১১. নন্দিযরাজস্স ৰত্থুম্হি অযমানুপুব্বীকথা

ইতো কির কপ্পসতসহস্সমত্থকে পদুমুত্তরো নাম সত্থা লোকে উদপাদি সদেৰকং লোকং সংসারকন্তারা উত্তারেন্তো. তস্মিং কির সমযে একো কুটুম্বিকো সত্থু ধম্মদেসনং সুত্ৰা পসন্নমানসো বুদ্ধপমুখং ভিক্খুসঙ্ঘং নিমন্তেত্ৰা মহাদানং সজ্জেত্ৰা অত্তনো ভৰনং দেৰভৰনমিৰ অলঙ্করিত্ৰা বুদ্ধারহং মহাসনং পঞ্ঞাপেত্ৰা গন্ত্ৰা ভগৰন্তং যাচি কালোযং ভন্তে ভগৰতো ভত্তগ্গস্স উপসঙ্কমনাযাতি. অথ ভগৰা ভিক্খুসঙ্ঘপরিৰুতো মহতা বুদ্ধানুভাৰেন গন্ত্ৰা নিসীদি পঞ্ঞত্তৰরবুদ্ধাসনে, ততো কুটুম্বিকো হট্ঠো উদগ্গো সপরিসো ভগৰন্তং পরিৰিসতি অনেকেহি মধুরন্নপানাদীহি. তদা তস্স ভগৰতো সাসনে ধুতঙ্গধরানং অগ্গো ৰসভত্থেরোনাম মহাসাৰকো সপদানৰত্তেন পিণ্ডায চরমানো তস্স কুটুম্বিকস্স গেহদ্ৰারে অট্ঠাসি, অথ সো থেরং দিস্ৰা ভন্তে সত্থা অন্তোগেহে নিসিন্নো, তুম্হেপি পৰিসথাতি যাচি, থেরো অপৰিসিত্ৰাৰ অগমাসি, কুটুম্বিকো ভগৰন্তং উপসঙ্কমিত্ৰা তমত্তং ৰত্ৰা কিং ভন্তে সদেৰকে লোকে ভগৰতাপি উত্তরিতরো গুণেন সংৰিজ্জতীতি আহ. অথস্স সত্থা পুত্তোপমং দস্সেত্ৰা থেরস্স গুণে ৰণ্ণেন্তো এৰমাহ.

১. পালেন্তি নিম্মলং কত্ৰা, পাতিমোক্খাদিসংৰরং;

সমাদিন্নধুতঙ্গাচ, অপ্পিচ্ছা মুনিসূনৰো.

২. নিচ্চ মন্তকযুদ্ধম্হি, নদ্ধা যোধাৰ দপ্পিতা;

পুঞ্ঞানং ৰত্থুভূতা তে, দেৰমানুসকা দিনং.

৩. ধারেমহং ৰণ্ণৰন্তং, সীৰেয্যম্পিচ চীৰরং;

বুদ্ধপুত্তা মহানাগা ন ধারেন্তি তথাৰিধং.

৪. ধারেন্তি তে পংসুকূলং, সঙ্ঘাটেত্ৰা পিলোতিকে;

ৰণচ্ছাদনচোলংৰ, ইচ্ছালোভ ৰিৰজ্জিতা.

৫. সাদিযামি সদা হম্ভো, উপাসকনিমন্তনং;

নেৰ সাদেন্তি সম্বুদ্ধ, পুত্তো পাসকযাচনং.

৬. সপদানেন যং লদ্ধং, লূখংৰাপি পণীতকং;

তেন তুস্সন্তি মে পুত্তা, রসগেধৰিৰজ্জিতা.

৭. নিপজ্জামি অহং সাধু, সন্থতে সযনে সুভে;

ন তে সেয্যং পকপ্পেন্তি, সংসারভযভীরুকা.

৮. ঠানা সনগমনেন, কপ্পেন্তি ইরিযাপথং;

নেকভূমিসমাকিণ্ণ, পাসাদেসু ৰসামহং.

