১৯. কঙ্খাৰিতরণৰিসুদ্ধিনিদ্দেসৰণ্ণনা

পচ্চযপরিগ্গহকথাৰণ্ণনা

৬৭৮. অনন্তরনিদ্দিট্ঠায দিট্ঠিৰিসুদ্ধিযা ৰিসযভাৰেন দস্সিতত্তা ‘‘এতস্সেৰা’’তি ৰুত্তং, ন তদঞ্ঞতো ৰিসেসনত্থং তদঞ্ঞস্সেৰ অভাৰতো. অজ্ঝত্তং ৰা হি ৰিপস্সনাভিনিৰেসো হোতু বহিদ্ধা ৰা, অজ্ঝত্তসিদ্ধিযং পন লক্খণতো সব্বম্পি নামরূপং অনৰসেসতো পরিগ্গহিতমেৰ হোতীতি. পচ্চযপরিগ্গহেনাতি হেতুম্হি করণৰচনং. পচ্চযপরিগ্গহহেতু হিস্স অদ্ধত্তযকঙ্খাৰিতরণং হোতীতি, করণে ৰা এতং করণৰচনং পচ্চযপরিগ্গহস্স সাধকতমভাৰতো কঙ্খাৰিতরণকিরিযায. যদা হিস্স সুপরিসুদ্ধো নিজ্জটো নিগ্গুম্বো পচ্চযপরিগ্গহো সিজ্ঝতি, তদানেন কঙ্খা ৰিতরীযতীতি. ৰিতরিত্ৰাতি অতিক্কমিত্ৰা, ৰিক্খম্ভেত্ৰাতি অত্থো. তং পন ঞাণং তথাধিগতং ৰসীভাৰপ্পত্তং ঝানং ৰিয যোগিনো সন্তানে পবন্ধৰসেন পৰত্ততীতি কত্ৰা ৰুত্তং ‘‘ঠিতং ঞাণ’’ন্তি.

তন্তি কঙ্খাৰিতরণৰিসুদ্ধিং. তং সম্পাদেতুকামো আপজ্জতীতি সম্বন্ধো. যাথাৰতো দিট্ঠং নামরূপং তিৰিধদুক্খতাযোগতো রোগো ৰিয. পচ্চযা চস্স রোগসমুট্ঠানং ৰিয উপট্ঠহন্তীতি ইমমত্থং দস্সেন্তো ‘‘যথা নাম…পে… পরিযেসতী’’তি আহ. সংসারদুক্খনিমুগ্গস্স সন্তানস্স ততো ৰিমোচেতুকামতাৰসেন অনুকম্পিতব্বতা লব্ভতীতি তমত্থং দস্সেতুং ‘‘যথা ৰা পনা’’তিআদি ৰুত্তং. এৰমেৰ ঠিতে যদেকে ৰদন্তি ‘‘অনুকম্পেতব্বকুমারকদস্সনেন তস্স মাতাপিতুআৰজ্জনং ইধ অনুদাহরণং নিরোধেতব্বতায নামরূপস্স অনুকম্পিতব্বতাভাৰতো’’তি, তদপাহতং হোতি. অৰস্সঞ্চেতং এৰং ইচ্ছিতব্বং, অঞ্ঞথা ৰেনেয্যপুগ্গলসন্তানে সত্থু মহাকরুণাপৰত্তি এৰ ৰিচারেতব্বা সিযা. মন্দবুদ্ধিতায মন্দং. ৰুড্ঢতরোপি কোচি মন্দবুদ্ধি হোতীতি ততো ৰিসেসনত্থং ‘‘কুমার’’ন্তি ৰুত্তং. যো কোচি পঠমৰযে ৰত্তমানো ‘‘কুমারো’’তি ৰুচ্চতীতি ততো ৰিসেসনত্থং ‘‘দহর’’ন্তি ৰুত্তং. এৰম্পি যো আধাৰিত্ৰা পরিধাৰিত্ৰা ৰিচারণকো তরুণদারকো, সোপি ‘‘দহরো’’তি ৰুচ্চতীতি ততো নিৰত্তনত্থং ‘‘উত্তানসেয্যক’’ন্তি ৰুত্তং. চতূহিপি পদেহি করুণাযিতব্বতংযেৰ দস্সেতি. আপজ্জতীতি করোতি.

যথা পনস্স হেতুপচ্চযপরিযেসনাপত্তি হোতি, তং দস্সেতুং ‘‘সো’’তিআদি ৰুত্তং. তত্থ ব্যতিরেকমুখেন অত্থো সাধিতো সম্মদেৰ সাধিতো হোতীতি অহেতুকভাৰং তাৰ পটিক্খিপন্তো ‘‘ন তাৰিদং নামরূপং অহেতুক’’ন্তি ৰত্ৰা তত্থ কারণমাহ ‘‘সব্বত্থা’’তিআদিনা. হেতুমন্তরেন সতি সম্ভৰে সব্বধম্মানং হেতুঅভাৰো সমানোতি সব্বসমানতা সিযা, তথা চ সতি সোতপদেসাদীসু, বহিদ্ধা চ চক্খুৰিঞ্ঞাণাদিহেতুঅভাৰোতি সব্বত্থ, চক্খাদীনং উপ্পত্তিতো পুব্বে, পরিভেদতো উদ্ধঞ্চ হেতুঅভাৰোতি সব্বদা চ অন্ধাদীনং অরূপীনং, অসঞ্ঞীনঞ্চ হেতুঅভাৰোতি সব্বেসঞ্চ চক্খুৰিঞ্ঞাণাদীহি ভৰিতব্বং, হেতুঅভাৰা ৰিসেসতো তঞ্চ নত্থীতি আহ ‘‘সব্বত্থ সব্বদা সব্বেসঞ্চ একসদিসভাৰাপত্তিতো’’তি. নিদস্সনমত্তঞ্চেতং যদিদং ‘‘চক্খুৰিঞ্ঞাণাদীসু হী’’তি. যত্তকা লোকে ৰিসেসা, তেহি সব্বেসং, সব্বকালঞ্চ ভৰিতব্বন্তি অধিপ্পাযো. আদি-সদ্দেন ৰা তেসম্পি গহণং কতমেৰাতি দট্ঠব্বং. তস্মা অহেতুকভাৰে ৰিসিট্ঠতায অসম্ভৰো এৰাতি সব্বত্থ একসদিসভাৰাপত্তিতো, সব্বদা একসদিসভাৰাপত্তিতো, সব্বেসং একসদিসভাৰাপত্তিতোতি পচ্চেকং সম্বন্ধো ৰেদিতব্বো. এৰং অহেতুভাৰে পটিসিদ্ধে ৰিসমহেতুৰাদী ৰদেয্য ‘‘ন ইদং অহেতুকং কিঞ্চরহি সহেতুকং, কেন পন হেতুনা সহেতুকন্তি? ইস্সরাদিনা’’তি.

আদি-সদ্দেন পকতিপুরিসপজাপতিকালাদীনং গহণং ৰেদিতব্বং, তং পটিক্খিপন্তো আহ ‘‘ন ইস্সরাদিহেতুক’’ন্তিআদি. ন নামরূপং ইস্সরাদিহেতুকং নামরূপতো অঞ্ঞস্স অনুপলব্ভমানত্তা ইস্সরপকতিআদিনমেৰ অভাৰতো. যদি পন অসতো ইস্সরাদিতো নামরূপস্স উপ্পত্তি, এৰং সতি সা এৰ সব্বত্থ সব্বদা সব্বেসং একসদিসতা আপজ্জতি. অথ নামরূপমত্তমেৰ ইস্সরাদিহেতুকং, নামরূপঞ্চ অহুত্ৰা সম্ভৰন্তং, হুত্ৰা চ ৰিনস্সন্তং দিস্সতীতি ইস্সরাদীহিপি তাদিসেহি ভৰিতব্বং. তথা চ তদপি সপ্পচ্চযং সঙ্খতমেৰাতি তস্সাপি পচ্চযপরিগ্গহো কাতব্বো. অথ তং নুপ্পজ্জতি, অহেতুকতা তস্স আপন্না. তেনাহ ‘‘অহেতুকভাৰাপত্তিতো’’তি.

