মহাৰগ্গসংযুত্তপাল়ি

অৰিজ্জাৰগ্গ

উপড্ঢসুত্ত

পুচ্ছা – মহাৰগ্গসংযুত্তে পনাৰুসো পোরাণকেহি ধম্মসংগাহকমহাথেরেহি দুতিযং সংগীতং উপড্ঢসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সক্কেসু ভন্তে সক্করে নাম সক্যানং নিগমে আযস্মন্তং আনন্দত্থেরং আরব্ভ ভাসিতং. আযস্মা ভন্তে আনন্দত্থেরো ভগৰন্তং এতদৰোচ ‘‘উপড্ঢমিদং ভন্তে ব্রহ্মচরিযং যদিদং কল্যাণমিত্ততা কল্যাণসহাযতা কল্যাণসম্পৰঙ্কতা’’তি. তস্মিং ভন্তে ৰত্থুস্মিং ‘‘মা হেৰং আনন্দ, মা হেৰং আনন্দ, সকলমেৰিদং আনন্দ ব্রহ্মচরিযং যদিদং কল্যাণমিত্ততা কল্যাণসহাযতা কল্যাণসম্পৰঙ্কতা’’তি এৰমাদিনা ভগৰতা ভাসিতং.

মমং হি আনন্দ কল্যাণমিত্তং আগম্ম জাতিধম্মা সত্তা জাতিযা পরিমুচ্চন্তি.

বোজ্ঝঙ্গসংযুত্ত

কুণ্ডলিযসুত্ত

পুচ্ছা – বোজ্ঝঙ্গসংযুত্তে পনাৰুসো পোরাণকেহি ধম্মসংগাহকমহাথেরেহি ছট্ঠং সংগীতং কুণ্ডলিযসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সাকেতে ভন্তে অঞ্জনৰনে মিগদাযে কুণ্ডলিযং পরিব্বাজকং আরব্ভ ভাসিতং. কুণ্ডলিযো ভন্তে পরিব্বাজকো ভগৰন্তং উপসঙ্কমিত্ৰা ‘‘অহমস্মি ভো গোতম আরামনিস্সযী পরিসাৰচরো, তস্স ময্হং ভো গোতম পচ্ছাভত্তং ভুত্তপাতরাসস্স অযমাচারো হোতি আরামেন আরামং উয্যানেন উয্যানং অনুচঙ্কমামি অনুৰিচরামি, সো তত্থ পস্সামি একে সমণব্রাহ্মণে ইতিৰাদপ্পমোক্খানিসংসঞ্চেৰ কথং কথন্তে উপারম্ভানিসংসঞ্চ, ভৰং পন গোতমো কিমানিসংসো ৰিহরতী’’তি এতং ৰচনং অৰোচ. তস্মিং ভন্তে ৰত্থুস্মিং ‘‘ৰিজ্জাৰিমুত্তিফলানিসংসো খো কুণ্ডলিয তথাগতো ৰিহরতী’’তি এৰমাদিনা ভগৰতা ভাসিতং.

পঠম গিলানসুত্ত

পুচ্ছা – তেনাৰুসো ভগৰ্ৰতা জানতা…পে… সম্মাসম্বুদ্ধেন বোজ্ঝঙ্গসংযুত্তে দুতিযে গিলানৰগ্গে পঠমগিলানসুত্তং কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – রাজগহে ভন্তে পিপ্পলিগুহাযং আযস্মন্তং মহাকস্সপত্থেরং আরব্ভ ভাসিতং. আযস্মা ভন্তে মহাকস্সপত্থেরো পিপ্পলিগুহাযং ৰিহরতি আবাধিকো দুক্খিতো বাল়্হগিলানো. অথ খো ভন্তে ভগৰা সাযন্হসমযং পটিসল্লানা ৰুট্ঠিতো যেনাযস্মা মহাকস্সপো তেনুপসঙ্কমি, উপসঙ্কমিত্ৰা পঞ্ঞত্তে আসনে নিসীদি, নিসজ্জ খো ভগৰা আযস্মন্তং মহাকস্সপং এতদৰোচ– ‘‘কচ্চি তে কস্সপ খমনীযং, কচ্চি যাপনীযং, কচ্চি দুক্খা ৰেদনা পটিক্কমন্তি নো অভিক্কমন্তি, পটিক্কমোসানং পঞ্ঞাযতি নো অভিক্কমোতি. ন মে ভন্তে খমনীযং ন যাপনীযং, বাল়্হা মে দুক্খা ৰেদনা অভিক্কমন্তি নো পটিক্কমন্তি, অভিক্কমোসানং পঞ্ঞাযতি নো পটিক্কমো’’তি. তস্মিং ভন্তে ৰত্থুস্মিং ‘‘সত্তিমে কস্সপ বোজ্ঝঙ্গা মযা সম্মদক্খাতা ভাৰিতা বহুলীকতা অভিঞ্ঞায সম্বোধায নিব্বানায সংৰত্তন্তী’’তি এৰমাদিনা ভগৰতা ভাসিতং.

