নমো তস্স ভগৰতো অরহতো সম্মাসম্বুদ্ধস্স

সুত্তন্তপিটক

অঙ্গুত্তরনিকাযে

সংগাযনস্স পুচ্ছা ৰিস্সজ্জনা

পুচ্ছা – পঠমমহাসংগীতিকালে আৰুসো ধম্মসংগাহকা মহাকস্সপাদযো মহাথেরৰরা পোরাণসংগীতিকারা পঠমং ৰিনযপিটকং সংগাযিত্ৰা সুত্তন্তপিটকে চ দীঘমজ্ঝিমসংযুত্তসঙ্খাতে তযো নিকাযে সংগাযিত্ৰা তদনন্তরং কিং নাম পাৰচনং সংগাযিংসু.

ৰিস্সজ্জনা – পঠমমহাসংগীতিকালে ভন্তে ধম্মসংগাহকা মহাকস্সপাদযো মহাথেরৰরা পোরাণসংগীতিকারা পঠমং ৰিনযং সংগাযিত্ৰা সুত্তন্তপিটকে চ দীঘমজ্ঝিমসংযুত্তসঙ্খাতে তযো নিকাযে সংগাযিত্ৰা তদনন্তরং নৰহি চ সুত্তসহস্সেহি পঞ্চহি চ সুত্তসত্তেহি সত্তপঞ্ঞাসায চ সুত্তেহি পটিমণ্ডিতং ৰীসতিভাণৰারসতপরিমাণং অঙ্গুত্তরনিকাযং নাম পাৰচনং সংগাযিংসু.

পুচ্ছা – অঙ্গুত্তরনিকাযেপি আৰুসো এককনিপাতো দুকনিপাতো তিকনিপাতোতিআদিনা নিপাতপকরণপরিচ্ছেদৰসেন একাদসৰিধা. তত্থ কতরং নিপাতপকরণং সংগাযিংসু.

ৰিস্সজ্জনা – অঙ্গুত্তরনিকাযে ভন্তে একাদসসু নিপাতপকরণপরিচ্ছেদেসু এককনিপাতং পঠমং সংগাযিংসু.

১. রূপাদিৰগ্গ

পুচ্ছা – এককনিপাতেপি আৰুসো রূপাদিৰগ্গো নীৰরণপ্পহানৰগ্গো অকম্মনিযৰগ্গোতিআদিনা ৰগ্গভেদৰসেন বহুৰিধা. তত্থ কতরং ৰগ্গং পঠমং সংগাযিংসু.

ৰিস্সজ্জনা – এককনিপাতে ভন্তে রূপাদিৰগ্গো নীৰরণপ্পহানৰগ্গোতিআদিনা ৰীসতিযা ৰগ্গেসু রূপাদিৰগ্গং পঠমং সংগাযিংসু.

পুচ্ছা – সাধু সাধু আৰুসো, মযম্পি দানি আৰুসো ততোযেৰ পট্ঠায সংগাহনত্থায সংগীতিপুব্বঙ্গমানি ধম্মপুচ্ছনৰিস্সজ্জনকিচ্চানি আৰহিতুং সমারভাম. তেনাৰুসো ভগৰতা জানতা পস্সতা অরহতা সম্মাসম্বুদ্ধেন অঙ্গুত্তরনিকাযে এককনিপাতে রূপাদিৰগ্গে পুরিমানি পঞ্চ সুত্তানি কত্থ কং আরব্ভ কথঞ্চ ভাসিতানি.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ রূপাদিগরুকানং পঞ্চন্নং পুরিসানং অজ্ঝাসযৰসেন ‘‘নাহং ভিক্খৰে অঞ্ঞং একরূপম্পি সমনুপস্সামি, যং এৰং পুরিসস্স চিত্তং পরিযাদায তিট্ঠতি, যথযিদং ভিক্খৰে ইত্থিরূপং, ইত্থিরূপং ভিক্খৰে পুরিসস্স চিত্তং পরিযাদায তিট্ঠতী’’তি এৰমাদিনা ভগৰতা ভাসিতানি.

