পট্ঠানপচ্চযকথাৰণ্ণনা

৫৯৪. তাৰাতি ৰত্তব্বন্তরাপেক্খো নিপাতো, তেন ‘‘অৰিজ্জা সঙ্খারানং পচ্চযো’’তি ইদং তাৰ সিদ্ধং, ইদং পন অপরং ৰত্তব্বন্তি দস্সেতি. ‘‘ইদং পন ৰত্তব্ব’’ন্তি যমত্থং সন্ধায ৰুত্তং, তং দস্সেতুং পচ্চযধম্মা নাম যেসং পচ্চযা হোন্তি, যথা ৰা পচ্চযা হোন্তি, তদুভযেসং বহুভাৰতো অনেকধাৰ পচ্চযা হোন্তীতি অৰিজ্জাযপি তং আসঙ্কন্তো পুচ্ছি ‘‘কতমেসং সঙ্খারানং কথং পচ্চযো হোতী’’তি, পুঞ্ঞাভিসঙ্খারাদযো বহূ সঙ্খারা ৰুত্তা. অৰিজ্জা চ তেসং পচ্চযো হোতি, ন সব্বেসং একধাৰ হোতি, তস্মা ইমেসং সঙ্খারানং এৰং পচ্চযো হোতীতি ইদং ৰত্তব্বন্তি অত্থো. তত্রাতি তস্মিং পচ্চযভাৰে. যদিপি ‘‘কতমেসং সঙ্খারান’’ন্তিআদিনা অসাধারণতো পুচ্ছা আরদ্ধা, একদেসেন পন সমুদাযোপলক্খণমেতন্তি দ্ৰাদসন্নং পটিচ্চসমুপ্পাদঙ্গানং যথাসকং পচ্চযুপ্পন্নানং পচ্চযভাৰো ৰত্তব্বোতি তং দস্সেতুং, অৰিজ্জায ৰা পচ্চযভাৰে পুচ্ছিতে তপ্পসঙ্গেন সব্বেসম্পি পচ্চযধম্মানং পচ্চযভাৰং ৰিসজ্জেতুকামো পচ্চযে তাৰ পাল়িনযেনেৰ দস্সেতুং ‘‘ভগৰতা হী’’তিআদি আরদ্ধং. তত্থ চ ভগৰতা চতুৰীসতি পচ্চযা ৰুত্তাতি সম্বন্ধো. তেসং ৰসেন অৰিজ্জাদীনং পচ্চযভাৰো ৰেদিতব্বোতি অধিপ্পাযো.

‘‘হেতু চ সো পচ্চযো চা’’তি ইমিনা ৰচনেন হেতুনো, অধিপতিপচ্চযাদিভূতস্স চ গহণং সিযাতি তং নিৰারেন্তো আহ ‘‘হেতু হুত্ৰা পচ্চযো’’তি. এৰম্পি সো এৰ দোসো আপজ্জতীতি পুন আহ ‘‘হেতুভাৰেন পচ্চযোতি ৰুত্তং হোতী’’তি. তেন ন ইধ হেতুসদ্দেন ধম্মগ্গহণং কতং, অথ খো ধম্মস্স সত্তিৰিসেসো গহিতোতি দস্সেতি. তস্স হি পচ্চযসদ্দস্স চ সমানাধিকরণতং সন্ধায ‘‘হেতু চ সো পচ্চযো চ, হেতু হুত্ৰা পচ্চযো’’তি চ ৰুত্তং. এৰঞ্চ কত্ৰা পরতো পাল়িযং ‘‘হেতূ হেতু…পে… হেতুপচ্চযেন পচ্চযো’’তিআদিনা (পট্ঠা. ১.১.১) তেন তেন হেতুভাৰাদিউপকারেন তস্স তস্স ধম্মস্স উপকারকত্তং ৰুত্তং. অভিধম্মট্ঠকথাযং পন ‘‘যো হি ধম্মো যং ধম্মং অপ্পচ্চক্খায তিট্ঠতি ৰা উপ্পজ্জতি ৰা, সো তস্স পচ্চযো’’তি (পট্ঠা. অট্ঠ. পচ্চযুদ্দেসৰণ্ণনা), ‘‘মূলট্ঠেন উপকারকো ধম্মো হেতুপচ্চযো’’তি (পট্ঠা. অট্ঠ. পচ্চযুদ্দেসৰণ্ণনা) চ এৰমাদিনা ধম্মপট্ঠাননিদ্দেসেন ধম্মতো অঞ্ঞা ধম্মসত্তি নাম নত্থীতি ধম্মেহেৰ ধম্মসত্তিৰিভাৰনং কতন্তি দট্ঠব্বং. ইধাপি ৰা ‘‘হেতু চ সো পচ্চযো চা’’তি ধম্মেনেৰ ধম্মসত্তিং দস্সেতি. ন হি ‘‘হেতুপচ্চযো’’তিআদিকো উদ্দেসো কুসলাদিউদ্দেসো ৰিয ধম্মপ্পধানো, অথ খো ধম্মানং উপকারকভাৰপ্পধানোতি.

‘‘এসেৰ নযো’’তি ইমিনা তব্ভাৰেন পচ্চযভাৰং আরম্মণাদীসু অতিদিসতি ‘‘আরম্মণঞ্চ তং পচ্চযো চাতি আরম্মণপচ্চযো, আরম্মণং হুত্ৰা পচ্চযো, আরম্মণভাৰেন পচ্চযোতি অত্থো’’তি, ন কম্মধারযমত্তং.

৫৯৫. ৰচনাৰযৰোতি সাধনাৰযৰং সন্ধাযাহ. ৰচনসভাৰঞ্হি সাধনং পরেসং অৰিদিতত্থঞাপনতো লোকে সাধনন্তি পাকটং পঞ্ঞাতং. তথা হি নং অৰযৰলক্খণং, ৰচনসভাৰঞ্চ সাধনং, অৰযৰপক্খাদীনি ৰচনানি সাধনন্তি চ ঞাযৰাদিনো ৰদন্তি. পটিঞ্ঞা, হেতূতিআদীসূতি পটিঞ্ঞা, হেতু, উদাহরণ, উপনয, নিগমনানি. উদাহরণসাধম্মিযা সাধ্যসাধনং হেতু. ৰিরূপো হেতূতি চ এৰমাদীসু কারণং যং কিঞ্চি কারণলক্খণং, সম্পাপকলক্খণম্পি ৰা. আদি-সদ্দেন তস্সাপি সঙ্গহেতব্বতায, ঞাপকলক্খণং পন ৰচনাৰযৰগ্গহণেন গহিতং. কামং মূলম্পি কারণলক্খণং কারণমেৰ, কারণন্তি পনেত্থ পচ্চযহেতু গহিতো. মূলন্তি হেতুহেতূতি কারণৰিসেসৰিসযত্তা মূলস্স ৰিসুং গহণং. এতীতি এতস্স অত্থৰচনং ৰত্ততীতি, তঞ্চ উপ্পত্তিট্ঠিতীনং সাধারণৰচনং. তেনেৰাহ ‘‘তিট্ঠতি ৰা উপ্পজ্জতি ৰা’’তি. একচ্চো হি পচ্চযো ঠিতিযা এৰ উপকারকো হোতি যথা পচ্ছাজাতপচ্চযো, একচ্চো উপ্পত্তিযা এৰ যথা অনন্তরাদিকো, একচ্চো উভযস্স যথা হেতুআদযো.

উপকারকলক্খণোতি চ ধম্মেন ধম্মসত্তিং উপকারং দস্সেতীতি দট্ঠব্বং. হিনোতি পতিট্ঠাতি এত্থাতি হেতু, অনেকত্থত্তা ধাতুসদ্দানং হি-সদ্দো মূলসদ্দো ৰিয পতিট্ঠত্থো ৰেদিতব্বো. হিনোতি ৰা এতেন কম্মনিদানভূতেন উদ্ধং ওজং অতিহরন্তেন মূলেন ৰিয পাদপো তপ্পচ্চযং ফলং গচ্ছতি পৰত্ততি ৰুদ্ধিং ৰিরুল়্হিং আপজ্জতীতি হেতু. অত্তনো ফলং করোতীতি কারণং. নিদদাতি দস্সেন্তং ৰিয হোতীতি নিদানং. সম্ভৰতি তং এতস্মাতি সম্ভৰো. পভৰতি এতস্মাতি পভৰোতি পচ্চযহেতুসদ্দেহি ইতরেসম্পি সমানত্থতা ৰেদিতব্বা. এৰং সন্তেপি কারণৰিসেসৰিসযো হেতুসদ্দো, কারণসামঞ্ঞৰিসযো পচ্চযসদ্দোতি দস্সেন্তো ‘‘মূলট্ঠেনা’’তিআদিমাহ. হেতুঅত্থো, পচ্চযট্ঠো চ হেট্ঠা পপঞ্চৰসেন ৰুত্তোতি তং সঙ্খিপ্পং দস্সেন্তো আহ ‘‘সঙ্খেপতো…পে… হেতুপচ্চযো’’তি.

যথা সালিৰীহিবীজাদীনি তংতংওসধীনং সালিৰীহিআদিভাৰস্স সাধকানি, মণিআদিপ্পভাৰত্থূনি চ নীলাদিৰণ্ণানি নীলাদিপ্পভাসাধকানি, এৰং হেতুপচ্চযো যথারহং অত্তনা সম্পযুত্তধম্মানং কুসলাদিভাৰস্স সাধকোতি ইমমত্থং দস্সেতি ‘‘সো সালিআদীন’’ন্তিআদিনা. আচরিযানন্তি চ রেৰতাচরিযং সন্ধাযাহ. এৰং সন্তেতি হেতুপচ্চযো যদি কুসলাদিভাৰসাধকো, এৰং সতি. ন সম্পজ্জতি ন সিজ্ঝতি. যথা কুসলাকুসলহেতু তংসমুট্ঠানরূপস্স কুসলাকুসলভাৰায ন পরিযত্তো, এৰং অব্যাকতোপি হেতু তংসমুট্ঠানরূপস্স অব্যাকতভাৰায. সভাৰেনেৰ হি তং অব্যাকতন্তি আহ ‘‘ন হি সো তেসং কুসলাদিভাৰং সাধেতী’’তি. হেতুপচ্চযো চ তেসং হোতিযেৰাতি আহ ‘‘ন চ পচ্চযো ন হোতী’’তি. ইদানি তমত্থং পাল়িযা সমত্থেতুং ‘‘ৰুত্তঞ্হেত’’ন্তিআদি ৰুত্তং. ৰিনা এতেনাতি এতেন হেতুনা অব্যাকতভাৰসাধকেন ৰিনা অহেতুকত্তা, অব্যাকতভাৰো সিদ্ধো সভাৰেনেৰাতি অধিপ্পাযো.