উদাযিসুত্ত

পুচ্ছা – তত্থেৰ আৰুসো ততিযে উদাযিৰগ্গে পোরাণকেহি ধম্মসংগাহকমহাথেরেহি দসমং সংগীতং উদাযিসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সুম্ভেসু ভন্তে সেতকেনাম সুম্ভানং নিগমে আযস্মন্তং উদাযিত্থেরং আরব্ভ ভাসিতং. আযস্মা ভন্তে উদাযিত্থেরো ভগৰন্তং উপসঙ্কমিত্ৰা ‘‘অচ্ছরিযং ভন্তে, অব্ভুতং ভন্তে, যাৰ বহুকতঞ্চ মে ভন্তে ভগৰতি পেমঞ্চ গারৰো চ হিরী চ ওত্তপ্পঞ্চাতি এৰমাদিকং ৰচনং অৰোচ. তস্মিং ভন্তে ৰত্থুস্মিং ‘‘সাধু সাধু উদাযি এসো হি তে উদাযি মগ্গো পটিলদ্ধো. যো তে ভাৰিতো বহুলীকতো, তথা তথা ৰিহরন্তং তথত্তায উপনেস্সতি, যথা ত্ৰং ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানিস্সতী’’তি. এৰং খো ভগৰতা ভাসিতং.

সতিপট্ঠানসংযুত্ত

সতিসুত্ত

পুচ্ছা – সতিপট্ঠানসংযুত্তে আৰুসো পোরাণকেহি ধম্মসংগাহক মহাথেরেহি দুতিযং সংগীতং সতিসুত্তং ভগৰতা কত্থ কং কারব্ভ কথঞ্চ ভাসিতং.

ৰিস্সজ্জনা – ৰেসালিযং ভন্তে অম্বপালিৰনে সম্বহুলে ভিক্খূ আরব্ভ ‘‘সতো ভিক্খৰে ভিক্খু ৰিহরেয্য সম্পজানো অযং ৰো অম্হাকং অনুসাসনী’’তি এৰমাদিনা ভগৰতা ভাসিতং.

সালসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি চতুত্থং সংগীতং সালসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – কোসলেসু ভন্তে সালাযনাম কেসলানং ব্রাহ্মণগামে সম্বহুলে ভিক্খূ আরব্ভ ‘‘যে তে ভিক্খৰে ভিক্খূ নৰা অচিরপব্বজিতা অধুনাগতা ইমং ধম্মৰিনযং, তে ৰো ভিক্খৰে ভিক্খূ চতুন্নং সতিপট্ঠানানং ভাৰনায সমাদপেতব্বা নিৰেসেতব্বা পতিট্ঠাপেতব্বা’’তি এৰমাদিনা ভন্তে ভগৰতা ভাসিতং.

সকুণগ্ঘিসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি ছট্ঠং সংগীতং সকুণগ্ঘিসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘ভূতপুব্বং ভিক্খৰে সকুণগ্ঘি লাপং সকুণং সহসা অজ্ঝপ্পত্তা অগ্গহেসি. অথ খো ভিক্খৰে লাপো সকুণো সকুণগ্ঘিযা হরিযমানো এৰং পরিদেৰসি মযমেৰম্হ অলক্খিকা, মযং অপ্পপুঞ্ঞা, যে মযং অগোচরে চরিম্হ পরৰিসযে, সচেজ্জ মযং গোচরে চরেয্যাম সকে পেত্তিকে ৰিসযে, ন ম্যাহং সকুণগ্ঘি অলং অভৰিস্স যদিদং যুদ্ধাযা’’তি এৰমাদিনা ভগৰতা ভাসিতং.

মযমেৰম্হ অলক্খিকা, মযং অপ্পপুঞ্ঞা.

কো পন তে লাপ গোচরো সকো পেত্তিকো ৰিসযো.

যদিদং নঙ্গলকট্ঠকরণং লেড্ডুট্ঠানং.

এহি খো দানি মে সকুণগ্ঘি, এহি খো দানি মে সকুণগ্ঘি,

(দারুগুল়োৰিয ৰিনিৰত্তিত্ৰা তস্সেৰ লেড্ডুস্স অন্তরে পচ্চুপাদি. অট্ঠকথা)

এৰঞ্হি তং ভিক্খৰে হোতি যো অগোচরে চরতি পরৰিসযে.

তস্মাতিহ ভিক্খৰে মা অগোচরে চরিত্থ পরৰিসযে.

গোচরে ভিক্খৰে চরথ সকে পেত্তিকে ৰিসযে.

গোচরে ভিক্খৰে চরতং সকে পেত্তিকে ৰিসযে ন লচ্ছতি মারো ওতারং, ন লচ্ছতি মারো আরম্মণং.

ভিক্খুনুপস্সযসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি দসমং সংগীতং ভিক্খুনুপস্সযসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সাৰত্থিযং ভন্তে আযস্মন্তং আনন্দত্থেরং আরব্ভ ভাসিতং. আযস্মা ভন্তে আনন্দো যাৰত্তকো অহোসি ভিক্খুনীহি সদ্ধিং কথাসল্লাপো তং সব্বং ভগৰতো আরোচেসি. তস্মিং ভন্তে ৰত্থুস্মিং ‘‘এৰমেতং আনন্দ, এৰমেতং আনন্দ, যোহি কোচি আনন্দ ভিক্খু ৰা ভিক্খুনী ৰা চতূসু সতিপট্ঠানেসু সুপ্পতিট্ঠিতচিত্তো ৰিহরতি, তস্সেতং পাটিকঙ্খং উল়ারং পুব্বেনাপরং ৰিসেসং সঞ্জানিস্সতী’’তি এৰমাদিনা ভগৰতা ভাসিতং.