অপিচ ন ইস্সরাদিহেতুকং নামরূপং. কিং কারণং? কমেন উপ্পত্তিতো. যদি হি এৰং নিচ্চং ইস্সরাদিসঞ্ঞিতং কম্মকিলেসিন্দ্রিযারম্মণাদিনিরপেক্খকারণম্পি সিযা, সব্বেসংযেৰ একজ্ঝং উপ্পত্তি সিযা, যত্তকেহি ততো উপ্পজ্জিতব্বং. কস্মা? কারণস্স সন্নিহিতভাৰতো. যদি পন তস্স ইচ্ছাৰসেন তস্স উপ্পত্তিং পরিকপ্পেয্যুং, তাসঞ্চ ইচ্ছানং একজ্ঝং উপ্পত্তিযং কো ৰিবন্ধো. অথ অঞ্ঞম্পি কিঞ্চি কম্মকিলেসিন্দ্রিযারম্মণাদিঅপেক্খিতব্বং অত্থীতি চে? তদেৰ হেতু কারণং, কিমঞ্ঞেন অদিট্ঠসামত্থিযেন পরিকপ্পিতেন পযোজনং? দিট্ঠঞ্হি কম্মাদীনং সামত্থিযং তদঞ্ঞপচ্চযসন্নিধানেপি তদভাৰে অভাৰতো. যথা হি রূপালোকমনসিকারসন্নিধানেপি চক্খুনো অভাৰে চক্খুৰিঞ্ঞাণস্স অভাৰং, ভাৰে চ ভাৰং দিস্ৰা চক্খুনো চক্খুৰিঞ্ঞাণুপ্পাদনসমত্থতা অত্থীতি ৰিঞ্ঞাযতি. যথা চ য্ৰাযং যমকানম্পি সমানানং জনকজননীসুক্কসোণিতাদিবাহিরপচ্চযসমভাৰেপি সত্তানং হীনপণীততাদিৰিসেসো দিস্সতি, সো চ সসন্তানে তাদিসস্স অঞ্ঞস্স হেতুনো অভাৰা কম্মকিলেসহেতুকোতি তস্স তত্থ সমত্থতা অত্থীতি ৰিঞ্ঞাযতি, ন এৰমিস্সরাদিকস্স. কারণস্স হি ভাৰাভাৰে ফলস্স ভাৰাভাৰেহি কারণস্স সমত্থতা ৰিঞ্ঞাযেয্য. ন চ সন্নিহিতে তদকারণস্স নামরূপস্স ইস্সরাদিৰেকল্লেন কত্থচি অনুপ্পত্তি দিট্ঠা, তস্মা অকারণমিস্সরো.

অথাপি সগ্গো এৰং ইস্সরাদিহেতুকো ৰুচ্চেয্য, সোপি সগ্গপ্পকারো সব্বকালং ততো নিব্বত্তেয্য. ন হি সন্নিহিতকারণস্স ফলস্স অনুপ্পত্তি যুত্তা. নিচ্চে চ সতি অঞ্ঞনিরপেক্খকারণে সগ্গস্স আদিযেৰ ন যুত্তো, যাৰ ইস্সরাদিকং কারণং, তাৰ সব্বস্স অত্থিভাৰপ্পসঙ্গতো. অথাপি ৰদেয্য ‘‘অঞ্ঞেপি যথারহং পচ্চযা হোন্তিযেৰ, ইস্সরাদিকম্পি তেসং সহকারীকারণং হোতী’’তি. যদেত্থ ৰত্তব্বং, তং হেট্ঠা ৰুত্তমেৰ. যদি পরো ৰদেয্য ‘‘ইধ বুদ্ধিপুব্বো ভাৰানং রচনাৰিসেসো দিট্ঠো, যথা তং ঘটগেহাদীনং. অত্থি চ অজ্ঝত্তিকবাহিরানং সরীরপদুমাদীনং রচনাৰিসেসো, তস্মা তেনাপি বুদ্ধিপুব্বেন ভৰিতব্বং. যস্স চ সো বুদ্ধিপুব্বো, সো ইস্সরাদিকো, তস্মা তেন নামরূপসঞ্ঞিতস্স লোকস্স কারণেন ভৰিতব্ব’’ন্তি. তযিদং অসিদ্ধং, রচিতা সরীরপদুমাদযোতি তত্থেৰ উপ্পন্নত্তা. উপ্পন্নস্স হি সন্নিৰেসৰসেন তথা তথা পট্ঠপনং ‘‘রচনা’’তি ৰুচ্চতি. অনেকন্তিকো চাযং অবুদ্ধিপুব্বস্সাপি দিট্ঠত্তা. দিট্ঠো হি ন্হারুআদীনং অগ্গিসংযোগেন রচনাৰিসেসো, তথা ৰিসুস্সন্তানং পুব্বচম্মাদীনং. যদি পনাযমিস্সরাদিকো গৰস্সজগদ্রভাদীনং করীসাৰত্তে পটিমহুতং রচেয্য, উম্মত্তো ৰিয ৰিক্খিত্তো সিযা. কিঞ্চাযং লোকং সজ্জেন্তো অত্তত্থং ৰা সজ্জেয্য লোকত্থং ৰা.

তত্থ চ যদি পুরিমো মক্খো কতকিচ্চো ন সিযা লোকেন সাধেতব্বস্স অত্থিভাৰতো. অথ দুতিযো, কস্মা লোকস্স অহিতদুক্খাৰহং পাপং নিরযাদিং, জরামরণাদিঞ্চ সজতি? অথ তদুভযং অনামসিত্ৰা কীল়ত্থং সজতি. কীল়া চ নাম রতিঅত্থা হোতি. ৰিনা কীল়ায রতিং অজানন্তানং রতিঅত্থঞ্চ কীল়মারভন্তো রতিযং ইস্সরো অনিস্সরো সিযা. অথ পযোজননিরপেক্খো, সব্বকালং সজেয্য, তস্স চাযং সজনসমত্থতা অহেতুকা ৰা সিযা সহেতুকা ৰা. অহেতুকা চে, সব্বেসং সিযা সহেতুকা ৰা. অহেতুকা চে, সব্বেসম্পি সিযা. অথ সহেতুকা, সো চস্স হেতু পরতো ৰা সম্ভূতো সিযা অত্ততো ৰা. তত্থ পরতো চে সম্ভূতো, যদস্স সো লদ্ধো, তস্সাযং ৰেয্যাৰচ্চকরসদিসো সিযা. অথ অত্ততো তদুপ্পত্তিতো পুব্বে অযং কীদিসো লোকো চাতি সব্বমিদং আলুনৰিসিণং আকুলব্যাকুলং গোযূথেন গতমগ্গসদিসফেণপিণ্ডসমং অৰিমদ্দক্খমং অসারং. তিট্ঠতু পসঙ্গো, যথাধিকতমেৰ ৰণ্ণযিস্সাম. তস্মাতি যস্মা ইদং নামরূপং ন অহেতুকং, নাপি ইস্সরাদিৰিসমহেতুকং, তস্মা. তেতি হেতুপচ্চযা.

৬৭৯. ওল়ারিকত্তা, সুপাকটত্তা চ রূপস্স পচ্চযপরিগ্গহো সুকরোতি ‘‘ইমস্স তাৰ রূপকাযস্সা’’তিআদিনা পঠমং তস্স পচ্চযপরিগ্গহৰিধিং আরভতি. তত্থ যথা নামরূপস্স পচ্চযপরিগ্গহো অহেতুৰিসমহেতুৰাদনিৰত্তিযা হোতি, এৰং নিব্বিদাৰিরাগাৰহভাৰেন তত্থ অভিরতিনিৰত্তিযাপি ইচ্ছিতব্বোতি তং গব্ভসেয্যকৰসেন দস্সেন্তো নিব্বত্তট্ঠানস্স সুচিভাৰপটিসেধনমুখেন অসুচিভাৰং ৰিভাৰেতুং ‘‘অযং কাযো’’তিআদিমাহ. তত্থ উপ্পলাদীনি অসুচিট্ঠানে নিব্বত্তানিপি সযং সুচিসম্মতানেৰাতি তংদস্সনত্থং অব্ভন্তরগ্গহণং. তেনাহ ভগৰা –

‘‘যথা সঙ্কারধানস্মিং, উজ্ঝিতস্মিং মহাপথে;

পদুমং তত্থ জাযেথ, সুচিগন্ধং মনোরম’’ন্তি. (ধ. প. ৫৮);

‘‘নিব্বত্ততী’’তি ইদং মাতুকুচ্ছিযং পটিসন্ধিপৰত্তীসু রূপকাযস্স নিব্বত্তনসামঞ্ঞতো গহেত্ৰা ৰুত্তং, ন পঠমাভিনিব্বত্তিমত্তং. এৰঞ্চ কত্ৰা আহারস্স উপত্থম্ভকপচ্চযতাৰচনং, উদরপটলস্স পচ্ছতো করণাদিৰচনং, দুগ্গন্ধজেগুচ্ছপটিক্কূলতাৰচনঞ্চ সমত্থিতং হোতি. এৰমৰট্ঠিতে যদেকচ্চেহি পিট্ঠিতো, পুরতো চ করণং কিং সিযা পটিসন্ধিকালেতিআদি ৰুত্তং, তং অপাহতং হোতি. ‘‘নিব্বত্তকত্তা’’তি ইমিনা বীজং ৰিয অঙ্কুরস্স অৰিজ্জাদযো রূপকাযস্স অসাধারণকারণতায হেতূতি দস্সেতি. ‘‘উপত্থম্ভকত্তা’’তি ইমিনা পন অঙ্কুরস্স পথৰীসলিলপারিসিআদযো ৰিয আহারো সাধারণকারণতায পচ্চযোতি দস্সেতি.