৯. বুদ্ধপুত্তা তথাচ্ছন্নং, ন কদা পৰিসন্তি তে;

রুক্খমূলে সুসানস্মিং, অব্ভোকাসে রমন্তি তে.

১০. ভাৰেত্ৰা ভৰনাসায, হেতুং ভাৰনমুত্তমং;

অহং গামে ৰসিস্সামি, পাপেন্তো জনতং সিৰং.

১১. রমন্তি মম পুত্তা তে, পন্তসেনাসনে ককা;

তেসং মহত্তরো সন্তো, থেরোযং ৰসভো মহা;

ধুতপাপো ধুতঙ্গগ্গো, ঞাতোযং মম সাসনেতি.

এৰং ভগৰা হত্থং উক্খিপিত্ৰা চন্দমণ্ডলে পহরন্তো ৰিয থেরস্স গুণে পকাসেসি, ততো সো তস্স গুণকথং সুত্ৰা সযম্পিতং ঠানন্তরং কামযমানো যন্নূনাহং অনাগতে অঞ্ঞতরস্স সম্মাসম্বুদ্ধস্স সাসনে ধুতঙ্গধরানং অগ্গো ভৰিস্সামীতি তং ঠানন্তরং পত্থেন্তো ভগৰতো পাদমূলে নিপজ্জি, সত্থা তং কারণং উপপরিক্খিত্ৰা ইতো কপ্পসতসহস্সমত্থকে গোতমো নাম সত্থা উপ্পজ্জিস্সতি. ত্ৰং তদা ধুতঙ্গধরানং অগ্গো হুত্ৰা কস্স পোতি পঞ্ঞাযিস্সতীতি ব্যাকরণ মদাসি. ততো পট্ঠায সো সোমনস্সো পুঞ্ঞকম্মং কত্ৰা ততো চুতো দেৰমনুস্সেসু দেৰিস্সরিযং অনুভৰন্তো ৰিপস্সীসম্মাসম্বুদ্ধকালে একসাটকো নাম ব্রাহ্মণো হুত্ৰা মহাদানং অদাসি. ততো চুতো কস্সপসম্মাসম্বুদ্ধে পরিনিব্বুতে বারাণসীনগরে বারাণসীসেট্ঠি হুত্ৰা নিব্বত্তো দানাদীনি পুঞ্ঞানি কত্ৰা ততো চৰিত্ৰা সংসারে সংসরন্তো দসৰস্সসহস্সা যুকেসু মনুস্সেসু বারাণসিযং একো কুটুম্বিকো হুত্ৰা নিব্বত্তি. সো পনাযং কুটুম্বিকো অরঞ্ঞে জঙ্ঘাৰিহারং অনুৰিচরন্তো পচ্চন্তিমে জনপদে অরঞ্ঞাযতনে অঞ্ঞতরং পচ্চেকবুদ্ধং অদ্দস. সো চ পচ্চেকবুদ্ধো তত্থ চীৰরকম্মং করোন্তো অনুৰাতে অপ্পহোন্তে সংহরিত্ৰা ঠপেতুং আরদ্ধো. কুটুম্বিকো তং দিস্ৰা ভন্তে কিং করোথাতি পুচ্ছি. সো পচ্চেকবুদ্ধো অপ্পিচ্ছতায তেন পুট্ঠো ন কিঞ্চি ৰুত্তো হোতি. সো চীৰরদুস্সং নপ্পহোতীতি ঞত্ৰা অত্তনো উত্তরসাটকং পচ্চেকবুদ্ধস্স পাদমূলে ঠপেত্ৰা অগমাসি. পচ্চেকবুদ্ধো তং গহেত্ৰা অনুৰাতকং আরোপেন্তো চীৰরং কত্ৰা পারুপি. কুটুম্বিকো জীৰিতপরিযোসানে কালং কত্ৰা তাৰতিংসভৰনে নিব্বত্তিত্ৰা তত্থ যাৰতাযুকং দিব্বসম্পত্তিং অনুভৰিত্ৰা ততো চৰিত্ৰা বারাণসিতো তিযোজনমত্তকে ঠানে অঞ্ঞতরস্মিং নগরে নিব্বত্তি, তস্স মাতাপিতরো নন্দিযোতি [নন্দীতিনামং ইতিসব্বত্থ] নামং অকংসু, তস্স সত্ত ভাতরো অহেসুং, সেসা ছ ভাতরো নানাকম্মন্তেসু ব্যাৰটা মাতাপিতুন্নং