চুন্দসুত্ত

পুচ্ছা – তত্থেৰ আৰুসো দুতিযে নালন্দৰগ্গে পোরাণকেহি ধম্মসংগাহকমহাথেরেহি ততিযং সংগীতং চুন্দসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সাৰত্থিযং ভন্তে আযস্মন্তংযেৰ আনন্দত্থেরং আরব্ভ ভাসিতং. আযস্মা ভন্তে আনন্দত্থেরো চুন্দেন সমণুদ্দেসেন সদ্ধিং যেন ভগৰা তেনুপসঙ্কমি. উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো ভন্তে আযস্মা আনন্দো ভগৰন্তং এতদৰোচ ‘‘অযং ভন্তে চুন্দো সমণুদ্দেসো এৰমাহ ‘আযস্মা ভন্তে সারিপুত্তো পরিনিব্বুতো, ইদমস্স পত্তচীৰর’ন্তি. অপি চ মে ভন্তে মধুরকজাতো ৰিয কাযো, দিসাপি মে ন পক্খাযন্তি, ধম্মাপি মং নপ্পটিভন্তি ‘আযস্মা সারিপুত্তো পরিনিব্বুতো’তি সুত্ৰা’’তি. তস্মিং ভন্তে ৰত্থুস্মিং ‘‘কিং নু খো তে আনন্দ সারিপুত্তো সীলক্খন্ধং ৰা আদায পরিনিব্বুতো, সমাধিক্খন্ধং ৰা, পঞ্ঞাক্খন্ধংৰা, ৰিমুত্তিক্খন্ধংৰা, ৰিমুত্তিঞাণদস্সনক্খন্ধং ৰা আদায পরিনিব্বুতো’’তি এৰমাদিনা ভগৰতা ভাসিতং.

অযং ভন্তে চুন্দোসমণুদ্দেসো এৰমাহ.

তস্মাতিহানন্দ অত্তদীপা ৰিহরথ অত্তসরণা অনঞ্ঞসরণা ধম্মদীপা ধম্মসরণা অনঞ্ঞসরণা.

বাহিযসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি পঞ্চমং সংগীতং বাহিযসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সাৰত্থিযং ভন্তে আযস্মন্তং বাহিযং আরব্ভ ভাসিতং. আযস্মা ভন্তে বাহিযো ভগৰন্তং এতদৰোচ ‘‘সাধু মে ভন্তে ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি. তস্মিং ভন্তে ৰত্থুস্মিং ‘‘তস্মাতিহ ত্ৰং বাহিয আদিমেৰ ৰিসোধেহি কুসলেসু ধম্মেসু. কো চাদিকুসলানং ধম্মানং, সীলঞ্চ সুৰিসুদ্ধং দিট্ঠিচ উজুকা’’তি এৰমাদিনা ভগৰতা ভাসিতং.

সীলট্ঠিতিৰগ্গ

চিরট্ঠিতিসুত্ত

পুচ্ছা – তত্থেৰ আৰুসো ততিযে সীলট্ঠিতিৰগ্গে পোরাণকেহি ধম্মসংগাহকমহাথেরেহি দুতিযং সংগীতং চিরট্ঠিতিসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – পাটলিপুত্তে ভন্তে আযস্মন্তং ভদ্দং আরব্ভ আযস্মতা আনন্দত্থেরেন ধম্মভণ্ডাগারিকেন ভাসিতং. আযস্মা ভন্তে ভদ্দো সাযন্হসমযং পটিসল্লানা ৰুট্ঠিতো যেনাযস্মা আনন্দো তেনুপসঙ্কমি, উপসঙ্কমিত্ৰা আযস্মন্তং আনন্দং এতদৰোচ ‘‘কো নু খো আৰুসো আনন্দ হেতু কো পচ্চযো, যেন তথাগতে পরিনিব্বুতে সদ্ধম্মো ন চিরট্ঠিতিকো হোতি, কো পনাৰুসো আনন্দ হেতু কো পচ্চযো, যেন তথাগতে পরিনিব্বুতে সদ্ধম্মো চিরট্ঠিতিকো হোতী’’তি. তস্মিং ভন্তে ৰত্থুস্মিং ‘‘সাধু সাধু আৰুসো ভদ্দ, ভদ্দকো খো তে আৰুসো ভদ্দ উম্মঙ্গো’’তি এৰমাদিনা আযস্মতা আনন্দত্থেরেন ধম্মভণ্ডাগারিকেন ভাসিতং.

ভদ্দকো তে আৰুসো ভদ্দ উম্মঙ্গো.

‘‘চতুন্নং খো আৰুসো সতিপট্ঠানানং অভাৰিতত্তা অবহুলীকতত্তা তথাগতে পরিনিব্বুতে সদ্ধম্মো ন চিরট্ঠিতিকো হোতী’’ –