‘‘যোনিসো, ভিক্খৰে, মনসি করোতো অনুপ্পন্না চেৰ কুসলা ধম্মা উপ্পজ্জন্তি, উপ্পন্না চ কুসলা ধম্মা অভিৰড্ঢন্তী’’তিআদি (অ. নি. ১.৬৭) ৰচনেহি কুসলভাৰস্স যোনিসোমনসিকারপ্পটিবদ্ধতা সিদ্ধাতি আহ ‘‘যোনিসোমনসিকারপ্পটিবদ্ধো কুসলভাৰো’’তি. এতেনেৰ অকুসলঅব্যাকতভাৰাপি কুসলভাৰো ৰিয ন হেতুপটিবদ্ধাতি দস্সিতং হোতি. যং পনেকে মঞ্ঞেয্যুং ‘‘অহেতুকহেতুস্স অকুসলভাৰো ৰিয সহেতুকহেতূনম্পি সভাৰতোৰ কুসলাদিভাৰো, অঞ্ঞেসং তংসম্পযুত্তানং হেতুপটিবদ্ধো’’তি, তস্স উত্তরং ৰত্তুং ‘‘যদি চা’’তিআদিমাহ. অলোভো কুসলো ৰা সিযা অব্যাকতো ৰাতি যদি অলোভো সভাৰতো কুসলো, সো কুসলসভাৰত্তা অব্যাকতো ন সিযা. অথ অব্যাকতো তংসভাৰত্তা কুসলো ন সিযা অলোভসভাৰস্স অদোসত্তাভাৰো ৰিয. যস্মা পন উভযথাপি হোতি, তস্মা যথা উভযথা হোন্তেসু সদ্ধাদীসু সম্পযুত্তেসু হেতুপটিবদ্ধং কুসলাদিভাৰং পরিযেসেথ, ন সভাৰতো, এৰং হেতূসুপি কুসলাদিতা অঞ্ঞপটিবদ্ধা পরিযেসিতব্বা, ন সভাৰতোতি যং ৰুত্তং ‘‘সম্পযুত্তহেতূসু সভাৰতোৰ কুসলাদিভাৰো’’তি, তং ন যুজ্জতি. সা পন পরিযেসিযমানা যোনিসোমনসিকারাদিপটিবদ্ধা হোতীতি হেতূসু ৰিয সম্পযুত্তেসুপি যোনিসোমনসিকারাদিপটিবদ্ধো কুসলাদিভাৰো, ন হেতুপটিবদ্ধোতি সিদ্ধং হোতীতি অধিপ্পাযো.

ৰিরুল়্হমূলা ৰিযাতি এতেন মূলানি ৰিয মূলানীতি দস্সেতি. তেনেৰাহ ‘‘সুপ্পতিট্ঠিতভাৰসাধনেনা’’তি. স্ৰাযং ‘‘কুসলো ধম্মো কুসলস্স, কুসলো ধম্মো অব্যাকতস্স, কুসলো ধম্মো কুসলাব্যাকতস্স, অকুসলো ধম্মো অকুসলস্স, অকুসলো ধম্মো অব্যাকতস্স, অকুসলো ধম্মো অকুসলাব্যাকতস্স, অব্যাকতো ধম্মো অব্যাকতস্সা’’তি এৰং সত্তধা পঞ্হাৰারে নিদ্দিট্ঠো. যং পন ৰুত্তং হেতুকিচ্চং দস্সেন্তেন ‘‘হেতূ হেতুসম্পযুত্তকানং ধম্মানং, তংসমুট্ঠানানঞ্চ রূপানং হেতুপচ্চযেন পচ্চযো’’তি (পট্ঠা. ১.১.১), তত্থ পঠমো হেতুসদ্দো পচ্চত্তনিদ্দিট্ঠো পচ্চযধম্মনিদ্দেসো, তেনস্স হেতুভাৰেন উপকারকতা হেতুপচ্চযতাতি দস্সেতি. দুতিযো পচ্চযুপ্পন্নৰিসেসনং, তেন ন যেসং কেসঞ্চি সম্পযুত্তকানং হেতূ হেতুপচ্চযেন পচ্চযো, অথ খো হেতুনা সম্পযুত্তানমেৰাতি দস্সেতি. ননু চ সম্পযুত্তসদ্দস্স সাপেক্খত্তা দুতিযে হেতুসদ্দে অৰিজ্জমানেপি অঞ্ঞস্স অপেক্খিতব্বস্স অনিদ্দিট্ঠত্তা হেতূ অত্তনাৰ সম্পযুত্তকানং হেতুপচ্চযেন পচ্চযোতি অযমত্থো ৰিঞ্ঞাযতীতি? নাযমেকন্তো. হেতুসদ্দো হি পচ্চত্তনিদ্দিট্ঠো ‘‘হেতুপচ্চযেন পচ্চযো’’তি এত্থেৰ ব্যাৰটো যদা গয্হতি, ন তদা সম্পযুত্তৰিসেসনং হোতীতি সম্পযুত্তঅৰিসিট্ঠা যে কেচি গহিতা ভৰেয্যুন্তি. ননু চ যথা ‘‘অরূপিনো আহারা সম্পযুত্তকানং ধম্মানং, অরূপিনো ইন্দ্রিযা সম্পযুত্তকানং ধম্মান’’ন্তি চ ৰুত্তে দুতিযেন আহারগ্গহণেন, ইন্দ্রিযগ্গহণেন চ ৰিনাপি আহারিন্দ্রিযসম্পযুত্তকাৰ গয্হন্তি, এৰমিধাপি সিযাতি? ন, আহারিন্দ্রিযাসম্পযুত্তস্স ৰজ্জেতব্বস্স অভাৰতো. ৰজ্জেতব্বাভাৰতো হি তত্থ দুতিযে আহারিন্দ্রিযগ্গহণে অসতিপি তংসম্পযুত্তকাৰ গয্হন্তীতি তং ন কতং, ইধ পন ৰজ্জেতব্বং অত্থীতি কত্তব্বং দুতিযং হেতুগ্গহণং. এৰম্পি ‘‘হেতূ হেতুসম্পযুত্তকান’’ন্তি এত্থ হেতুসম্পযুত্তকানং সো এৰ সম্পযুত্তকহেতূতি ৰিসেসনস্স অকতত্তা যো কোচি হেতু যস্স কস্সচি হেতুসম্পযুত্তস্স হেতুপচ্চযেন পচ্চযোতি আপজ্জতীতি? নাপজ্জতি, পচ্চত্তনিদ্দিট্ঠস্সেৰ হেতুনো পুন সম্পযুত্তৰিসেসনভাৰেন ৰুত্তত্তা. এতদত্থমেৰ হি ৰিনাপি দুতিযেন হেতুসদ্দেন হেতুসম্পযুত্তভাৰে সিদ্ধেপি তস্স গহণং কতং.

অথ ৰা অসতি দুতিযে হেতুসদ্দে হেতুসম্পযুত্তকানং হেতুপচ্চযেন পচ্চযো, ন পন হেতূনন্তি এৰম্পি গহণং সিযাতি তন্নিৰারণত্থং সো ৰুত্তো. তেন হেতুসম্পযুত্তভাৰং যে লভন্তি, তেসং সব্বেসং হেতূনং, অঞ্ঞেসম্পি হেতূ হেতুপচ্চযেন পচ্চযোতি দস্সিতং হোতি. যস্মা পন হেতুঝানমগ্গা পতিট্ঠামত্তাদিভাৰেন অঞ্ঞধম্মনিরপেক্খা, ন আহারিন্দ্রিযা ৰিয সাপেক্খা এৰ, তস্মা এতেস্ৰেৰ দুতিযং হেতাদিগ্গহণং কতং. আহারিন্দ্রিযা পন আহরিতব্বঈসিতব্বাপেক্খা এৰ, তস্মা তে ৰিনাপি দুতিযেন আহারিন্দ্রিযগ্গহণেন অত্তনা এৰ আহরিতব্বে, ঈসিতব্বে চ আহারিন্দ্রিযভূতে, অঞ্ঞে চ সম্পযুত্তকে পরিচ্ছিন্দন্তীতি তং তত্থ ন কতং. ইধ চ দুতিযেন হেতুগ্গহণেন পচ্চযুপ্পন্নানং হেতুনা, পচ্চযভূতেনেৰ চ সম্পযুত্তানং হেতূনং, অঞ্ঞেসঞ্চ পরিচ্ছিন্নত্তা পুন ৰিসেসেন কিচ্চং নত্থীতি পঞ্হাৰারে ‘‘কুসলা হেতূ সম্পযুত্তকানং খন্ধান’’ন্তিআদীসু দুতিযং হেতুগ্গহণং ন কতন্তি দট্ঠব্বং.

৫৯৬. আরম্মণভাৰেনাতি ৰিসযভাৰেন, আলম্বিতব্বভাৰেনাতি অত্থো. আরভিত্ৰাপীতি পি-সদ্দেন ইমমত্থং দস্সেতি – রূপাযতনাদিমত্তে যস্মিং কিস্মিঞ্চি একস্মিং অট্ঠত্ৰা ‘‘যং যং ধম্মং আরব্ভা’’তি (পট্ঠা ১.১.২) অনিযমেন সব্বরূপাযতনানং…পে… সব্বধম্মাযতনানঞ্চ আরম্মণপচ্চযভাৰস্স ৰুত্তত্তা রূপাদিভেদেন ছব্বিধেসু সঙ্খতাসঙ্খতপঞ্ঞত্তিধম্মেসু ন কোচি ধম্মো আরম্মণপচ্চযো ন হোতীতি. স্ৰাযং আরম্মণপচ্চযভাৰো হেট্ঠা ৰিভাৰিতো এৰ. আলম্বিত্ৰাতি গহেত্ৰা. একন্তসারম্মণভাৰতো অনারব্ভ পৰত্তি এৰ নত্থীতি আহ ‘‘আরব্ভেৰা’’তি. স্ৰাযং ‘‘কুসলো ধম্মো কুসলস্স, কুসলো ধম্মো অকুসলস্স, কুসলো ধম্মো অব্যাকতস্স, অকুসলো ধম্মো অকুসলস্স, কুসলস্স, অব্যাকতস্স, অব্যাকতো ধম্মো অব্যাকতস্স, কুসলস্স, অকুসলস্সা’’তি এৰং নৰপ্পকারো ৰেদিতব্বো.

৫৯৭. জেট্ঠকট্ঠেনাতি পমুখভাৰেন. অত্তাধীনানঞ্হি পতিভূতো ধম্মো অধিপতি. সো তেসং পমুখভাৰেন পৰত্ততি. ‘‘ছন্দৰতো কিং নাম ন সিজ্ঝতী’’তিআদিকং পুরিমাভিসঙ্খারূপনিস্সযং লভিত্ৰা উপ্পজ্জমানে চিত্তুপ্পাদে ছন্দাদযো ধুরভূতা জেট্ঠকভূতা সম্পযুত্তধম্মে সাধযমানা ৰসে ৰত্তযমানা হুত্ৰা পৰত্তন্তি, সম্পযুত্তধম্মা চ তেসং ৰসেন ৰত্তন্তি হীনাদিভাৰেন তদনুৰত্তনতো, তেন তে অধিপতিপচ্চযা হোন্তি. গরুকাতব্বম্পি আরম্মণং তন্নিন্নপোণপব্ভারানং অস্সাদনপচ্চৰেক্খণমগ্গফলানং অত্তনো ৰসে ৰত্তযমানং ৰিয পচ্চযো হোতি. তস্মা অযং অত্তাধীনানং পতিভাৰেন উপকারকত্তা অধিপতিপচ্চযোতি দট্ঠব্বো. ছন্দাধিপতীতি ছন্দসঙ্খাতো অধিপতি, ছন্দং ধুরং ছন্দং জেট্ঠকং কত্ৰা চিত্তুপ্পত্তিকালে উপ্পন্নস্স কত্তুকম্যতাছন্দস্সেতং নামং. সেসেসুপি এসেৰ নযো. কস্মা পন যথা হেতুপচ্চযনিদ্দেসে ‘‘হেতূ হেতুসম্পযুত্তকান’’ন্তি (পট্ঠা. ১.১.১) ৰুত্তং, এৰমিধ ‘‘অধিপতী অধিপতিসম্পযুত্তকান’’ন্তি অৰত্ৰা ‘‘ছন্দাধিপতি ছন্দসম্পযুত্তকান’’ন্তিআদিনা (পট্ঠা. ১.১.৩) নযেন ৰুত্তন্তি? একক্খণে অভাৰতো. হেতৰো হি দ্ৰে তযোপি একক্খণে হেতুপচ্চযা হোন্তি, মূলট্ঠেন উপকারকভাৰস্স অৰিজহনতো. অধিপতি পন জেট্ঠকট্ঠেন উপকারকো, ন চ একক্খণে বহূ জেট্ঠকা হোন্তি. তস্মা একতো উপ্পন্নানম্পি তেসং একক্খণে অধিপতিপচ্চযভাৰো নত্থীতি ‘‘অধিপতী অধিপতিসম্পযুত্তকান’’ন্তি অৰত্ৰা ‘‘ছন্দাধিপতি ছন্দসম্পযুত্তকান’’ন্তিআদিনা নযেন ৰুত্তং.

