১০. রূপদেৰিযা ৰত্থুম্হি অযমানুপুব্বীকথা

অতীতে কির ৰিপস্সিস্স ভগৰতো কালে তস্মিং নগরে একা গামদারিকা ৰিহারে আহিণ্ডন্তী একং গিলানভিক্খুং দিস্ৰা কম্পমানহদযা উপসঙ্কমিত্ৰা ৰন্দিত্ৰা ভন্তে কোতে আবাধো সরীরং পীল়েতীতি পুচ্ছি. তেনাপি ভগিনি খরাবাধো মে পীল়েতীতি ৰুত্তে সা তেনহি ভন্তে অহং তং রোগং ৰূপসমেস্সামীতি নিমন্তেত্ৰা গেহং গন্ত্ৰা তং পৰত্তিং মাতাপিতুন্নং কথেত্ৰা তেহি অনুঞ্ঞাতা পুন দিৰসে নানগ্গরসেন ভেসজ্জাহারং সম্পাদেসি, ততো সো ভিক্খু পুনদিৰসে চীৰরং পারুপিত্ৰা ভিক্খায চরন্তো তস্সা গেহং গন্ত্ৰা অট্ঠাসি. সা থেরং আগতং দিস্ৰা সোমনস্সজাতা পত্তং গহেত্ৰা আসনং পঞ্ঞাপেত্ৰা অদাসি. তত্থ নিসিন্নং তং আহারেন সাধুকং পরিৰিসিত্ৰা সক্কার মকাসি. অথস্সা সদ্ধাবলেন ভুত্তমত্তেযেৰ সো আবাধো ৰূপসমি. ততো সো ৰূপসন্তরোগো দুতিযদিৰসে তস্সা গেহং না গমাসি. অথ সা ৰিহারং গন্ত্ৰা তং ৰন্দিত্ৰা কস্মানাগতত্থাতি পুচ্ছিত্ৰা তেন মে ভগিনি ব্যাধি ৰূপসমি, তস্মা নাগতোস্মীতি ৰুত্তে সা সাধু ভন্তেতি সোমনস্সজাতা গেহমেৰ অগমাসি. সা তেন পুঞ্ঞকম্মেন কালং কত্ৰা দেৰলোকে নিব্বত্তি. তস্সা তত্থ দ্ৰাদসযোজনিকং কনকৰিমানং নিব্বত্তি. সা তত্থ দেৰিস্সরিযং অনুভৰন্তী ছবুদ্ধন্তরং খেপেত্ৰা অম্হাকং ভগৰতো কালে জম্বুদীপে দেৰপুত্তনগরে উদিচ্চব্রহ্মণকুলে জেট্ঠব্রাহ্মণস্স ভরিযায কুচ্ছিম্হি পটিসন্ধিং গণ্হি, সা পরিপাক মন্ৰায মাতুকুচ্ছিতো নিক্খমি. তস্সা মাতুকুচ্ছিতো নিক্খন্তকালতো পট্ঠায দিৰসে দিৰসে অট্ঠট্ঠনালিমত্তং তণ্ডুলং নিব্বত্ততি. তস্সা রূপসম্পত্তিং দিস্ৰা পসন্না মাতাপিতরো রূপদেৰীতি নাম মকংসু. পচ্ছা তং পতিরূপেন দারকেন নিযোজেসুং. অথস্সা তণ্ডুল- নালিমত্তং গহেত্ৰা পচিতুং আরদ্ধে ইচ্ছিতিচ্ছিতমংসাদিব্যঞ্জনঞ্জ সপ্পিনৰনীতদধিখীরাদিগোরসঞ্চ জীরমরিচাদিকটুকভণ্ডঞ্চ কদলিপনসমধুগুল়াদিউপকরণঞ্চ ভাজনানি পূরেত্ৰা নিব্বত্ততি, তায হত্থেন গহিতং কিঞ্চি খাদনীযং ভোজনীযংৰা পূতিভাৰং ন গচ্ছতি, ভত্তুক্খলিং গহেত্ৰা সকলনগরৰাসিনো ভোজেন্তিযাপি এককটচ্ছুমত্তং ভত্তং গহিতট্ঠানং ন পঞ্ঞাযতি. এৰং অপরিক্খযপুঞ্ঞা অহোসি, সকলদেৰপুত্তনগরে চন্দসুরিযাৰ পাকটা অহোসি, অথ সা পঞ্চসতভিক্খূ নিমন্তেত্ৰা নিচ্চং সকনিৰেসনেযেৰ ভোজেতি, তদা তেসং অন্তরে পটিসম্ভিদাপত্তো মহাসঙ্ঘরক্খিতত্থেরোনাম ইমিস্সা পুঞ্ঞানুভাৰং দিব্বচক্খুনা দিস্ৰা ন জানাতি এসা অত্থনা পুব্বে কতকম্মং. যন্নূনাহং অস্সা পকাসেয্যন্তি একদিৰসং তস্সা নিৰেসনে ভুঞ্জিত্ৰা অনুমোদনং করোন্তো জানাসি ভগিনি তযা পুব্বে কতকম্মন্তি পুচ্ছি, ন জানামি ভন্তে. সোতুমিচ্ছামীতি, অথস্সা সো পুব্বকম্মং পকাসেন্তো.

