৪. চতুত্থৰগ্গো

(৩৫) ৩. অনাসৰকথা

৩৯১. অরহতো সব্বে ধম্মা অনাসৰাতি? আমন্তা. মগ্গো ফলং নিব্বানং, সোতাপত্তিমগ্গো সোতাপত্তিফলং, সকদাগামিমগ্গো সকদাগামিফলং, অনাগামিমগ্গো অনাগামিফলং, অরহত্তমগ্গো অরহত্তফলং, সতিপট্ঠানং সম্মপ্পধানং ইদ্ধিপাদো ইন্দ্রিযং বলং বোজ্ঝঙ্গোতি? ন হেৰং ৰত্তব্বে…পে….

অরহতো সব্বে ধম্মা অনাসৰাতি? আমন্তা. অরহতো চক্খুং অনাসৰন্তি? ন হেৰং ৰত্তব্বে…পে…. অরহতো চক্খুং অনাসৰন্তি? আমন্তা. মগ্গো ফলং নিব্বানং, সোতাপত্তিমগ্গো সোতাপত্তিফলং…পে… বোজ্ঝঙ্গোতি? ন হেৰং ৰত্তব্বে…পে….

অরহতো সোতং…পে… অরহতো ঘানং… অরহতো জিৰ্হা… অরহতো কাযো অনাসৰোতি? ন হেৰং ৰত্তব্বে …পে… অরহতো কাযো অনাসৰোতি? আমন্তা. মগ্গো ফলং নিব্বানং, সোতাপত্তিমগ্গো সোতাপত্তিফলং…পে… বোজ্ঝঙ্গোতি? ন হেৰং ৰত্তব্বে…পে….

অরহতো কাযো অনাসৰোতি? আমন্তা. অরহতো কাযো পগ্গহনিগ্গহুপগো ছেদনভেদনুপগো কাকেহি গিজ্ঝেহি কুললেহি সাধারণোতি? আমন্তা. অনাসৰো ধম্মো পগ্গহনিগ্গহুপগো ছেদনভেদনুপগো কাকেহি গিজ্ঝেহি কুললেহি সাধারণোতি? ন হেৰং ৰত্তব্বে …পে….

অরহতো কাযে ৰিসং কমেয্য, সত্থং কমেয্য, অগ্গি কমেয্যাতি? আমন্তা. অনাসৰে ধম্মে ৰিসং কমেয্য, সত্থং কমেয্য, অগ্গি কমেয্যাতি? ন হেৰং ৰত্তব্বে…পে….

লব্ভা অরহতো কাযো অদ্দুবন্ধনেন বন্ধিতুং, রজ্জুবন্ধনেন বন্ধিতুং, সঙ্খলিকবন্ধনেন বন্ধিতুং, গামবন্ধনেন বন্ধিতুং, নিগমবন্ধনেন বন্ধিতুং, নগরবন্ধনেন বন্ধিতুং, জনপদবন্ধনেন বন্ধিতুং, কণ্ঠপঞ্চমেহি বন্ধনেহি বন্ধিতুন্তি? আমন্তা. লব্ভা অনাসৰো ধম্মো অদ্দুবন্ধনেন বন্ধিতুং, রজ্জুবন্ধনেন বন্ধিতুং, সঙ্খলিকবন্ধনেন বন্ধিতুং, গামনিগমনগরজনপদবন্ধনেন বন্ধিতুং, কণ্ঠপঞ্চমেহি বন্ধনেহি বন্ধিতুন্তি? ন হেৰং ৰত্তব্বে…পে….