যং যং ধম্মন্তি যং যং আরম্মণধম্মং. গরুং কত্ৰাতি গরুকারচিত্তীকারৰসেন ৰা অস্সাদনৰসেন ৰা গরুকারিকং লদ্ধব্বং অৰিজহিতব্বং অনৰঞ্ঞাতং কত্ৰা. তে তে ধম্মাতি তে তে গরুকাতব্বা ধম্মা. তেসং তেসন্তি তংতংগরুকারকধম্মানং. অধিপতিপচ্চযেনাতি আরম্মণাধিপতিপচ্চযেন. স্ৰাযং ‘‘কুসলো ধম্মো কুসলস্স সহজাতারম্মণেহি, অকুসলস্স আরম্মণেনেৰ, অব্যাকতস্স সহজাতারম্মণেহি, কুসলাব্যাকতস্স সহজাতেনেৰাতি কুসলমূলা চত্তারো, অকুসলো ধম্মো অকুসলস্স সহজাতারম্মণেহি, অব্যাকতস্স সহজাতেনেৰ, তথা অকুসলাব্যাকতস্সাতি অকুসলমূলা তযো, অব্যাকতো ধম্মো অব্যাকতস্স সহজাতারম্মণেহি, কুসলস্স আরম্মণেনেৰ, তথা অকুসলস্সাতি অব্যাকতমূলা তযো’’তি সঙ্খেপতো দসপ্পকারো অধিপতিপচ্চযো. এত্থ চ সত্তধা সহজাতাধিপতি, সত্তধা আরম্মণাধিপতি ৰেদিতব্বো.

৫৯৮. অন্তরাযতীতি অন্তরং, ব্যৰধাযকন্তি অত্থো. নাস্স অন্তরং ৰিজ্জতীতি অনন্তরো, অনন্তরো চ সো পচ্চযো চাতি অনন্তরপচ্চযো. ‘‘অত্থানন্তরতা অনন্তরপচ্চযো, কালানন্তরতা সমনন্তরপচ্চযো’’তিআদিনা বহুধা পপঞ্চযন্তি, অসারং গন্থৰিত্থারং করোন্তি. যথা পৰত্তিওকাসদানৰিসেসভাৰেন নত্থিৰিগতপচ্চযা ৰুত্তা, ন এৰং অনন্তরসমনন্তরপচ্চযা, এতে পন চিত্তনিযমহেতুভাৰেন ৰুত্তাতি তং চিত্তনিযমহেতুভাৰং দস্সেতুং ‘‘যো হি এসা’’তিআদি আরদ্ধং. তত্থ মনোৰিঞ্ঞাণধাতূতিআদি চিত্তনিযমোতি এত্থ আদি-সদ্দেন সন্তীরণানন্তরা ৰোট্ঠব্বনং, চুতিঅনন্তরা পটিসন্ধীতি যস্স যস্স চিত্তস্স অনন্তরা যং যং চিত্তং উপ্পজ্জতি, তস্স তস্স তদনন্তরুপ্পাদনিযমো তংতংসহকারিপচ্চযৰিসিট্ঠস্স পুরিমপুরিমচিত্তস্সেৰ ৰসেন ইজ্ঝতীতি দস্সেতি.

অত্থানন্তরতাযাতি অত্থেন কেনচি ধম্মেন অনন্তরতায. কালানন্তরতাযাতি কালভেদেন অনন্তরতায. আচরিযানন্তি ইধাপি রেৰতাচরিযমেৰ সন্ধায ৰুত্তং. তত্থাতি তস্মিং কালানন্তরতায সমনন্তরপচ্চযভাৰে, তস্মিং ৰা যথাৰুত্তৰিরোধে. ভাৰনাবলেন পন ৰারিতত্তাতি এত্থ যথা রুক্খস্স ৰেধে দিন্নে পুপ্ফিতুং সমত্থস্সেৰ পুপ্ফনং ন হোতি, ৰেধে পন অপনীতে তায এৰ সমত্থতায পুপ্ফনং হোতি, এৰমিধাপি ভাৰনাবলেন ৰারিতত্তা সমুট্ঠাপনসমত্থস্সেৰ অসমুট্ঠাপনং, তস্মিঞ্চ অপগতে তায এৰ সমত্থতায সমুট্ঠাপনং হোতীতি অধিপ্পাযো. তম্পি ৰচনং কালানন্তরতা নত্থি সত্তাহাদিনা কালেন অন্তরিতভাৰতো. এতদেৰ ‘‘কালন্তরিততা অত্থি’’ ইচ্চেৰ ৰদাম. ননু চ কালো নাম কোচি পরমত্থতো নত্থীতি ৰদেয্যাতি আসঙ্কন্তো আহ ‘‘কালানন্তর…পে… লদ্ধী’’তি.

ব্যঞ্জনমত্ততোৰেত্থ নানাকরণং পচ্চেতব্বং, ন অত্থতোতি উপচযসন্ততিঅধিৰচননিরুত্তিপদানং ৰিয সদ্দত্থমত্ততো নানাকরণং, ন ৰচনীযত্থতোতি অধিপ্পাযো. তেনেৰ সদ্দত্থৰিসেসং দস্সেতুং ‘‘কথ’’ন্তিআদিমাহ. তত্থ পুরিমপচ্ছিমানং নিরোধুপ্পাদন্তরাভাৰতো নিরন্তরুপ্পাদনসমত্থতা অনন্তরপচ্চযভাৰো. রূপকলাপানং ৰিয সণ্ঠানাভাৰতো, পচ্চযপচ্চযুপ্পন্নানং সহাৰট্ঠানাভাৰতো চ ‘‘ইদমিতো হেট্ঠা, উদ্ধং, তিরিয’’ন্তি ৰিভাগাভাৰা অত্তনা একত্তমিৰ উপনেত্ৰা সুট্ঠু অনন্তরভাৰেন উপ্পাদনসমত্থতা সমনন্তরপচ্চযতা. উপ্পাদনসমত্থতাতি চ অব্যাপারত্তা ধম্মানং যস্মিং যদাকারে নিরুদ্ধে, ৰত্তমানে ৰা সতি তংতংৰিসেসৰন্তো ধম্মা হোন্তি, তস্স সোৰ আকারো ৰুচ্চতীতি দট্ঠব্বো. ধম্মানং পৰত্তিমত্তমেৰ চ উপাদায কালৰোহারোতি নিরোধা ৰুট্ঠহন্তস্স নেৰসঞ্ঞানাসঞ্ঞাযতনফলসমাপত্তীনং অসঞ্ঞভৰা চৰন্তস্স, পুরিমচুতিপচ্ছিমপটিসন্ধীনঞ্চ নিরোধুপ্পাদনিরন্তরতায কালন্তরতা নত্থি. ন হি তেসং অন্তরা অরূপধম্মপ্পৰত্তি অত্থি, যং উপাদায কালন্তরতা ৰুচ্চেয্য, ন চ রূপধম্মপ্পৰত্তি অরূপধম্মপ্পৰত্তিযা অন্তরং করোতি অঞ্ঞসন্তানত্তা. রূপারূপসন্ততিযো হি দ্ৰে অঞ্ঞমঞ্ঞং ৰিসদিসসভাৰত্তা অঞ্ঞমঞ্ঞূপকারভাৰেন পৰত্তমানাপি ৰিসুংযেৰ হোন্তি. একসন্ততিযঞ্চ পুরিমপচ্ছিমানং মজ্ঝে পৰত্তমানং তংসন্ততিপরিযাপন্নতায অন্তরকারকং হোতি. তাদিসঞ্চ কিঞ্চি নেৰসঞ্ঞানাসঞ্ঞাযতনফলসমাপত্তীনং মজ্ঝে নত্থি, ন চ অভাৰো অন্তরকারকো হোতি অভাৰত্তা এৰ. তস্মা জৰনানন্তরস্স জৰনস্স ৰিয, ভৰঙ্গানন্তরস্স ভৰঙ্গস্স ৰিয চ নিরন্তরতা সুট্ঠু অনন্তরতা হোতীতি তথা উপ্পাদনসমত্থতা নেৰসঞ্ঞানাসঞ্ঞাযতনচুতীনম্পি দট্ঠব্বা. উপ্পত্তিযা পচ্চযভাৰো চেত্থ অনন্তরপচ্চযাদীনং পাকটোতি উপ্পাদনসমত্থতাৰ ৰুত্তা. পচ্চুপ্পন্নানং পন ধম্মানং পুব্বন্তাপরন্তপরিচ্ছেদেন গহিতানং উপ্পজ্জতীতি ৰচনং অলভন্তানং ‘‘অতীতো ধম্মো পচ্চুপ্পন্নস্স ধম্মস্স অনন্তরপচ্চযেন পচ্চযো’’তিআদিনা (পট্ঠা. ২.১৮.৪) অনন্তরাদিপচ্চযভাৰো ৰুত্তোতি ন সো উপ্পত্তিযা এৰাতি ৰিঞ্ঞাযতি. ন হি কুসলাদিগ্গহণং ৰিয পচ্চুপ্পন্নগ্গহণং অপরিচ্ছেদং. যতো উপ্পত্তিমত্তসমঙ্গিনো এৰ গহণং সিযা. তেনেৰ চ অতীতত্তিকে পটিচ্চৰারাদযো ন সন্তীতি. তস্স ‘‘কুসলো ধম্মো কুসলস্স, কুসলো ধম্মো অব্যাকতস্স, অকুসলো ধম্মো অকুসলস্স, অকুসলো ধম্মো অব্যাকতস্স, অব্যাকতো ধম্মো অব্যাকতস্স, অব্যাকতো ধম্মো কুসলস্স, অব্যাকতো ধম্মো অকুসলস্সা’’তি সত্তধা ভেদো ৰেদিতব্বো.