পোসেন্তি. নন্দিযো পন অকম্মসীলো গেহেযেৰ ৰসতি. তস্মা তস্স সেসা কুজ্ঝন্তি. মাতাপিতরোপি নন্দিযং আমন্তেত্ৰা ওৰদন্তি. সো তুণ্হী হোতেৰ. অথাপরস্মিং সমযে গামে নক্খত্তং সঙ্ঘুট্ঠং, তদা সো মাতরং আহ. অম্ম সাটকং দেহি, নক্খত্তং কীল়িস্সামীতি, সা ধোত- ৰত্থং নীহরিত্ৰা অদাসি, অম্ম থূলং ইদন্তি, সা অঞ্ঞং নীহরিত্ৰা অদাসি, তম্পি পটিক্খিপি. অথ নং মাতা আহ. তাত যাদিসে মযং গেহে জাতা, নত্থি ইতো সুখুমতরস্স পটিলাভায পুঞ্ঞন্তি, লভনট্ঠানং গমিস্সামি অম্মাতি. পুত্ত অহং অজ্জেৰ তৰ বারাণসীনগরে রজ্জপটিলাভং ইচ্ছামীতি আহ. সো সাধু অম্মাতি মাতরং ৰন্দিত্ৰা পদক্খিণং কত্ৰা পক্কামি. মাতুযা পনস্স এৰং অহোসি. কহং সো গমিস্সতি, পুব্বেৰিয ইধৰা এত্থৰা গেহে নিসীদিত্ৰা আগচ্ছতীতি, সো পন পুঞ্ঞনিযামেন চোদিযমানো গামতো নিক্খমিত্ৰা বারাণসিং গন্ত্ৰা সেনগুত্তস্স গেহে পটিৰসতি, অথেকদিৰসং সো তস্স কম্মকারেহি সদ্ধিং সল্লপন্তো নিসীদিত্ৰা পচলাযন্তো সুপিনং অদ্দস. মুখেন অন্তং নিক্খমিত্ৰা সকলজম্বুদীপে পত্থরিত্ৰা অন্তোকুচ্ছিমেৰ পাৰিসি. পবুদ্ধো সো ভীতো মহাসদ্দমকাসি. অথ নং মহাসেনগুত্তো পুচ্ছি. নন্দিযো সুপিনং অদ্দসন্তি আহ. অথ তেন কীদিসন্তি পুট্ঠো কথেসি, ততো সেনগুত্তো তং অত্তনো কুলূপগং পরিব্বাজিকং পুচ্ছি কো তস্স ৰিপাকোতি. পরিব্বাজিকা যদি ভো ইত্থী পস্সতি. সত্তদিৰসব্ভন্তরেযেৰ অভিসেকং লভতি, যদি পুরিসো পস্সতি, তথেৰ রাজা হোতীতি কথেসি. সেনগুত্তো তস্সা তং কথং সুত্ৰা ইমং মম ঞাতিং করোমীতি অত্তনো সত্ত ধীতরে পক্কোসিত্ৰা পটিপাটিযা পুচ্ছি. নন্দিযস্স সন্তিকে ৰসথাতি, সেসা সব্বা ন ইচ্ছিংসু, ন মযং জানাম এতং অধুনাগতং কুলৰন্তং ৰা দুক্কুলৰন্তংৰাতি. অথ কণিট্ঠিকং পুচ্ছি. সা যস্স মং মাতাপিতরো দস্সন্তি. তেসং ৰচনং ন ভিন্দিস্সামীতি সম্পটিচ্ছি, অথ সেনগুত্তো নন্দিযং পক্কোসিত্ৰা অত্তনো ধীতরং দত্ৰা তস্স মহাসম্পত্তি মদাসি. ততো সত্তমে দিৰসে নন্দিযো তত্থ তত্থ আহিণ্ডন্তো রঞ্ঞো মঙ্গলুয্যানং পস্সিস্সামীতি গন্ত্ৰা ধঙ্গলসিলাপট্টেসসীসং পারুপিত্ৰা নিপজ্জি, সো চ বারাণসীরঞ্ঞো কালঙ্কতস্স সত্তমো দিৰসো হোতি. অমচ্চাচ পুরোহিতোচ রঞ্ঞো সরীরকিচ্চং কারেত্ৰা রাজঙ্গণে নিসীদিত্ৰা মন্তযিংসু. রঞ্ঞো একাৰ ধীতা অত্থি, পুত্তো পনস্স