(৩৩) ১. গিহিস্স অরহাতিকথা

৩৮৭. গিহিস্স অরহাতি? আমন্তা. অত্থি অরহতো গিহিসংযোজনন্তি? ন হেৰং ৰত্তব্বে…পে… নত্থি অরহতো গিহিসংযোজনন্তি? আমন্তা. হঞ্চি নত্থি অরহতো গিহিসংযোজনং, নো চ ৰত রে ৰত্তব্বে – ‘‘গিহিস্স অরহা’’তি.

গিহিস্স অরহাতি? আমন্তা. ননু অরহতো গিহিসংযোজনং পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মন্তি? আমন্তা. হঞ্চি অরহতো গিহিসংযোজনং পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং, নো চ ৰত রে ৰত্তব্বে – ‘‘গিহিস্স অরহা’’তি.

গিহিস্স অরহাতি? আমন্তা. অত্থি কোচি গিহী গিহিসংযোজনং অপ্পহায দিট্ঠেৰ ধম্মে দুক্খস্সন্তকরোতি [ম. নি. ২.১৮৬]? নত্থি. হঞ্চি নত্থি কোচি গিহী গিহিসংযোজনং অপ্পহায দিট্ঠেৰ ধম্মে দুক্খস্সন্তকরো, নো চ ৰত রে ৰত্তব্বে – ‘‘গিহিস্স অরহা’’তি.

গিহিস্স অরহাতি? আমন্তা. ননু ৰচ্ছগোত্তো পরিব্বাজকো ভগৰন্তং এতদৰোচ – ‘‘অত্থি নু খো, ভো গোতম, কোচি গিহী গিহিসংযোজনং অপ্পহায কাযস্স ভেদা দুক্খস্সন্তকরো’’তি? ‘‘নত্থি খো, ৰচ্ছ, কোচি গিহী গিহিসংযোজনং অপ্পহায কাযস্স ভেদা দুক্খস্সন্তকরো’’তি. অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘গিহিস্স অরহা’’তি.

গিহিস্স অরহাতি? আমন্তা. অরহা মেথুনং ধম্মং পটিসেৰেয্য, মেথুনং উপ্পাদেয্য, পুত্তসম্বাধসযনং অজ্ঝাৰসেয্য, কাসিকচন্দনং পচ্চনুভৰেয্য, মালাগন্ধৰিলেপনং ধারেয্য, জাতরূপরজতং সাদিযেয্য, অজেল়কং পটিগ্গণ্হেয্য, কুক্কুটসূকরং পটিগ্গণ্হেয্য, হত্থিগৰস্সৰল়ৰং পটিগ্গণ্হেয্য, তিত্তিরৰট্টকমোরকপিঞ্জরং [… কপিঞ্জলং (স্যা. কং. পী.)] পটিগ্গণ্হেয্য, চিত্তৰণ্ডৰালমোল়িং [পীতৰণ্টৰালমোল়িকং (স্যা. কং. পী.)] ধারেয্য, ওদাতানি ৰত্থানি দীঘদসানি ধারেয্য, যাৰজীৰং অগারিযভূতো অস্সাতি? ন হেৰং ৰত্তব্বে…পে….

ন ৰত্তব্বং – ‘‘গিহিস্স অরহা’’তি? আমন্তা. ননু যসো কুলপুত্তো, উত্তিযো গহপতি, সেতু মাণৰো, গিহিব্যঞ্জনেন অরহত্তং পত্তোতি? আমন্তা. হঞ্চি যসো কুলপুত্তো, উত্তিযো গহপতি, সেতু মাণৰো, গিহিব্যঞ্জনেন অরহত্তং পত্তো, তেন ৰত রে ৰত্তব্বে – ‘‘গিহিস্স অরহা’’তি.

গিহিস্স অরহাতিকথা নিট্ঠিতা.