৫৯৯. উপ্পজ্জমানোৰ সহ উপ্পাদনভাৰেনাতি এত্থাপি উপ্পত্তিযা পচ্চযভাৰেন পাকটেন ঠিতিযাপি পচ্চযভাৰং নিদস্সেতীতি দট্ঠব্বং, অঞ্ঞথা পদীপনিদস্সনং ন যুজ্জেয্য. পদীপো হি পভাসস্স ঠিতিযাপি পচ্চযো, ন উপ্পত্তিযা এৰ. পচ্চযুপ্পন্নানং সহজাতভাৰেন উপকারকতা সহজাতপচ্চযতা. ওক্কন্তিক্খণেতি পটিসন্ধিক্খণে. তস্মিং হি খণে নামরূপং ওক্কন্তং ৰিয পরলোকতো আগন্ত্ৰা ইধ মাতুকুচ্ছিআদিং পৰিসন্তং ৰিয উপ্পজ্জতি, তস্মা সো খণো ওক্কন্তিক্খণোতি ৰুচ্চতি. এত্থ চ রূপন্তি হদযৰত্থুযেৰ অধিপ্পেতং. তঞ্হি নামস্স, নামঞ্চ তস্স সহজাতপচ্চযো হোতি. চিত্তচেতসিকাতি পৰত্তিযং চত্তারো খন্ধা পটিসন্ধিক্খণে চিত্তসমুট্ঠানানং অভাৰতো. রূপিনো ধম্মাতি হদযৰত্থুং সন্ধাযাহ. তত্থ যদিপি পুব্বে ‘‘ওক্কন্তিক্খণে নামরূপ’’ন্তি ৰুত্তং, তথাপি তেন খণন্তরে সহজাতপচ্চযভাৰো রূপধম্মানং ন নিৰারিতোতি তন্নিৰারণত্থমিদং ৰুত্তন্তি গহেতব্বং. কিঞ্চি কালেতি কেচি কিস্মিঞ্চি কালেতি অত্থো, তেন রূপিনো ধম্মা কেচি ৰত্থুভূতা কিস্মিঞ্চি পটিসন্ধিকালেতি অঞ্ঞেসং রূপধম্মানং, ৰত্থুনো চ পৰত্তিযং অরূপধম্মানং সহজাতপচ্চযভাৰং পুব্বে অনিৰারিতং নিৰারেতি. এৰঞ্চ কত্ৰা ‘‘কিঞ্চি কাল’’ন্তি ৰা ‘‘কিস্মিঞ্চি কালে’’তি ৰা ৰত্তব্বে তথা অৰত্ৰা ৰিভত্তিৰিপল্লাসং কত্ৰা ৰুত্তং. তেন কিঞ্চীতি উপযোগেকৰচনং. ‘‘রূপিনো ধম্মা’’তি এতেন সম্বন্ধে পচ্চত্তবহুৰচনং জাযতি. ‘‘কালে’’তি এতেন সম্বন্ধে ভুম্মেকৰচনন্তি দীপিতন্তি ৰেদিতব্বং. পুরিমেন চ ‘‘একো খন্ধো, ৰত্থু চ তিণ্ণন্নং খন্ধান’’ন্তি (পট্ঠা. ১.১.৪১৯) আদিৰচনেন নামসহিতং এৰ ৰত্থু নামস্স পচ্চযোতি ৰত্তব্বে আপন্নে ইতরেন কেৰলস্স চ তথাৰত্তব্বতং দস্সেতি. স্ৰাযং সহজাতপচ্চযো ‘‘কুসলো ধম্মো কুসলস্স, অব্যাকতস্স, কুসলাব্যাকতস্স, অকুসলো ধম্মো অকুসলস্স, অব্যাকতস্স, অকুসলাব্যাকতস্স, অব্যাকতো ধম্মো অব্যাকতস্স, কুসলাব্যাকতো ধম্মো অব্যাকতস্স, অকুসলাব্যাকতো ধম্মো অব্যাকতস্সা’’তি (পট্ঠা. ১.১.৪১৯) নৰৰিধো ৰেদিতব্বো.

৬০০. অত্তনো উপকারকস্স উপকারকতা অঞ্ঞমঞ্ঞপচ্চযতা. তথা হিস্স তিদণ্ডং নিদস্সিতং. উপকারকতা চ অঞ্ঞমঞ্ঞতাৰসেনেৰ দট্ঠব্বা, ন সহজাততাদিৰসেন. সহজাতাদিপচ্চযো হোন্তোযেৰ হি কোচি অঞ্ঞমঞ্ঞপচ্চযো ন হোতি, ন চ সহজাতাদিপচ্চযধম্মেহি ৰিনা ইমস্স পৰত্তি অত্থি. তথা হি সহজাতাদিপচ্চযো চ হোন্তোযেৰ হি কোচি অঞ্ঞমঞ্ঞপচ্চযো হোতি. যদি চ অত্তনো উপকারকস্স উপকারকতামত্তং অঞ্ঞমঞ্ঞপচ্চযো সিযা, পুরেজাতপচ্ছাজাতভাৰেন উপকারস্স উপকারকা ৰত্থুখন্ধা অঞ্ঞমঞ্ঞপচ্চযা সিযুং, ন চ তং ইচ্ছিতং. তেন ৰুত্তং ‘‘উপকারকতা চ অঞ্ঞমঞ্ঞৰসেনেৰ দট্ঠব্বা’’তি. অযঞ্চ উপ্পত্তিযা, ঠিতিযা চ উপকারকোতি ৰেদিতব্বো. অযং পন ‘‘কুসলো ধম্মো কুসলস্স, অকুসলো ধম্মো অকুসলস্স, অব্যাকতো ধম্মো অব্যাকতস্সা’’তি তিৰিধো ৰেদিতব্বো.

৬০১. তরুআদীনং পথৰী ৰিয অধিট্ঠানাকারেন পথৰীধাতু সেসধাতূনং, চক্খাদযো চক্খুৰিঞ্ঞাণাদীনং উপকারকা চিত্তকম্মস্স পটাদযো ৰিয নিস্সযাকারেন খন্ধাদযো তংতংনিস্সযানং খন্ধাদীনং. পথৰীধাতুযং পতিট্ঠায এৰ হি সেসধাতুযো উপাদারূপানি ৰিয যথাসকং কিচ্চং করোন্তি.

অধিট্ঠানাকারেনাতি আধারাকারেন. আধারাকারো চেত্থ তেসং সাতিসযং তদধীনৰুত্তিতায ৰেদিতব্বো. যতো ভূতানি অনিদ্দিসিতব্বট্ঠানানি ৰুচ্চন্তি, এৰঞ্চ কত্ৰা চক্খাদীনম্পি অধিট্ঠানাকারেন উপকারকতা সুট্ঠু যুজ্জতি. ন হি যথাৰুত্তং তদধীনৰুত্তিতাৰিসেসং মুঞ্চিত্ৰা অঞ্ঞো চক্খাদীসু অদেসকানং অরূপধম্মানং অধিট্ঠানাকারো সম্ভৰতি. যদিপি যং যং ধম্মং পটিচ্চ যে যে ধম্মা উপ্পজ্জন্তি, তেসং সব্বেসং তদধীনৰুত্তিভাৰো. যেন পন পচ্চযভাৰৰিসেসেন চক্খাদীনং পটুমন্দভাৰেসু চক্খুৰিঞ্ঞাণাদযো তদনুৰিধানাকারেনেৰ পৰত্তন্তি, স্ৰাযমিধ তেসং তদধীনৰুত্তিতাসিদ্ধো ৰিসেসোতি. এৰঞ্হি পচ্চযভাৰসামঞ্ঞে সতিপি আরম্মণপচ্চযতো নিস্সযপচ্চযস্স ৰিসেসো ৰিভাৰিতো হোতি. স্ৰাযং নযো হেট্ঠা পকাসিতোৰ. ছট্ঠো পনাতি এত্থ ‘‘রূপিনো ধম্মা অরূপীনং ধম্মানং কিস্মিঞ্চি কালে’’তি ইদং ন লব্ভতি. যং পনেত্থ লব্ভতি ‘‘রূপিনো ধম্মা কেচী’’তি, তত্থ তে এৰ ধম্মে দস্সেতুং ‘‘চক্খাযতন’’ন্তিআদি নিদ্দিট্ঠং. যং রূপন্তি হদযৰত্থুং সন্ধায ৰুত্তং. অযং পন নিস্সযপচ্চযো তেরসৰিধো. কথং? সহজাততো কুসলমূলা তযো, তথা অকুসলমূলা, অব্যাকতমূলেসু পন পুরেজাতং লব্ভতি. অব্যাকতঞ্হি অব্যাকতস্স সহজাতম্পি পচ্চযো হোতি, পুরেজাতম্পি কুসলস্স পুরেজাতমেৰ, তথা অকুসলস্স, কুসলাব্যাকতং সহজাতপুরেজাততো কুসলস্স, সহজাততো এৰ অব্যাকতস্স, তথা অকুসলাব্যাকত’’ন্তি এৰং তেরস.

৬০২. তদধীনৰুত্তিতায অত্তনো ফলেন নিস্সিতোতি যং কিঞ্চি কারণং নিস্সযোতি ৰত্ৰা তত্থ যো ভুসো নিস্সযো, তং উপনিস্সযোতি নিদ্ধারেতি. বলৰকারণভাৰেন উপকারকোতি আরম্মণভাৰৰসেন অনন্তরং অনুরূপচিত্তুপ্পাদনসমত্থতাৰসেন, কেৰলঞ্চ বলৰন্তং কারণং হুত্ৰা উপকারকো. তেনাহ ‘‘সো’’তিআদি.

তত্থ দানং দত্ৰাতি দেয্যধম্মং চজিত্ৰা. যায ৰা চেতনায সো দিয্যতি, সা চেতনা দানং. দত্ৰাতি তং চেতনং পরিযোদপেত্ৰা ৰিসুদ্ধং কত্ৰা. সীলং সমাদিযিত্ৰাতি পঞ্চঙ্গদসঙ্গাদিৰসেন নিচ্চসীলং গণ্হিত্ৰা. ইমিনা সমাদানৰিরতিযেৰ দস্সিতা, সম্পত্তৰিরতিসমুচ্ছেদৰিরতিযো পন লোকে ‘‘সীল’’ন্তি অপাকটত্তা ন ৰুত্তা. কিঞ্চাপি ন ৰুত্তা, আরম্মণপচ্চযো পন হোন্তিযেৰ. তত্থ সমুচ্ছেদৰিরতি সেক্খানংযেৰ কুসলস্স আরম্মণং হোতি, ন ইতরেসং. উপোসথকম্মন্তি ‘‘পাণং ন হনে, ন চাদিন্নমাদিযে’’তি (সু. নি. ৪০২) এৰং ৰুত্তং উপোসথসীলং. তং গরুং কত্ৰা পচ্চৰেক্খতীতি তং যথাৰুত্তং কুসলং সেক্খোপি পুথুজ্জনোপি পচ্চৰেক্খতি, অরহাপি তং পচ্চৰেক্খতেৰ. অরহতোপি হি পুব্বে কতং কুসলং কুসলমেৰ. যেন পন চিত্তেন পচ্চৰেক্খতি, তং কিরিযচিত্তং নাম হোতি. তস্মা ‘‘কুসলো কুসলস্সা’’তি ইমস্মিং অধিকারে ন লব্ভতি. পুব্বে সুচিণ্ণানীতি ‘‘দত্ৰা কত্ৰা’’তি হি আসন্নকতানি ৰুত্তানি, ইমিনা ন আসন্নকতানীতি ৰেদিতব্বানি, দানাদীহি ৰা সেসানি কামাৰচরকুসলানি দস্সেতুং ইদং ৰুত্তং. ঝানা ৰুট্ঠহিত্ৰাতি ঝানং সমাপন্নো ঝানতো ৰুট্ঠহিত্ৰা. ‘‘ঝানং ৰুট্ঠহিত্ৰা’’তিপি পাল়ি. সেক্খা গোত্রভুন্তি সোতাপন্নং সন্ধায ৰুত্তং. সো হি গোত্রভুং পচ্চৰেক্খতি. ‘‘ৰোদান’’ন্তি ইদং পন সকদাগামিঅনাগামিনো সন্ধায ৰুত্তং. তেসঞ্হি তং চিত্তং ৰোদানং নাম হোতি. সেক্খাতি সোতাপন্নসকদাগামিঅনাগামিনো. মগ্গা ৰুট্ঠহিত্ৰাতি মগ্গফলভৰঙ্গাতিক্কমৰসেন অত্তনা পটিলদ্ধমগ্গা ৰুট্ঠহিত্ৰা, সুদ্ধমগ্গতোযেৰ পন ৰুট্ঠায পচ্চৰেক্খণং নাম নত্থি. আদি-সদ্দেন ‘‘কুসলং অনিচ্চতো দুক্খতো অনত্ততো ৰিপস্সন্তী’’তি (পট্ঠা. ১.১.৪০৪) এৰমাদিং সঙ্গণ্হাতি. যদিপি নানত্তং অকত্ৰাৰ ৰিভত্তো, তথাপি ইদম্পি আরম্মণাধিপতিআরম্মণূপনিস্সযানং ৰিসেসোতি দস্সেতুং ‘‘তত্থা’’তিআদি ৰুত্তং.

