১. সুক্কৰিস্সট্ঠিসঙ্ঘাদিসেস সিক্খাপুচ্ছা

পুচ্ছা – যং তেন আৰুসো ভগৰতা জানতা পস্সতা অরহতা সম্মাসম্বুদ্ধেন উপক্কমিত্ৰা অসুচিং মোচেন্তস্স সঙ্ঘাদিসেসো কত্থ পঞ্ঞত্তো.

ৰিস্সজ্জনা – সাৰত্থিযং ভন্তে পঞ্ঞত্তো.

পুচ্ছা – কং আৰুসো আরব্ভ পঞ্ঞত্তো.

ৰিস্সজ্জনা – আযস্মন্তং ভন্তে সেয্যসকং আরব্ভ পঞ্ঞত্তো.

পুচ্ছা – কিস্মিং আৰুসো ৰত্থুস্মিং পঞ্ঞত্তো.

ৰিস্সজ্জনা – আযস্মা ভন্তে সেয্যসকো হত্থেন উপক্কমিত্ৰা অসুচিং মোচেসি, তস্মিং ভন্তে ৰত্থুস্মিং পঞ্ঞত্তো.

পুচ্ছা – অত্থি আৰুসো তত্থ পঞ্ঞত্তি অনুপঞ্ঞত্তি অনুপ্পন্নপঞ্ঞত্তি.

ৰিস্সজ্জনা – একা ভন্তে পঞ্ঞত্তি, একা অনুপঞ্ঞত্তি, অনুপ্পন্নপঞ্ঞত্তি তস্মিং নত্থি.

পুচ্ছা – কতমা আৰুসো তত্থ মূলপঞ্ঞত্তি.

ৰিস্সজ্জনা – সঞ্চেতনিকা সুক্কৰিস্সট্ঠি সঙ্ঘাদিসেসোতি অযং ভন্তে তত্থ মূলপঞ্ঞত্তি.

পুচ্ছা – কতমা পনাৰুসো তত্থ অনুপঞ্ঞত্তি.

ৰিস্সজ্জনা – অঞ্ঞত্র সুপিনন্তাতি অযং ভন্তে তত্থ অনুপঞ্ঞত্তি.

পুচ্ছা – কতমা পনাৰুসো তত্থ পরিপুণ্ণপঞ্ঞত্তি.

ৰিস্সজ্জনা – সঞ্চেতনিকা সুক্কৰিস্সট্ঠি অঞ্ঞত্রসুপিনন্তা সঙ্ঘাদিসোতি অযং ভন্তে তত্থ পরিপুণ্ণপঞ্ঞত্তি.

পুচ্ছা – সাধারণ পঞ্ঞত্তিনুখো আৰুসো অসাধারণ পঞ্ঞত্তিনুখো.

ৰিস্সজ্জনা – অসাধারণপঞ্ঞত্তি ভন্তে.

পুচ্ছা – তত্থ আৰুসো উপক্কমিত্ৰা অসুচিং মোচেন্তো কতি আপত্তিযো আপজ্জতি.

ৰিস্সজ্জনা – উপক্কমিত্ৰা ভন্তে অসুচিং মোচেন্তো তিস্সো আপত্তিযো আপজ্জতি, চেতেতি উপক্কমতি মুচ্চতি আপত্তি

সঙ্ঘাদিসেসস্স, চেতেতি উপক্কমতি ন মুচ্চতি আপত্তি থুল্লচ্চযস্স, পযোগে দুক্কটং.

পুচ্ছা – কেসং আৰুসো অনাপত্তি.

ৰিস্সজ্জনা – ছন্নং ভন্তে অনাপত্তি সুপিনন্তেন মোচেন্তস্স ন মোচনাধিপ্পাযস্স উম্মত্তকস্স খিত্তচিত্তস্স ৰেদনাট্টস্স আদিকম্মিকস্স ইমেসং খো ভন্তে ছন্নং অনাপত্তি.

পুচ্ছা – পঞ্চন্নং আৰুসো পাতিমোক্খুদ্দেসানং কতমেন উদ্দেসেন উদ্দেসং আগচ্ছতি.

ৰিস্সজ্জনা – পঞ্চন্নং ভন্তে পাতিমোক্খুদ্দেসানং ততিযেন উদ্দেসেন উদ্দেসং আগচ্ছতি.

পুচ্ছা – চতুন্নং আৰুসো ৰিপত্তীনং কতমা ৰিপত্তি.

ৰিস্সজ্জনা – চতুন্নং ভন্তে ৰিপত্তীনং সীলৰিপত্তি.

পুচ্ছা – কা আৰুসো ৰিপত্তি.

ৰিস্সজ্জনা – অসংৰরো ভন্তে ৰিপত্তি.

পুচ্ছা – কা আৰুসো সম্পত্তি.

ৰিস্সজ্জনা – সংৰরো ভন্তে সম্পত্তি.

পুচ্ছা – কা আৰুসো পটিপত্তি.

ৰিস্সজ্জনা – ন এৰ রূপং করিস্সামীতি যাৰজীৰং আপাণকোটিকং সমাদায সিক্খতি সিক্খাপদেসু অযং ভন্তে পটিপত্তি.

পুচ্ছা – কতি আৰুসো অত্থৰসে পটিচ্চ ভগৰতা উপক্কমিত্ৰা অসুচিং মোচেন্তস্স সঙ্ঘাদিসেসো পঞ্ঞত্তো.

