৩৪. ইন্দগুত্তত্থেরস্স ৰত্থুম্হি অযমানুপুব্বীকথা

অম্হাকং ভগৰতো পরিনিব্বাণতো ওরভাগে জম্বুদীপে কির পাটলিপুত্তং নাম নগরং অহোসি. তত্থ ধম্মাসোকো নাম মহিদ্ধিকো মহানুভাৰো আণাচক্কৰত্তি রাজা রজ্জং কারেতি. উদ্ধং আকাসতো হেট্ঠা পথৰিযা যোজনপ্পমাণে সকলজম্বূদীপে তস্স আণা পৰত্ততি, তদা সকলজম্বুদীপৰাসিনো চ চতুরাসীতি নগরসহস্সে রাজানো চ অত্তনো অত্তনো বলৰাহনে গহেত্ৰা আগম্ম ধম্মাসোকমহারঞ্ঞো উপট্ঠানং করোন্তি. তস্মিং সমযে দেৰপুত্তনগরে দেৰপুত্তো নাম মহারাজা অত্তনো বলৰাহনং গহেত্ৰা রঞ্ঞো উপট্ঠানং অগমাসি. ধম্মাসোকো দেৰপুত্তমহারাজানং দিস্ৰা মধুরপটিসন্থারং কত্ৰা তুম্হাকং রট্ঠে বহুস্সুতা আগতাগমা মহাগুণৰন্তা অয্যা অত্থীতি পুচ্ছি. তং সুত্ৰা দেৰপুত্তরাজা অত্থি দেৰ তস্মিং নগরে সীহকুম্ভকং নাম মহাৰিহারং. তত্থ অনেকসহস্সভিক্খূ ৰিহরন্তি সীলৰন্তা অপ্পিচ্ছা সন্তুট্ঠা ৰিৰেককামিনো. তেসু সাট্ঠকথাতিপিটকধরো ইন্দগুত্তত্থেরো নাম তেসং পামোক্খো অহোসি. সো অনেকপরিযাযেন সনরামরানং ভিক্খূনং ধম্মংৰণ্ণেতি. গুণৰা অত্তনো গুণং নিস্সায লোকে পাকটোতি. তং সুত্ৰা রাজা তুট্ঠমানসো থেরং পস্সিতুকামো হুত্ৰা সম্ম ত্ৰমেৰ গন্ত্ৰা থেরং যাচিত্ৰা ইধা নেহীতি আহ. তং সুত্ৰা দেৰপুত্তরাজা অত্তনো হত্থস্সবলৰাহনা দিমহা সেনঙ্গপরিৰুতো ইন্দগুত্তত্থেরস্স সন্তিকং গন্ত্ৰা ৰন্দিত্ৰা অয্য অয্যং ধম্মাসোকমহারাজা দট্ঠুকামোতি আহ. থেরেন সাধূতি সম্পটিচ্ছিতে রাজা থেরেন সম্পটিচ্ছিতভাৰং ধম্মাসোকমহারাজিনো পেসেসি. ততো ধম্মাসোকমহারাজা সোমনস্সপ্পত্তো অত্তনো আণাপৰত্তিতট্ঠানে রাজূনং সাসনং পেসেসি. সব্বেৰ থেরাগমনমগ্গং অলঙ্করোন্তূতি. অথ তে রাজানো তুট্ঠপহট্ঠা অত্তনো অত্তনো নগরে ভেরিং চরাপেত্ৰা দেৰপুত্তনগরতো যাৰ পাটলিপুত্তনগরং এত্থন্তরে পঞ্চপণ্ণাসযোজনিকং মগ্গং ৰিসমং সমং করোন্তো দেৰতানং দিব্বৰীথিমিৰ অলঙ্করিত্ৰা ধম্মাসোকমহানরিন্দস্স এৰং সাসনং পেসেসুং. ভৰন্তেত্থ.

১. ইন্দগুত্তমহাথের, সামিনো গমনায নো;

মগ্গং অলঙ্করোন্তূতি, মহারাজেন পেসিতং.

২. ততো তে অপনেত্ৰান, পাসাণকণ্টকাদিকং;

ৰিসমং সমং করিত্ৰান, সম্মজ্জিত্ৰান সাধুকং.

৩. ধোতমুত্তা সমাভাসা, ওকিরিত্ৰান ৰালুকা;

উস্সাপিতা তত্থ তত্থ, দুস্সতোরণপন্তিযো.

৪. কলধোতহেমরম্ভাদি, নানাতোরণপন্তিযো;

তথা পুপ্ফমযা নেক, তোরণূপরিতোরণা.

৫. তেসু তেসুচ ঠানেসু, সঙ্খতা কুসুমগ্ঘিকা;

তথেৰ গন্ধতেলেহি, দীপিতা দীপপন্তিযো.