নত্থি. অরাজিকং রজ্জং ন তিট্ঠতি. ফুস্সরথং ৰিস্সজ্জেস্সামাতি. তে কুমুদপত্তৰণ্ণে চত্তারো সিন্ধৰে যোজেত্ৰা সেতচ্ছত্তপমুখংপঞ্চৰিধরাজককুধভণ্ডং রথস্মিংযেৰ ঠপেত্ৰা রথং ৰিস্সজ্জেত্ৰা পচ্ছতো তুরিযানি পগ্গণ্হাপেসুং. রথো পাচীদ্ৰারেন নিক্খমিত্ৰা উয্যানাভিমুখো অহোসি. পরিচযেন উয্যানাভিমুখো গচ্ছতি. নিৰত্তেমাতি কেচি আহংসু. পুরোহিতো মা নিৰারযিত্থাতি আহ. রথো কুমারকং পদক্খিণং কত্ৰা আরোহণসজ্জো হুত্ৰা অট্ঠাসি. পুরোহিতো পারুপণকণ্ণং অপনেত্ৰা পাদতলানি ওলোকেন্তো তিট্ঠতু অযং দীপো. দ্ৰিসহস্সদীপ পরিৰারেসু চতূসু মহাদীপেসু একরজ্জং কাতুং সমত্থোতিৰত্ৰা তস্স ধিতিং উপধারেতুং তিক্খত্তুং তুরিযানি পগ্গণ্হাপেসি. অথ কুমারো মুখং ৰিৰরিত্ৰা ওলোকেত্ৰা কেন কারণেন আগতত্থাতি আহ, দেৰ তুম্হাকং রজ্জং পাপুণাতীতি, রাজা কহন্তি, দেৰত্তং গতো সামীতি, কতি দিৰসা অতিক্কন্তাতি, অজ্জ সত্তমো দিৰসোতি. পুত্তো ৰা ধীতা ৰা নত্থীতি, ধীতা অত্থি দেৰ. পুত্তো ন ৰিজ্জতীতি, তেনহি করিস্সামি রজ্জন্তি, তে তাৰদেৰ অভিসেকমণ্ডপং কারেত্ৰা রাজধীতরং সব্বালঙ্কারেহি অলঙ্কারিত্ৰা উয্যানং নেত্ৰা কুমারস্স অভিসেকং অকংসু, অথস্স কতাভিসেকস্স সতসহস্সগ্ঘনকং ৰত্থং আনেসুং, সো কিমিদং তাতাতি আহ, নিৰাসনৰত্থং দেৰাতি, ননু তাতা থূলংতি, মনুস্সানং পরিভোগৰত্থেসু ইতো সুখুমতরং নত্থি দেৰাতি, তুম্হাকং রাজা এৰরূপং নিৰাসেসীতি, আম দেৰাতি. ন মঞ্ঞে পুঞ্ঞৰা তুম্হাকং রাজাতি ৰত্ৰা হন্দ সুৰণ্ণভিঙ্কারং আহরথ, লভিস্সাম ৰত্থন্তি, তে সুৰণ্ণভিঙ্কারং আহরিংসু, সো উট্ঠায হত্থে ধোৰিত্ৰা মুখং ৰিক্খালেত্ৰা হত্থেন উদকং আদায পুরত্থিমদিসায অব্ভুক্কিরি, তাৰদেৰ ঘনপথৰিং ভিন্দিত্ৰা সোল়সকপ্পরুক্খা উট্ঠহিংসু, পুন উদকং হত্থেন গহেত্ৰা দক্খিণং পচ্ছিমং উত্তরন্তি এৰং চতস্সোপি দিসা অব্ভুক্কিরি, সব্বদিসাসু সোল়স সোল়স হুত্ৰা চতুসট্ঠিকপ্পরুক্খা উট্ঠহিংসু, সো একং দিব্বদুস্সং নিৰাসেত্ৰা একং পারুপিত্ৰা নন্দিযরঞ্ঞো ৰিজিতে সুত্তকন্তিকা ইত্থিযো মা সুত্তং কন্তন্তূতি ভেরিং চরাপেথাতি ৰত্ৰা ছত্তং উস্সাপেত্ৰা অলঙ্কতপটিযত্তো হত্থিক্খন্ধৰরগতো নগরং পৰিসিত্ৰা পাসাদমভিরুয্হ মহাসম্পত্তিং অনুভৰি. অহো তদা পচ্চেকবুদ্ধস্স দিন্নানুৰাতকস্স ৰিপাকো. তেনাহু পোরাণা.