পঞ্চ ধম্মা হেতুপচ্চযাতি অৰিজ্জাদযো পঞ্চ ধম্মা যথারহং হেতু চ পচ্চযো চাতি অত্থো. ভৰেসু ৰিজ্জমানদোসপটিচ্ছাদনপত্থনা দল়্হগ্গাহভাৰেন সঙ্খারভৰানং হেতুভূতা জনকসহাযতায ভৰনিকন্তি তংসহজাতআসন্নকারণত্তা অভিসঙ্খারিকা, অপস্সযভূতা চাতি ‘‘মাতা ৰিয দারকস্স উপনিস্সযা’’তি ৰুত্তা. যথা পিতু জনিতসুক্কে পুত্তস্স উপ্পত্তীতি পিতা জনকো, এৰং কম্মং সত্তস্স উপ্পাদকত্তা জনকং ৰুত্তং. যথা ধাতি জাতস্স দারকস্স পোসনৰসেন সন্ধারিকা, এৰং আহারো উপ্পন্নস্স কাযস্সাতি সন্ধারকো ৰুত্তো.

কামঞ্চেত্থ অৰিজ্জাদযো নামকাযস্সাপি পচ্চযো, পকারন্তরেন পন তস্স পাকটং পচ্চযপরিগ্গহৰিধিং দস্সেতুং ‘‘চক্খুঞ্চ পটিচ্চা’’তিআদি ৰুত্তং. তত্থ চক্খুঞ্চাতি চ-সদ্দো সমুচ্চযত্থো. তেন চক্খুৰিঞ্ঞাণস্স আৰজ্জনাদিঅজ্ঝত্তং সব্বং পচ্চযজাতং সঙ্গণ্হাতি. রূপে চাতি পন চ-সদ্দেন যথা বহুলং বাহিররূপং চক্খুৰিঞ্ঞাণস্স আরম্মণপচ্চযো, এৰং অঞ্ঞম্পি বাহিরং পচ্চযজাতং সঙ্গণ্হাতি. পটিচ্চাতি পচ্চযভূতং লদ্ধাতি অত্থো. তেন চক্খুস্স নিস্সযপুরেজাতইন্দ্রিযৰিপ্পযুত্তঅত্থিঅৰিগতৰসেন, রূপস্স আরম্মণপুরেজাতঅত্থিঅৰিগতৰসেন, ইতরেসঞ্চ সঙ্গহিতানং অনন্তরাদিসহজাতাদিৰসেন পচ্চযভাৰং দস্সেতি. ৰচনভেদে পন কারণং হেট্ঠা ৰুত্তমেৰ. আদি-সদ্দেন চ ফস্সাদীনং ৰিয সহপচ্চযেহি সোতৰিঞ্ঞাণাদীনং সঙ্গহো ৰেদিতব্বো ‘‘তিণ্ণং সঙ্গতি ফস্সো’’তিআদিপাঠস্স (ম. নি. ১.২০৪; ৩.৪২১, ৪২৫-৪২৬; সং. নি. ২.৪৩-৪৫; কথা. ৪৬৫, ৪৬৭) ৰিয ‘‘সোতঞ্চ পটিচ্চা’’তিআদিপাঠস্স সঙ্গহিতত্তা. এৰং সম্মসনুপগং সব্বং নামং সহপচ্চযেন সঙ্গহিতং হোতি. তেনাহ ‘‘নামকাযস্স পচ্চযপরিগ্গহং করোতী’’তি.

পৰত্তিং দিস্ৰাতি এতরহি পৰত্তিং দিস্ৰা. এৰন্তি ইমিনা ন কেৰলং সপ্পচ্চযতামত্তমেৰ পচ্চামট্ঠং, অথ খো যাদিসেহি পচ্চযেহি এতরহি পৰত্ততি, তাদিসেহি অৰিজ্জাদিপচ্চযেহেৰ অতীতেপি পৰত্তিত্থাতি পচ্চযসদিসতাপি পচ্চামট্ঠাতি দট্ঠব্বং.

৬৮০. পুব্বন্তন্তি অতীতং খন্ধপ্পবন্ধকোট্ঠাসং. আরব্ভাতি উদ্দিস্স. অহোসিং নু খো, ন নু খো অহোসিন্তি সস্সতাকারং, অধিচ্চসমুপ্পত্তিআকারঞ্চ নিস্সায অতীতে অত্তনো ৰিজ্জমানতং, অৰিজ্জমানতঞ্চ কঙ্খতি. কিং নু খো অহোসিন্তি জাতিলিঙ্গূপপত্তিযো নিস্সায ‘‘খত্তিযো নু খো অহোসিং, ব্রাহ্মণাদীসু গহট্ঠাদীসু দেৰাদীসু অঞ্ঞতরো নু খো’’তি কঙ্খতি. কথং নু খোতি সণ্ঠানাকারং নিস্সায ‘‘দীঘো নু খো অহোসিং, রস্সওদাতকাল়পমাণিকঅপ্পমাণিকাদীনম্পি অঞ্ঞতরো’’তি কঙ্খতি. ইস্সরনিম্মানাদিং নিস্সায ‘‘কেন নু খো পকারেন অহোসি’’ন্তি নিব্বত্তাকারতো কঙ্খতীতি চ ৰদন্তি. কিং হুত্ৰা কিং অহোসিন্তি জাতিআদিং নিস্সায ‘‘খত্তিযো হুত্ৰা নু খো ব্রাহ্মণো অহোসিং…পে… দেৰো হুত্ৰা নু খো মনুস্সো অহোসি’’ন্তি অত্তনো অপরাপরুপ্পত্তিং কঙ্খতি. সব্বত্থেৰ চ অদ্ধানন্তি কালাধিৰচনং. ভৰিস্সামি নু খোতি সস্সতাকারং, উচ্ছেদাকারঞ্চ নিস্সায অনাগতে অত্তনো ৰিজ্জমানতং, অৰিজ্জমানতঞ্চ কঙ্খতি. সেসমেত্থ ৰুত্তনযমেৰ. এতরহি ৰা পন পচ্চুপ্পন্নং অদ্ধানন্তি ইদানি ৰা পটিসন্ধিমাদিং কত্ৰা চুতিপরিযন্তং সব্বম্পি ৰত্তমানকালং. অজ্ঝত্তং কথংকথী হোতীতি অত্তনো খন্ধেসু ৰিচিকিচ্ছা হোতি. অহং নু খোস্মীতি অত্তনো অত্থিভাৰং কঙ্খতি. অযুত্তং পনেতন্তি. যুত্তং অযুত্তন্তি কা এত্থ চিন্তা. উম্মত্তকো ৰিয হি বালপুথুজ্জনো. নো নু খোস্মীতি অত্তনো নত্থিভাৰং কঙ্খতি. কিং নু খোস্মীতি খত্তিযোৰ সমানো অত্তনো খত্তিযভাৰং কঙ্খতি. এস নযো সেসেসু. কথং নু খোস্মিন্তি ৰুত্তনযমেৰ. কেৰলঞ্হেত্থ ‘‘অব্ভন্তরে জীৰো নাম অত্থী’’তি গহেত্ৰা তস্স দীঘাদিভাৰং কঙ্খন্তো ‘‘কথং নু খোস্মি’’ন্তি কঙ্খতীতি ৰেদিতব্বো. পচ্চুপ্পন্নং পন অত্তনো সরীরসণ্ঠানং অজানন্তো নাম নত্থি. কুতো আগতো, সো কুহিং গামী ভৰিস্সতীতি অত্তভাৰস্স আগতিগতিট্ঠানং কঙ্খতি. সা সব্বাপি পহীযতীতি সা যথাৰুত্তা সোল়সৰিধাপি ৰিচিকিচ্ছা ৰিক্খম্ভনৰসেন পহীযতি.

