৩. ততিযৰগ্গো

(২৭) ৭. দিব্বচক্খুকথা

৩৭৩. মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. মংসচক্খুং দিব্বচক্খুং, দিব্বচক্খুং মংসচক্খুন্তি? ন হেৰং ৰত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. যাদিসং মংসচক্খুং তাদিসং দিব্বচক্খুং, যাদিসং দিব্বচক্খুং তাদিসং মংসচক্খুন্তি? ন হেৰং ৰত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. তঞ্ঞেৰ মংসচক্খুং তং দিব্বচক্খুং, তং দিব্বচক্খুং তং মংসচক্খুন্তি? ন হেৰং ৰত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. যাদিসো মংসচক্খুস্স ৰিসযো আনুভাৰো গোচরো তাদিসো দিব্বস্স চক্খুস্স ৰিসযো আনুভাৰো গোচরোতি? ন হেৰং ৰত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. উপাদিণ্ণং [উপাদিন্নং (স্যা. কং.)] হুত্ৰা অনুপাদিণ্ণং হোতীতি? ন হেৰং ৰত্তব্বে…পে….

উপাদিণ্ণং হুত্ৰা অনুপাদিণ্ণং হোতীতি? আমন্তা. কামাৰচরং হুত্ৰা রূপাৰচরং হোতীতি? ন হেৰং ৰত্তব্বে…পে….

কামাৰচরং হুত্ৰা রূপাৰচরং হোতীতি? আমন্তা. রূপাৰচরং হুত্ৰা অরূপাৰচরং হোতীতি? ন হেৰং ৰত্তব্বে…পে….

রূপাৰচরং হুত্ৰা অরূপাৰচরং হোতীতি? আমন্তা. পরিযাপন্নং হুত্ৰা অপরিযাপন্নং হোতীতি? ন হেৰং ৰত্তব্বে…পে….

৩৭৪. মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. দিব্বচক্খুং ধম্মুপত্থদ্ধং মংসচক্খুং হোতীতি? ন হেৰং ৰত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. দিব্বচক্খুং ধম্মুপত্থদ্ধং পঞ্ঞাচক্খুং হোতীতি? ন হেৰং ৰত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. দিব্বচক্খুং ধম্মুপত্থদ্ধং মংসচক্খুং হোতীতি? ন হেৰং ৰত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. দ্ৰেৰ চক্খূনীতি? ন হেৰং ৰত্তব্বে…পে… দ্ৰেৰ চক্খূনীতি? আমন্তা. ননু তীণি চক্খূনি ৰুত্তানি ভগৰতা – মংসচক্খুং, দিব্বচক্খুং, পঞ্ঞাচক্খুন্তি? আমন্তা. হঞ্চি তীণি চক্খূনি ৰুত্তানি ভগৰতা – মংসচক্খুং, দিব্বচক্খুং, পঞ্ঞাচক্খুং, নো চ ৰত রে ৰত্তব্বে – ‘‘দ্ৰেৰ চক্খূনী’’তি.

দ্ৰেৰ চক্খূনীতি? আমন্তা. ননু ৰুত্তং ভগৰতা – ‘‘তীণিমানি, ভিক্খৰে, চক্খূনি! কতমানি তীণি? মংসচক্খুং, দিব্বচক্খুং, পঞ্ঞাচক্খুন্তি – ইমানি খো, ভিক্খৰে, তীণি চক্খূনী’’তি.

‘‘মংসচক্খুং দিব্বচক্খুং, পঞ্ঞাচক্খুং অনুত্তরং;

এতানি তীণি চক্খূনি, অক্খাসি পুরিসুত্তমো.

‘‘মংসচক্খুস্স উপ্পাদো, মগ্গো দিব্বস্স চক্খুনো;

যদা চ ঞাণং উদপাদি, পঞ্ঞাচক্খুং অনুত্তরং;

তস্স চক্খুস্স পটিলাভা, সব্বদুক্খা পমুচ্চতী’’তি [ইতিৰু. ৬১ ইতিৰুত্তকে].

অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘দ্ৰেৰ চক্খূনী’’তি.

দিব্বচক্খুকথা নিট্ঠিতা.