৭. ৰেস্সামিত্তায ৰত্থুম্হি অযমানুপুব্বীকথা

জম্বুদীপে কির কোসম্বিনগরে কোসম্বিরঞ্ঞো ৰেস্সামিত্তানাম অগ্গমহেসী অহোসি. তদা ভগৰা কোসম্বিযং পটিৰসতি মহতা ভিক্খুসঙ্ঘেন সদ্ধিং চারিকং চরমানো. তস্মিং সমযে সা রঞ্ঞা সদ্ধিং ৰিহারং গন্ত্ৰা অনোপমায বুদ্ধলীল়ায মধুরেন সরেন দেসেন্তস্স ভগৰতো ধম্মং সুত্ৰা পসন্না সরণেসু পতিট্ঠায বুদ্ধমামিকা হুত্ৰা ৰিহরতি. অথা পরভাগে তস্স রঞ্ঞো রজ্জত্থায পচ্চন্তরাজা যুদ্ধসজ্জো রজ্জং ৰা দেতু, যুদ্ধংৰাতি পণ্ণং পহিণি. তং সুত্ৰা রাজা মহতিযা সেনায পরিৰুতো যুদ্ধভূমিং গচ্ছন্তো মহেসিযা সদ্ধিং গন্ত্ৰা খন্ধাৰারং নিৰাসেত্ৰা তস্সা এৰমাহ. ভদ্দে সঙ্গামসীসে জযপরাজযো নাম ন সক্কা ৰিঞ্ঞাতুং. সচে মে পরাজযো অভৰিস্স, পুরেতরমেৰ রত্তপতাকং উস্সাপেস্সামি, তেন অভিঞ্ঞাণেন ত্ৰং কোসম্বিমেৰ গচ্ছাহীতি অনুসাসিত্ৰা সঙ্গাম মণ্ডলং গন্ত্ৰা মহারণং করোন্তো অত্তনো পরাজযভাৰং ঞত্ৰা মাতুগামং সরিত্ৰা রত্তদ্ধজং উস্সাপেত্ৰা যুজ্ঝন্তো রণে পতি. অথ সা রত্তপতাকং দিস্ৰা পরাজিতো নূন মে সামিকোতি ভযেন পলাযিতুমারভি. অথ তং চোররঞ্ঞো মনুস্সা দিস্ৰা নূনাযং রঞ্ঞো অগ্গমহেসীতি ঞত্ৰা অত্তনো রাজানং দস্সেসুং, রাজা তং দিস্ৰা পটিবদ্ধচিত্তো মমেতং অভিসেকং করোথাতি অমচ্চে আণাপেসি. অমচ্চা তং অভিসেকত্থায যাচিংসু, সা ন মে ভণে অভিসেকেনত্থোতি ন ইচ্ছি. অমচ্চা তমত্থং রঞ্ঞো আরোচেসুং. রাজা নং পক্কোসাপেত্ৰা কস্মা ন ইচ্ছসীতি পুচ্ছি. সা এৰমাহ.

১. সুণোহি সাধুকং দেৰ, ভাসমানায মে ৰচো;

ভত্তা ময্হং মতো অজ্জ, সব্বসম্পত্তিদাযকো.

২. কত্ৰান সোভিসেকং মং, অত্তনো হদযং ৰিয;

পালেতি তং সরন্তস্সা, সোকগ্গি দহতে মনং.

৩. মহারাজ সচঞ্ঞস্স, অস্স মগ্গমহেসিকা;

তম্হা দুক্খা ন মুচ্চামি, তেনাহং তং ন পত্থযে.

৪. সোকগ্গিনা পদিত্তাহং, সোকে সোকং কথং খিপে;

জলন্তগ্গিম্হী কো নাম, পলালং পক্খিপে বুধো.

৫. পিযৰিপ্পযোগদুক্খং, তং চিন্তযন্তী পুনপ্পুনং;

তম্হা দুক্খা ন মুচ্চামি, তস্মাহং তং ন পত্থযেতি.

তং সুত্ৰা রাজা কোধেনাভিভূতো সচে নাভিসিঞ্চিস্সসি, অগ্গিম্হি তং পক্খিপিস্সামীতি ৰত্ৰা মহন্তং দারুচিতকং কারাপেত্ৰা অগ্গিং দত্ৰা একপজ্জোতে জাতে এত্ত পৰিসাতি আহ. অথ সা যাচন্তী রাজানং আহ.

৬. পাপো নিপ্পাপিনং রাজ, পাতনং খলু পাৰকে;

হোতি পাপফলং তস্স, পচ্চত্তেচ পরত্থচ.