নাহং ভিক্খৰে অঞ্ঞং একরূপম্পি সমনুপস্সামি, যং এৰং পুরিসস্স চিত্তং পরিযাদায তিট্ঠতি, যথযিদং ভিক্খৰে ইত্থিরূপং, ইত্থিরূপং ভিক্খৰে পুরিসস্স চিত্তং পরিযাদায তিট্ঠতি.

পুচ্ছা – তত্থেৰ আৰুসো পচ্ছিমানি পঞ্চ সুত্তানি ভগৰতা কত্থ কং আরব্ভ কথঞ্চ ভাসিতানি.

ৰিস্সজ্জনা – তস্মিংযেৰ ভন্তে সাৰত্থিযং সম্বহুলে ভিক্খূ আরব্ভ রূপাদিগরুকানং পঞ্চন্নং ইত্থীনং অজ্ঝাসযৰসেন ‘‘নাহং ভিক্খৰে অঞ্ঞং একরূপম্পি সমনুপস্সামি, যং এৰং ইত্থিযা চিত্তং পরিযাদায তিট্ঠতি, যথযিদং ভিক্খৰে পুরিসরূপং, পুরিসরূপং ভিক্খৰে ইত্থিযা চিত্তং পরিযাদায তিট্ঠতী’’তি এৰমাদিনা ভগৰতা ভাসিতানি.

নাহং ভিক্খৰে অঞ্ঞং একরূপম্পি সমনুপস্সামি, যং এৰং ইত্থিযা চিত্তং পরিযাদায তিট্ঠতি, যথযিদং ভিক্খৰে পুরিসরূপং, পুরিসরূপং ভিক্খৰে ইত্থিযা চিত্তং পরিযাদায তিট্ঠতি.

নীতত্থৰসেন, নেয্যত্থৰসেন

পুচ্ছা – ইমস্মিং আৰুসো রূপাদিৰগ্গে ভগৰতা নীতত্থৰসেন কিং কথিতং, নেয্যত্থৰসেন পন কিং ঞাপিতং.

ৰিস্সজ্জনা – ইমস্মিং ভন্তে রূপাদিৰগ্গে ভগৰতা নীতত্থৰসেন ৰট্টং কথিতং. নেয্যত্থৰসেন পন ৰিৰট্টম্পি ঞাপিতং.

২. নীৰরণপ্পহানৰগ্গ

পুচ্ছা – দুতিযো পন আৰুসো নীৰরণপ্পহানৰগ্গো ভগৰতা কত্থ কথঞ্চ ভাসিতো.

ৰিস্সজ্জনা – সাৰত্থিযং ভন্তে ‘‘নাহং ভিক্খৰে অঞ্ঞং একধম্মম্পি সমনুপস্সামি, যেন অনুপ্পন্নো ৰা কামচ্ছন্দো উপ্পজ্জতি, উপ্পন্নো ৰা কামচ্ছন্দো ভিয্যোভাৰায ৰেপুল্লায সংৰত্ততি, যথযিদং ভিক্খৰে সুভনিমিত্তং, সুভনিমিত্তং ভিক্খৰে অযোনিসো মনসিকরোতো অনুপ্পন্নোচেৰ কামচ্ছন্দো উপ্পজ্জতি, উপ্পন্নো চ কামচ্ছন্দো ভিয্যোভাৰায ৰেপুল্লায সংৰত্ততী’’তি এৰমাদিনা ভগৰতা ভাসিতো.

পুচ্ছা – ইমস্মিং পন আৰুসো দুতিযে নীৰরণপ্পহানৰগ্গে ভগৰতা কিং কথিতং.

ৰিস্সজ্জনা – ইমস্মিং পন ভন্তে দুতিযে নীৰরণপ্পহানৰগ্গে ভগৰতা ৰট্টম্পি ৰিৰট্টম্পি কথিতং.