সিরিৰড্ঢসুত্ত

পুচ্ছা – তস্সাৰুসো ভগৰতা অরহতো সম্মাসম্বুদ্ধস্স পাৰচনসমুদযভূতায মহাৰগ্গপাল়িযা সতিপট্ঠানসংযুত্তে সীলট্ঠিতিৰগ্গে নৰমং সিরিৰড্ঢসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – রাজগহে ভন্তে সিরিৰড্ঢং গহপতিং আরব্ভ আযস্মতা আনন্দত্থেরেন ধম্মভণ্ডাগারিকেন ভাসিতং. সিরিৰড্ঢো ভন্তে গহপতি আবাধিকো হোতি দুক্খিতো বাল়্হগিলানো. অথখো ভন্তে আযস্মা আনন্দো যেনসিরিৰড্ঢস্স গহপতিস্স নিৰেসনং তেনুপসঙ্কমি, উপসঙ্কমিত্ৰা পঞ্ঞত্তে আসনে নিসীদি. নিসজ্জ খো আযস্মা আনন্দো সিরিৰড্ঢং গহপতিং এতদৰোচ ‘‘কচ্চি তে গহপতি খমনীযং, কচ্চি যাপনীযং, কচ্চি দুক্খা ৰেদনা পটিক্কমন্তি নো অভিক্কমন্তি, পটিক্কমোসানং পঞ্ঞাযতি নো অভিক্কমো’’তি. ন মে ভন্তে খমনীযং, ন যাপনীযং, বাল়্হা মে দুক্খা ৰেদনা অভিক্কমন্তি নো পটিক্কমন্তি, অভিক্কমোসানং পঞ্ঞাযতি নো পটিক্কমো’’তি. তস্মিং ভন্তে ৰত্থুস্মিং ‘‘তস্মাতিহ তে গহপতি এৰং সিক্খিতব্বং ‘কাযে কাযানুপস্সী ৰিহরিস্সামি আতাপী সম্পজানো সতিমা ৰিনেয্য লোকে অভিজ্ঝা দোমনস্সং. ৰেদনাসু. চিত্তে. ধম্মেসু ধম্মানুপস্সী ৰিহরিস্সামি আতাপী সম্পজানো সতিমা ৰিনেয্য লোকে অভিজ্ঝা দোমনস্স’ন্তি. এৰঞ্হি তে গহপতি সিক্খিতব্ব’’ন্তি. এৰং খো আযস্মতা আনন্দত্থেরেন ধম্মভণ্ডাগারিকেন ভাসিতং.

ইদ্ধিপাদসংযুত্ত

মোগ্গল্লানসুত্ত

পুচ্ছা – ইদ্ধিপাদসংযুত্তে আৰুসো চতুত্থং মোগ্গল্লানসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং. সম্বহুলা ভন্তে ভিক্খূ হেট্ঠামিগারমাতুপাসাদে ৰিহরন্তি উদ্ধতা উন্নল়া চপলা মুখরা ৰিকিণ্ণৰাচা মুট্ঠস্সতিনো অসম্পজানা অসমাহিতা ভন্তচিত্তা পাকতিন্দ্রিযা. তস্মিং ভন্তে ৰত্থুস্মিং আযস্মন্তং মহামোগ্গল্লানং তে ভিক্খূ সংৰেজেত্ৰা ‘‘কিং নু তুম্হে ভিক্খৰে সংৰিগ্গা লোমহট্ঠজাতা একমন্তং ঠিতা’’তি এৰমাদিনা ভগৰতা ভাসিতং.

অচ্ছরিযং ৰত ভো, অব্ভুতং ৰত ভো.

নিৰাতঞ্চ ৰত.

অযঞ্চ মিগারমাতুপাসাদো গম্ভীরনেমো.

তুম্হেৰ খো ভিক্খৰে সংৰেজেতুকামেন মোগ্গল্লানেন ভিক্খুনা পাদঙ্গুট্ঠকেন মিগারমাতুপাসাদো সঙ্কম্পিতো সম্পকম্পিতো সম্পধালিতো.

তং কিং মঞ্ঞথ ভিক্খৰে, কতমেসং ধম্মানং ভাৰিতত্তা বহুলীকতত্তা মোগ্গল্লানো ভিক্খু এৰং মহিদ্ধিকো এৰং মহানুভাৰো.

অনুরুদ্ধসংযুত্ত

বাল়্হগিলানসুত্ত

পুচ্ছা – অনুরুদ্ধসংযুত্তে আৰুসো পোরাণকেহি ধম্মসংগাহকমহাথেরেহি দসমং সংগীতং বাল়্হগিনানসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ আযস্মতা অনুরুদ্ধত্থেরেন ভাসিতং. সম্বহুলা ভন্তে ভিক্খূ আযস্মন্তং অনুরুদ্ধং আবাধিকং দুক্খিতং বাল়্হগিলানং এতদৰোচুং ‘‘কতমেনাযস্মতো অনুরুদ্ধস্স ৰিহারেন ৰিহরতো উপ্পন্না সারীরিকা দুক্খা ৰেদনা চিত্তং ন পরিযাদায তিট্ঠন্তী’’তি. তস্মিং ভন্তে ৰত্থুস্মিং ‘‘চতূসু খো মে আৰুসো সতিপট্ঠানেসু সুপ্পতিট্ঠিতচিত্তস্স ৰিহরতো উপ্পন্না সারীরিকা দুক্খা ৰেদনা চিত্তং ন পরিযাদায তিট্ঠন্তী’’তি এৰমাদিনা আযস্মতা অনুরুদ্ধত্থেরেন ভাসিতং.

আনাপানসংযুত্ত

মহাকপ্পিনসুত্ত

পুচ্ছা – আনাপানসংযুত্তে আৰুসো পোরাণকেহি ধম্মসংগাহকমহাথেরেহি সত্তমং সংগীতং মহাকপ্পিনসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘পস্সথ নো তুম্হে ভিক্খৰে এতস্স ভিক্খুনো কাযস্স ইঞ্জিতত্তং ৰা ফন্দিতব্বং ৰা’’তি এৰমাদিনা ভগৰতা ভাসিতং.