৭. পুরাতনেহি ভূপাল, সমণব্রহ্মণেসুচ;

মাতাপিতুসু বালেসু, রোগেনা তুরইত্থিসু;

নপ্পসত্থো ৰধো দেৰ, তস্মাহং ন ৰধারহাতি.

তং সুত্ৰাপি রাজা অসদ্দহন্তো মনুস্সে আণাপেসি. এতায হত্থপাদে গহেত্ৰা অগ্গিম্হি পক্খিপথাতি তে তথা করিংসু, অথ সা অগ্গিম্হি পক্খিপমানা নত্থেত্থ মে কোচি পটিসরণোতি সরণমেৰ সরণং করোমীতি চিন্তেত্ৰা ‘‘বুদ্ধং সরণং গচ্ছামি, ধম্মং সরণং গচ্ছামি, সঙ্ঘং সরণং গচ্ছামীতি’’ ৰদন্তী মনসাচ অনুস্সরন্তী অগ্গিম্হি পতি, তথাৰিধোপি অগ্গি তস্সা সরীরে লোমকূপমত্তম্পি উণ্হাকারং কাতুং নাসক্খি. পদুমগব্ভং পৰিট্ঠা ৰিয সীতিভূতসরীরা অহোসি. রাজা তং অচ্ছরিযং দিস্ৰা সংৰিগ্গো লোমহট্ঠজাতো ৰেগেন তং উপসঙ্কমিত্ৰা উভোহি হত্থেহি পগ্গয্হ উরে নিপজ্জাপেত্ৰা রাজাসনে নিসীদাপেত্ৰা অঞ্জলিং গগ্গয্হ ঠিতো কস্মা তে তং অগ্গি সরীরং মা পরিদহীতি পুচ্ছি. সা তং কারণং কথেন্তী এৰ মাহ.

৮. মাতা পিতাচ ঞাতীচ, পরিৰারাচ সোহদা;

মন্তো সধাদযোচাপি, মহেসক্খাচ দেৰতা.

৯. এতেচ ঞ্ঞেচ ভূপাল, সত্তানং ভয মাগতে;

রক্খিতুং নেৰ সক্কোন্তি, হিত্ৰান সরণত্তযং.

১০. অগাহং বুদ্ধং সরণং, বুদ্ধো মে সরণং ইতি;

তেন তেজেন মং রাজ, জলন্তো অগ্গি নো দহি.

১১. অগাহং ধম্মং সরণং, ধম্মো মে সরণং ইতি;

তেন তেজেন মং রাজ, জলন্তো অগ্গি নো দহি.

১২. অগাহং সঙ্ঘং সরণং, সঙ্ঘো মে সরণং ইতি;

তেন তেজেন মং রাজ, জলন্তো অগ্গি নো দহি.

১৩. এৰং মহানুভাৰন্তং, পচ্চক্খং এহিপস্সিকং;

নানো পদ্দৰ ৰিদ্ধংসিং, নানাসম্পত্তিদাযকং.

১৪. সরণত্তযঞ্হি যো সত্তো, ন সমাদায গণ্হতি;

ইধৰা পরত্থৰা লোকে, সো সুখং নানুভোস্সতি.

১৫. সরণত্তযঞ্হি যো সত্তো, সুসমাদায গণ্হতি;

ইধৰাপরত্থৰা লোকে, সো সুখা ন ৰিহাযতি.

১৬. তস্মা তুৰম্পি ভূপাল, গণ্হাহি সরণত্তযং;

তং তে ভৰতি সব্বত্থ, তাণং লেণং পরাযণন্তি.

তং সুত্ৰা রাজা অতিৰিয পসন্নমানসো তং খমাপেত্ৰা মহন্তং সক্কারসম্মানং কত্ৰা অজ্জপ্পট্ঠায ত্ৰং মম মাতাতি তং মাতুট্ঠানে ঠপেত্ৰা সরণ মগমাসি. তস্মিং সন্নিপতিত্ৰা ঠিতমহাজনা তং পাটিহারিযং দিস্ৰা সরণেসুচ সীলেসুচ পতিট্ঠায দানাদীনি পুঞ্ঞকম্মানি কত্ৰা যথাকম্মং গতাতি.

১৭. ইতি সরণৰরং সা কেৰলং উগ্গহেত্ৰা,

জলিতদহনমজ্ঝে সীতিভাৰং অলত্থ;

পরমসরণসীলং পালযন্তা কথং ৰো,

ন লভথ ভৰভোগং নিব্বুতিঞ্চাপি অন্তেতি.

ৰেস্সামিত্তাপ ৰত্থুং সত্তমং.