নেসং চিত্তচেতসিকানং অনন্তরপচ্চযঅনন্তরূপনিস্সযানং নিক্খেপৰিসেসো অত্থি. যস্মা পুরিমো অব্যাকতধম্মৰসেন পৰত্তো, ইতরো কুসলাদিৰসেনপীতি সোপি নিক্খেপৰিসেসো অত্থতো একীভাৰমেৰ গচ্ছতি সব্বেসুপি চিত্তুপ্পাদেসু তদুভযস্স ইচ্ছিতব্বত্তা. এৰং সন্তেপীতিআদি অনন্তরঅনন্তরূপনিস্সযানং ৰিসেসদস্সনং. যথা হীতিআদি অনন্তরূপনিস্সযস্স সম্ভৰদস্সনং.

পকতোতি এত্থ প-কারো উপসগ্গো, সো অত্তনো ফলস্স উপ্পাদনসমত্থভাৰেন সুট্ঠুকততং দীপেতি. তথা চ কতং অত্তনো সন্তানে কতং হোতীতি আহ ‘‘অত্তনো সন্তানে’’তিআদি. করণঞ্চ দুৰিধং নিপ্ফাদনং, উপসেৰনঞ্চাতি তং দস্সেতুং ‘‘নিপ্ফাদিতো ৰা’’তিআদি ৰুত্তং. তত্থ নিপ্ফাদনং হেতুপচ্চযসমোধানেন ফলস্স নিব্বত্তনং. উপসেৰনং পন কাযে অল্লীযাপনৰসেন উপযোগূপসেৰনং, ৰিজাননসঞ্জাননাদীনং ৰসেন আরম্মণূপসেৰনঞ্চ. তেনেৰ অনাগতানম্পি উতুসম্পদাদীনং আরম্মণূপসেৰনেন উপসেৰিতানং পকতূপনিস্সযতা ৰুত্তা হোতি, পগেৰ অতীতপচ্চুপ্পন্নানং. পচ্চুপ্পন্নস্সাপি হি ‘‘পচ্চুপ্পন্নং উতুভোজনং সেনাসনং উপনিস্সায ঝানং উপ্পাদেতী’’তিআদিৰচনতো (পট্ঠা. ২.১৮.৮) পকতূপনিস্সযভাৰো লব্ভতীতি. পকতিযা এৰাতি পচ্চযন্তরসঙ্কররহিতেন অত্তনো সভাৰেনেৰ. উপনিস্সযোতি বলৰকারণং কত্ৰা. অনেকপ্পকারতো পভেদো ৰেদিতব্বো পঞ্হাৰারে আগতনযেন. পচ্চযৰারে পন –

‘‘পুরিমা পুরিমা কুসলা ধম্মা পচ্ছিমানং পচ্ছিমানং কুসলানং ধম্মানং উপনিস্সযপচ্চযেন পচ্চযো, পুরিমা পুরিমা কুসলা ধম্মা পচ্ছিমানং পচ্ছিমানং অকুসলানং ধম্মানং কেসঞ্চি, কুসলা অব্যাকতানং, অকুসলা অকুসলানং, কুসলানং কেসঞ্চি, অকুসলা অব্যাকতানং, অব্যাকতা অব্যাকতানং, অব্যাকতা কুসলানং, অব্যাকতা অকুসলানং, পুগ্গলোপি, সেনাসনম্পি উপনিস্সযপচ্চযেন পচ্চযো’’তি (পট্ঠা. ১.১.৯).

তত্থ যে পুরিমা যেসং পচ্ছিমানং অনন্তরূপনিস্সযো হোন্তি, তে তেসং সব্বেসম্পি একন্তেনেৰ হোন্তি, ন কেসঞ্চি কদাচি. তস্মা যেসু পদেসু অনন্তরূপনিস্সযো লব্ভতি, তেসু ‘‘কেসঞ্চী’’তি ন সক্কা ৰত্তুন্তি ন ৰুত্তং. যে পন পুরিমা যেসং পচ্ছিমানং আরম্মণূপনিস্সযো ৰা পকতূপনিস্সযো ৰা হোন্তি, তে তেসং, ন সব্বেসং একন্তেন হোন্তি. যেসং উপ্পত্তিৰিবন্ধকা পচ্চযা বলৰন্তো হোন্তি, তেসং ন ভৰন্তি, ইতরেসং ভৰন্তি. তস্মা যেসু পদেসু অনন্তরপচ্চযো ন লব্ভতি, তেসু ‘‘কেসঞ্চী’’তি ৰুত্তং. সিদ্ধানং পচ্চযধম্মানং যেহি পচ্চযুপ্পন্নেহি ভৰিতব্বং, তেসং ‘‘কেসঞ্চী’’তি অযমেত্থ অত্থো.

কসিণপঞ্ঞত্তিযা আরম্মণূপনিস্সযতাভাৰতো একচ্চায পঞ্ঞত্তিযা সদ্ধিং সব্বো ধম্মো আরম্মণূপনিস্সযো, অনন্তরাতীতো চিত্তচেতসিকরাসি অনন্তরূপনিস্সযো, কুসলাকুসলৰিপাককিরিযারূপৰসেন পঞ্চৰিধো পকতূপনিস্সযোতি অযমেত্থ সঙ্খেপো. ৰিত্থারো পন পট্ঠানট্ঠকথাযং ৰেদিতব্বো.

৬০৩. পঠমতরন্তি পচ্চযুপ্পন্নতো পুরেতরং. অযঞ্হি পুরেজাতপচ্চযো রূপধম্মৰসেনেৰ লব্ভতি. পচ্চযুপ্পন্নো চ অরূপধম্মাযেৰ. তেনাহ ‘‘ৰত্তমানভাৰেন উপকারকো’’তি. নিস্সযারম্মণাকারাদীহি ৰিসিট্ঠা পুরেজাতভাৰেন ৰিনা উপকারকভাৰং অগচ্ছন্তানং ৰত্থারম্মণানং পুরেজাতাকারেন উপকারকতা পুরেজাতপচ্চযতা. এৰং ৰত্থারম্মণৰসেন দুৰিধে পুরেজাতপচ্চযে ‘‘চক্খাযতন’’ন্তিআদি ৰত্থুৰসেন ৰুত্তং, ‘‘রূপারম্মণ’’ন্তিআদি আরম্মণৰসেন.

যং রূপন্তি হদযৰত্থুং সন্ধাযাহ. তত্থ ‘‘কিঞ্চি কালে’’তি পৰত্তিকালৰসেন ৰুত্তং. ‘‘কিঞ্চি কালেন’’ ইতি পটিসন্ধিকালৰসেন. যানি আরম্মণপুরেজাতেন ৰিনা ন ৰত্তন্তি, তেসং চক্খুৰিঞ্ঞাণাদীনং আরম্মণপুরেজাতদস্সনেন মনোদ্ৰারেপি যং যং আরম্মণপুরেজাতেন ৰত্ততি, তস্স তস্স আরম্মণপচ্চযভূতং সব্বং রূপরূপং আরম্মণপুরেজাতন্তি দস্সিতমেৰ হোতি. তথা হি ৰুত্তং পঞ্হাৰারে ‘‘আরম্মণপুরেজাতং সেক্খা ৰা পুথুজ্জনা ৰা চক্খুং অনিচ্চতো দুক্খতো অনত্ততো ৰিপস্সন্তী’’তিআদি (পট্ঠা. ১.১.৪২৪). ‘‘অব্যাকতো ধম্মো অব্যাকতস্স ধম্মস্স পুরেজাতপচ্চযেন পচ্চযো, অব্যাকতো ধম্মো কুসলস্স ধম্মস্স পুরেজাতপচ্চযেন পচ্চযো, অব্যাকতো ধম্মো অকুসলস্স ধম্মস্স পুরেজাতপচ্চযেন পচ্চযো’’তি (পট্ঠা. ১.১.৪২৪) অব্যাকতমূলকা তযোৰ ৰারা. তে চ পচ্চেকং ৰত্থুপুরেজাতং, আরম্মণপুরেজাতন্তি দ্ৰিধা ৰিভত্তা.

৬০৪. পচ্চযুপ্পন্নধম্মস্স পুরেতরং সিদ্ধভাৰে সতি পচ্চযধম্মস্স পচ্ছাজাততাতি ৰুত্তং ‘‘পুরেজাতান’’ন্তি. অযঞ্চ নযো রূপধম্মেসু এৰ লব্ভতি, ন অরূপধম্মেসূতি ৰুত্তং ‘‘রূপধম্মান’’ন্তি. যদি পচ্চযুপ্পন্নধম্মা পুরেতরমেৰ জাতা, কথং পচ্চযভাৰোতি আহ ‘‘উপথম্ভকত্তেনা’’তি. পচ্ছাজাতেন হি ৰিনা সন্তানাৰিচ্ছেদহেতুভাৰং অগচ্ছন্তানং ধম্মানং যে পচ্ছাজাতাকারেন উপকারকা, তেসং সা ৰিপ্পযুত্তাকারাদীহি ৰিসিট্ঠা উপকারকতা পচ্ছাজাতপচ্চযতা. এৰং সব্বপচ্চযানং পচ্চযন্তরাকারৰিসিট্ঠা উপকারকতা যোজেতব্বা. ‘‘গিজ্ঝপোতকসরীরানং আহারাসাচেতনা ৰিযা’’তি এতেন মনোসঞ্চেতনাহারৰসেন পৰত্তমানেহি অরূপধম্মেহি রূপকাযস্স উপত্থম্ভিতভাৰং দস্সেতি. তেনেৰ ‘‘আহারাসা ৰিযা’’তি অৰত্ৰা চেতনাগ্গহণং কতং. কাযস্সাতি চতুসমুট্ঠানিকভূতুপাদাযরূপসঙ্খাতস্স রূপকাযস্স. সঙ্খেপতো ঠপেত্ৰা রূপধম্মে অৰিসিট্ঠো অরূপক্খন্ধো পচ্ছাজাতপচ্চযো. সো জাতিৰসেন কুসলো, অকুসলো, ৰিপাকো, কিরিযাতি চতুব্বিধোতি ৰেদিতব্বং.

৬০৫. কুসলাদিভাৰেন অত্তনা সদিসস্স পযোগেন করণীযস্স পুনপ্পুনং করণং পৰত্তনং আসেৰনট্ঠো, অত্তসদিসসভাৰতাপাদনং ৰাসনং ৰা. পুরিমপুরিমাভিযোগো ৰিযাতি উগ্গহণসৰনধারণাদিপুরিমাপুরিমাসেৰনা ৰিয. তীসু পন এতেসু পুরিমা পুরিমাতি সমনন্তরাতীতা দট্ঠব্বা. কস্মা পনেত্থ অনন্তরপচ্চযে ৰিয ‘‘পুরিমা পুরিমা কুসলা ধম্মা পচ্ছিমানং পচ্ছিমানং অব্যাকতান’’ন্তিআদিনা ভিন্নজাতিযেহি সদ্ধিং নিদ্দেসো ন কতোতি? অত্তনো গতিং গাহেতুং অসমত্থত্তা. ভিন্নজাতিকা হি ভিন্নজাতিকানং আসেৰনগুণেন পগুণবলৰভাৰং সম্পাদেন্তা অত্তনোৰ কুসলাদিভাৰসঙ্খাতং গতিং গাহেতুং ন সক্কুণন্তি. তস্মা তেহি সদ্ধিং নিদ্দেসং অকত্ৰা যে যেসং ৰাসনাসঙ্খাতেন আসেৰনগুণেন পগুণবলৰভাৰৰিসিট্ঠং অত্তনো কুসলাদিভাৰসঙ্খাতং গতিং গাহেতুং সমত্থা, তেসং তেহি সমানজাতিকেহেৰ সদ্ধিং নিদ্দেসো কতোতি দট্ঠব্বো.