৬৮১. কুসলাদিভেদতো সব্বপ্পকারস্সাপি নামস্স সাধারণো পচ্চযোতি, ততো পৰত্তিতো মনসিকারাদিকো কুসলাদিভেদতো সব্বপ্পকারস্সাপি নামস্স অসাধারণো পচ্চযোতি চ যোজেতব্বং. কুসলাদিভেদতোতি কুসলাকুসলৰিপাককিরিযভেদতো. তস্সাপি সোমনস্সসহগতাদিঅঞ্ঞতরভেদৰসেন সব্বপ্পকারস্সাপি. যং একন্ততো ছদ্ৰারিকং, তম্পি ছদ্ৰারগ্গহণেনেৰ গহিতং যথা ছট্ঠারম্মণং ছল়ারম্মণগ্গহণেনাতিপি ৰুত্তং ‘‘সব্বপ্পকারস্সাপী’’তি. ততোতি চক্খুরূপাদিতো. মনসিকারাদিকোতি যোনিসোমনসিকারঅযোনিসোমনসিকারাদিকো, কম্মভৰঙ্গাদিকো চ. কামঞ্চেত্থ দ্ৰারচ্ছক্কযোনিসোমনসিকারাদিৰসেন নামস্সেৰ সাধারণো, অসাধারণো চ পচ্চযো ৰুত্তো, তং পন অৰিসেসৰসেন ৰুত্তং. ৰিসেসতো পন কম্মং ৰিপাকনামস্স, কম্মসমুট্ঠানরূপানঞ্চ চিত্তং চেতসিকনামস্স, চিত্তসমুট্ঠানরূপানঞ্চ সাধারণো পচ্চযো, যথাৰুত্তস্সেৰ চ নামস্স, রূপস্স চ তদঞ্ঞনামরূপাপেক্খায অসাধারণো পচ্চযো. তথা সভাগো, উতুসভাগো চ আহারো তংসমুট্ঠানরূপানং সাধারণো পচ্চযো, তদঞ্ঞাপেক্খায অসাধারণোতি রূপস্সাপি সাধারণো, অসাধারণো চ পচ্চযো যথারহং নিদ্ধারেতব্বো. পচ্চযপরিগ্গহো নাম অনধিগতারহত্তেন কাতব্বোতি তদপেক্খায ‘‘যোনিসোমনসিকারসদ্ধম্মস্সৰনাদিকো কুসলস্সেৰা’’তি ৰুত্তং. আদি-সদ্দেন সপ্পুরিসূপনিস্সযস্স, চতুন্নম্পি ৰা সম্পত্তিচক্কানং সঙ্গহো দট্ঠব্বো. ৰিপরীতো অকুসলস্সাতি ৰচনতো যথা যোনিসোমনসিকারাদিৰিপরীতো অকুসলস্সেৰ পচ্চযো, তথা যোনিসোমনসিকারাদি কুসলস্সেৰ পচ্চযো হোতীতি অত্থো. যস্স ৰা কুসলং সম্ভৰতি, অকুসলং সম্ভৰতি, কুসলাকুসলানি ৰা, তস্সাতি অত্থসিদ্ধমেতং. কম্মাদিকোতি আদি-সদ্দেন অৰিজ্জাদযো ৰিয গতিকালাদযোপি সঙ্গহিতাতি দট্ঠব্বা. ভৰঙ্গাদিকোতি ভৰঙ্গসন্তীরণপরিত্তকিরিযারহত্তাদিকো. তত্থ ভৰঙ্গং পঞ্চদ্ৰারমনোদ্ৰারাৰজ্জনকিরিযানং, সন্তীরণং ৰোট্ঠব্বনস্স, পরিত্তকিরিযা যথারহং পরিত্তমহগ্গতকিরিযানং, অরহত্তং আৰজ্জনৰজ্জানং সব্বকিরিযানং পচ্চযোতি ৰেদিতব্বং.

কম্মন্তি চেতনাৰ অধিপ্পেতা, সা চ খো কুসলাকুসলা. ৰুত্তঞ্হেতং ‘‘কুসলাকুসলচেতনা ৰিপাকানং খন্ধানং, কটত্তা চ রূপানং কম্মপচ্চযেন পচ্চযো’’তি (পট্ঠা. ১.১.৪২৭). ন চিত্তং ৰিয সসম্পযুত্তা. চিত্তঞ্হেত্থ সসম্পযুত্তং অধিপ্পেতং ‘‘হেতূ হেতুসম্পযুত্তকানং ধম্মানং, তংসমুট্ঠানানঞ্চ রূপানং হেতুপচ্চযেন পচ্চযো’’তিআদিৰচনতো (পট্ঠা. ১.১.১). তত্থাতি তেসু কম্মাদীসু রূপজনকপচ্চযেসু. অতীততো এৰ কম্মতো ফলং উপ্পজ্জতি, ন ৰত্তমানতোতি ৰুত্তং ‘‘কম্মং অতীতমেৰ কম্মসমুট্ঠানস্স রূপস্স পচ্চযো’’তি. যদি হি পচ্চুপ্পন্নতো কম্মতো ফলং উপ্পজ্জেয্য, আযূহনক্খণে এৰ ফলেন উপ্পজ্জিতব্বং ভৰেয্য, ন চ তং দিট্ঠমিচ্ছিতং ৰা. ন হি লোকে কুদাচনং করিযমানমেৰ কম্মং ফলং দেন্তং দিট্ঠং, তথারূপো ৰা আগমো অত্থীতি. ননু চ ইদমপি ন দিট্ঠং, যং ৰিনট্ঠতো হেতুতো ফলং উপ্পজ্জমানং, মতো ৰা কুক্কুটো ৰস্সন্তোতি? সচ্চমদিট্ঠং রূপধম্মানং পবন্ধৰিচ্ছেদে, ইদং পন অরূপং পবন্ধোপি অত্থীতি উপমা ন সংসন্দতি. কম্মতো হি অতীততো এৰ কম্মস্স কতত্তা, উপচিতত্তা চ ফলং উপ্পজ্জতি. ৰুত্তঞ্হেতং ‘‘কামাৰচরস্স কুসলস্স কম্মস্স কতত্তা উপচিতত্তা ৰিপাকং চক্খুৰিঞ্ঞাণং উপ্পন্নং হোতী’’তিআদি (ধ. স. ৪৩১). যস্মা অনন্তরাদিপচ্চযলাভতো উপ্পাদক্খণে এৰ চিত্তস্স বলৰতা, তস্মা তং উপ্পজ্জমানমেৰ রূপং জনেতীতি আহ ‘‘চিত্তং চিত্তসমুট্ঠানস্স উপ্পজ্জমান’’ন্তি. রূপস্স পচ্চযো হোতীতি সম্বন্ধো. যস্মা পন রূপস্স ঠিতিক্খণে বলৰতা পচ্ছাজাতাদিপচ্চযলাভতো, তস্মা ৰুত্তং ‘‘উতুআহারা…পে… হোন্তী’’তি, বাহিরং উতুং, আহারঞ্চ পচ্চযং লভিত্ৰা অত্তনো ঠিতিক্খণে উতুআহারা রূপং জনেন্তীতি অত্থো.

এৰন্তি ‘‘সাধারণাসাধারণৰসেনা’’তিআদিনা ৰুত্তপ্পকারেন.

৬৮২. সঙ্খারানন্তি সঙ্খতসঙ্খারানং. ভঙ্গন্তি মরণং. জরামরণং নাম জাতিযা সতীতিআদি ফলদস্সনানুপুব্বিযা হেতুদস্সনক্কমেন নামরূপস্স পচ্চযপরিগ্গহো সুকরোতি কত্ৰা দস্সিতো. তত্থ ভৰে সতীতি কম্মভৰে সতি.

৬৮৩. পুব্বে ৰিত্থারেত্ৰা দস্সিতঅনুলোমপটিচ্চসমুপ্পাদৰসেনাতি পরিযোসানতো পট্ঠায পটিলোমনযেন আদিপাপনৰসেন ৰিত্থারেত্ৰা দস্সিতঅনুলোমপটিচ্চসমুপ্পাদৰসেন. ‘‘অসতি জাতিযা নত্থি জরামরণ’’ন্তিআদিনা (সং. নি. ২.৪) হি পটিলোমৰসেন দস্সিতে পচ্চযাকারে ‘‘যস্স অভাৰা যস্স অভাৰো, সো তস্স পচ্চযো’’তি ব্যতিরেকতো, অন্ৰযতো চ নামরূপস্স পচ্চযপরিগ্গহো সুকরোতি.

৬৮৪. পুরিমকম্মভৰস্মিং মোহোতিআদি ৰুত্তত্থমেৰ. কম্মসহাযত্তা কিলেসৰট্টং কম্মৰট্টে পক্খিত্ৰা ৰুত্তং ‘‘কম্মৰট্টৰিপাকৰট্টৰসেনা’’তি.

৬৮৫. দিট্ঠধম্মো ৰুচ্চতি পচ্চক্খভূতো পচ্চুপ্পন্নো অত্তভাৰো, তত্থ ৰেদিতব্বফলং কম্মং দিট্ঠধম্মৰেদনীযং. পচ্চুপ্পন্নভৰতো অনন্তরং ৰেদিতব্বফলং কম্মং উপপজ্জৰেদনীযং. অপরাপরিযাযেতি দিট্ঠধম্মানন্তরানাগততো অঞ্ঞস্মিং অত্তভাৰপরিযাযে অত্তভাৰপরিৰত্তে. অহোসিকম্মন্তি অহোসি এৰ কম্মং, ন তস্স ৰিপাকো অহোসি, ‘‘অত্থি, ভৰিস্সতি ৰা’’তি এৰং ৰত্তব্বকম্মং. পটিপক্খেহি অনভিভূততায, পচ্চযৰিসেসেন পটিলদ্ধৰিসেসতায চ বলৰভাৰং পত্তা তাদিসস্স পুব্বাভিসঙ্খারস্স ৰসেন সাতিসযা হুত্ৰা পৰত্তা পঠমজৰনচেতনা তস্মিংযেৰ অত্তভাৰে ফলদাযিনী দিট্ঠধম্মৰেদনীযা নাম. সা হি ৰুত্তাকারেন বলৰতি জৰনসন্তানে গুণৰিসেসযুত্তেসু উপকারাপকারৰসপ্পৰত্তিযা, আসেৰনালাভেন অপ্পৰিপাকতায চ পঠমজৰনচেতনা ইতরদ্ৰযং ৰিয পৰত্তসন্তানুপরমাপেক্খং, ওকাসলাভাপেক্খঞ্চ কম্মং ন হোতীতি ইধেৰ পুপ্ফমত্তং ৰিয পৰত্তিৰিপাকমত্তং ফলং দেতি. তথা অসক্কোন্তন্তি কম্মস্স ৰিপাকদানং নাম উপধিপযোগাদিপচ্চযন্তরসমৰাযেনেৰ হোতীতি তদভাৰতো তস্মিংযেৰ অত্তভাৰে ৰিপাকং দাতুং অসক্কোন্তং. অত্থসাধিকাতি দানাদিপাণাতিপাতাদিঅত্থস্স নিপ্ফাদিকা. কা পন সাতি আহ ‘‘সত্তমজৰনচেতনা’’তি. সা হি সন্নিট্ঠাপকচেতনা ৰুত্তনযেন পটিলদ্ধৰিসেসা, পুরিমজৰনচেতনাহি লদ্ধাসেৰনা চ সমানা অনন্তরত্তভাৰে ৰিপাকদাযিনী উপপজ্জৰেদনীযকম্মং নাম. ‘‘সতি সংসারপ্পৰত্তিযা’’তি ইমিনা অসতি সংসারপ্পৰত্তিযং অহোসিকম্মপক্খে তিট্ঠতি ৰিপচ্চনোকাসস্স অভাৰতোতি দীপেতি.

