১৫. ব্যগ্ঘস্স ৰত্থুম্হি অযমানুপুব্বীকথা

জম্বুদীপে চূলরট্ঠা সন্নে বারাণসীনগরে একং পংসুপব্বতং ৰিনিৰিজ্ঝিত্ৰা মহামগ্গো হোতি, তত্থ ৰেমজ্ঝে একো ব্যগ্ঘো অত্তনো অন্ধপিতরং পব্বতগুহাযং কত্ৰা পোসেন্তো ৰসতি. তস্সেৰ পব্বতস্স ৰনদ্ৰারে তুণ্ডিলো নাম একো সুৰপোতকো রুক্খস্মিং ৰসতি. তে উভোপি অঞ্ঞমঞ্ঞং পিযসহাযা অহেসুং, তস্মিং সমযে পচ্চন্তগামৰাসী একো মনুস্সো অত্তনো মাতুগামেন সদ্ধিং কলহং কত্ৰা বারাণসিং গচ্ছন্তো তং ৰনদ্ৰারং সম্পাপুণি. অথ সুৰপোতকো পরিহীনত্তভাৰং দুক্খিতং তং দিস্ৰা কম্পমানহদযো তং পক্কোসিত্ৰা ভো কুহিং গচ্ছসীতি আহ, তেন পরখণ্ডং গচ্ছামীতি ৰুত্তে তুণ্ডিলো ভো ইমস্মিং ৰনখণ্ডমজ্ঝে একো ব্যগ্ঘো ৰসতি. কক্খলো ফরুসো সম্পত্তসম্পত্তে মারেত্ৰা খাদতি. মা ত্ৰং তেন গচ্ছাতি আহ. স্ৰাযং দুব্ভগো মনুস্সো হিতকামস্স তস্স ৰচনং অনাদিযিত্ৰা গচ্ছামেৰাতি আহ. তুণ্ডিলো তেনহি সম্ম যদি অনিৰত্তমানো গচ্ছসি. এসো ব্যগ্ঘো মম সহাযো. মে ৰচনং তৰ সন্তিকা সুত্ৰা ন গণ্হাতীতি. তস্স তং অনাদিযন্তো সো সুৰরাজে পদুট্ঠচিত্তো মুগ্গরেন পহরিত্ৰা মারেত্ৰা অরণিং অগ্গিং কত্ৰা মংসং খাদি. অসপ্পুরিসসংসগ্গো নামে স ইধ লোকপরলোকেসু দুক্খাৰহোযেৰ. তথাহি.

১. মযা কতং ময্হমিদং, ইতি ৰেস্সানরং নরো;

সমালিঙ্গতি সপ্পেমো, দহতেৰস্স ৰিগ্গহং.

২. মধুখীরাদিদানেন, পেমসা পরিপালিতো;

সোরগো কুপিতোৰস্স, ডসতেৰস্স ৰিগ্গহং.

৩. এৰং নিহীনজচ্চেন, পাপেন অকতঞ্ঞুনা;

নরা ধমেন দীনেন, কতোপি খণসঙ্গমো.

৪. অসাধুকো অযংতেৰং, জানমানেন জন্তুনা;

মুহুত্তম্পি ন কাতব্বো, সঙ্গমো সো অনত্থদোতি.

ততো সো অসপ্পুরিসো মংসং খাদিত্ৰা গচ্ছন্তো ৰনখণ্ডমজ্ঝং সম্পাপুণি. অথ ব্যগ্ঘো তং দিস্ৰা মহানাদং করোন্তো গহণত্থায উট্ঠাসি. সো ব্যগ্ঘং দিস্ৰা ভযপ্পত্তো তুণ্ডিলস্স ৰচনং সরিত্ৰা অহং ভো তৰ সহাযতুণ্ডিলস্স সন্তিকা আগতোম্হীতি আহ, তং সুত্ৰা ব্যগ্ঘো অত্তমনো এহি সম্মাতি তং পক্কোসিত্ৰা অত্তনো ৰসনট্ঠানং নেত্ৰা খাদিতব্বাহারেন তং সন্তপ্পেত্ৰা পিতুসন্তিকে নিসীদাপেত্ৰা পুন ৰনখণ্ড মগমাসি. অথস্স পিতা পুত্তস্স গতকালে তেন সদ্ধিং সল্লপন্তো তস্স ৰচনানুসারেন তুণ্ডিলং মারেত্ৰা খাদিতভাৰং অঞ্ঞাসি. ততো সো পুত্তস্স আগতকালে তৰ সহাযো তেন মারিতোতি আহ. তং সুত্ৰা ব্যগ্ঘো অনত্তমনো ৰেগেন তস্স ৰসনট্ঠানং গন্ত্ৰা সম্ম তুণ্ডিলাতি সদ্দং কত্ৰা অপস্সন্তো লুঞ্চিতপত্তংচস্স দিস্ৰা নিস্সংসযং তেন মারিতো মে সহাযোতি সোচন্তো পরিদেৰন্তো আগঞ্ছি. অথ সো অসপ্পুরিসো তস্মিং তত্থ গতে তস্স পিতরং পাসাণেন পহরিত্ৰা মারেত্ৰা ব্যগ্ঘংচ দানি মারেস্সামীতি ব্যগ্ঘাগমনমগ্গং ওলোকেন্তো নিলীনো অট্ঠাসি. তস্মিং খণে ব্যগ্ঘোপি আগঞ্ছি. সো তস্সা গতকালে তস্স তেজেন ভীতো গন্ত্ৰা জীৰিতং মে সামি দেহীতি পাদমূলে উরেন নিপজ্জি, ব্যগ্ঘো পন তেন কতকম্মং দিস্ৰা তস্মিং চিত্তং নিব্বাপেত্ৰা মম সহাযস্স সাসনমাদাযাগতস্স দুব্ভিতুং ন যুত্তন্তি চিন্তেন্তো তং সমস্সাসেত্ৰা গচ্ছ সম্মাতি সুখং পেসেসি. এৰঞ্হি সপ্পুরিসসমাগমো নাম ইধ লোকপরলোকেসু সুখাৰহোযেৰ, ৰুত্তংহি.

৫. সব্ভিরেৰ সমাসেথ, সব্ভি কুব্বেথ সন্থৰং;

সব্বত্থ সন্থৰো তেন, সেয্যো হোতি ন পাপিযো.

৬. সুখাৰহো দুক্খনুদো, সদা সব্ভি সমাগমো;

তস্মা সপ্পুরিসেহেৰ, সঙ্গমো হোতু জন্তুনং.

ততো সো ব্যগ্ঘো তেন মেত্তচিত্তানুভাৰেন কালং কত্ৰা সগ্গে নিব্বত্তোতি.

৭. এৰংৰিধোপি ফরুসো পরমংসভোজী;

ব্যগ্ঘো দযাযুপগতো সুগতিং সুমেধো;

তস্মা করোথ করুণং সততং জনানং,

তং ৰো দদাতি ৰিভৰঞ্চ ভৰেসু ভোগন্তি.

ব্যগ্ঘস্স ৰত্থুং পঞ্চমং.