৩৯২. যদি অরহা পুথুজ্জনস্স চীৰরং দেতি, অনাসৰং হুত্ৰা সাসৰং হোতীতি? ন হেৰং ৰত্তব্বে…পে… অনাসৰং হুত্ৰা সাসৰং হোতীতি? আমন্তা. তঞ্ঞেৰ অনাসৰং তং সাসৰন্তি? ন হেৰং ৰত্তব্বে…পে… তঞ্ঞেৰ অনাসৰং তং সাসৰন্তি? আমন্তা. মগ্গো অনাসৰো হুত্ৰা সাসৰো হোতীতি? ন হেৰং ৰত্তব্বে…পে… ফলং… সতিপট্ঠানং… সম্মপ্পধানং… ইদ্ধিপাদো… ইন্দ্রিযং… বলং… বোজ্ঝঙ্গো অনাসৰো হুত্ৰা সাসৰো হোতীতি? ন হেৰং ৰত্তব্বে…পে….

যদি অরহা পুথুজ্জনস্স পিণ্ডপাতং দেতি, সেনাসনং দেতি, গিলানপচ্চযভেসজ্জপরিক্খারং দেতি, অনাসৰো হুত্ৰা সাসৰো হোতীতি? ন হেৰং ৰত্তব্বে…পে… অনাসৰো হুত্ৰা সাসৰো হোতীতি? আমন্তা. তঞ্ঞেৰ অনাসৰং তং সাসৰন্তি? ন হেৰং ৰত্তব্বে…পে… তঞ্ঞেৰ অনাসৰং তং সাসৰন্তি? আমন্তা. মগ্গো অনাসৰো হুত্ৰা সাসৰো হোতীতি? ন হেৰং ৰত্তব্বে…পে… ফলং… সতিপট্ঠানং… সম্মপ্পধানং… ইদ্ধিপাদো… ইন্দ্রিযং… বলং… বোজ্ঝঙ্গো অনাসৰো হুত্ৰা সাসৰো হোতীতি? ন হেৰং ৰত্তব্বে…পে….

যদি পুথুজ্জনো অরহতো চীৰরং দেতি, সাসৰং হুত্ৰা অনাসৰং হোতীতি? ন হেৰং ৰত্তব্বে…পে… সাসৰং হুত্ৰা অনাসৰং হোতীতি? আমন্তা. তঞ্ঞেৰ সাসৰং তং অনাসৰন্তি? ন হেৰং ৰত্তব্বে…পে… তঞ্ঞেৰ সাসৰং তং অনাসৰন্তি? আমন্তা. রাগো সাসৰো হুত্ৰা অনাসৰো হোতীতি? ন হেৰং ৰত্তব্বে…পে… দোসো…পে… মোহো…পে… অনোত্তপ্পং সাসৰং হুত্ৰা অনাসৰং হোতীতি? ন হেৰং ৰত্তব্বে…পে….

যদি পুথুজ্জনো অরহতো পিণ্ডপাতং দেতি, সেনাসনং দেতি, গিলানপচ্চযভেসজ্জপরিক্খারং দেতি, সাসৰো হুত্ৰা অনাসৰো হোতীতি? ন হেৰং ৰত্তব্বে…পে… সাসৰো হুত্ৰা অনাসৰো হোতীতি? আমন্তা. তঞ্ঞেৰ সাসৰং তং অনাসৰন্তি? ন হেৰং ৰত্তব্বে…পে… তঞ্ঞেৰ সাসৰং তং অনাসৰন্তি? আমন্তা. রাগো সাসৰো হুত্ৰা অনাসৰো হোতীতি? ন হেৰং ৰত্তব্বে…পে… দোসো…পে… মোহো…পে… অনোত্তপ্পং সাসৰং হুত্ৰা অনাসৰং হোতীতি? ন হেৰং ৰত্তব্বে…পে….

ন ৰত্তব্বং – ‘‘অরহতো সব্বে ধম্মা অনাসৰা’’তি? আমন্তা. ননু অরহা অনাসৰোতি? আমন্তা. হঞ্চি অরহা অনাসৰো, তেন ৰত রে ৰত্তব্বে – ‘‘অরহতো সব্বে ধম্মা অনাসৰা’’তি.

অনাসৰকথা নিট্ঠিতা.