৬৮৬. যং গরুকন্তি যং অকুসলং মহাসাৰজ্জং, কুসলং মহানুভাৰং কম্মং. যং বহুলন্তি যং বহুলং অভিণ্হসো কতং সমাসেৰিতং. মরণকালে অনুস্সরিতন্তি পরিব্যত্তভাৰেন মরণস্স আসন্নকালে অনুস্সরিতং. আসন্নকালে কতে ৰত্তব্বমেৰ নত্থীতি হি ৰুত্তং. ‘‘পুনপ্পুনং লদ্ধাসেৰন’’ন্তি ইমিনা ‘‘যং বহুল’’ন্তি ৰুত্তকম্মতো ৰিসেসেতি. তথা দিট্ঠধম্মৰেদনীযং নিৰত্তেতি পটিসন্ধিআকড্ঢনানুজাননতো. পটিসন্ধিজনকৰসেন হি গরুকাদিকম্মচতুক্কং ৰুত্তং.

তত্থ গরুকং সব্বপঠমং ৰিপচ্চতি. তথা হি তং গরুকন্তি ৰুত্তং. গরুকে অসতি বহুলীকতং, তস্মিং অসতি আসন্নং, তস্মিম্পি অসতি ‘‘কটত্তা ৰা পনা’’তি ৰুত্তং পুরিমজাতীসু কতকম্মং ৰিপচ্চতি. বহুলাসন্নপুব্বকতেসু চ বলাবলং ৰা জানিতব্বং, পাপতো পাপন্তরং, কল্যাণঞ্চ, কল্যাণতো চ কল্যাণন্তরং, পাপঞ্চ, বহুলীকততো চ মহতো চ পুব্বকতাদি, অপ্পঞ্চ. বহুলানুস্সরণেন ৰিপ্পটিসারাদিজননতো পটিপক্খস্স অপরিপুণ্ণতায আরদ্ধৰিপাকস্স কম্মস্স, কম্মসেসস্স ৰা অপরাপরিযাযে ৰেদনীযস্স অপরিক্খীণতায সন্ততিযা পরিণামৰিসেসতোতি তেহি তেহি কারণেহি আহিতবলং পঠমং ৰিপচ্চতি. মহানারদকস্সপজাতকে ৰিদেহরঞ্ঞো সেনাপতি অলাতো, বীজকো দাসো, রাজকঞ্ঞা রুচা চ এত্থ নিদস্সনং. তথা হি ৰুত্তং ভগৰতা –

‘‘তত্রানন্দ, য্ৰাযং পুগ্গলো ইধ পাণাতিপাতী…পে… মিচ্ছাদিট্ঠি কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. পুব্বে ৰাস্স তং কতং হোতি পাপকম্মং দুক্খৰেদনীযং, পচ্ছা ৰাস্স তং কতং হোতি পাপকম্মং দুক্খৰেদনীযং, মরণকালে ৰাস্স হোতি মিচ্ছাদিট্ঠি সমত্তা সমাদিন্না, তেন সো কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. যঞ্চ খো সো ইধ পাণাতিপাতী হোতি…পে… মিচ্ছাদিট্ঠি হোতি, তস্স দিট্ঠে ৰা ধম্মে ৰিপাকং পটিসংৰেদেতি উপপজ্জ ৰা অপরে ৰা পরিযাযে.

‘‘তত্রানন্দ, য্ৰাযং পুগ্গলো ইধ পাণাতিপাতী…পে… মিচ্ছাদিট্ঠি কাযস্স ভেদা পরং মরণা সুগতিং সগ্গং লোকং উপপজ্জতি. পুব্বে ৰাস্স তং কতং হোতি কল্যাণকম্মং সুখৰেদনীযং, পচ্ছা ৰাস্স তং কতং হোতি কল্যাণকম্মং সুখৰেদনীযং, মরণকালে ৰাস্স হোতি সম্মাদিট্ঠি সমত্তা সমাদিন্না, তেন সো কাযস্স ভেদা পরং মরণা সুগতিং সগ্গং লোকং উপপজ্জতি. যঞ্চ খো সো ইধ পাণাতিপাতী হোতি…পে… মিচ্ছাদিট্ঠি হোতি, তস্স দিট্ঠে ৰা ধম্মে ৰিপাকং পটিসংৰেদেতি উপপজ্জ ৰা অপরে ৰা পরিযাযে.

‘‘তত্রানন্দ, য্ৰাযং পুগ্গলো ইধ পাণাতিপাতা পটিৰিরতো…পে… সম্মাদিট্ঠি কাযস্স ভেদা পরং মরণা সুগতিং সগ্গং লোকং উপপজ্জতি. পুব্বে ৰাস্স তং কতং হোতি কল্যাণকম্মং সুখৰেদনীযং, পচ্ছা ৰাস্স তং কতং হোতি কল্যাণকম্মং সুখৰেদনীযং, মরণকালে ৰাস্স হোতি সম্মাদিট্ঠি সমত্তা সমাদিন্না, তেন সো কাযস্স ভেদা পরং মরণা সুগতিং সগ্গং লোকং উপপজ্জতি. যঞ্চ খো সো ইধ পাণাতিপাতা পটিৰিরতো…পে… সম্মাদিট্ঠি হোতি, তস্স দিট্ঠে ৰা ধম্মে ৰিপাকং পটিসংৰেদেতি উপপজ্জ ৰা অপরে ৰা পরিযাযে.

‘‘তত্রানন্দ, য্ৰাযং পুগ্গলো ইধ পাণাতিপাতা পটিৰিরতো…পে… সম্মাদিট্ঠি কাযস্স ভেদা পরং…পে… নিরযং উপপজ্জতি. পুব্বে ৰাস্স তং কতং হোতি পাপকম্মং দুক্খৰেদনীযং, পচ্ছা ৰাস্স তং কতং হোতি পাপকম্মং দুক্খৰেদনীযং, মরণকালে ৰাস্স হোতি মিচ্ছাদিট্ঠি সমত্তা সমাদিন্না, তেন সো কাযস্স ভেদা পরং মরণা অপাযং …পে… নিরযং উপপজ্জতি. যঞ্চ খো সো ইধ পাণাতিপাতা পটিৰিরতো হোতি…পে… সম্মাদিট্ঠি হোতি, তস্স দিট্ঠে ৰা ধম্মে ৰিপাকং পটিসংৰেদেতি উপপজ্জ ৰা অপরে ৰা পরিযাযে’’তি (ম. নি. ৩.৩০৩).

কিং বহুনা যং তং তথাগতস্স মহাকম্মৰিভঙ্গঞাণং, তস্সেৰাযং ৰিসযো, যদিদং তস্স তস্স কম্মস্স তেন তেন কারণেন পুব্বাপরৰিপাকতা সামত্থিযং.