ইচ্ছানঙ্গলসুত্ত

পুচ্ছা – তত্থেৰ আৰুসো দুতিযৰগ্গে পঠমং ইচ্ছানঙ্গলসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – ইচ্ছানঙ্গলে ভন্তে সম্বহুলে ভিক্খূ আরব্ভ ‘‘সচে খো ভিক্খৰে অঞ্ঞতিত্থিযা পরিব্বাজকা এৰং পুচ্ছেয্যুং ‘কতমে নাৰুসো ৰিহারেন সমণো গোতমো ৰস্সাৰাসং বহুলং ৰিহাসী’তি. এৰং পুট্ঠা তুম্হে ভিক্খৰে তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ আনাপানস্সতিসমাধিনা খো আৰুসো ভগৰা ৰস্সাৰাসং বহুলং ৰিহাসী’’তি এৰমাদিনা ভন্তে ভগৰতা ভাসিতং.

সোতাপত্তিসংযুত্ত

চক্কৰত্তিরাজসুত্ত

পুচ্ছা – সোতাপত্তিসংযুত্তে আৰুসো পোরাণকেহি ধম্মসংগাহকমহাথেরেহি পঠমং সংগীতং চক্কৰত্তিরাজসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘কিঞ্চাপি ভিক্খৰে রাজা চক্কৰত্তী চতুন্নং দীপানং ইস্সরিযাধিপচ্চং রজ্জং কারেত্ৰা কাযস্স ভেদা পরং মরণা সুগতিং সগ্গং লোকং উপপজ্জতি দেৰানং তাৰতিংসানং সহব্যতং, সো তত্থ নন্দনে ৰনে অচ্ছরাসঙ্ঘপরিৰুতো দিব্বেহি চ পঞ্চহি কামগুণেহি সমপ্পিতো সমঙ্গীভূতো পরিচারেতি সো চতূহি ধম্মেহি অসমন্নাগতো, অথ খো সো অপরিমুত্তোৰ নিরযা, অপরিমুত্তো তিরচ্ছানযোনিযা, অপরিমুত্তো পেত্তিৰিসযা, অপরিমুত্তো অপাযদুগ্গতিৰিনিপাতা’’তি এৰমাদিনা ভন্তে ভগৰতা ভাসিতং.

দীঘাৰু উপাসকসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি ততিযং সংগীতং দীঘাৰুউপাসকসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – রাজগহে ভন্তে দীঘাৰুং উপাসকং আরব্ভ ভাসিতং. ভগৰা ভন্তে দীঘাৰুং উপাসকং আবাধিকং দুক্খিতং বাল়্হগিলানং এতদৰোচ ‘‘কচ্চি তে দীঘাৰু খমনীযং, কচ্চি যাপনীযং, কচ্চি দুক্খা ৰেদনা পটিক্কমন্তি নো অভিক্কমন্তি, পটিক্কমোসানং পঞ্ঞাযতি নো অভিক্কমো’’তি. ন মে ভন্তে খমনীযং, ন যাপনীযং বাল়্হা মে দুক্খা ৰেদনা অভিক্কমন্তি নো পটিক্কমন্তি, অভিক্কমোসানং পঞ্ঞাযতি নো পটিক্কমোতি. তস্মিং ভন্তে ৰত্থুস্মিং ‘‘তস্মাতিহ তে দীঘাৰু এৰং সিক্খিতব্বং বুদ্ধে অৰেচ্চপ্পসাদেন সমন্নাগতো ভৰিস্সামী’’তি এৰমাদিনা ভগৰতা ভাসিতং.

যানিমানি ভন্তে ভগৰতা চত্তারি সোতাপত্তিযঙ্গানি দেসিতানি, সংৰিজ্জন্তে তে ধম্মা মযি–

তস্মাতিহ ত্ৰং দীঘাৰু ইমেসু চতূসু সোতাপত্তিযঙ্গেসু পতিট্ঠায ছ ৰিজ্জাভাগিযে ধম্মে উত্তরি ভাৰেয্যাসি–

মা ত্ৰং তাত দীঘাৰু এৰং মনসাকাসি.

ইঙ্ঘ ত্ৰং তাত দীঘাৰু যদেৰ তে ভগৰা আহ, তদেৰ ত্ৰং সাধুকং মনসিকরোহি.

পণ্ডিতো ভিক্খৰে দীঘাৰু উপাসকো.

পচ্চপাদি ধম্মস্সানুধম্মং.

ন চ মং ধম্মাধিকরণং ৰিহেঠেসি.

দীঘাৰু ভিক্খৰে উপাসকো পঞ্চন্নং ওরম্ভাগিযানং সংযোজনানং পরিক্খযা ওপপাতিকো তত্থ পরিনিব্বাযী অনাৰত্তিধম্মো তস্মা লোকা.

ৰেল়ুদ্ৰারেয্যসুত্ত

পুচ্ছা – তেনাৰুসো ভগৰতা…পে… সম্মাসম্বুদ্ধেন সোতাপত্তিসংযুত্তে সত্তমং সংগীতং ৰেল়ুদ্ৰারেয্যসুত্তং কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – কোসলেসু ভন্তে ৰেল়ুদ্ৰারে নাম কোসলানং ব্রাহ্মণ গামে ৰেল়ুদ্ৰারেয্যকে ব্রাহ্মণগহপতিকে আরব্ভ ভাসিতং.