৩. অকম্মনিযৰ

পুচ্ছা – তেনাৰুসো…পে… সম্মাসম্বুদ্ধেন অঙ্গুত্তরনিকাযে এককনিপাতে ততিযে অকম্মনিযৰগ্গে কীদিসী ধম্মদেসনাযো দেসিতা.

ৰিস্সজ্জনা – ততিযে ভন্তে অকম্মনিযৰগ্গে ‘‘নাহং ভিক্খৰে অঞ্ঞং একধম্মম্পি সমনুপস্সামি, যং এৰং অভাৰিতং অকম্মনিযং হোতি, যথযিদং ভিক্খৰে চিত্তং, চিত্তং ভিক্খৰে অভাৰিতং অকম্মনিযং হোতি. নাহং ভিক্খৰে অঞ্ঞং একধম্মম্পি সমনুপস্সামি, যং এৰং ভাৰিতং কম্মনিযং হোতি, যথযিদং ভিক্খৰে চিত্তং. চিত্তং ভিক্খৰে ভাৰিতং কম্মনিযং হোতী’’তি এৰমাদিকা ভগৰতা ধম্মদেসনাযো দেসিতা.

৪. অদন্তৰগ্গ

পুচ্ছা – চতুত্থে পনাৰুসো অদন্তৰগ্গে ভগৰতা কীদিসী ধম্মদেসনাযো দেসিতা.

ৰিস্সজ্জনা – চতুত্থে ভন্তে অদন্তৰগ্গে ‘‘নাহং ভিক্খৰে অঞ্ঞং একধম্মম্পি সমনুপস্সামি, যং এৰং অদন্তং মহতো অনত্থায সংৰত্ততি, যথযিদং ভিক্খৰে চিত্তং, চিত্তং ভিক্খৰে অদন্তং মহতো অনত্থায সংৰত্ততি. নাহং ভিক্খৰে অঞ্ঞং একধম্মম্পি সমনুপস্সামি, যং এৰং দন্তং মহতো অত্থায সংৰত্ততি, যথযিদং ভিক্খৰে চিত্তং, চিত্তং ভিক্খৰে দন্তং মহতো অত্থায সংৰত্ততী’’তি এৰমাদিকা ভগৰতা ধম্মদেসনাযো দেসিতা.

৫. পণিহিতঅচ্ছৰগ্গ

পুচ্ছা – পঞ্চমে আৰুসো পণিহিতঅচ্ছৰগ্গে ভগৰতা কীদিসী ধম্মদেসনাযো দেসিতা.

ৰিস্সজ্জনা – পঞ্চমে ভন্তে পণিহিতঅচ্ছৰগ্গে ‘‘সেয্যথাপি ভিক্খৰে সালিসূকং ৰা যৰসূকং ৰা মিচ্ছাপণিহিতং হত্থেন ৰা পাদেন ৰা অক্কন্তং হত্থং ৰা পাদং ৰা ভেচ্ছতি, লোহিতং ৰা উপ্পাদেস্সতীতি নেতং ঠান ৰিজ্জতি. তং কিস্সহেতু, মিচ্ছাপণিহিতত্তা ভিক্খৰে সূকস্স. এৰমেৰ খো ভিক্খৰে সো ৰত ভিক্খু মিচ্ছাপণিহিতেন চিত্তেন অৰিজ্জং ভেচ্ছতি, ৰিজ্জং উপ্পাদেস্সতি, নিব্বানং সচ্ছিকরিস্সতীতি নেতং ঠানং ৰিজ্জতি, তং কিস্স হেতু, মিচ্ছাপণিহিতত্তা ভিক্খৰে চিত্তস্সা’’তি এৰমাদিকা ভগৰতা ধম্মদেসনাযো দেসিতা.

৬. অচ্ছরাসঙ্ঘাতৰগ্গ

পুচ্ছা – অচ্ছরাসঙ্ঘাতৰগ্গে আৰুসো পঠম দুতিযসুত্তানি ভগৰতা কথং ভাসিতানি.