১২. যথা সাসপমত্তম্হা, বীজা নিগ্রোধপাদপো;

জাযতে সতসাখড্ঢো, মহানীলম্বুদোপমো.

১৩. তথেৰ পুঞ্ঞকম্মম্হা, অণুম্হা ৰিপুলং ফলং;

হোতীতি অপ্পপুঞ্ঞন্তি, নাৰমঞ্ঞেয্য পণ্ডিতোতি.

এৰং গচ্ছন্তে কালে একদিৰসং দেৰী রঞ্ঞো সম্পত্তিং দিস্ৰা অহো তপস্সীতি কারুঞ্ঞাকারং দস্সেসি. কিমিদং দেৰীতি চ পুট্ঠা অতিমহতী তে দেৰ সম্পত্তি. অতীতমদ্ধানং কল্যাণং কতত্তা. ইদানি অনাগতস্সত্থায কুসলং করোথাতি আহ. কস্স দস্সাম. সীলৰন্তা নত্থীতি. অসুঞ্ঞো দেৰ জম্বুদীপো অরহন্তেহি, তুম্হে দানং সজ্জেথ, অহং অরহন্তে লচ্ছামীতি আহ. পুনদিৰসে রাজা মহারহং দানং সজ্জাপেসি. দেৰী সচে ইমিস্সা দিসায অরহন্তো অত্থি, ইধা গন্ত্ৰা অম্হাকং ভিক্খং গণ্হন্তূতি উত্তরহিমৰন্তাভিমুখী পুপ্ফানি উদ্ধং খিপিত্ৰা উরেন নিপজ্জি. অথ তানি পুপ্ফানি আকাসতো গন্ত্ৰা হিমৰন্তপদেসে ৰসন্তানং পদুমৰতিযা পুত্তানং পঞ্চসতানংপচ্চেকবুদ্ধানং জেট্ঠকমহাপদুমপচ্চেকবুদ্ধস্স পাদমূলে পতিংসু. তথাহি.

১৪. অহো পস্সথ ভো দানি, ৰিম্হযং পুঞ্ঞকম্মুনো;

অচেতনাপি পুপ্ফানি, দূতকিচ্চেসু ব্যাৰটা.