ৰেল়ুদ্ৰারেয্যকা ভন্তে ব্রাহ্মণগহপতিকা ভগৰন্তং এতদৰোচুং ‘‘মযং ভো গোতম এৰংকামা এৰংছন্দা এৰংঅধিপ্পাযা পুত্তসম্বাধসযনং অজ্ঝাৰসেয্যাম…পে… জাতরূপরজতং সাদিযেয্যাম, কাযস্স ভেদা পরং মরণা সুগতিং সগ্গং লোকং উপপজ্জেয্যাম, তেসং নো ভৰং গোতমো অম্হাকং এৰংকামানং এৰংছন্দানং এৰংঅধিপ্পাযানং তথা দম্মং দেসেতু, যথা মযং পুত্তসম্বাধসযনং অজ্ঝাৰসেয্যাম…পে… কাযস্স ভেদা পরং মরণা সুগতিং সগ্গং লোকং উপপজ্জেয্যামা’’তি. তস্মিং ভন্তে ৰত্থুস্মিং ‘‘অত্তূপনাযিকং ৰো গহপতযো ধম্মপরিযাযং দেসেস্সামি, তং সুণাথ সাধুকং মনসি করোথ, ভাসিস্সামী’’তি এৰমাদিনা ভগৰতা ভাসিতং.

সরণানিৰগ্গ

পঠম মহানামসুত্ত

পুচ্ছা – তত্থেৰ আৰুসো ততিযে সরণানিৰগ্গে পোরাণকেহি ধম্মসংগাহকমহাথেরেহি পঠমং সংগীতং পঠমমহানামসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সক্কেসু ভন্তে কপিলৰত্থুস্মিং নিগ্রোধারামে মহানামং সক্কং আরব্ভ ভাসিতং. মহানামো ভন্তে সক্কো ভগৰন্তং এতদৰোচ ‘‘ইদং ভন্তে কপিলৰত্থু ইদ্ধঞ্চেৰ ফীতঞ্চ বাহুজঞ্ঞং আকিণ্ণমনুস্সং সম্বাধব্যূহং, সো খ্ৰাহং ভন্তে ভগৰন্তং ৰা পযিরুপাসিত্ৰা মনোভাৰনীযে ৰা ভিক্খূ সাযন্হসমযং কপিলৰত্থুং পৰিসন্তো ভন্তেনপি হত্থিনা সমাগচ্ছামি, ভন্তেনপি অস্সেন সমাগচ্ছামি, ভন্তেনপি রথেন সমাগচ্ছামি, ভন্তেনপি সকটেন সমাগচ্ছামি, ভন্তেনপি পুরিসেন সমাগচ্ছামি, তস্স ময্হং ভন্তে তস্মিং সমযে মুস্সতেৰ ভগৰন্তং আরব্ভ সতি, মুস্সতি ধম্মং আরব্ভ সতি, মুস্সতি সঙ্ঘং আরব্ভ সতি, তস্স ময্হং ভন্তে এৰং হোতি ইমম্হি চাহং সমযে কালং করেয্যং, কা ময্হং গতি, কো অভিসম্পরাযো’’তি. তস্মিং ভন্তে ৰত্থুস্মিং ‘‘মা ভাযি মহানাম, মা ভাযি মহানাম, অপাপকং তে মরণং ভৰিস্সতি অপাপিকা কালং কিরিযা’’তি এৰমাদিনা ভগৰতা ভাসিতং.

দুতিয সরণানিসক্কসুত্ত

পুচ্ছা – তত্থেৰ আৰুসো ধম্মসংগাহকমহাথেরেহি পঞ্চমং সংগীতং দুতিযসরণানিসক্কসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সক্কেসু ভন্তে কপিলৰত্থুস্মিং নিগ্রোধারামে মহানামংযেৰ সক্কং আরব্ভ ভাসিতং.

মহানামো ভন্তে সক্কো ভগৰন্তং এতদৰোচ ‘‘ইধ ভন্তে সরণানি সক্কো কালঙ্কতো, সো ভগৰতা ব্যাকতো ‘সোতাপন্নো অৰিনিপাতধম্মো নিযতো সম্বোধিপরাযণো’তি. তত্র সুদং ভন্তে সম্বহুলা সক্কা সঙ্গম্ম সমাগম্ম উজ্ঝাযন্তি খীযন্তি ৰিপাচেন্তি ‘অচ্ছরিযং ৰত ভো, অব্ভুতং ৰত

ভো, এত্থ দানি কো ন সোতাপন্নো ভৰিস্সতি, যত্র হি নাম সরণানি সক্কো কালঙ্কতো, সো ভগৰতা ব্যাকতো ‘সোতাপন্নো অৰিনিপাতধম্মো নিযতো সম্বোধিপরাযণো’তি, সরণানি সক্কো সিক্খায অপরিপূরকারী অহোসী’’তি তস্মিং ভন্তে ৰত্থুস্মিং ‘‘যো সো মহানাম দীঘরত্তং উপাসকো বুদ্ধং সরণং গতো, ধম্মং সরণং গতো, সঙ্ঘং সরণং গতো, সো কথং ৰিনিপাতং গচ্ছেয্যা’’তি এৰমাদিনা ভগৰতা ভাসিতং.

পঠম অনাথপিণ্ডিকসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি ছট্ঠং সংগীতং পঠমঅনাথপিণ্ডিকসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – সাৰত্থিযং ভন্তে অনাথপিণ্ডিকং গহপতিং আরব্ভ আযস্মতা সারিপুত্তত্থেরেন ধম্মসেনাপতিনা ভাসিতং.