১. একনৰুতে ইতো কপ্পে,

ৰিপস্সীনাম নাযকো;

অহোসি লোকে লোকেক,

নাযকো ছিন্নবন্ধনো.

২. তদা তস্মিং পুরে রম্মে, আসি ত্ৰং গামদারিকা;

আহিণ্ডন্তী ৰিহারস্মিং, অদ্দক্খি জিনসাৰকং.

৩. রোগাতুরং কিসং পণ্ডুং, অস্সসন্তং মুহুং মুহুং;

দিস্ৰান কম্পিতা চিত্তা, নিমন্তেত্ৰান তং মুনিং.

৪. ভেসজ্জঞ্চেৰ ভত্তঞ্চ, অদা ত্ৰং তেন সো যতি;

অব্যাবাধো অনীঘোচ, অহোসি অনুপদ্দৰো.

৫. ততো ত্ৰং তেন কম্মেন, সুকতেন ততো চুতা;

জাতাসি দেৰলোকস্মিং, সব্বকামসমিদ্ধিনী.

৬. তত্থ তে পুঞ্ঞতেজেন, পাসাদো রতনামযো;

মণিথূপিসতাকিণ্ণো, কূটাগারেহি লঙ্কতো.

৭. নেকগব্ভসতাকিণ্ণো, সযনাসনমণ্ডিতো;

অচ্ছরাসতসংকিণ্ণো, নচ্চগীতাদিসংকুলো.

৮. রম্ভাম্বজম্বুসন্নীর, পূগপুন্নাগপাটলী;

নাগাদিতরুসণ্ডেহি, মণ্ডিতুয্যানপন্তিহি.

৯. পদুমুপ্পলকল়ার, কুন্দকাননমণ্ডিতে;

মধুমত্তালিপালীহি, সারসীসরসংকুলে.

১০. দেৰপুত্তেহি নেকেহি, তথা দেৰচ্ছরাহিচ;

নিচ্চুস্সৰে মহাভোগে, ৰিমানে মননন্দনে.

১১. ত্ৰমেৰং দেৰলোকম্হি, ৰিন্দমানা মহাযসং;

অদ্ধানং ৰীতিনামেত্ৰা, নিব্বুতে গোতমে জিনে.

১২. জম্বুদীপে ইদানি ত্ৰং, নিব্বত্তা উদিতে কুলে;

পুঞ্ঞপঞ্ঞাগুণাৰাসা, রূপেনগ্গা পিযংৰদা.

১৩. এতং তে দেৰলোকস্মিং, দেৰিস্সরিযমব্ভুতং,

ইমং তে ইধ লোকস্মিং, সব্বং মানুসিকং সুখং.

১৪. ৰিপস্সিমুনিনো কালে, ত্ৰং তস্সেকস্স ভিক্খুনো;

অদা দানং গিলানস্স, তস্স তং ফলমীদিসং.

১৫. কাতব্বঞ্হি সদা পুঞ্ঞং, ইচ্ছন্তেন সুখপ্পদং;

তস্মা ত্ৰং সব্বদা ভদ্দে, উস্সুক্কা কুসলে ভৰাতি.

এৰং সো তস্স পুরিমত্তভাৰে কতকম্মং পকাসেত্ৰা ইদানি পুঞ্ঞকম্মে অপ্পমাদা ভৰাতি অনুসাসি. সা থেরস্স ধম্মদেসনং সুত্ৰা পরমসোমনস্সা ততো পট্ঠায দানাদীসু নিরতা পুঞ্ঞানি করোন্তী তেনেৰ সোমনস্সেন সোতাপন্না অরিযসাৰিকা অহোসীতি.

১৬. ইতি তরুণকুমারী পুঞ্ঞকম্মেসু সারং,

অৰিদিতগুণমত্তা দত্ৰ ভিক্খুস্স দানং;

দিৰিমনুজসুখং সালত্থ তুম্হে ভৰন্তা,

ৰিদিতকুসলপাকা কিং ন লব্ভেথ সন্তিং.

রূপদেৰিযা ৰত্থুং দসমং.

ধম্মসোণ্ডকৰগ্গো পথমো.