সল়াযতনপচ্চযাফস্সপদৰিত্থারকথাৰণ্ণনা
৬৪২. বাৰীসতিযা লোকিযৰিপাকৰিঞ্ঞাণেহি সম্পযুত্তা বাৰীসতিলোকিযৰিঞ্ঞাণসম্পযুত্তা. ততো এৰ বাৰীসতি.
তত্থাতি তস্মিং সল়াযতনে, তেসু ছসু আযতনেসূতি অত্থো. অজ্ঝত্তন্তি সসন্ততিপরিযাপন্নমেৰ গণ্হাতি. তঞ্হি সসন্ততিপরিযাপন্নকম্মনিব্বত্তং তাদিসস্স ফস্সস্স পচ্চযো হোতি. রূপাদীনি, পন বহিদ্ধা অনুপাদিন্নানি চ ফস্সস্স আরম্মণং হোন্তি, ন তানি চক্খাদীনি ৰিয সসন্ততিপরিযাপন্নকম্মকিলেসনিমিত্তপ্পৰত্তিভাৰেন ফস্সস্স পচ্চযা হোন্তীতি পঠমাচরিযৰাদে ন গহিতানি, দুতিযাচরিযৰাদে পন যথা তথা ৰা পচ্চযভাৰে সতি ন সক্কা ৰজ্জেতুন্তি গহিতানি.
তত্থাতি সল়াযতনপচ্চযা ফস্সপদে. যে তাৰ আচরিযা মহাৰিহারৰাসিনোৰ যথা ৰিঞ্ঞাণং, এৰং নামরূপং, সল়াযতনং, ফস্সং, ৰেদনঞ্চ পচ্চযং, পচ্চযুপ্পন্নঞ্চ সসন্ততিপরিযাপন্নং দীপেন্তা ৰিপাকমেৰ ইচ্ছন্তি. ‘‘ছট্ঠাযতনপচ্চযা ফস্সো’’তি অভিধম্মভাজনীযপাল়ি (ৰিভ. ২৪৩) আরুপ্পং সন্ধায ৰুত্তাতি ‘‘ছট্ঠাযতনপচ্চযা ফস্সোতি পাল়িঅনুসারতো’’তি ৰুত্তং.
সব্বে ফস্সা ন সম্ভোন্তীতি যোজনা. যদি সব্বাযতনেহি একো ফস্সো সম্ভৰেয্য, ‘‘সল়াযতনপচ্চযা ফস্সো’’তি একস্স ৰচনং যুজ্জেয্য, অথাপি একম্হা আযতনা সব্বে ফস্সা সম্ভৰেয্যুং, তথাপি সব্বাযতনেহি সব্বফস্সসম্ভৰতো আযতনভেদেন ফস্সভেদো নত্থীতি তদভেদৰসেন একস্স ৰচনং যুজ্জেয্য, তথা পন অসম্ভৰতো ন যুত্তন্তি চোদেতি ‘‘ন সব্বাযতনেহী’’তিআদিনা. অঞ্ঞস্সাপি ৰা অসম্ভৰন্তস্স ৰিধানস্স বোধনত্থমেতং ৰুত্তং ‘‘নাপি একম্হা আযতনা সব্বে ফস্সা’’তি. ‘‘ন সব্বাযতনেহি একো ফস্সো সম্ভোতী’’তি ইদমেৰ পন একফস্সৰচনস্সাযুত্তত্তদীপকং কারণন্তি ৰেদিতব্বং. নিদস্সনৰসেন ৰা এতং ৰুত্তং. নাপি একম্হা আযতনা সব্বে ফস্সা সম্ভোন্তি, এৰং ন সব্বাযতনেহি একো ফস্সো সম্ভোতি. তস্মা একস্স ৰচনং অযুত্তন্তি. পরিহারং পন অনেকাযতনেহি একফস্সস্স সম্ভৰতোতি দস্সেন্তো ‘‘তত্রিদং ৰিস্সজ্জন’’ন্তিআদিমাহ. অৰসেসসম্পযুত্তধম্মাযতনা ফস্সৰজ্জিতা তংসম্পযুত্তচেতসিকা ধম্মা.
একোপি অনেকাযতনপ্পভৰো একোপনেকাযতনপ্পভৰো.
ছধা পচ্চযত্তে পঞ্চ ৰিভাৰযে, একং নৰধা পচ্চযত্তে, বাহিরানি ছ আযতনানি আরম্মণাদিনা যথাসম্ভৰং পচ্চযত্তে ৰিভাৰযেতি সম্বন্ধো.
অনেকভেদস্সাতি কুসলৰিপাকাদিপঞ্চদ্ৰারাদিৰসেন অনেকৰিধস্স দ্ৰিপঞ্চৰিঞ্ঞাণসম্পযুত্তৰজ্জস্স ৰিপাকফস্সস্স. তানি চাতি রূপাযতনাদীনি. ‘‘মনো চ নেসং গোচরৰিসযং পচ্চনুভোতী’’তি (ম. নি. ১.৪৫৫) হি ৰুত্তং. তথা চাতি পচ্চুপ্পন্নানি রূপাদীনি পচ্চুপ্পন্নঞ্চ ধম্মাযতনপরিযাপন্নং রূপরূপং সন্ধায ৰুত্তং. আরম্মণপচ্চযমত্তেনাতি তং সব্বং অপচ্চুপ্পন্নং, অঞ্ঞঞ্চ ধম্মাযতনং সন্ধায ৰুত্তং.