১৫. কত্তুকামেন লোকস্মিং, সকলং অত্তনো ৰসং;

সব্বত্থামেন কত্তব্বং, পুঞ্ঞং পঞ্ঞৰতা সদাতি.

ততো মহাপদুমপচ্চেকবুদ্ধো তং ঞত্ৰা সেসভাতরে আমন্তেসি. মারিসা নন্দিযরাজা তুম্হে নিমন্তেসি. অধিৰাসেথ তস্স নিমন্তনন্তি. তে অধিৰাসেত্ৰা তাৰদেৰ আকাসেনা গন্ত্ৰা উত্তরদ্ৰারে ওতরিংসু. মনুস্সা পঞ্চসতা দেৰ পচ্চেকবুদ্ধা আগতাতি রঞ্ঞো আরোচেসুং, রাজা সদ্ধিং দেৰিযা গন্ত্ৰা ৰন্দিত্ৰা পত্তে গহেত্ৰা পচ্চেকবুদ্ধে পাসাদং আরোপেত্ৰা তত্থ তেসং দানং দত্ৰা ভত্তকিচ্চাৰসানে রাজা সঙ্ঘত্থেরস্স দেৰী সঙ্ঘনৰকস্স চ পাদমূলে নিপজ্জিত্ৰা অয্যা পচ্চযেহি ন কিলমিস্সন্তু, মযং পুঞ্ঞেন ন হাযিস্সাম, অম্হাকং ইধ ৰাসায পটিঞ্ঞং দেথাতি পটিঞ্ঞং কারেত্ৰা উয্যানে নিৰাসট্ঠানাদযো কারেত্ৰা যাৰজীৰং পচ্চকবুদ্ধে উপট্ঠহিত্ৰা তেসু পরিনিব্বুতেসু সাধুকীল়নং কারেত্ৰা চন্দনা গরুআদীহি সরীরকিচ্চং কারেত্ৰা ধাতুযো গহেত্ৰা চেতিযং পতিট্ঠাপেত্ৰা এৰরূপানম্পি মহানুভাৰানং মহেসীনং মরণং ভৰিস্সতি, কিমঙ্গং পন মাদিসানন্তি সংৰেগজাতো জেট্ঠপুত্তং রজ্জে পতিট্ঠাপেত্ৰা সযং পব্বজং পব্বজি, দেৰীপি রঞ্ঞে পব্বজিতে অহং কিংকরিস্সামীতি পব্বজিত্ৰা দ্ৰেপি উয্যানে ৰসন্তা ঝানাভিঞ্ঞং নিব্বত্তেত্ৰা ঝানসুখেন ৰীতিনামেন্তা আযুপরিযোসানে ব্রহ্মলোকে নিব্বত্তিংসু. তে অম্হাকং ভগৰতো কালে ব্রাহ্মণকুলে নিব্বত্তিত্ৰা বুদ্ধসাসনে পব্বজিংসু, তদা নন্দিযরাজা ধুতঙ্গধরানং অগ্গো মহাকস্সপত্থেরোনাম হুত্ৰা চন্দো ৰিয সুরিযো ৰিযচ লোকে পাকটো হুত্ৰা ভগৰতি পরি- নিব্বুতে বুদ্ধসাসনং অতিৰিয সোভেতি. ভরিযাপিস্স ভদ্দকাপিল়ানী নাম অহোসীতি.

১৬. দত্ৰা পুরেকো ৰিপিনে চরন্তো,

পচ্চেকবুদ্ধস্সনুৰাতমত্তং;

কত্ৰা সরট্ঠং কুরুদীপসোভং,

মহানুভাৰো ৰসুধা ধিপোসি.

১৭. তুম্হেচ ভোন্তো খলু সীলৰন্তে,

দদাথ দানানি অনপ্পকানি;

তং ৰো পতিট্ঠাচ ভৰন্তরস্মিং,

চিন্তামণিং কপ্পতরুংৰ সারন্তি.

নন্দিযরাজস্স ৰত্থুং পথমং.