৬. পদুমুপ্পলসন্নীর, পুপ্ফপল্লৰ লঙ্কতা;

ঠপিতা ঘটমালাযো, পুণ্ণা সোগন্ধৰারিহি.

৭. নিলপীতা দিসম্ভিন্ন, পতাকাহি ধজেহি চ;

মগ্গস্স উভতো পস্সে, ৰনমাসি সমাকুলং.

৮. কেতৰো উগ্গতা তত্থ, মন্দমন্দসমীরণা;

অৰ্হযন্তাৰ সোভন্তি, ব্রহ্মোরগসুরাদযো.

৯. নাগচম্পপুন্নাগ, কেতকীৰকুলাদিহি;

পদুমুপ্পলা দিজলজেহি, মালতী কুসুমা দিহি.

১০. মালাদামেহি নেকেহি, মগ্গমাসি ৰিচিত্তকং;

পত্থরিত্ৰা পাদপটে, সিত্তসম্মত্তভূমিযং.

১১. লাজাদিপঞ্চপুপ্ফানি, ৰিকিরিংসু মনোরমং;

অলঙ্করিত্ৰা হত্তস্সা, কুসুমা ভরণাদিহি.

১২. মগ্গালঙ্করণত্থায, ঠপিতাসুং ততো ততো;

তেসু তেসু চ ঠানেসু, ভেরিমণ্ডলমজ্ঝগা.

১৩. নচ্চন্তি চাতুরা নারী, রসভাৰনিরন্তরা;

কংসৰংসাদিপগ্গয্হ, ৰজ্জেন্তানেকতন্তিযো.

১৪. গাযন্তি মধুরং গীতং, গাযন্তেত্থ লযান্ৰিতং;

মগ্গোসো সাধুৰাদেহি, ভেরিতন্তিনদেহিচ.

১৫. করীনং কোঞ্চনাদেহি, হযানং হেসিতেহি চ;

নেকৰিটঙ্কসঙ্ঘেহি, সো করীহি সমাকুলো.

১৬. মগ্গস্স উভতো পস্সে, দেৰকঞ্ঞূপমা সুভা;

মালাকলাপে পগ্গয্হ, তিট্ঠন্তি তুট্ঠমানসা.

১৭. তথা পুণ্ণঘটে গয্হ, পদুমুপ্পলসংকুলে,

অট্ঠমঙ্গলমুগ্গয্হ, তিট্ঠন্তি পমদা তহিং.

১৮. সীতলূদকসম্পন্ন, পপাহি সমলঙ্কতা;

সিনানত্থং খতা আসুং, পোক্খরঞ্ঞো তহিংতহিং.

১৯. তহিংতহিংকতা আসুং, দানসালা মনোরমা;

নিচিতাসুমনেকানি, দানোপকরণা তহিং.

২০. এৰং নেকৰিধা পূজা, অম্হেহি পটিপাদিতা;

ঠপেত্ৰান মহাগঙ্গং, তং জানাতু মহীপতীতি.

তং সুত্ৰা অসোকমহারাজা গঙ্গং অলঙ্করোথাতি সোল়সযক্খে পেসেসি, তে সপরিৰারা তত্থ গন্ত্ৰা অত্তনো আনুভাৰেন গঙ্গায অন্তো তিগাৰুতট্ঠানে উদুক্খলপাসাণে ঠপেসুং. ঠপেত্ৰা থম্ভে উস্সাপেত্ৰা তুলাসংঘাটে দত্ৰা হিমৰন্ততো রত্তচন্দনসারে আহরিত্ৰা পদরে সন্থরিত্ৰা অনেকেহি পূজাৰিধানেহি অলঙ্করিত্ৰা রঞ্ঞো এৰং সাসনং পেসেসুং. ভৰন্তেত্থ.

২১. যমত্থায মযং সব্বে, মহারাজেন পেসিতা;

অম্হেহি দানি তং সব্বং, কতমেৰ সুণোথ তং.

২২. গাৰুতত্তযগম্ভীরং, গঙ্গং যোজনৰিত্থতং;

থম্ভে পতিট্ঠপেত্ৰান, অনগ্ঘং রত্তচন্দনং.

২৩. হিমৰন্ততো হরিত্ৰান, সেতুং তত্থ সুমাপিতং;

তোরণা চ উভো পস্সে, রতনেহি সুনিম্মিতা.

২৪. পুণ্ণকুম্ভদ্ধজা চেৰ, পদীপাৰলিযো তথা;

উভো পস্সেসু রতনানি, মাপেত্ৰালম্বনানিচ.

২৫. সুৰণ্ণমণিমুত্তাদি, দামেহি সমলঙ্কতা;

ৰালুকত্থায ওকিণ্ণা, ধোতমুত্তা পভস্সরা.

২৬. তেসু তেসু চ ঠানেসু, ঠপিতাসুং মহামণী;

নানারাগৰিতানেহি, সোভিতা সেতুনো পরি.