ৰিস্সজ্জনা – অচ্ছরাসঙ্ঘাতৰগ্গে ভন্তে ভগৰতা ‘‘পভস্সরমিদং ভিক্খৰে চিত্তং, তঞ্চ খো আগন্তুকেহি উপক্কিলেসেহি উপক্কিলিট্ঠং, তং অস্সুতৰা পুথুজ্জনো যথাভূতং নপ্পজানাতি, তস্মা ‘অস্সুতৰতো পুথুজ্জনস্স চিত্তভাৰনা নত্থী’তি ৰদামি. পভস্সরমিদং ভিক্খৰে চিত্তং, তঞ্চ খো আগন্তুকেহি উপক্কিলেসেহি ৰিপ্পমুত্তং, তং সুভৰা অরিযসাৰকো যথাভূতং পজানাতি. তস্মা ‘সুতপতো অরিযসাৰকস্স চিত্তভাৰনা অত্থী’তি ৰদামী’’তি. এৰং খো ভগৰতা ভাসিতানি.

ততিযসুত্ত

পুচ্ছা – তত্থেৰ আৰুসো ততিযসুত্তাদীনি ভগৰতা কথং ভাসিতানি.

ৰিস্সজ্জনা – তত্থেৰ ভন্তে ততিযসুত্তাদীনি পঞ্চসুত্তানি ‘‘অচ্ছরাসঙ্ঘাতমত্তম্পি চে ভিক্খৰে ভিক্খু মেত্তাচিত্তং আসেৰতি, ভাৰেতি, মনসিকরোতি. অযং ৰুচ্চতি ভিক্খৰে ভিক্খু অরিত্তজ্ঝানো ৰিহরতি সত্থুসাসনকরো ওৰাদপতিকরো অমোঘং রট্ঠপিণ্ডং ভুঞ্জতি, কো পন ৰাদো যে নং বহুলীকরোন্তি. যেকেচি ভিক্খৰে ধম্মা অকুসলা অকুসলভাগিযা অকুসলপক্খিকা, সব্বেতে মনোপুব্বঙ্গমা, মনো তেসং ধম্মানং পঠমং উপ্পজ্জতি, অন্ৰদেৰ অকুসলাধম্মা, যেকেচি ভিক্খৰে ধম্মা কুসলা কুসলভাগিযা কুসলপক্খিকা, সব্বেতে মনোপুব্বঙ্গমা, মনো তেসং ধম্মানং পঠমং উপ্পজ্জতি, অন্ৰদেৰ কুসলা ধম্মা’’তি এৰং খো ভন্তে ভগৰতা ভাসিতানি.

অট্ঠমসুত্ত

পুচ্ছা – তত্থেৰ আৰুসো অট্ঠম নৰম দসমসুত্তানি চ ৰীরিযারম্ভাদিৰগ্গে দসসুত্তানি চ কল্যাণমিত্তাদিৰগ্গে পঠমসুত্তঞ্চ ভগৰতা কথং ভাসিতানি.

ৰিস্সজ্জনা – তত্থেৰ ভন্তে অট্ঠম নৰম দসমসুত্তানি চ ৰীরিযারম্ভাদিৰগ্গে দসসুত্তানি চ কল্যাণমিত্তাদিৰগ্গে পঠমসুত্তঞ্চ ‘‘নাহং ভিক্খৰে অঞ্ঞং একধম্মম্পি সমনুপস্সামি, যেন অনুপ্পন্না ৰা অকুসলা ধম্মা উপ্পজ্জন্তি, উপ্পন্না ৰা কুসলা ধম্মা পরিহাযন্তি, যথযিদং ভিক্খৰে পমাদো, পমত্তস্স ভিক্খৰে অনুপ্পন্না চেৰ অকুসলা ধম্মা উপ্পজ্জন্তি, উপ্পন্না চ কুসলা ধম্মা পরিহাযন্তী’’তি এৰমাদিনা ভন্তে ভগৰতা ভাসিতানি.