আযস্মা ভন্তে সারিপুত্তত্থেরো আযস্মতা আনন্দত্থেরেন পচ্ছাসমণেন সদ্ধিং যেন অনাথপিণ্ডিকস্স গহপতিস্স নিৰেসনং তেনুপসঙ্কমি, উপসঙ্কমিত্ৰা পঞ্ঞত্তে আসনে নিসীদি, নিসজ্জ খো আযস্মা সারিপুত্তো অনাথপিণ্ডিকং গহপতিং আবাধিকং দুক্খিতং বাল়্হগিলানং এতদৰোচ ‘‘কচ্চি তে গহপতি খমনীযং কচ্চি যাপনীযং, কচ্চি দুক্খা ৰেদনা পটিক্কমন্তি, নো অভিক্কমন্তি, পটিক্কমোসানং পঞ্ঞাযতি, নো অভিক্কমো’’তি, ন মে ভন্তে খমনীযং, ন যাপনীযং, বাল়্হা মে দুক্খা ৰেদনা অভিক্কমন্তি, নো পটিক্কমন্তি, অভিক্কমোসানং পঞ্ঞাযতি, নো পটিক্কমোতি. তস্মিং ভন্তে ৰত্থুস্মিং ‘‘যথা রূপেন খো গহপতি বুদ্ধে অপ্পসাদেন সমন্নাগতো অস্সুতৰা পুথুজ্জনো কাযস্স ভেদা পরং মরণা অপাযং দুগ্গতিং ৰিনিপাতং নিযরং উপপজ্জতি তথারূপো তে বুদ্ধে অপ্পসাদো নত্থি, অত্থি চ খো তে গহপতি বুদ্ধে অৰেচ্চপ্পসাদো ‘ইতিপি সো ভগৰা অরহং সম্মাসম্বুদ্ধো…পে… ভগৰা’তি তঞ্চ পন তে বুদ্ধে অৰেচ্চপ্পসাদং অত্তনি সমনুপস্সতো ঠানসো ৰেদনা পটিপ্পস্সম্ভেয্যা’’তি এৰমাদিনা আযস্মতা সারিপুত্তত্থেরেন ধম্মসেনাপতিনা ভাসিতং.

যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অরিযকন্তং পসংসিতং.

সঙ্ঘে পসাদো যস্সত্থি, উজুভূতঞ্চ দস্সনং;

অদলিদ্দোতি তং আহু, অমোঘং তস্স জীৰিতং.

তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৰী, সরং বুদ্ধানসাসনং.

পুঞ্ঞাভিসন্দৰগ্গ

মহানামসুত্ত

পুচ্ছা – তত্থেৰ আৰুসো পুঞ্ঞাভিসন্দৰগ্গো পোরাণকেহি ধম্মসংগাহকমহাথেরেহি সত্তমং সংগীতং মহানামসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সক্কেসু ভন্তে কপিলৰত্থুস্মিং মহানামং সক্কং আরব্ভ ভাসিতং.

মহানামো ভন্তে সক্কো ভগৰন্তং এতদৰোচ ‘‘কিত্তাৰতা নু খো ভন্তে উপাসকো হোতী’’তি. তস্মিং ভন্তে ৰত্থুস্মিং ‘‘যতো খো মহানাম বুদ্ধং সরণং গতো হোতি, ধম্মং সরণং গতো হোতি, সঙ্ঘং সরণং গতো হোতী’’তি এৰমাদিনা ভগৰতা ভাসিতং.

কিত্তাৰতা নু খো ভন্তে উপাসকো হোতি.

কাল়িগোধসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি নৰমং সংগীতং কাল়িগোধসুত্তং ভগৰতা কত্থ কং কারব্ভ কথঞ্চ ভাসিতং.

ৰিস্সজ্জনা – সক্কেসু ভন্তে কাল়িগোধং নাম সাকিযানিং আরব্ভ ‘‘চতূহি খো গোধে ধম্মেহি সমন্নাগতা অরিযসাৰিকা সোতাপন্না হোতি অৰিনিপাতধম্মা নিযতা সম্বোধিপরাযণা’’তি এৰমাদিনা ভগৰতা ভাসিতং.

লাভা তে গোধে, সুলদ্ধং তে গোধে, সোতাপত্তিফলং তযা গোধে –

নন্দিযসক্কসুত্ত

পুচ্ছা – তেনাৰুসো জানতা…পে… সম্মাসম্বুদ্ধেন সোতাপত্তিসংযুত্তে পুঞ্ঞাভিসন্দৰগ্গে দসমং নন্দিযসক্কসুত্তং কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সক্কেসু ভন্তে কপিলৰত্থুস্মিং নিগ্রোধারামে নন্দিযং সক্কং আরব্ভ ভাসিতং. নন্দিযো ভন্তে সক্কো ভগৰন্তং এতদৰোচ ‘‘যস্সেৰ নু খো ভন্তে অরিযসাৰকস্স চত্তারি সোতাপত্তিযঙ্গানি সব্বেন সব্বং সব্বথাসব্বং নত্থি, স্ৰেৰ নু খো ভন্তে অরিযসাৰকো পমাদৰিহারী’’তি. তস্মিং ভন্তে ৰত্থুস্মিং ‘‘যস্স খো নন্দিয চত্তারি সোতাপত্তিযঙ্গানি সব্বেনসব্বং সব্বথাসব্বং নত্থি, তমহং বাহিরো পুথুজ্জনপক্খে ঠিতোতি ৰদামী’’তি এৰমাদিনা ভগৰতা ভাসিতং.