২৭. ওলম্বিতাসুং তত্থেৰ, দিব্বাদিকুসুমাদযো;

নিট্ঠিতং ইধ কাতব্ব, যুত্তং পূজাৰিধিংতু নো;

দেৰোতং পটিজানাতু, ইতি ৰত্ৰান পেসযুংতি.

তম্পি সুত্ৰা অসোকো মহারাজা তুম্হেৰ থেরং ইধানেথাতি তেসংযেৰ সাসনং পটিপেসেসি, তে সাধূতি ইন্দগুত্তত্থেরস্স সন্তিকং গন্ত্ৰা ৰন্দিত্ৰা ভন্তে পাটলিপুত্তনগরস্স গমনায কালোতি আহংসু, ততো থেরো সট্ঠিসহস্সমত্তেহি ভিক্খুসঙ্ঘেহি পরিৰুতো পঞ্চপণ্ণাসযোজনমগ্গং পটিপজ্জি. অথাপরং দেৰপুত্তনগরৰাসিনো অনেকৰিধমালাগন্ধৰাসচুণ্ণদ্ধজপতাকাদীহি অনেকেহি তালাৰচরেহি নচ্চগীতৰাদিতেহি পূজেত্ৰা অগমংসু. অথ থেরো মহন্তেন পূজাৰিধানেন জম্বুদীপৰাসীহি পূজিযমানো অনুক্কমেন চন্দভাগায গঙ্গায সেতুং পত্ৰা তত্থ মহন্তং পূজাৰিধানং ওলোকেন্তো এৰং চিন্তেসি, এৰং উল়ারং পূজাৰিধানং ইদানি জম্বুদীপে নাঞ্ঞস্স হোতি, ময্হমেৰেতং কতং. অহমেৰেত্ত উত্তমো অপ্পটিমোতি এৰং সেয্যস্স সেয্যোহমস্মীতি মানং উপ্পাদেত্ৰা অট্ঠাসি. তস্মিং খণে একো খীণাসৰত্থেরো তং মানেনুপত্থদ্ধচেতসা ঠিতং দিব্বচক্খুনা দিস্ৰা উপসঙ্কমিত্ৰা ৰন্দিত্ৰা থেরস্স ওৰদন্তো এৰমাহ. তস্মা.

২৮. মা মানস্স ৰসী হোথ, মানো ভন্তে ৰসংগতং [মানংভন্তেৰসীকতং ইতিসব্বত্থ];

অনত্থদো সদা হোতি, পাতেত্ৰান ভৰা ৰটে.

২৯. মানো পলালিতো সত্তো, তণ্হাপটিঘসঙ্গতো;

মক্কটোরগসোণাদি, হুত্ৰা জাযতি জাতিসু.

৩০. মা মানং সামি পূরেহি, অত্তানং পরিসোধয;

অপরিসুদ্ধা সযো ভিক্খু, দাযকং ন পরিতোসতি.

৩১. দদন্তানং সরন্তানং, পূজেন্তানং সচে তুৰং;

মহপ্ফলং মহাভূতিং, কামত্থ হোথ নিব্বণাতি [নিম্মনা ইতিকত্তচি].

তং সুত্ৰা থেরো সংসারে নিব্বিন্দো তত্থেৰ ঠিতো তিলক্খণং পট্ঠপেত্ৰা করজকাযং সম্মসন্তো সহপটি সম্ভিদাহি অরহত্তং পত্ৰাৰ নিক্খমি. ততো ধম্মাসোকমহারাজা বলৰাহনপরিৰুতো মহন্তেন পূজাৰিধানেন পটিমগ্গং আগম্ম ৰন্দিত্ৰা ততো দিগুণং পূজাসক্কারং কুরুমানো মহাভিক্খুসঙ্ঘেন সদ্ধিং থেরং অত্তনো নগরং নেত্ৰা তস্স ধম্মকথং সুত্ৰা পসন্নমানসো পঞ্চসীলে পতিট্ঠায মহন্তং ৰিহারং কারেত্ৰা থেরেন সহাগতানং সট্ঠিসহস্সানং ভিক্খূনং চতুপচ্চযেহি উপট্ঠান মকাসি, অথ থেরো সাট্ঠকথং পিটকত্তযং পকাসেন্তো তস্মিং চিরং ৰসিত্ৰা তত্থেৰ পরিনিব্বাযি. ততো রাজা সপরিসো তস্স সরীরনিক্খেপং কারেত্ৰা ধাতুযো গহেত্ৰা মহন্তং চেতিযং কারাপেসীতি.

৩২. পুরাতনানং ভুৰি পুঞ্ঞকম্মিনং,

গুণানুভাৰেন মহেন্তি এৰং;

সদেৰকা নং মনসীকরোন্তা,

পুঞ্ঞং করোথা যতনে সদা দরাতি.

ইন্দগুত্তত্থেরস্স ৰত্থুং চতুত্থং.