২. দোসপরিহারাৰবোধ-দুতিযপরিচ্ছেদ

৬৮. কদাচি কৰিকোসল্লা, ৰিরোধো সকলো প্য’যং;

দোসসঙ্খ্য মতিক্কম্ম, গুণৰীথিং ৰিগাহতে.

৬৯. তেন ৰুত্তৰিরোধান, মৰিরোধো যথা সিযা;

তথা দোসপরিহারা, ৰবোধো দানি নীযতে.

তত্থ ৰিরুদ্ধত্থন্তরস্স পরিহারো যথা

৭০. ৰিন্দন্তং পাকসালীনং, সালীনং দস্সনা সুখং;

তং কথং নাম মেঘো’যং, ৰিসদো সুখযে জনং?

যথা ৰা

৭১. ৰিনাযকোপি নাগো সি, গোতমোপি মহামতি;

পণীতোপি রসা’পেতো, চিত্তা মে সামি তে গতি.

অঝ’ত্থস্স যথা

৭২. কথং তাদিগুণাভাৰে, লোকং তোসেতি দুজ্জনো?

ওভাসিতাসেসদিসো, খজ্জোতো নাম কিং ভৰে?

৭৩. পহেলিকায [পহেল়িকায (ক.)] মারুল়্হা, ন হি দুট্ঠা কিলিট্ঠতা;

পিযা সুখা’লিঙ্গিতং ক, মালিঙ্গতি নু নো ইতি.

৭৪. যমকে নো পযোজেয্য, কিলিট্ঠপদ মিচ্ছিতে;

ততো যমক মঞ্ঞং তু, সব্ব মেতংমযং ৰিয.

দেসৰিরোধিনো যথা

৭৫. বোধিসত্তপ্পভাৰেন, থলেপি জলজান্য’হুং;

নুদন্তানি’ৰ সুচিরা, ৰাসক্লেসং তহিং জলে.

কালৰিরোধিনো যথা

৭৬. মহানুভাৰ পিসুনো, মুনিনো মন্দ মারুতো;

সব্বোতুকমযং ৰাযি, ধুনন্তো কুসুমং সমং.

কলাৰিরোধিনো যথা

৭৭. নিমুগ্গমানসো বুদ্ধ, গুণে পঞ্চসিখস্সপি;

তন্তিস্সর ৰিরোধো সো, ন সম্পীণেতি কং জনং?

লোকৰিরোধিনো যথা

৭৮. গণযে চক্কৰাল়ং সো, চন্দনাযপি সীতলং;

সম্বোধি সত্ত হদযো, পদিত্ত’ঙ্গারপূরিতং.

ঞাযৰিরোধিনো যথা

৭৯. পরিচ্চত্তভৰোপি ত্ৰ, মুপনীতভৰো অসি;

অচিন্ত্যগুণসারায, নমো তে মুনিপুঙ্গৰ.

আগমৰিরোধিনো যথা

৮০. নেৰা’লপতি কেনা’পি, ৰচীৰিঞ্ঞত্তিতো যতি;

সম্পজানমুসাৰাদা, ফুসেয্যা’পত্তিদুক্কটং.

নেয্যস্স যথা

৮১. মরীচিচন্দনা’লেপ, লাভা সীতমরীচিনো;

ইমা সব্বাপি ধৰলা, দিসা রোচন্তি নিব্ভরং.

যথা ৰা

৮২. মনোনুরঞ্জনো মার, ঙ্গনাসিঙ্গারৰিব্ভমো;

জিনেনা’সমনুঞ্ঞাতো, মারস্স হদযা’নলো.

ৰিসেসনাপেক্খস্স যথা

৮৩. অপযাতা’পরাধম্পি, অযং ৰেরী জনং জনো;

কোধপাটলভূতেন, ভিয্যো পস্সতি চক্খুনা.

হীনত্থস্স যথা

৮৪. অপ্পকানম্পি পাপানং, পভাৰং নাসযে বুধো;

অপি নিপ্পভাতা’নীত, খজ্জোতো হোতি ভাণুমা.

অনত্থস্স যথা

৮৫. ন পাদপূরণত্থায, পদং যোজেয্য কত্থচি,

যথা ৰন্দে মুনিন্দস্স, পাদপঙ্কেরুহং ৰরং.

৮৬. ভযকোধপসংসাদি, ৰিসেসো তাদিসো যদি;

ৰত্তুং কামীযতে দোসো, ন তত্থে’কত্থতাকতো.

যথা

৮৭. সপ্পো সপ্পো! অযং হন্দ, নিৰত্ততু ভৰং ততো,

যদি জীৰিতুকামো’সি, কথং ত মুপসপ্পসি?

ভগ্গরীতিনো যথা

৮৮. যোকোচি রূপা’তিসযো, কন্তি কাপি মনোহরা;

ৰিলাসা’তিসযো কোপি,

অহো! বুদ্ধমহো’দযো.

৮৯. অব্যামোহকরং বন্ধং, অব্যাকিণ্ণং মনোহরং;

অদূরপদ ৰিন্যাসং, পসংসন্তি কৰিস্সরা.

যথা

৯০. নীলুপ্পলা’ভং নযনং, বন্ধুকরুচিরো’ধরো;

নাসা হেম’ঙ্কুসো তেন, জিনো’যং পিযদস্সনো.

৯১. সমতিক্কন্ত গাম্মত্তং, কন্ত ৰাচা’ভিসঙ্খতং;

বন্ধনং রসহেতুত্তা, গাম্মত্তং অতিৰত্ততি.