দুতিযসুত্ত

পুচ্ছা – কল্যাণমিত্তাদিৰগ্গে আৰুসো দুতিয ততিযসুত্তানি ভগৰতা কথং ভাসিতানি.

ৰিস্সজ্জনা – কল্যাণমিত্তাদিৰগ্গে ভন্তে দুতিয ততিযসুত্তানি ‘‘নাহং ভিক্খৰে অঞ্ঞং একধম্মম্পি সমনুপস্সামি, যেন অনুপ্পন্না ৰা অকুসলা ধম্মা উপ্পজ্জন্তি, উপ্পন্না ৰা কুসলা ধম্মা পরিহাযন্তি, যথযিদং ভিক্খৰে অনুযোগো অকুসলানং ধম্মানং অননুযোগো কুসলানং ধম্মান’’ন্তি এৰমাদিনা ভগৰতা ভাসিতানি.

ছট্ঠসুত্ত

পুচ্ছা – তত্থেৰ আৰুসো ছট্ঠসুত্তাদীনি চ পমাদাদিৰগ্গে পঠমসুত্তঞ্চ ভগৰতা কথং ভাসিতানি.

ৰিস্সজ্জনা – তত্থেৰ ভন্তে ছট্ঠসুত্তাদীনি চ পমাদাদিৰগ্গে পঠমসুত্তঞ্চ ‘‘অপ্পমত্তিকা এসা ভিক্খৰে পরিহানি যদিদং ঞাতিপরিহানি. এতং পতিকিট্ঠং ভিক্খৰে পরিহানীনং যদিদং পঞ্ঞাপরিহানীতি. অপ্পমত্তিকা এসা ভিক্খৰে ৰুদ্ধি যদিদং ঞাতিৰুদ্ধি. এতদগ্গং ভিক্খৰে ৰুদ্ধীনং যদিদং পঞ্ঞাৰুদ্ধি. তস্মাতিহ ভিক্খৰে এৰং সিক্খিতব্বং ‘পঞ্ঞাৰুদ্ধিযা ৰদ্ধিস্সামা’তি. এৰঞ্হি ৰো ভিক্খৰে সিক্খিতব্ব’’ন্তি এৰমাদিনা ভন্তে ভগৰতা ভাসিতানি.

পমাদাদিৰগ্গ

পুচ্ছা – তেনাৰুসো…পে… সম্মাসম্বুদ্ধেন পমাদাদিৰগ্গে দুতিযসুত্তাদীনি কথং ভাসিতানি.

ৰিস্সজ্জনা – নাহং ভিক্খৰে অঞ্ঞং একধম্মম্পি সমনুপস্সামি, যো এৰং মহতো অনত্থায সংৰত্ততি, যথযিদং ভিক্খৰে পমাদো. পমাদো ভিক্খৰে মহতো অনত্থায সংৰত্ততি. নাহং ভিক্খৰে অঞ্ঞং একধম্মম্পি, যো এৰং মহতো অত্থায সংৰত্ততি, যথযিদং ভিক্খৰে অপ্পমাদো, অপ্পমাদো ভিক্খৰে মহতো অনত্থায সংৰত্ততীতি এৰমাদিনা ভন্তে ভগৰতা ভাসিতানি.

দুতিয পমাদাদিৰগ্গ

পুচ্ছা – দুতিযে পনাৰুসো পমাদাদিৰগ্গে পঠমসুত্তাদীনি ভগৰতা কথং ভাসিতানি.

ৰিস্সজ্জনা – দুতিযে ভন্তে পমাদাদিৰগ্গে অজ্ঝত্তিকং ভিক্খৰে অঙ্গন্তি করিত্ৰা নাঞ্ঞং একঙ্গম্পি সমনুপস্সামি, যং এৰং মহতো অনত্থায সংৰত্ততি, যথযিদং ভিক্খৰে পমাদো. পমাদো ভিক্খৰে মহতো অনত্থায সংৰত্ততি. অজ্ঝত্তিকং ভিক্খৰে অঙ্গন্তি করিত্ৰা নাঞ্ঞং একঙ্গম্পি সমনুপস্সামি, যং এৰং মহতো অত্থায সংৰত্ততি, যথযিদং ভিক্খৰে অপ্পমাদো. অপ্পমাদো ভিক্খৰে মহতো অত্থায সংৰত্ততীতি এৰমাদিনা ভন্তে ভগৰতা ভাসিতানি.