অথ ৰিপাকাব্যাকতং কস্মা ন গহিতং? আসেৰনাভাৰতো. ৰিপাকাব্যাকতঞ্হি কম্মৰসেন ৰিপাকভাৰপ্পত্তং কম্মপরিণামিতং হুত্ৰা পৰত্তমানং নিরুস্সাহং দুব্বলং সন্তং আসেৰনগুণেন অত্তনো সভাৰং গাহেত্ৰা পরিভাৰেত্ৰা নেৰ অঞ্ঞং ৰিপাকং পৰত্তেতি, ন চ পুরিমৰিপাকানুভাৰং গহেত্ৰা উপ্পজ্জতি, অথ খো কম্মৰেগক্খিত্তং পতিতং ৰিয হুত্ৰা উপ্পজ্জতি. তস্মা সব্বথাপি ৰিপাকে আসেৰনা নত্থীতি ন গহিতং. কুসলাকুসলকিরিযানন্তরং উপ্পজ্জমানম্পি সকম্মপটিবদ্ধৰুত্তিতায আসেৰনগুণং ন গণ্হাতীতি কুসলাদযোপি তস্স আসেৰনপচ্চযো ন হোন্তি. নানাজাতিকত্তাপি চেতে তস্স আসেৰনাধানং ন করোন্তেৰ. ভূমিতো, পন আরম্মণতো ৰা নানাজাতিকতা নাম নত্থীতি পরিত্তকুসলকিরিযা মহগ্গতকুসলকিরিযানং, সঙ্খারারম্মণঞ্চ কুসলং নিব্বানারম্মণস্স আসেৰনপচ্চযো হোতিযেৰ. স্ৰাযং ‘‘কুসলো ধম্মো কুসলস্স, অকুসলো ধম্মো অকুসলস্স, অব্যাকতো ধম্মো অব্যাকতস্স আসেৰনপচ্চযেন পচ্চযো’’তি (পট্ঠা. ১.১.৪২৬) তিধাৰ ৰুত্তো. অব্যাকতগ্গহণেন আৰজ্জনৰজ্জিতা কিরিযধম্মা গহিতা.

৬০৬. চিত্তপযোগো চিত্তকিরিযা, আযূহনন্তি অত্থো. যথা হি কাযৰচীপযোগো ৰিঞ্ঞত্তি, এৰং চিত্তপযোগো চেতনা. তেন হি সা উপ্পন্নকিরিযতাৰিসিট্ঠে সন্তানে সেসপচ্চযসমাগমে পৰত্তমানানং ৰিপাককটত্তারূপানম্পি তেনেৰ সন্তানৰিসেসেন কিরিযাভাৰেন উপকারিকা হোতি. তস্স হি কিরিযাভাৰস্স পৰত্তত্তা তেসং পৰত্তি, ন অঞ্ঞথা. সহজাতানং পন আযূহনকিরিযাভাৰেন পৰত্তমানা উপকারিকাতি কিং ৰত্তব্বং. কম্মন্তি চ চেতনাকম্মমেৰ অধিপ্পেতং. ন হি চেতনাসম্পযুত্তং কম্মং অভিজ্ঝাদি কম্মপচ্চযো হোতি. সতিপি ৰিপাকধম্মভাৰে চেতনাৰজ্জানং অতংসভাৰত্তা ৰিপাকাপি চেতনা সহজাতকম্মপচ্চযো হোতিযেৰ, স্ৰাযং কম্মপচ্চযো জাতিৰসেন চতুব্বিধোতি সব্বং ৰত্তব্বং.

৬০৭. ‘‘নিরুস্সাহসন্তভাৰেনা’’তি এতেন সউস্সাহেহি ৰিপাকধম্মধম্মেহি কুসলাকুসলেহি সারম্মণাদিভাৰেন সদিসানম্পি অসদিসং ৰিপাকভাৰং দস্সেতি. সো হি ৰিপাকানং পযোগেন অসাধেতব্বতায পযোগেন, অঞ্ঞথা ৰা সেসপচ্চযেসু সিদ্ধেসু কম্মস্স কটত্তা এৰ সিজ্ঝনতো নিরুস্সাহো সন্তভাৰো হোতি, ন কিলেসৰূপসন্তভাৰো. তথাসন্তভাৰতো এৰ হি ভৰঙ্গাদযো দুৰিঞ্ঞেয্যা. পঞ্চদ্ৰারেপি হি জৰনপ্পৰত্তিযা রূপাদীনং গহিততা ৰিঞ্ঞাযতি, অভিনিপাতসম্পটিচ্ছনসন্তীরণমত্তা পন ৰিপাকা দুৰিঞ্ঞেয্যা এৰ. নিরুস্সাহসন্তভাৰাযাতি নিরুস্সাহসন্তভাৰত্থায. এতেন তপ্পচ্চযৰন্তানং অৰিপাকানম্পি রূপধম্মানং ৰিপাকানুকূলং পৰত্তিং দস্সেতি. পৰত্তেতিআদি পঞ্হাৰারনযং গহেত্ৰা ৰুত্তং. পটিচ্চৰারে পন ‘‘ৰিপাকা চত্তারো খন্ধা অরূপিনো অঞ্ঞমঞ্ঞং ৰিপাকপচ্চযেন পচ্চযো’’তিআদিনা (পট্ঠা. ১.১.১৪) আগতা. এত্থ চ যেসং একন্তেন ৰিপাকো ৰিপাকপচ্চযো হোতি, তেসং ৰসেন নযদস্সনং কতন্তি দট্ঠব্বং. ন হি আরুপ্পে কামরূপভূমীসু ৰিয ৰিপাকো রূপস্স পচ্চযো হোতি.

৬০৮. সতিপি জনকভাৰে উপত্থম্ভকত্তং আহারানং পধানকিচ্চন্তি আহ ‘‘রূপারূপানং উপত্থম্ভকত্তেনা’’তি. উপত্থম্ভকত্তঞ্হি সতিপি জনকত্তে অরূপীনং আহারানং, আহারজরূপসমুট্ঠাপকরূপাহারস্স চ হোতি. অসতিপি চতুসমুট্ঠানিকরূপূপত্থম্ভকরূপাহারস্স, অসতি পন উপত্থম্ভকত্তে আহারানং জনকত্তং নত্থীতি উপত্থম্ভকত্তং পধানং. অথ ৰা জনযমানোপি আহারো অৰিচ্ছেদৰসেন উপত্থম্ভেন্তো জনেতীতি উপত্থম্ভনভাৰো এৰ আহারভাৰোতি ‘‘উপত্থম্ভকত্তেনা’’তি ৰুত্তং. কেচি পন ‘‘রূপাহারো অত্তনা জনিতস্স আহারপচ্চযো ন হোতি, অঞ্ঞেন জনিতস্স হোতি, তস্মা ‘উপত্থম্ভকত্তেনা’তি ৰুত্ত’’ন্তি ৰদন্তি. তং ‘‘আহারো রূপস্স পচ্চযো হোন্তো আহারপচ্চযো ন হোতীতি ৰিরুদ্ধমেত’’ন্তি অপরে নানুজানন্তি. রূপাহারো চেত্থ রূপধম্মানং এৰ আহারপচ্চযো হোতি. অরূপাহারা পন রূপধম্মানম্পি আহারপচ্চযো হোন্তি. তঞ্চ খো ন কেৰলং চিত্তসমুট্ঠানানং রূপানমেৰ, অথ খো কদাচি কটত্তারূপানম্পীতি দস্সেতুং ‘‘পঞ্হাৰারে পনা’’তিআদি ৰুত্তং.

৬০৯. অধিপতিযট্ঠেনাতি এত্থ ন অধিপতিপচ্চযধম্মানং ৰিয পৰত্তিনিৰারকে অভিভৰিত্ৰা পৰত্তনেন গরুভাৰো অধিপতিযট্ঠো, অথ খো দস্সনাদিকিচ্চেসু চক্খুৰিঞ্ঞাণাদীহি, জীৰনে কম্মজরূপেহি অরূপধম্মেহি চ জীৰন্তেহি, মননে সম্পযুত্তধম্মেহি, সুখিতাদিভাৰে সুখিতাদীহি, অধিমোক্খপগ্গহূপট্ঠানাৰিক্খেপপজাননেসু, ‘‘অনঞ্ঞাতং ঞস্সামী’’তি পৰত্তিযং আজাননে, অঞ্ঞাতাৰিভাৰে চ সদ্ধাদিসহজাতেহীতি এৰং তংতংকিচ্চেসু চক্খাদিপচ্চযেহি ধম্মেহি চক্খাদীনং অনুৰত্তনীযতা. তেসু হি কিচ্চেসু চক্খাদীনং ইস্সরিযং, তপ্পচ্চযানঞ্চ তদনুৰত্তনেন তত্থ পৰত্তি. কস্মা পনেত্থ ইত্থিপুরিসিন্দ্রিযদ্ৰযং ন গহিতং, ননু চেতম্পি লিঙ্গাদীহি অনুৰত্তীযতীতি? সচ্চং অনুৰত্তীযতি, ন পন পচ্চযভাৰতো. যথা হি জীৰিতাহারা যেসং পচ্চযা হোন্তি, তেসং অনুপালকউপত্থম্ভকা, অত্থিঅৰিগতপচ্চযভূতা চ হোন্তি, ন এৰং ইত্থিপুরিসভাৰা লিঙ্গাদীনং কেনচি পকারেন উপকারকা হোন্তি. যতো পচ্চযা সিযুং, কেৰলং পন যথাসকেহি এৰ পচ্চযেহি পৰত্তমানানং লিঙ্গাদীনং যথা ইত্থিআদিগ্গহণস্স পচ্চযভাৰো হোতি, ততো অঞ্ঞেনাকারেন তংসহিতসন্তানে অপ্পৰত্তিতো লিঙ্গাদীহি অনুৰত্তনীযতা, ইন্দ্রিযতা চ তেসং ৰুচ্চতি. তস্মা ন তেসং ইন্দ্রিযপচ্চযভাৰো ৰুত্তো. চক্খাদযো অরূপধম্মানংযেৰাতি এত্থ সুখিন্দ্রিযদুক্খিন্দ্রিযানিপি চক্খাদিগ্গহণেন গহিতানীতি দট্ঠব্বানি.