যথা

৯২. দুনোতি কামচণ্ডালো, সো মং সদয নিদ্দযো;

ঈদিসং ব্যসনা’পন্নং, সুখীপি কি মুপেক্খসে?

৯৩. যতিহীনপরিহারো, ন পুনে’দানি নীযতে;

যতো ন সৰনু’ব্বেগং, হেট্ঠা যেসং ৰিচারিতং.

কমচ্চুতস্স যথা

৯৪. উদারচরিতো’সি ত্ৰং, তেনে’ৰা’রাধনা ত্ৰযি;

দেসং ৰা দেহি গামং ৰা, খেত্তং ৰা মম সোভনং.

অতিৰুত্তস্স যথা

৯৫. মুনিন্দচন্দসম্ভূত, যসোরাসিমরীচিনং;

সকলোপ্য’য মাকাসো, না’ৰকাসো ৰিজম্ভনে.

৯৬. ৰাক্যং ব্যাপন্নচিত্তানং, অপেতত্থং অনিন্দিতং;

তেনু’ম্মত্তাদিকানং তং, ৰচনা’ঞ্ঞত্র দুস্সতি.

যথা

৯৭. সমুদ্দো পীযতে সো’য, মহ’মজ্জ জরাতুরো;

ইমে গজ্জন্তি জীমূতা, সক্কস্সে’রাৰণো পিযো.

৯৮. সুখুমালা’ৰিরোধিত্ত, দিত্তভাৰপ্পভাৰিতং;

বন্ধনং বন্ধফরুস, দোসং সংদূসযেয্য তং.

যথা

৯৯. পস্সন্তা রূপৰিভৰং, সুণন্তা মধুরং গিরং;

চরন্তি সাধূ সম্বুদ্ধ, কালে কেল়িপরম্মুখা.

অপক্কমস্স যথা

১০০. ভাৰনা, দান, সীলানি, সম্মা সম্পাদিতানি’হ;

নিব্বান, ভোগ, সগ্গাদি, সাধনানি ন সংসযো.

১০১. উদ্দিট্ঠৰিসযো কোচি, ৰিসেসো তাদিসো যদি;

অনু’দ্দিট্ঠেসু নেৰ’ত্থি, দোসো কমৰিলঙ্ঘনে.

যথা

১০২. কুসলা’কুসলং অব্যা, কত’মিচ্চেসু পচ্ছিমং;

অব্যাকতং পাকদং ন, পাকদং পঠমদ্ৰযং.

১০৩. সগুণানা’ৰিকরণে, কারণে সতি তাদিসে;

ওচিত্যহীনতা’পত্তি, নত্থি ভূতত্থসংসিনো.

১০৪. ওচিত্যং নাম ৰিঞ্ঞেয্যং, লোকে ৰিখ্যাত মাদরা;

তত্থো’পদেসপভৰা, সুজনা কৰিপুঙ্গৰা.

১০৫. ৰিঞ্ঞাতোচিত্যৰিভৰো, চিত্যহীনং পরিহরে;

ততো’চিত্যস্স সম্পোসে,

রসপোসো সিযা কতে.

যথা

১০৬. যো মারসেন মাসন্ন, মাসন্নৰিজযু’স্সৰো;

তিণাযপি ন মঞ্ঞিত্থ, সো ৰো দেতু জযং জিনো.

১০৭. আরদ্ধকত্তুকম্মাদি, কমা’তিক্কমলঙ্ঘনে;

ভগ্গরীতিৰিরোধো’যং, গতিং ন ক্ৰা’পি ৰিন্দতি.

যথা

১০৮. সুজন’ঞ্ঞান মিত্থীনং, ৰিস্সাসো নো’পপজ্জতে;

ৰিসস্স সিঙ্গিনো রোগ, নদীরাজকুলস্স চ.

যথা

১০৯. ভেসজ্জে ৰিহিতে সুদ্ধ, বুদ্ধাদিরতনত্তযে;

পসাদ মাচরে নিচ্চং, সজ্জনে সগুণেপি চ.

সসংসযস্স যথা

১১০. মুনিন্দচন্দিমা’লোক, রস লোল ৰিলোচনো;

জনো’ৰক্কন্তপন্থো’ৰ, রংসিদস্সনপীণিতো.

১১১. সংসযাযে’ৰ যংকিঞ্চি, যদি কীল়াদিহেতুনা;

পযুজ্জতে ন দোসো’ৰ, সসংসযসমপ্পিতো.

যথা

১১২. যাতে দুতিযং নিলযং, গরুম্হি সকগেহতো;

পাপুণেয্যাম নিযতং, সুখ’মজ্ঝযনা’দিনা.

১১৩. সুভগা ভগিনী সা’যং, এতস্সি’চ্চেৰমাদিকং;

ন ‘গাম্ম’মিতি নিদ্দিট্ঠং, কৰীহি সকলেহিপি.

১১৪. দুট্ঠা’লঙ্কারৰিগমে, সোভনা’লঙ্কতিক্কমো;

অলঙ্কারপরিচ্ছেদে, আৰিভাৰং গমিস্সতি.

১১৫. দোসে পরীহরিতু মেস ৰরো’পদেসো,

সত্থন্তরানুসরণেন কতো মযেৰং;

ৰিঞ্ঞাযি’মং গরুৰরান’ধিক’প্পসাদা,

দোসে পরং পরিহরেয্য যসোভিলাসী.

ইতি সঙ্ঘরক্খিতমহাসামিৰিরচিতে সুবোধালঙ্কারে

দোসপরিহারাৰবোধো নাম

দুতিযো পরিচ্ছেদো.