰিদিতং সচ্ছিকতং উপসম্পজ্জ ৰিহরতি, কাযেন ফুসিত্ৰা ৰিহরতীতি? আমন্তা. সেখস্স অসেখং ঞাণং অত্থি, সেখো অসেখং ধম্মং জানাতি পস্সতি, দিট্ঠং ৰিদিতং সচ্ছিকতং উপসম্পজ্জ ৰিহরতি, কাযেন ফুসিত্ৰা ৰিহরতীতি? ন হেৰং ৰত্তব্বে…পে….

৪২২. সেখস্স অসেখং ঞাণং অত্থি, সেখো অসেখং ধম্মং ন জানাতি ন পস্সতি, অদিট্ঠং অৰিদিতং অসচ্ছিকতং ন উপসম্পজ্জ ৰিহরতি, ন কাযেন ফুসিত্ৰা ৰিহরতীতি? আমন্তা. অসেখস্স অসেখং ঞাণং অত্থি, অসেখো অসেখং ধম্মং ন জানাতি ন পস্সতি, অদিট্ঠং অৰিদিতং অসচ্ছিকতং ন উপসম্পজ্জ ৰিহরতি, ন কাযেন ফুসিত্ৰা ৰিহরতীতি? ন হেৰং ৰত্তব্বে…পে….

সেখস্স অসেখং ঞাণং অত্থীতি? আমন্তা. গোত্রভুনো পুগ্গলস্স সোতাপত্তিমগ্গে ঞাণং অত্থীতি? ন হেৰং ৰত্তব্বে…পে… সোতাপত্তিফলসচ্ছিকিরিযায পটিপন্নস্স পুগ্গলস্স সোতাপত্তিফলে ঞাণং অত্থীতি? ন হেৰং ৰত্তব্বে…পে… সকদাগামিফল… অনাগামিফল… অরহত্তসচ্ছিকিরিযায পটিপন্নস্স পুগ্গলস্স অরহত্তে ঞাণং অত্থীতি? ন হেৰং ৰত্তব্বে…পে….

৪২৩. ন ৰত্তব্বং – ‘‘সেখস্স অসেখং ঞাণং অত্থী’’তি? আমন্তা. ননু আযস্মা আনন্দো সেখো – ‘‘ভগৰা উল়ারো’’তি জানাতি, ‘‘সারিপুত্তো থেরো, মহামোগ্গল্লানো থেরো উল়ারো’’তি জানাতীতি? আমন্তা. হঞ্চি আযস্মা আনন্দো সেখো – ‘‘ভগৰা উল়ারো’’তি জানাতি, ‘‘সারিপুত্তো থেরো, মহামোগ্গল্লানো থেরো উল়ারো’’তি জানাতি, তেন ৰত রে ৰত্তব্বে – ‘‘সেখস্স অসেখং ঞাণং অত্থী’’তি.

অসেখঞাণকথা নিট্ঠিতা.