৬৮৭. পটিসন্ধিদানাদিৰসেন ৰিপাকসন্তানস্স নিব্বত্তকং জনকং. তেনাহ ‘‘তং পটিসন্ধিযম্পি পৰত্তেপি রূপারূপৰিপাকক্খন্ধে জনেতী’’তি. সুখদুক্খসন্তানস্স, নামরূপপ্পবন্ধস্স ৰা চিরতরপ্পৰত্তিহেতুভূতং উপত্থম্ভকং. তেনাহ ‘‘সুখদুক্খং উপত্থম্ভেতি, অদ্ধানং পৰত্তেতী’’তি. উপপীল়কং সুখদুক্খপ্পবন্ধে পৰত্তমানে সণিকং সণিকং তং হাপেতি. তেনাহ ‘‘সুখদুক্খং পীল়েতি বাধতি, অদ্ধানং পৰত্তিতুং ন দেতী’’তি. ঘাতেত্ৰাতি উপচ্ছিন্দিত্ৰা. কম্মস্স উপচ্ছিন্দনং নাম তস্স ৰিপাকপটিবাহনমেৰাতি আহ ‘‘তস্স ৰিপাকং পটিবাহিত্ৰা’’তি. তঞ্চ অত্তনো ৰিপাকুপ্পত্তিযা ওকাসকরণন্তি ৰুত্তং ‘‘অত্তনো ৰিপাকস্স ওকাসং করোতী’’তি. ৰিপচ্চনায কতোকাসং কম্মং ৰিপক্কমেৰ নাম হোতীতি আহ ‘‘এৰং পন কম্মেন কতে ওকাসে তং ৰিপাকং উপ্পন্নং নাম ৰুচ্চতী’’তি. উপপীল়কং অঞ্ঞস্স ৰিপাকং উপচ্ছিন্দতি, ন সযং অত্তনো ৰিপাকং দেতি. উপঘাতকং পন দুব্বলং কম্মং উপচ্ছিন্দিত্ৰা অত্তনো ৰিপাকং উপ্পাদেতীতি অযমেতেসং ৰিসেসো. বৰ্হাবাধতাদিপচ্চযূপনিপাতেন ৰিপাকস্স ৰিবাধকং উপপীল়কং, তথা ৰিপাকস্সেৰ উপচ্ছেদকং উপঘাতকং. কম্মং উপঘাতেত্ৰা অত্তনো ৰিপাকস্স ওকাসকরণেন ৰিপচ্চনে সতি জনকমেৰ সিযা, জনকাদিভাৰো নাম ৰিপাকং পতি ইচ্ছিতব্বো, ন কম্মং পতীতি ৰিপাকস্সেৰ উপঘাতকতা যুত্তা ৰিয দিস্সতি, ৰীমংসিতব্বং.

কম্মন্তরন্তি কম্মৰিসেসো কম্মানং বলাবলভেদো. ৰিপাকন্তরন্তি ৰিপাকৰিসেসো, তস্স হীনপণীততাদিভেদো. অপরো নযো – যস্মিং কম্মে কতে পটিসন্ধিযং, পৰত্তে চ ৰিপাককটত্তারূপানং উপ্পত্তি হোতি, তং জনকং. যস্মিং পন কতে অঞ্ঞেন জনিতস্স ইট্ঠস্স ৰা অনিট্ঠস্স ৰা ফলস্স ৰিবাধকৰিচ্ছেদকপচ্চযানুপ্পত্তিযা, উপব্রূহনপচ্চযুপ্পত্তিযা চ জনকানুভাৰানুরূপং পরিপোসচিরতরপ্পবন্ধা হোন্তি, তং উপত্থম্ভকং. জনকেন নিব্বত্তিতং কুসলফলং ৰা অকুসলফলং ৰা যেন পচ্চনীকভূতেন রোগধাতুসমতাদিনিমিত্ততায বাধীযতি, তং উপপীল়কং. যেন পন কম্মুনা জনকসামত্থিযৰসেন চিরতরপ্পবন্ধারহম্পি সমানং ফলং ৰিচ্ছেদকপচ্চযুপ্পত্তিযা উপহঞ্ঞতি ৰিচ্ছিজ্জতি, তং উপঘাতকং. তত্থ কেচি দুতিযস্স কুসলভাৰং ইত্থন্নামগতস্স অপ্পাবাধদীঘাযুকতাসংৰত্তনৰসেন, পচ্ছিমানং দ্ৰিন্নং অকুসলভাৰং বৰ্হাবাধঅপ্পাযুকতাসংৰত্তনৰসেন ৰণ্ণেন্তি. দেৰদত্তাদীনং, পন নাগাদীনং, ইতো অনুপদিন্নেন যাপনকপেতানঞ্চ নরকাদীসু অকুসলৰিপাকুপত্থম্ভনুপপীল়নুপঘাতকানি ন ন সন্তীতি চতুন্নম্পি অকুসলাকুসলভাৰো ন ৰিরুজ্ঝতি. বুদ্ধাৰেণিকতায অসাধারণস্সেৰ ঞাণস্স গোচরভাৰতো কম্মন্তরাদি ‘‘অসাধারণং সাৰকেহী’’তি ৰুত্তং. একদেসতো জানিতব্বং অনৰসেসতো জানিতুং ন সক্কা অৰিসযত্তা. সব্বেন সব্বং অজাননে পচ্চযপরিগ্গহো ন পরিপূরতীতি.

৬৮৮. যথাৰুত্তং কম্মং ৰত্তমানৰিপাকপ্পবন্ধনিমিত্তমেৰ অধিপ্পেতন্তি কম্মেকদেসতায ‘‘দ্ৰাদসৰিধং কম্মং কম্মৰট্টে পক্খিপিত্ৰা’’তি ৰুত্তং. কিলেসৰট্টম্পি কম্মসহাযতায কম্মৰট্টপক্খিকমেৰ কত্ৰা আহ ‘‘কম্মৰট্টৰিপাকৰট্টৰসেনা’’তি. যাদিসতো পচ্চযতো পচ্চুপ্পন্নে অদ্ধানে নামরূপস্স পৰত্তি, তাদিসতো এৰ ইতরস্মিম্পি অদ্ধদ্ৰযেতি যথা অতীতানাগতে নযং নেতি, তং দস্সেন্তো ‘‘ইদ’’ন্তিআদিমাহ. তত্থ অনাগতেপি কম্মৰট্টৰিপাকৰট্টৰসেনেৰাতি এত্থ ৰুত্তং এৰ-সদ্দং ‘‘এতরহি অতীতেপী’’তি এত্থাপি আনেত্ৰা ৰত্তব্বং অদ্ধত্তযেপি কিরিযাকিরিযফলমত্ততাদস্সনপরত্তা চোদনায. ইতি কম্মঞ্চেৰাতিআদি ৰুত্তস্সেৰত্থস্স নিগমনৰসেন ৰুত্তং. অপরাপরং ৰট্টনট্ঠেন ৰট্টং. তথা পৰত্তনং পৰত্তং. হেতুফলভাৰেন সম্বন্ধতীতি সন্ততি, পবন্ধো. করণট্ঠেন, পচ্চযেহি করীযতীতি ৰা কিরিযা.

কম্মাতি কম্মতো. সম্ভৰতি এতস্মাতি সম্ভৰো, কম্মং সম্ভৰো এতস্সাতি কম্মসম্ভৰো, ৰিপাকো.

কারণসামগ্গিযং দানাদীহি সাধিতকিরিযায ৰত্তমানায কারণমত্তে কত্তুৰোহারোতি আহ ‘‘নেৰ কারণতো উদ্ধং কারকং পস্সতী’’তি. করোতীতি হি কারকং. ৰিপাকপটিসংৰেদকং ন পস্সতীতি সম্বন্ধো. কামং বালাপি ‘‘কারকো পটিসংৰেদকো’’তি ৰদন্তা অত্থতো পঞ্ঞত্তিমত্তমেৰ ৰদন্তি, তে পন ৰিপরীতাভিনিৰেসৰসেনাপি ৰদন্তীতি তং অপ্পমাণন্তি আহ ‘‘সমঞ্ঞামত্তেন পণ্ডিতা ৰোহরন্তী’’তি.

৬৮৯. এৰেতন্তি এৰংৰিধং এতং দস্সনং, সম্মদস্সনং, অৰিপরীতদস্সনন্তি অত্থো. বীজরুক্খাদিকানংৰাতি যথা বীজতো রুক্খো, রুক্খতো পুন বীজন্তি অনাদিকালিকত্তা বীজরুক্খসন্তানস্স পুব্বকোটি নত্থি, এৰং কম্মপচ্চযা ৰিপাকো, ৰিপাকপচ্চযা কম্মন্তি অনাদিকালিকত্তা কম্মৰিপাকসন্তানস্স পুব্বকোটি ন পঞ্ঞাযতি. আদি-সদ্দেন ‘‘কুক্কুটিযা অণ্ডং, অণ্ডতো কুক্কুটী, পুনপি কুক্কুটিযা অণ্ড’’ন্তি এৰমাদিং সঙ্গণ্হাতি. অনাগতেপি সংসারেতি যথা অতীতে, এৰং অনাগতেপি অদ্ধানে ‘‘খন্ধানঞ্চ পটিপাটী’’তিআদিনা (ৰিসুদ্ধি. ২.৬১৯; দী. নি. অট্ঠ. ২.৯৫ অপসাদনাৰণ্ণনা; সং. নি. অট্ঠ. ২.২.৬০; অ. নি. অট্ঠ. ২.৪.১৯৯; ধ. স. অট্ঠ. নিদানকথা; ৰিভ. অট্ঠ. ২২৬ সঙ্খারপদনিদ্দেস; সু. নি. অট্ঠ. ২.৫২৩; উদা. অট্ঠ. ৩৯; ইতিৰু. অট্ঠ. ১৪, ৫৮; থেরগা. অট্ঠ. ১.৬৭, ৯৯; পটি. ম. অট্ঠ. ২.১.১১৭; চূল়নি. অট্ঠ. ৬; বু. ৰং. অট্ঠ. ২.৫৮) ৰুত্তে সংসারে সতি কম্মৰিপাকানং অপ্পৰত্তং ন দিস্সতি, কম্মৰিপাকানং অপ্পৰত্তি ন দিস্সতি, পৰত্ততি এৰাতি অত্থো.