৬১০. লক্খণারম্মণূপনিজ্ঝানভূতানং ৰিতক্কাদীনং ৰিতক্কনাদিৰসেন আরম্মণং উপগন্ত্ৰা নিজ্ঝানং পেক্খনং, চিন্তনং ৰা ৰিতক্কাদীনংযেৰ আৰেণিকো ব্যাপারো উপনিজ্ঝাযনট্ঠো. ‘‘ঠপেত্ৰা দ্ৰিপঞ্চৰিঞ্ঞাণে সুখদুক্খৰেদনাদ্ৰয’’ন্তি ৰত্ৰাপি ‘‘সত্ত ঝানঙ্গানী’’তি ৰচনেন অঝানঙ্গানং উপেক্খাচিত্তেকগ্গতানং নিৰত্তনং কতন্তি দট্ঠব্বং. যদি এৰং ‘‘সত্ত ঝানঙ্গানী’’তি এতেনেৰ সিদ্ধে ‘‘ঠপেত্ৰা সুখদুক্খৰেদনাদ্ৰয’’ন্তি কস্মা ৰুত্তং? ৰেদনাভেদেসু পঞ্চসু সুখদুক্খদ্ৰযস্স একন্তেন অঝানঙ্গভাৰদস্সনত্থং ঝানঙ্গট্ঠানে নিদ্দিট্ঠত্তা, সতিপি ৰা ঝানঙ্গৰোহারে ৰেদনাভেদদ্ৰযস্স একন্তেন ঝানপচ্চযত্তাভাৰদস্সনত্থং. উপেক্খাচিত্তেকগ্গতানং পন যদিপি ঝানপচ্চযত্তাভাৰো অত্থি, নঝানপচ্চযভাৰো পন নত্থীতি সব্বানিপি সত্ত ঝানঙ্গানীতি এত্থ গহণং কতং. তত্থ ‘‘সব্বানিপী’’তি ৰচনং সব্বকুসলাদিভেদসঙ্গণ্হনত্থং, ন পন সব্বচিত্তুপ্পাদগতসঙ্গণ্হনত্থন্তি দট্ঠব্বং. যেসং পন ‘‘ঠপেত্ৰা দ্ৰিপঞ্চৰিঞ্ঞাণে ৰেদনাত্তয’’ন্তি পাঠো, তেসং যথাৰুত্তো ৰিচারো চিত্তেকগ্গতাৰসেনেৰ ৰেদিতব্বো.

৬১১. যতো ততো ৰাতি সম্মা ৰা মিচ্ছা ৰাতি অত্থো. পঞ্হাৰারে পনাতিআদি যদিপি পচ্চযনিদ্দেসে তংসমুট্ঠানগ্গহণেন সো অত্থো ঞাপিতো এৰ, পঞ্হাৰারে পন সরূপেনেৰ গহিতোতি দস্সনত্থং ৰুত্তং. এতে পন দ্ৰেপি…পে… ন লব্ভন্তি ‘‘যথাসঙ্খ্য’’ন্তি ৰচনসেসো ৰেদিতব্বো. পট্ঠানট্ঠকথাযং পন ‘‘দ্ৰেপি ঝানমগ্গপচ্চযা অহেতুকচিত্তেসু ন লব্ভন্তী’’তি ৰুত্তং. তেনস্স কথমৰিরোধোতি? অধিপ্পাযৰসেন. অযঞ্হি তত্থ অধিপ্পাযো – অহেতুকচিত্তেসু এৰ ঝানমগ্গপচ্চযা ন লব্ভন্তি, ন সহেতুকচিত্তেসূতি সহেতুকচিত্তেসু অলাভাভাৰদস্সনত্থং ৰুত্তং, ন অহেতুকচিত্তেসু লাভাভাৰদস্সনত্থন্তি. এৰঞ্হি অত্থে গয্হমানে অহেতুকচিত্তেসু কত্থচি কস্সচি লাভো ন নিৰারিতোতি ৰিঞ্ঞাযতি. তেন সৰিতক্কাহেতুকচিত্তেসু ঝানপচ্চযস্স সম্ভৰো অনুঞ্ঞাতো হোতি. তত্থ হি যেন অলাভেন ধম্মসঙ্গণিযং মনোধাতুআদীনং সঙ্গহসুঞ্ঞতৰারেসু ঝানং ন উদ্ধটং, তং অলাভং সন্ধায ঝানপচ্চযস্সপি অহেতুকচিত্তেসু অলাভো ৰুত্তো. যথা হি সহেতুকচিত্তুপ্পাদেসু ৰিতক্কাদীনং সহজাতে সঙ্কড্ঢিত্ৰা একত্তগতভাৰকরণং উপনিজ্ঝাযনব্যাপারো বলৰা, ন তথা অহেতুকচিত্তুপ্পাদেসূতি. ইধ পন দুব্বলম্পি উপনিজ্ঝাযনং যদি কিঞ্চিমত্তম্পি অত্থি, ন তেন উপকারকতা ন হোতীতি সৰিতক্কাহেতুকচিত্তেসুপি ঝানপচ্চযং অনুজানন্তেন ‘‘এতে পন দ্ৰেপি ঝানমগ্গপচ্চযা দ্ৰিপঞ্চৰিঞ্ঞাণাহেতুকচিত্তেসু ন লব্ভন্তী’’তি (পট্ঠা. অট্ঠ. পচ্চযুদ্দেসৰণ্ণনা) ৰুত্তং. পচ্চযকথা নাম সমন্তপট্ঠাননিস্সিতা, ন ধম্মসঙ্গণীনিস্সিতাতি.

৬১২. সমং অৰিসমং, সম্মা, সহ ৰা পকারেহি যুত্ততায একীভাৰূপগমেন ৰিয উপকারকতা সম্পযুত্তপচ্চযতা. কা পন সা পকারেহি যুত্ততাতি আহ ‘‘একৰত্থুকএকারম্মণএকুপ্পাদেকনিরোধসঙ্খাতেনা’’তি. তত্থ যে একৰত্থুকা, তে সম্পযুত্তাতি এত্তকে ৰুচ্চমানে অৰিনিব্ভোগরূপেসু একং মহাভূতং সেসমহাভূতুপাদারূপানং নিস্সযপচ্চযো হোতি, তেন তানি একৰত্থুকানি, চক্খাদিনিস্সযভূতানি ৰা ভূতানি একং ৰত্থু এতেসু নিস্সিতন্তি একৰত্থুকানীতি কপ্পেন্তস্স তেসং সম্পযুত্ততাপত্তি সিযাতি তন্নিৰারণত্থং একারম্মণগ্গহণং. যে একৰত্থুকা, একারম্মণা চ, তে সম্পযুত্তাতি এৰম্পি চুতিআসন্নানং সম্পটিচ্ছনসন্তীরণাদীনং সম্পযুত্ততা আপজ্জেয্যাতি একুপ্পাদগ্গহণং. যে একৰত্থুকেকারম্মণেকুপ্পাদা, তে সম্পযুত্তাতি কিং পন নানানিরোধাপি এৰংতিৰিধলক্খণা হোন্তি, উদাহু একনিরোধা এৰাতি ৰিচারণাযং একনিরোধা এৰ এৰংলক্খণা হোন্তীতি দস্সনত্থং ‘‘একনিরোধা’’তি ৰুত্তং.

পটিলোমতো ৰা একনিরোধা সম্পযুত্তাতি ৰুচ্চমানে একস্মিং খণে নিরুজ্ঝমানানং রূপারূপধম্মানং সম্পযুত্ততা আপজ্জেয্যাতি ‘‘একুপ্পাদা’’তি ৰুত্তং. এৰম্পি অৰিনিব্ভোগরূপানং অত্থি একুপ্পাদেকনিরোধতাতি তেসম্পি সম্পযুত্ততা আপজ্জেয্যাতি তন্নিৰারণত্থং একারম্মণগ্গহণং. যে একারম্মণা হুত্ৰা একুপ্পাদেকনিরোধা, তে সম্পযুত্তাতি অযঞ্চ নযো একৰত্থুকেসু এৰ লব্ভতি, ন নানাৰত্থুকেসূতি দস্সনত্থং একৰত্থুকগ্গহণং. যে একৰত্থুকেকারম্মণেকুপ্পাদেকনিরোধা, তে সম্পযুত্তাতি পঞ্চৰোকারভৰাপেক্খায চেতং একৰত্থুকগ্গহণং. আরুপ্পে পন ৰত্থুযেৰ নত্থীতি কুতো একৰত্থুকগ্গহণস্স অৰসরো.

৬১৩. অঞ্ঞমঞ্ঞং সম্বন্ধতায যুত্তানম্পি সমানানং ৰিপ্পযুত্তভাৰেন ৰিসংসট্ঠতায নানত্তূপগমেন উপকারকতা ৰিপ্পযুত্তপচ্চযতা. অযঞ্চ ৰিপ্পযুত্ততা ন সম্পযুত্তপচ্চযতায ৰিয অঞ্ঞমঞ্ঞং পচ্চযপচ্চযুপ্পন্নধম্মৰসেন গহেতব্বা, অথ খো ৰিসুংযেৰ. তত্থ হি অরূপধম্মানং সমানজাতিযতায সমধুরং, ইধ রূপারূপধম্মানং ৰিজাতিযতায ৰিধুরং. তেন ৰুত্তং ‘‘যুত্তানম্পি…পে… ৰিপ্পযুত্তপচ্চযতা’’তি. ন হি ৰত্থুসহজাতপচ্ছাজাতৰসেন অযুত্তানং রূপাদীনং আরম্মণাদিভাৰেন উপকারকানং ৰিপ্পযুত্তানম্পি ৰিপ্পযুত্তপচ্চযতা অত্থি. যথা হি ‘‘ৰত্থু খন্ধানং ৰিপ্পযুত্তপচ্চযেন পচ্চযো, সহজাতা কুসলা খন্ধা চিত্তসমুট্ঠানানং রূপানং, পচ্ছাজাতা কুসলা খন্ধা পুরেজাতস্স ইমস্স কাযস্স ৰিপ্পযুত্তপচ্চযেন পচ্চযো’’তিআদিৰচনতো (পট্ঠা. ১.১.৪৩৪) ৰত্থুনা, সহজাতপচ্ছাজাতৰসেন চ যুত্তানং অত্থি ৰিপ্পযুত্তপচ্চযভাৰো, ন এৰং অযুত্তানং অত্থীতি. যদি এৰং রূপানং রূপেহি কস্মা ৰিপ্পযুত্তপচ্চযো ন ৰুত্তোতি? রূপানং রূপেহি সতিপি অৰিনিব্ভোগে সম্পযোগো ৰিয ৰিপ্পযোগো (ধাতু. ৩) নত্থীতি ন তেসং ৰিপ্পযুত্তপচ্চযতা. ৰুত্তঞ্হি ‘‘চতূহি সম্পযোগো, চতূহি ৰিপ্পযোগো’’তি. সম্পযুজ্জমানানঞ্হি অরূপানং রূপেহি, রূপানঞ্চ তেহি সিযা সম্পযোগাসঙ্কাতি তেসং অঞ্ঞমঞ্ঞং ৰিপ্পযুত্তপচ্চযতা ৰুত্তা. রূপানং পন রূপেহি সম্পযোগো নত্থীতি ন তেসং ৰিপ্পযুত্তপচ্চযতা ৰুত্তা.

