২. আযতনং

২২. চক্খাযতনং কতিহি খন্ধেহি কতিহাযতনেহি কতিহি ধাতূহি সঙ্গহিতং? চক্খাযতনং একেন খন্ধেন একেনাযতনেন একায ধাতুযা সঙ্গহিতং. কতিহি অসঙ্গহিতং? চতূহি খন্ধেহি একাদসহাযতনেহি সত্তরসহি ধাতূহি অসঙ্গহিতং.

২৩. সোতাযতনং … ঘানাযতনং… জিৰ্হাযতনং… কাযাযতনং… রূপাযতনং… সদ্দাযতনং… গন্ধাযতনং… রসাযতনং… ফোট্ঠব্বাযতনং…পে… একেন খন্ধেন একেনাযতনেন একায ধাতুযা সঙ্গহিতং. কতিহি অসঙ্গহিতং? চতূহি খন্ধেহি একাদসহাযতনেহি সত্তরসহি ধাতূহি অসঙ্গহিতং.

২৪. মনাযতনং একেন খন্ধেন একেনাযতনেন সত্তহি ধাতূহি সঙ্গহিতং. কতিহি অসঙ্গহিতং? চতূহি খন্ধেহি একাদসহাযতনেহি একাদসহি ধাতূহি অসঙ্গহিতং.

২৫. ধম্মাযতনং অসঙ্খতং খন্ধতো ঠপেত্ৰা চতূহি খন্ধেহি একেনাযতনেন একায ধাতুযা সঙ্গহিতং. কতিহি অসঙ্গহিতং? একেন খন্ধেন একাদসহাযতনেহি সত্তরসহি ধাতূহি অসঙ্গহিতং.

(একমূলকং.)

২৬. চক্খাযতনঞ্চ সোতাযতনঞ্চ একেন খন্ধেন দ্ৰীহাযতনেহি দ্ৰীহি ধাতূহি সঙ্গহিতা. কতিহি অসঙ্গহিতা? চতূহি খন্ধেহি দসহাযতনেহি সোল়সহি ধাতূহি অসঙ্গহিতা.

২৭. চক্খাযতনঞ্চ ঘানাযতনঞ্চ… চক্খাযতনঞ্চ জিৰ্হাযতনঞ্চ… চক্খাযতনঞ্চ কাযাযতনঞ্চ… চক্খাযতনঞ্চ রূপাযতনঞ্চ… চক্খাযতনঞ্চ সদ্দাযতনঞ্চ… চক্খাযতনঞ্চ গন্ধাযতনঞ্চ… চক্খাযতনঞ্চ রসাযতনঞ্চ… চক্খাযতনঞ্চ ফোট্ঠব্বাযতনঞ্চ একেন খন্ধেন দ্ৰীহাযতনেহি দ্ৰীহি ধাতূহি সঙ্গহিতা. কতিহি অসঙ্গহিতা? চতূহি খন্ধেহি দসহাযতনেহি সোল়সহি ধাতূহি অসঙ্গহিতা.

২৮. চক্খাযতনঞ্চ মনাযতনঞ্চ দ্ৰীহি খন্ধেহি দ্ৰীহাযতনেহি অট্ঠহি ধাতূহি সঙ্গহিতা. কতিহি অসঙ্গহিতা? তীহি খন্ধেহি দসহাযতনেহি দসহি ধাতূহি অসঙ্গহিতা.

২৯. চক্খাযতনঞ্চ ধম্মাযতনঞ্চ অসঙ্খতং খন্ধতো ঠপেত্ৰা চতূহি খন্ধেহি দ্ৰীহাযতনেহি দ্ৰীহি ধাতূহি সঙ্গহিতা. কতিহি অসঙ্গহিতা? একেন খন্ধেন দসহাযতনেহি সোল়সহি ধাতূহি অসঙ্গহিতা.

(দুকমূলকং.)

৩০. দ্ৰাদসাযতনানি কতিহি খন্ধেহি কতিহাযতনেহি কতিহি ধাতূহি সঙ্গহিতা? দ্ৰাদসাযতনানি অসঙ্খতং খন্ধতো ঠপেত্ৰা পঞ্চহি খন্ধেহি দ্ৰাদসহাযতনেহি অট্ঠারসহি ধাতূহি সঙ্গহিতা. কতিহি অসঙ্গহিতা? ন কেহিচি খন্ধেহি ন কেহিচি আযতনেহি ন কাহিচি ধাতূহি অসঙ্গহিতা.

(দ্ৰাদসকং.)