দসসুত্ত

পুচ্ছা – তত্থেৰ আৰুসো তেত্তিংসমাদীনিচ দসসুত্তানি অধম্মৰগ্গে চ দসসুত্তানি ভগৰতা কথং ভাসিতানি.

ৰিস্সজ্জনা – তত্থেৰ ভন্তে তেত্তিংসমাদীনি দসসুত্তানি চ অধম্মৰগ্গে দসসুত্তানি চ যে তে ভিক্খৰে ভিক্খূ অধম্মং ‘‘ধম্মো’’তি দীপেন্তি, তে ভিক্খৰে ভিক্খূ বহুজনঅহিতায পটিপন্না বহুজনঅসুখায বহুনো জনস্স অনত্থায অহিতায দুক্খায দেৰমনুস্সানং. বহুঞ্চ তে ভিক্খৰে ভিক্খূ অপুঞ্ঞং পসৰন্তি, তে চিমং সদ্ধম্মং অন্তরধাপেন্তীতি এৰমাদিনা চ, যে তে ভিক্খৰে ভিক্খূ অধম্মং ‘‘অধম্মো’’তি দীপেন্তি, তে ভিক্খৰে ভিক্খূ বহুজনহিতায পটিপন্না বহুজনসুখায বহুজনো জনস্স অত্থায হিতায সুখায দেৰমনুস্সানং. বহুঞ্চ তে ভিক্খৰে ভিক্খূ পুঞ্ঞং পসৰন্তি, তে চিমং সদ্ধম্মং ঠপেন্তীতি এৰমাদিনা চ ভন্তে ভগৰতা ভাসিতানি.

একপুগ্গলৰগ্গ

পুচ্ছা – একপুগ্গলৰগ্গে আৰুসো ভগৰতা কীদিসী ধম্মদেসনাযো দেসিতা.

ৰিস্সজ্জনা – একপুগ্গলৰগ্গে ভন্তে ভগৰতা একপুগ্গলো ভিক্খৰে লোকে উপ্পজ্জমানো উপ্পজ্জতি বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং. কতমো একপুগ্গলো, তথাগতো অরহং সম্মাসম্বুদ্ধো, অযং খো ভিক্খৰে একপুগ্গলো লোকে উপ্পজ্জমানো উপ্পজ্জতি বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানন্তি এৰমাদিকা ভগৰতা ধম্মদেসনাযো দেসিতা.

এতদগ্গৰগ্গ

অঞ্ঞাসিকোণ্ডঞ্ঞ ৰত্থু

পুচ্ছা – এতদৰগ্গে আৰুসো আগতেসু একচত্তালীসায থেরেসু আযস্মা অঞ্ঞাসিকোণ্ডঞ্ঞত্থেরো কথং ভগৰতা এতদগ্গট্ঠানে ঠপিতো.

ৰিস্সজ্জনা – এতদগ্গৰগ্গে ভন্তে আগতেসু একচত্তালীসায মহাথেরেসু ‘‘এতদগ্গং ভিক্খৰে মম সাৰকানং ভিক্খূনং রত্তঞ্ঞূনং যদিদং অঞ্ঞাসিকোণ্ডঞ্ঞো’’তি, এৰং খো ভন্তে আযস্মা অঞ্ঞাসিকোণ্ডঞ্ঞত্থেরো ভগৰতা এতদগ্গট্ঠানে ঠপিতো.