রূপিনো ধম্মা অরূপীনং ধম্মানং, অরূপিনোপি রূপীনন্তি এত্থ অরূপগ্গহণং চতুন্নং খন্ধানং ৰসেন ৰেদিতব্বং. অরূপধম্মেসু হি চত্তারো এৰ খন্ধা সহজাতপুরেজাতানং রূপধম্মানং ৰিপ্পযুত্তপচ্চযা হোন্তি. নিব্বানং পন যথা অরূপধম্মানং সম্পযুত্তপচ্চযো ন হোতি, এৰং রূপধম্মানং ৰিপ্পযুত্তপচ্চযো ন হোতি. ‘‘চতূহি সম্পযোগো, চতূহি ৰিপ্পযোগো’’তি (ধাতু. ৩) হি ৰুত্তং. তস্মা অরূপধম্মেসু চতুন্নং খন্ধানমেৰ ৰিপ্পযুত্তপচ্চযতা. ৰুত্তঞ্চ পঞ্হাৰারে ‘‘সহজাতা কুসলা খন্ধা চিত্তসমুট্ঠানানং রূপানং ৰিপ্পযুত্তপচ্চযেন পচ্চযো’’তিআদি (পট্ঠা. ১.১.৪৩৪). রূপিনো ধম্মাতি চেতং হদযৰত্থুনো চেৰ চক্খাদীনঞ্চ ৰসেন ৰেদিতব্বং. রূপধম্মেসু হি ছ ৰত্থূনিযেৰ অরূপক্খন্ধানং ৰিপ্পযুত্তপচ্চযো. রূপাযতনাদযো পন আরম্মণধম্মা কিঞ্চাপি ৰিপ্পযুত্তধম্মা, ৰিপ্পযুত্তপচ্চযো পন ন হোন্তি. কিং কারণা? সম্পযোগাসঙ্কাভাৰতো. অরূপক্খন্ধা হি চক্খাদীনং ৰত্থূনং অব্ভন্তরতো নিক্খমন্তা ৰিয উপ্পজ্জন্তীতি সিযা তত্থ আসঙ্কা ‘‘কিং নু খো ইমে ইমেহি সম্পযুত্তা, উদাহু ৰিপ্পযুত্তা’’তি? আরম্মণধম্মা পন ৰত্থুসন্নিস্সযেন উপ্পজ্জমানানং আরম্মণমত্তং হোন্তীতি নত্থি তেসু সম্পযোগাসঙ্কাতি ন তে ৰিপ্পযুত্তা. সম্পযোগাসঙ্কাসব্ভাৰতো ৰত্থূনিযেৰ ৰিপ্পযুত্তপচ্চযা হোন্তি. ৰুত্তম্পি চেতং পঞ্হাৰারে ‘‘ৰত্থু কুসলানং খন্ধানং ৰিপ্পযুত্তপচ্চযেন পচ্চযো, ৰত্থু অকুসলানং খন্ধানং, চক্খাযতনং চক্খুৰিঞ্ঞাণধাতুযা’’তিআদি. স্ৰাযং ৰিপ্পযুত্তপচ্চযো ‘‘সহজাতপচ্ছাজাততো কুসলেন অব্যাকতং, তথা অকুসলেন অব্যাকতং, সহজাতপুরেজাতপচ্ছাজাততো অব্যাকতেন অব্যাকতং, ৰত্থুপুরেজাততো অব্যাকতেন কুসলং, তথা অকুসলন্তি কুসলমূলমেকং, অকুসলমূলমেকং, অব্যাকতমূলানি তীণী’’তি পঞ্চৰিধো ৰেদিতব্বো.

৬১৪. পচ্চুপ্পন্নলক্খণেনাতি পচ্চুপ্পন্নসভাৰেন. তেন ‘‘অত্থি মে পাপকম্মং কতং, অত্থি পুগ্গলো অত্তহিতায পটিপন্নো’’তি (পু. প. চতুক্কউদ্দেস ২৪) চ এৰমাদীসু ৰুত্তং নিব্বত্তিতূপলব্ভমানতালক্খণং অত্থিভাৰং নিৰারেতি. সতিপি জনকত্তে উপত্থম্ভকত্তপ্পধানা অত্থিভাৰেন উপকারকতাতি আহ ‘‘উপত্থম্ভকত্তেনা’’তি. ইদঞ্চ উপত্থম্ভকত্তং ৰত্থারম্মণসহজাতাদীনং সাধারণং অত্থিভাৰেন উপকারকত্তন্তি দট্ঠব্বং. ‘‘সত্তধা মাতিকা নিক্খিত্তা’’তি ৰুত্তমত্থং পাল়িযা এৰ দস্সেতুং ‘‘যথাহা’’তিআদি ৰুত্তং. তত্থ ‘‘চত্তারো খন্ধা অরূপিনো’’তিআদিনা সহজাতৰসেন অত্থিপচ্চযোদস্সিতো, ‘‘চক্খাযতন’’ন্তিআদিনা পুরেজাতৰসেন, ‘‘যং রূপং নিস্সাযা’’তিআদিনা সহজাতপুরেজাতৰসেন. এৰমযং পাঠো সহজাতপুরেজাতঅত্থিপচ্চযৰসেনেৰ আগতো.

অঞ্ঞত্থ পন ততো অঞ্ঞথাপি আগতোতি দস্সেতুং ‘‘পঞ্হাৰারে পনা’’তিআদিমাহ. তং তেন পচ্ছাজাতাহারিন্দ্রিযৰসেনাপি অত্থিপচ্চযত্তং ৰিভাৰেতি. পুরিমপাঠে পন সাৰসেসা দেসনা কতাতি ৰেদিতব্বং. সতি চ যেসং পচ্চযা হোন্তি, তেহি একতো, পুরেতরং, পচ্ছা চ উপ্পন্নভাৰে সহজাতাদিপচ্চযত্তাভাৰতো আহারো, ইন্দ্রিযঞ্চ সহজাতাদিভেদং ন লভন্তি, তদভাৰো চ তেসং ধম্মসভাৰৰসেন দট্ঠব্বো. স্ৰাযং অত্থিপচ্চযো ‘‘সহজাততো কুসলেন কুসলং, সহজাতপচ্ছাজাততো কুসলেন অব্যাকতং, সহজাততো এৰ কুসলেন কুসলাব্যাকতন্তি কুসলমূলা তযো, তথা অকুসলমূলা. সহজাতপুরেজাতপচ্ছাজাতাহারিন্দ্রিযতো পন অব্যাকতেন অব্যাকতং, ৰত্থারম্মণপুরেজাততো অব্যাকতেন কুসলং, তথা অকুসলং. সহজাতপুরেজাততো কুসলঞ্চ অব্যাকতঞ্চ কুসলস্স, সহজাতপুরেজাতপচ্ছাজাতাহারিন্দ্রিযতো কুসলঞ্চ অব্যাকতঞ্চ অব্যাকতস্স, সহজাতপুরেজাততো অকুসলঞ্চ অব্যাকতঞ্চ অকুসলস্স, সহজাতপুরেজাতপচ্ছাজাতাহারিন্দ্রিযতো অকুসলঞ্চ অব্যাকতঞ্চ অব্যাকতস্সা’’তি এৰং তেরসৰিধো. সঙ্খেপেন কুসলাকুসলৰিপাককিরিযরূপৰসেন পঞ্চৰিধো অত্থিপচ্চযো, ন নিব্বানং. যো হি অত্থিভাৰাভাৰেন অনুপকারকো অত্থিভাৰং লভিত্ৰা উপকারকো হোতি, সো অত্থিপচ্চযো হোতি. নিব্বানঞ্চ নিব্বানারম্মণানং ন অত্তনো অত্থিভাৰাভাৰেন অনুপকারকং হুত্ৰা অত্থিভাৰলাভেন উপকারকং হোতীতি, উপ্পাদাদিযুত্তানং ৰা নত্থিভাৰোপকারকতাৰিরুদ্ধো উপকারকভাৰো অত্থিপচ্চযতাতি, ন নিব্বানং অত্থিপচ্চযো হোতি.

৬১৫. আরম্মণে ফুসনাদিৰসেন পৰত্তমানানং ফস্সাদীনং অনেকেসং সহভাৰো নত্থীতি একস্মিং ফস্সাদিসমুদাযে সতি দুতিযো ন হোতি, অসতি পন হোতীতি তেন নত্থিভাৰেন উপকারকতা নত্থিপচ্চযতা. সতিপি পুরিমতরচিত্তানং নত্থিভাৰে ন তেন তানি নত্থিভাৰেন উপকারকানি, অনন্তরমেৰ পন অত্তনো অত্থিভাৰেন পৰত্তিওকাসং অলভমানং নত্থিভাৰেন ওকাসং দদমানং ৰিয উপকারকং হোতীতি ‘‘পৰত্তিওকাসদানেন উপকারকা’’তি আহ. পটুপ্পন্নানন্তি পচ্চুপ্পন্নানং.

‘‘তে এৰা’’তি এতেন নত্থিৰিগতপচ্চযানং ধম্মতো ৰিসেসাভাৰমাহ. এৰং সন্তেপি অভাৰমত্তেন উপকারকতা ওকাসদানং নত্থিপচ্চযতা, সভাৰাৰিগমেন অপ্পৰত্তমানানং সভাৰৰিগমেন উপকারকতা ৰিগতপচ্চযতা. নত্থিতা চ নিরোধানন্তরা সুঞ্ঞতা, ৰিগততা নিরোধপ্পত্ততাতি অযমেতেসং ৰিসেসো.

অত্থিপচ্চযধম্মা এৰ চাতি চ-সদ্দো সম্পিণ্ডনত্থো. তেন ন কেৰলং নত্থিৰিগতপচ্চযা এৰ ধম্মতো অৰিসিট্ঠা, অথ খো অত্থিঅৰিগতপচ্চযাপীতি ইমমত্থং দীপেতি. যদিপিমে পচ্চযা ধম্মতো অৰিসিট্ঠা, তথাপি অত্থিতায সসভাৰতায উপকারকতা অত্থিপচ্চযতা, সভাৰাৰিগমেন নিরোধস্স অপ্পত্তিযা উপকারকতা অৰিগতপচ্চযতাতি পচ্চযভাৰৰিসেসো ধম্মাৰিসেসেপি ৰেদিতব্বো. ধম্মানঞ্হি সমত্থতাৰিসেসং সব্বং যাথাৰতো অভিসম্বুজ্ঝিত্ৰা ভগৰতা চতুৰীসতিপচ্চযৰিসেসা ৰুত্তাতি ধম্মস্সামিম্হি সদ্ধায ‘‘এৰং ৰিসেসা এতে ধম্মা’’তি সুতমযঞাণং উপ্পাদেত্ৰা চিন্তাভাৰনামযেহি তদভিসমযায যোগো করণীযো.

এত্থ চ আরম্মণঅনন্তরসমনন্তরউপনিস্সযপুরেজাতআসেৰনসম্পযুত্তনত্থিৰিগতপচ্চযা অরূপধম্মানংযেৰ, পচ্ছাজাতপচ্চযো রূপধম্মানংযেৰ, ইতরে চুদ্দস রূপারূপধম্মানং.

হেতুঅনন্তরসমনন্তরাসেৰনপচ্ছাজাতকম্মৰিপাকঝানমগ্গসম্পযুত্তনত্থিৰিগতপচ্চযা অরূপধম্মা এৰ, পুরেজাতপচ্চযো রূপমেৰ, উভযং আরম্মণূপনিস্সযে ঠপেত্ৰা সেসা, তে দ্ৰে পঞ্ঞত্তিসভাৰাপি হোন্তি.

অনন্তরসমনন্তরাসেৰননত্থিৰিগতপচ্চযা অতীতা এৰ. আরম্মণারম্মণাধিপতিআরম্মণূপনিস্সযা তিকালিকা, কালৰিনিমুত্তা চ. কম্মপচ্চযো অতীতপচ্চুপ্পন্নৰসেন দ্ৰিকালিকো. সেসা পঞ্চদস পচ্চুপ্পন্নাৰ.

তথা অনন্তরসমনন্তরঅনন্তরূপনিস্সযপকতূপনিস্সযাসেৰনপচ্চযা, নানাক্খণিককম্মপচ্চযো, নত্থিৰিগতপচ্চযা চাতি ইমে পচ্চযা জনকা এৰ, ন উপত্থম্ভকা. পচ্ছাজাতপচ্চযো উপত্থম্ভকো এৰ, ন জনকো. সেসা জনকা চ উপত্থম্ভকা চাতি অযম্পি ৰিসেসো ৰেদিতব্বো.