এতমত্থন্তি ‘‘কম্মস্স কারকো নত্থী’’তিআদিনা (ৰিসুদ্ধি. ২.৬৮৯) ৰুত্তমত্থং. অসযংৰসীতি ন সযংৰসিনো, মিচ্ছাভিনিৰেসপরৰসাতি অত্থো. অঞ্ঞমঞ্ঞৰিরোধিতাতি ইতরীতরৰিরোধিতা, দিট্ঠিযো, দিট্ঠিযা ৰা অঞ্ঞমঞ্ঞেন ৰিরোধিতা ৰিরুদ্ধা.

গম্ভীরঞাণগোচরতায গম্ভীরং. তথা নিপুণং. সত্তসুঞ্ঞতায, অঞ্ঞমঞ্ঞসভাৰসুঞ্ঞতায চ সুঞ্ঞং. পচ্চযন্তি নামরূপস্স পচ্চযং, তপ্পচ্চযপটিৰেধেনেৰ চ সব্বং পটিৰিদ্ধং হোতীতি. কম্মং নত্থি ৰিপাকম্হীতিআদীসু যং ৰত্তব্বং, তং হেট্ঠা ৰুত্তমেৰ.

পচ্চযসুঞ্ঞং ফলন্তি যথাৰুত্তমত্থং উপমায ৰিভাৰেতুং ‘‘যথা ন সূরিযে’’তিআদি ৰুত্তং. তেসন্তি সূরিযাদীনং. সোতি অগ্গি. সম্ভারেহীতি আতপাদীহি কারণেহি.

যদি চ হেতু চ ফলঞ্চ অঞ্ঞমঞ্ঞরহিতং, কথং হেতুতো ফলং নিব্বত্ততীতি আহ ‘‘কম্মঞ্চ খো উপাদাযা’’তি. ন কেৰলং কম্মফলমেৰ সুঞ্ঞং কত্তুরহিতং, সব্বম্পি ধম্মজাতং কারকরহিতন্তি দস্সেতুং ‘‘ন হেত্থ দেৰো’’তি গাথা ৰুত্তা. হেতুসম্ভারপচ্চযাতি হেতুসমূহনিমিত্তং, হেতুপচ্চযনিমিত্তং ৰা.

৬৯০. চুতিপটিসন্ধিৰসেন ৰিদিতা হোন্তীতি কম্মৰট্টৰিপাকৰট্টৰসেন পচ্চযপরিগ্গহস্স কতত্তা চুতিপটিসন্ধিৰসেন ৰিদিতা হোন্তীতি ৰদন্তি. ৰুত্তনযেন পন সপ্পচ্চযনামরূপস্স দস্সনেন তীসু অদ্ধাসু পহীনৰিচিকিচ্ছস্স অদ্ধত্তযপরিযাপন্না ধম্মা অতীতপচ্চুপ্পন্নানাগতভৰেসু চ চুতিপটিসন্ধিৰসেন ৰিদিতা হোন্তি, ন অনুপদধম্মৰসেন তথাপরিগ্গহস্স অকতত্তা. সাস্স হোতি ঞাতপরিঞ্ঞাতি যায নামরূপপরিগ্গহং, তস্স চ পচ্চযপরিগ্গহং করোতি, সা অস্স যোগিনো ‘‘ইদং নামং, এত্তকং নাম’’ন্তিআদিনা, ‘‘তস্স অযং পচ্চযো, এত্তকো পচ্চযো’’তিআদিনা চ পরিচ্ছেদৰসেন ঞাতৰতী পঞ্ঞাতি কত্ৰা ঞাতপরিঞ্ঞা.

ইদানি যেন কারণেন অদ্ধত্তযপরিযাপন্না ধম্মা চুতিপটিসন্ধিৰসেন ৰিদিতা হোন্তি, তং দস্সেতুং ‘‘সো এৰং পজানাতী’’তিআদি ৰুত্তং. তেন ধম্মানং ভৰন্তরসঙ্কমো নাম ন কদাচিপি অত্থি, তত্থ তত্থেৰ নিরুজ্ঝনতোতি দস্সেতি. সজ্ঝায মন্তোদকপান মুখমণ্ডন পদীপসীখূপমাহি তমেৰ ধম্মানং সঙ্কমাভাৰং ৰিভাৰেতুং ‘‘অপিচ খো’’তিআদিমাহ.

মনোধাতুঅনন্তরন্তি কিরিযমনোধাতুযা অনন্তরং লব্ভমানং চক্খুৰিঞ্ঞাণং. ন চেৰ আগতন্তি কিরিযমনোধাতুতো ন চেৰ আগতং কিরিযমনোধাতুযং চক্খুৰিঞ্ঞাণস্স অভাৰতো. নাপি ন নিব্বত্তং অনন্তরন্তি কিরিযমনোধাতুতো অনাগচ্ছন্তম্পি পচ্চযসামগ্গিলাভেন ততো অনন্তরং নাপি ন নিব্বত্তং, নিব্বত্তমেৰ হোতি. যথাযং পৰত্তিযং চিত্তপ্পৰত্তি, তথেৰ পটিসন্ধিম্হি ৰত্ততে চিত্তসন্ততি, চুতিচিত্ততো অনাগচ্ছন্তম্পি পটিসন্ধিচিত্তং ততো অনন্তরং নাপি ন নিব্বত্ততি, পচ্চযসামগ্গিৰসেন নিব্বত্ততেৰাতি অত্থো. সন্ততিগহণেন চেত্থ কুতোচি আগমাভাৰমেৰ ৰিভাৰেতি. হেতুফলভাৰেন হি সম্বন্ধতাতি ধম্মপ্পৰত্তি সন্ততীতি. তেনাহ ‘‘পুরিমং ভিজ্জতে চিত্ত’’ন্তিআদি. পুরিমন্তি চুতিচিত্তং. ভিজ্জতেতি নিরুজ্ঝতি. পচ্ছিমন্তি পটিসন্ধিচিত্তং. ততোতি চুতিচিত্ততো অনন্তরমেৰ জাযতি. যত্থ হি চুতিচিত্ততো দূরেপি কালন্তরেপি উপ্পজ্জমানং পটিসন্ধিচিত্তং অনন্তরমেৰ জাযতীতি ৰুচ্চতি. তস্মা তেসং অন্তরিকা নত্থি তেসং চুতিপটিসন্ধিচিত্তানং ব্যৰধাযকং কিঞ্চি নত্থি. ৰীচি তেসং ন ৰিজ্জতীতি তস্সেৰ ৰেৰচনং. ইতোতি চুতিচিত্ততো অনন্তরং ন চ গচ্ছতি কিঞ্চি চিত্তং. তঞ্হি সসম্পযুত্তধম্মং তথেৰ নিরুজ্ঝতি. পটিসন্ধি চাতি পটিসন্ধিৰিঞ্ঞাণঞ্চ অঞ্ঞমেৰ যথাপচ্চযং জাযতি নিব্বত্ততীতি পুনপি সঙ্কমাভাৰমেৰ ৰিভাৰেন্তো সপ্পচ্চযনামরূপদস্সনং নিগমেতি.

৬৯১. নামরূপগ্গহণেন, তস্স চ পচ্চযধম্মগ্গহণেন অগ্গহিতস্স তেভূমকধম্মস্স অভাৰতো ‘‘ৰিদিতসব্বধম্মস্সা’’তি ৰুত্তং. ন চেত্থ লোকুত্তরধম্মা অধিগতা. থামগতং হোতি অনেকাকারৰোকারপচ্চযপরিগ্গহৰিধিনো অনুট্ঠিতত্তা. সুট্ঠুতরং পহীযতি তিযদ্ধগতধম্মপ্পৰত্তিযা ৰিগতসম্মোহত্তা. সা এৰাতি সোল়সৰিধা কঙ্খা এৰ. যস্মা এত্থ ‘‘বুদ্ধো, ধম্মো, সঙ্ঘো, সিক্খা’’তি চ কঙ্খায গোচরভূতা লোকিযা ধম্মা অধিপ্পেতা. ন হি লোকুত্তরধম্মে আরব্ভ কিলেসা পৰত্তিতুং সক্কোন্তি. পুব্বন্তোতি অতীতা খন্ধাযতনধাতুযো. অপরন্তোতি অনাগতা. পুব্বন্তাপরন্তোতি তদুভযং, অদ্ধাপচ্চুপ্পন্নং ৰা তদুভযভাগযুত্তত্তা. এৰং বুদ্ধাদিগ্গহণেন, পটিচ্চসমুপ্পন্নধম্মগ্গহণেন চ গহিতো অট্ঠমো কঙ্খাৰিসযো নামরূপমত্তং, ইদপ্পচ্চযতাগ্গহণেন পন তস্স পচ্চযো গহিতো, তস্মা সোল়সৰত্থুকায কঙ্খায পহীনায অট্ঠৰত্থুকা কঙ্খা অপ্পতিট্ঠাৰ হোতীতি আহ ‘‘ন কেৰলঞ্চ…পে… পহীযতিযেৰা’’তি.