অগ্গসাৰকৰত্থু

পুচ্ছা – তেনাৰুসো ভগৰতা…পে… সম্মাসম্বুদ্ধেন অঙ্গুত্তরনিকাযে এককনিপাতে এতদগ্গৰগ্গে আগতেসু একচত্তালীসায মহাথেরেসু আযস্মা চ সারিপুত্তত্থেরো ধম্মসেনাপতি পঠমো অগ্গসাৰকো আযস্মা চ মহামোগ্গল্লানত্থেরো দুতিযো অগ্গসাৰকো কথং এতদগ্গট্ঠানে ঠপিতো.

ৰিস্সজ্জনা – আযস্মা ভন্তে সারিপুত্তত্থেরো ধম্মসেনাপতি ‘‘এতদগ্গং ভিক্খৰে মম সাৰকানং ভিক্খূনং মহাপঞ্ঞানং যদিদং সারিপুত্তো’’তি. আযস্মা পন মহামোগ্গল্লানত্থেরো ‘‘এতদগ্গং ভিক্খৰে মম সাৰকানং ভিক্খূনং ইদ্ধিমন্তানং যদিদং মহামোগ্গল্লানো’’তি. এৰং খো ভন্তে ভগৰতা এতদগ্গট্ঠানে ঠপিতো.

ইদং তে আসনং ৰীর, পঞ্ঞত্তং তৰনুচ্ছৰিং;

মম চিত্তং পসাদেন্তো, নিসীদ পুপ্ফমাসনে.

যে ৰত লোকে অরহন্তো ৰা অরহত্তমগ্গং ৰা সমাপন্না, অযং তেসং ভিক্খু অঞ্ঞতরো.

যংনূনাহং ইমং ভিক্খুং উপসঙ্কমিত্ৰা পঞ্হং পুচ্ছেয্যং.

যে ধম্মা হেতুপ্পভৰা,

তেসং হেতুং তথাগতো;

আহ তেসঞ্চ যো নিরোধো,

এৰংৰাদী মহাসমণো –

লভেয্যাম মযং ভন্তে ভগৰতো সন্তিকে পব্বজ্জং, লভেয্যাম উপসম্পদং.

এতদগ্গং ভিক্খৰে মম সাৰকানং ভিক্খূনং মহাপঞ্ঞানং যদিদং সারিপুত্তো.

এতদগ্গং ভিক্খৰে মম সাৰকানং ভিক্খূনং ইদ্ধিমন্তানং যদিদং মহামোগ্গল্লানো.

মহাকস্সপৰত্থু

পুচ্ছা – আযস্মা পন আৰুসো মহাকস্সপত্থেরো পঠমমহাসংগীতিকালে পামোক্খসঙ্ঘনাযকভূতো ভগৰতা কথং এতদগ্গট্ঠানে ঠপিতো.

ৰিস্সজ্জনা – আযস্মা ভন্তে মহাকস্সপত্থেরো পঠমমহাসংগীতিকালে সঙ্ঘপামোক্খভূতো ‘‘এতদগ্গং ভিক্খৰে মম সাৰকানং ভিক্খূনং ধুতৰাদানং যদিদং মহাকস্সপো’’তি. এৰং খো ভন্তে ভগৰতা এতদগ্গট্ঠানে ঠপিতো.

অনুরুদ্ধত্থেরৰত্থু

পুচ্ছা – তেনাৰুসো…পে… সম্মাসম্বুদ্ধেন অঙ্গুত্তরনিকাযে এককনিপাতে এতদগ্গৰগ্গে আগতেসু একচত্তালীসায মহাথেরেসু আযস্মা অনুরুদ্ধত্থেরো কথং এতদগ্গট্ঠানে ঠপিতো.

ৰিস্সজ্জনা – আযস্মা ভন্তে অনুরুদ্ধত্থেরো ‘‘এতদগ্গং ভিক্খৰে মম সাৰকানং ভিক্খূনং দিব্বচক্খুকানং যদিদং অনুরুদ্ধো’’তি এৰং খো ভন্তে ভগৰতা এতদগ্গট্ঠানে ঠপিতো.

সীৰলিৰত্থু

পুচ্ছা – আযস্মা পন আৰুসো সীৰলিত্থেরো ভগৰতা কথং এতদগ্গট্ঠানে ঠপিতো.