ৰিস্সজ্জনা – দস ভন্তে অত্থৰসে পটিচ্চ ভগৰতা উপক্কমিত্ৰা অসুচিং মোচেন্তস্স সঙ্ঘাদিসেসো পঞ্ঞত্তো সঙ্ঘসুট্ঠুতায…পে… ৰিনযানুগ্গহায.

পুচ্ছা – কত্থ আৰুসো ঠিতং.

ৰিস্সজ্জনা – সিক্খাকামেসু ভন্তে ঠিতং.

পুচ্ছা – কে আৰুসো ধারেন্তি.

ৰিস্সজ্জনা – যেসং ভন্তে ৰত্ততি তে ধারেন্তি.

পুচ্ছা – কস্স আৰুসো ৰচনং.

ৰিস্সজ্জনা – ভগৰতো ভন্তে ৰচনং অরহতো সম্মাসম্বুদ্ধস্স.

পুচ্ছা – কেনাৰুসো আভতং.

ৰিস্সজ্জনা – পরম্পরায ভন্তে আভতং.

পুচ্ছা – অত্থি নুখো আৰুসো তত্থ সনিদানে সপদভাজনীযে সৰিনীতৰত্থুকে উপনেতব্বং ৰা অপনেতব্বং ৰা অক্খরপদপচ্চাভট্ঠং ৰা ৰিরদ্ধপদব্যঞ্জনং ৰা.

সংগাযনত্থায সঙ্ঘস্স ঞাপনং

সুণাতু মে ভন্তে সঙ্ঘো আযস্মন্তং ৰিচিত্তসারাভিৰংসং তিপিটকধর ধম্মভণ্ডাগারিকং পঠমস্স সঙ্ঘাদিসেস সিক্খাপদস্স নিদানম্পি পুচ্ছিং, পুগ্গলম্পি পুচ্ছিং, ৰত্থুম্পি পুচ্ছিং, পঞ্ঞত্তিম্পি পুচ্ছিং, অনুপঞ্ঞত্তিম্পি পুচ্ছি, আপত্তিম্পি পুচ্ছিং, অনাপত্তিম্পি পুচ্ছিং, অঞ্ঞানিপি এৰরূপানি অনেকানি পুচ্ছিতব্বট্ঠানানি পুচ্ছিং, পুট্ঠো পুট্ঠো চ সো আযস্মা ৰিচিত্তসারাভিৰংসো ৰিস্সজ্জেসি, ইতিহিদং ভন্তে পঠম সঙ্ঘাদিসেস সিক্খাপদং সপরিৰারং নিম্মলং সুপরিসুদ্ধং তস্সেৰ ভগৰতো ৰচনং অরহতো সম্মাসম্বুদ্ধস্স. তস্মা যথাপুরে মহাকস্সপাদযো মহাথেরৰরা পোরাণসংগীতিকারা ব্রহ্মচরিযস্স চিরট্ঠিতিযা বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং ধম্মৰিনযং সংগাযিংসুচেৰ অনুসংগাযিংসুচ, এৰমেৰ মযম্পি সব্বেৰ ছট্ঠসংগীতিমহাধম্মসভা পরিযাপন্না ইদং পঠমং সঙ্ঘাদিসেস সিক্খাপদং নিদানতো পট্ঠায একচ্চানং ৰচসা সজ্ঝাযৰসেন একচ্চানং মনসা মনসিকরণৰসেনচ একতো গণসজ্ঝাযং কত্ৰা সংগাযেয্যাম.

পুচ্ছা – যং তেন আৰুসো ভগৰতা…পে… সম্মাসম্বুদ্ধেন মাতুকামেন সদ্ধিং কাযসংসগ্গং সমাপজ্জন্তস্স চ, মাতুগামং দুট্ঠুল্লাহি ৰাচাহি ওভাসন্তস্স চ, মাতুগামস্স সন্তিকে অত্তকাম পারিচরিযায ৰণ্ণং ভাসন্তস্স চ, সঞ্চরিত্তং সমাপজ্জন্তস্স চ সঙ্ঘাদিসেসো কত্থ পঞ্ঞত্তো.

ৰিস্সজ্জনা – সাৰত্থিযং ভন্তে পঞ্ঞত্তো.

পুচ্ছা – কং আৰুসো আরব্ভ পঞ্ঞত্তো.

ৰিস্সজ্জনা – আযস্মন্তং ভন্তে উদাযিত্থেরং আরব্ভ পঞ্ঞত্তো.

পুচ্ছা – কিস্মিং আৰুসো ৰত্থুস্মিং পঞ্ঞত্তো.

ৰিস্সজ্জনা – আযস্মা ভন্তে উদাযিত্থেরো মাতুগামেন সদ্ধিং কাযসংসগ্গং সমাপজ্জি, আযস্মাযেৰ ভন্তে উদাযিত্থেরো মাতুগামং দুট্ঠুল্লাহি ৰাচাহি ওভাসি, আযস্মাযেৰ ভন্তে উদাযিত্থেরো মাতুগামস্স সন্তিকে অত্তকাম পারিচরিযায ৰণ্ণং অভাসি, আযস্মাযেৰ ভন্তে উদাযিত্থেরো সঞ্চরিত্তং সমাপজ্জিং, তস্মিং ভন্তে ৰত্থুস্মিং পঞ্ঞত্তো.