দিট্ঠেকট্ঠত্তা ৰিচিকিচ্ছায যথা দিট্ঠি সমুচ্ছিজ্জমানা ৰিচিকিচ্ছায সদ্ধিংযেৰ সমুচ্ছিজ্জতি, এৰং ৰিচিকিচ্ছা ৰিক্খম্ভিযমানা দিট্ঠিযা সদ্ধিংযেৰ ৰিক্খম্ভীযতীতি আহ ‘‘দ্ৰাসট্ঠি দিট্ঠিগতানি ৰিক্খম্ভন্তী’’তি. অত্তাভিনিৰেসূপনিস্সযা হি ‘‘অহোসিং নু খো অহ’’ন্তিআদি (ম. নি. ১.১৮; সং. নি. ২.২০) নযপ্পৰত্তা সোল়সৰত্থুকা কঙ্খা, সা এৰ চ পুব্বন্তাদিৰত্থুকভাৰেন ৰুত্তা. অত্তাভিনিৰেসৰত্থুকানি চ দ্ৰাসট্ঠি দিট্ঠিগতানি, বুদ্ধাদিৰত্থুকা চ কঙ্খা তদেকট্ঠাতি. ধরীযন্তি অত্তনো পচ্চযেহীতি ধম্মা, তিট্ঠতি এত্থ তদাযত্তৰুত্তিতায ফলন্তি ঠিতি, ধম্মানং ঠিতি ধম্মট্ঠিতি, পচ্চযধম্মো. অথ ৰা ধম্মোতি কারণং ‘‘ধম্মপটিসম্ভিদা’’তিআদীসু (ৰিভ. ৭১৮ আদযো) ৰিয, ধম্মস্স ঠিতি সভাৰো, ধম্মতো চ অঞ্ঞো সভাৰো নত্থীতি পচ্চযধম্মানং পচ্চযভাৰো ধম্মট্ঠিতি, ধম্মট্ঠিতিযং ঞাণং ধম্মট্ঠিতিঞাণং. সঙ্খারানং যং যং ভূতং অনিচ্চতাদি যথাভূতং, তত্থ ঞাণন্তি যথাভূতঞাণং. সম্মা পস্সতীতি সম্মাদস্সনং.

অৰিজ্জা পচ্চযোতি অৰিজ্জা হেতুআদিৰসেন সঙ্খারানং যথারহং পচ্চযো. ততো এৰ সঙ্খারা পচ্চযসমুপ্পন্না. উভোপেতেতি যস্মা অৰিজ্জাপি আসৰাদিৰসেন পচ্চযসম্ভূতাৰ, তস্মা অৰিজ্জা সঙ্খারাতি উভযেপি এতে ধম্মা পচ্চযসমুপ্পন্না. ইতীতি এৰং. পচ্চযপরিগ্গহে পঞ্ঞাতি পচ্চযানং পরিচ্ছিজ্জ গহণৰসেন পৰত্তা পঞ্ঞা. ৰুত্তনযেন ধম্মট্ঠিতিঞাণং.

নিমিত্তন্তি সঙ্খারনিমিত্তং, অত্থতো পঞ্চক্খন্ধা. তে হি ঘনসঞ্ঞাপৰত্তিযা ৰত্থুভাৰতো নিমিত্তং, সৰিগ্গহভাৰেন উপট্ঠানতো ৰা. যস্মা অনিচ্চতা নাম সঙ্খারানং অৰিপরীতাকারো. তত্থ নিচ্চতায লেসস্সাপি অভাৰতো অনিচ্চতো পস্সন্তো যথাভূতং জানাতি. তঞ্চ ঞাণং অৰিপরীতগ্গহণতায সম্মাদস্সনং. তংসমঙ্গিনা চ পচ্চুপ্পন্নেসু ৰিয অতীতানাগতেসুপি নযং নেন্তেন তে সুপরিৰিদিতা হোন্তি.

অনিচ্চতা চ নাম উপ্পত্তিমতো, উপ্পাদো চ পচ্চযৰসেনাতি অনিচ্চতা সিজ্ঝমানা সঙ্খারানং সপ্পচ্চযতং সাধেন্তী যথাৰুত্তকঙ্খপ্পহানায সংৰত্ততীতি ইমমত্থং দস্সেন্তো ‘‘অনিচ্চতো…পে… পহীযতী’’তি আহ. তত্থ তদন্ৰযেনাতি পচ্চক্খতো দিট্ঠস্স অনুগমনেন. এত্থাতি যথাদিট্ঠেসু ধম্মেসু. দুক্খতো মনসি করোন্তোতিআদীসুপি এসেৰ নযো. পৰত্তন্তি উপাদিন্নক্খন্ধপ্পৰত্তং. তঞ্হি কিলেসাভিসঙ্খারেহি পৰত্তিতত্তা সাতিসযং দুক্খভাৰেন উপট্ঠাতি. পৰত্তন্তি ঠাননিসজ্জাদিৰসেন দুক্খদুক্খতাদিৰসেন চ সঙ্খারপ্পৰত্তন্তি অপরে. ‘‘নিমিত্তং, পৰত্ত’’ন্তি চ ৰুত্তে অজ্ঝত্তবহিদ্ধাসন্তানসঞ্ঞিতে সব্বস্মিং সপ্পচ্চযে নামরূপে যাথাৰতো পৰত্তা একাৰ পঞ্ঞা পরিযাযৰসেন ‘‘যথাভূতঞাণ’’ন্তিপি ‘‘সম্মাদস্সন’’ন্তিপি তত্থ কঙ্খাৰিক্খম্ভনেন ‘‘কঙ্খাৰিতরণা’’তিপি ৰুচ্চতি. যথা ‘‘রুক্খো পাদপো তরূ’’তি ইমমত্থং দস্সেন্তো আহ ‘‘যঞ্চ যথাভূতঞাণ’’ন্তিআদি.

পরমত্থতো সাসনে অস্সাসো নাম অরিযফলং, পতিট্ঠা নাম অরিযমগ্গো, অযং পন অনধিগতমগ্গফলোপি তদধিগমুপাযপটিপত্তিযং ঠিতত্তা লদ্ধস্সাসো ৰিয, লদ্ধপতিট্ঠো ৰিয চ হোতীতি ৰুত্তং ‘‘লদ্ধস্সাসো লদ্ধপতিট্ঠো’’তি. অপরিহীনকঙ্খাৰিতরণৰিসুদ্ধিকো ৰিপস্সকো লোকিযাহি সীলসমাধিপঞ্ঞাসম্পদাহি সমন্নাগতত্তা উত্তরি অপ্পটিৰিজ্ঝন্তো সুগতিপরাযণো চ হোতীতি ৰুত্তং ‘‘নিযতগতিকো’’তি. ততো এৰ চূল়সোতাপন্নো নাম হোতি. সোতাপন্নো হি খীণাপাযদুগ্গতিৰিনিপাতোতি.

অথ ৰা লদ্ধস্সাসো দিট্ঠিৰিসুদ্ধিসমধিগমেন. নামরূপপরিচ্ছেদেন হি খন্ধাদিকে সভাৰসরসতো সল্লক্খেত্ৰা সাসনে ধম্মুপসংহিতপামোজ্জপ্পটিলাভেন লদ্ধস্সাসো হোতি. লদ্ধপতিট্ঠো কঙ্খাৰিতরণৰিসুদ্ধিসমধিগমেন. সপ্পচ্চযনামরূপদস্সনেন হি পরিমদ্দিতদিট্ঠিকণ্টকো ৰিনিদ্ধতঅহেতুৰিসমহেতুৰাদো যথাসকং পচ্চযেহেৰ ধম্মমত্তং জানিত্ৰা সাসনে পতিট্ঠিতসদ্ধো লদ্ধপতিট্ঠো নাম হোতি. নামরূপৰৰত্থানেন দুক্খসচ্চং, ধম্মট্ঠিতিঞাণেন সমুদযসচ্চং, তস্সেৰ অপরভাগেন অনিচ্চতো মনসিকারাদিৰিধিনা মগ্গসচ্চঞ্চ অভিঞ্ঞায পৰত্তিযা দুক্খভাৰং দিস্ৰা অপ্পৰত্তে নিরোধে একংসেনেৰ নিন্নজ্ঝাসযতায লোকিযেনেৰ ঞাণেন চতুন্নং অরিযসচ্চানং অধিগতত্তা অপাযেসু অভব্বুপ্পত্তিকো, সোতাপন্নভূমিযং ভব্বুপ্পত্তিকো চ হোতীতি ৰুত্তং ‘‘নিযতগতিকো’’তি. তেনাহ ‘‘চূল়সোতাপন্নো নাম হোতী’’তি.

তস্মাতি যস্মা এৰং মহানিসংসমেতং যথাভূতঞাণং, তস্মা. সদাতি সব্বকালং রত্তিঞ্চেৰ দিৰা চ. সব্বসোতি নিব্বত্তকহেতুআদিপরিগ্গণ্হনৰসেন সব্বপ্পকারেন.

কঙ্খাৰিতরণৰিসুদ্ধিনিদ্দেসৰণ্ণনা নিট্ঠিতা.

ইতি একূনৰীসতিমপরিচ্ছেদৰণ্ণনা.