৮-৯. দুট্ঠদোস সঙ্ঘাদিসেস সিক্খাপুচ্ছা

পুচ্ছা – যং তেন আৰুসো ভগৰতা…পে… সম্মাসম্বুদ্ধেন ভিক্খুং অমূলকেন পারাজিকেন ধম্মেন অনুদ্ধংসেন্তস্স চ, ভিক্খুং অঞ্ঞভাগিযস্স অধিকরণস্স কিঞ্চিদেসং লেসমত্তং উপাদায পারাজিকেন ধম্মেন অনুদ্ধংসেন্তস্স চ সঙ্ঘাদিসেসো কত্থ পঞ্ঞত্তো.

ৰিস্সজ্জনা – রাজগহে ভন্তে পঞ্ঞত্তো.

পুচ্ছা – কং আৰুসো আরব্ভ কিস্মিং ৰত্থুস্মিং পঞ্ঞত্তো.

ৰিস্সজ্জনা – মেত্তিযভূমজকা ভন্তে ভিক্খূ আরব্ভ পঞ্ঞত্তো, মেত্তিযভূমজকা ভন্তে ভিক্খূ আযস্মন্তং দব্বং মল্লপুত্তং অমূলকেন পারাজিকেন ধম্মেন অনুদ্ধংসেসুং, তেযেৰ ভন্তে মেত্তিযভূমজকা ভিক্খূ আযস্মন্তং দব্বং মল্লপুত্তং অঞ্ঞভাগিযস্স অধিকরণস্স কিঞ্চিদেসং লেসমত্তং উপাদায পারাজিকেন ধম্মেন অনুদ্ধংসেসুং, তস্মিং ভন্তে ৰত্থুস্মিং, পঞ্ঞত্তো.