সচ্চসংযুত্ত

তিরচ্ছানকথাসুত্ত

পুচ্ছা – সচ্চসংযুত্তে আৰুসো পোরাণকেহি ধম্মসংগাযকমহাথেরেহি দসমং সংগীতং তিরচ্ছানকথাসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ মা ভিক্খৰে অনেকৰিহিতং তিরচ্ছানকথং কথেয্যাথ. সেয্যথিদং, রাজকথং চোরকথং মহামত্তকথং সেনাকথং ভযকথং যুদ্ধকথং অন্নকথং পানকথং ৰত্থকথং সযনকথং এৰমাদিনা ভন্তে ভগৰতা ভাসিতং.

ইদং দুক্খন্তি কথেয্যাথ.

তস্মাতিহ ভিক্খৰে ইদং দুক্খন্তি যোগো করণীযো…পে… অযং দুক্খনিরোধগামিনী পটিপদাতি যোগো করণীযো.

ধম্মচক্কপৰত্তনসুত্ত

পুচ্ছা – তত্থেৰ আৰুসো ধম্মচক্কপ্পৰত্তনৰগ্গে পোরাণকেহি ধম্মসংগাহকমহাথেরেহি পঠমং সংগীতং ধম্মচক্কপৰত্তনসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – বারাণসিযং ভন্তে ইসিপতনে মিগদাযে পঞ্চৰগ্গিযে ভিক্খূ আরব্ভ ‘‘দ্ৰে মে ভিক্খৰে অন্তা পব্বজিতেন নসেৰিতব্বা. কতমে দ্ৰে, যো চাযং কামেসু কামসুখল্লিকানুযোগো হীনো গম্মো পোথুজ্জনিকো অনরিযো অনত্থসংহিতো, যো চাযং অত্তকিলমথানুযোগো দুক্খো অনরিযো অনত্থসংহিতো, এতে খো ভিক্খৰে উভো অন্তে অনুপগম্ম মজ্ঝিমাপটিপদা তথাগতেন অভিসম্বুদ্ধা’’তি এৰমাদিনা ভগৰতা ভাসিতং.

আসৰক্খযসুত্ত

পুচ্ছা – তত্থেৰ আৰুসো কোটিগামৰগ্গে পোরাণকেহি ধম্মসংগাহকমহাথেরেহি পঞ্চমং সংগীতং আসৰক্খযসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘জানতোহং ভিক্খৰে পস্সতো আসৰানং খযং ৰদামি, নো অজানতো অপস্সতো. কিঞ্চ ভিক্খৰে জানতো পস্সতো আসৰানং খযো হোতি, ইদং দুক্খন্তি ভিক্খৰে জানতো পস্সতো আসৰানং খযো হোতি, অযং দুক্খসমুদযোতি, অযং দুক্খনিরোধোতি, অযং দুক্খনিরোধগামিনীপটিপদাতি জানতো পস্সতো আসৰানং খযো হোতি. এৰং খো ভিক্খৰে জানতো এৰং পস্সতো আসৰানং খযো হোতি. তস্মাতিহ ভিক্খৰে ‘‘ইদং দুক্খ’’ন্তি যোগো করণীযো, অযং দুক্খসমুদযোতি, অযং দুক্খনিরোধোতি, অযং দুক্খনিরোধগামিনীপটিপদাতি যোগো করণীযো’’তি এৰং খো ভগৰতা ভাসিতং.

সীসপাৰনসুত্ত

পুচ্ছা – তত্থেৰ আৰুসো সীসপাৰনৰগ্গে পোরাণকেহি ধম্মসংগাহকমহাথেরেহি পঠমং সংগীতং সীসপাৰনসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – কোসম্বিযং ভন্তে সীসপাৰনে সম্বহুলে ভিক্খূ আরব্ভ ‘‘তং কিং মঞ্ঞথ ভিক্খৰে, কতমং নুখো বহুতরং যানি ৰা মযা পরিত্তানি সীসপাপণ্ণানি পাণিনা গহিতানি যদিদং উপরি সীসপাৰনে’’তি এৰমাদিনা ভগৰতা ভাসিতং.

পঞ্চগতিপেয্যালৰগ্গ

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি পরিযোসানভাৰেন সংগীতো পঞ্চগতিপেয্যালৰগ্গে, ভগৰতা কত্থ কং আরব্ভ কথঞ্চ ভাসিতো.

ৰিস্সজ্জনা – ৰেসালিযং ভন্তে সম্বহুলে ভিক্খূ আরব্ভ ‘‘তং কিং মঞ্ঞথ ভিক্খৰে, কতমং নু খো বহুতরং, যো ৰাযং মযা পরিত্তো নখসিখাযং পংসু আরোপিতো, অযং ৰা মহাপথৰী’’তি এৰমাদিনা ভগৰতা ভাসিতো.

পুচ্ছা – কে আৰুসো সিক্খন্তি.

ৰিস্সজ্জনা – সেক্খা চ ভন্তে পুথুজ্জনকল্যাণকা চ সিক্খন্তি.

পুচ্ছা – কে আৰুসো সিক্খিতসিক্খা.

ৰিস্সজ্জনা – অরহন্তো ভন্তে সিক্খিতসিক্খা.

পুচ্ছা – কত্থ আৰুসো ঠিতং.

ৰিস্সজ্জনা – সিক্খাকামেসু ভন্তে ঠিতং.