ৰিস্সজ্জনা – আযস্মা ভন্তে সীৰলিত্থেরো ‘‘এতদগ্গং ভিক্খৰে মম সাৰকানং ভিক্খূনং লাভীনং যদিদং সীৰলী’’তি এৰং খো ভন্তে ভগৰতা এতদগ্গট্ঠানে ঠপিতো.

সম্মাসম্বুদ্ধো ৰত সো ভগৰা, যো ইমস্স এৰরূপস্স দুক্খস্স পহানায ধম্মং দেসেতি.

সুপ্পটিপন্নো ৰত তস্স ভগৰতো সাৰকসঙ্ঘো, যো ইমস্স এৰরূপস্স দুক্খস্স পহানায পটিপন্নো.

সুসুখং ৰত নিব্বানং, যত্থিদং এৰরূপং দুক্খং ন সংৰিজ্জতি –

‘‘এতদগ্গং ভিক্খৰে মম সাৰকানং ভিক্খূনং লাভীনং যদিদং সীৰলি’’ হু –

আনন্দাথেরৰত্থু

পুচ্ছা – আযস্মা পন আৰুসো আনন্দত্থেরো ধম্মভণ্ডাগারিকো পঠমমহাসংগীতিকালে ধম্মৰিস্সজ্জকথেরভূতো কথং ভগৰতা এতদগ্গট্ঠানে ঠপিতো.

ৰিস্সজ্জনা – আযস্মা ভন্তে আনন্দত্থেরো ধম্মভণ্ডাগারিকো পঠমমহাসংগীতিকালে ধম্মৰিস্সজ্জকভূতো ‘‘এতদগ্গং ভিক্খৰে মম সাৰকানং ভিক্খূনং বহুস্সুতানং যদিদং আনন্দো. এতদগ্গং ভিক্খৰে মম সাৰকানং ভিক্খূনং সতিমন্তানং যদিদং আনন্দো. এতদগ্গং ভিক্খৰে মম সাৰকানং ভিক্খূনং গতিমন্তানং যদিদং আনন্দো. এতদগ্গং ভিক্খৰে মম সাৰকানং ভিক্খূনং ধিতিমন্তানং যদিদং আনন্দো. এতদগ্গং ভিক্খৰে মম সাৰকানং ভিক্খূনং উপট্ঠাকানং যদিদং আনন্দো’’তি এৰং খো ভন্তে ভগৰতা পঞ্চসু এতদগ্গট্ঠানেসু ঠপিতো.

সতসহস্সেন মে কীতং,

সতসহস্সেন মাপিতং;

সোভনং নাম উয্যানং;

পটিগ্গণ্হ মহামুনি –

‘‘এতদগ্গং ভিক্খৰে মম সাৰকানং ভিক্খূনং বহুস্সুতানং. সতিমন্তানং. গতিমন্তানং. ধিতিমন্তানং. উপট্ঠাকানং যদিদং আনন্দো’’ –

উপালিৰত্থু

পুচ্ছা – তেনাৰুসো ভগৰতা…পে… সম্মাসম্বুদ্ধেন অঙ্গুত্তরনিকাযে এককনিপাতে এতদগ্গৰগ্গে আগতেসু একচত্তালীসায মহাথেরেসু আযস্মা উপালিত্থেরো পঠমমহাসংগীতিকালে ৰিনযৰিস্সজ্জকভূতো কথং এতদগ্গট্ঠানে ঠপিতো.

ৰিস্সজ্জনা – আযস্মা ভন্তে উপালিত্থেরো পঠমমহাসংগীতিকালে ৰিনযৰিস্সজ্জকভূতো ‘‘এতদগ্গং ভিক্খৰে মম সাৰকানং ভিক্খূনং ৰিনযধরানং যদিদং উপালী’’তি এৰং খো ভন্তে ভগৰতা এতদগ্গট্ঠানে ঠপিতো.

ৰিনযো ৰাসযো ময্হং,

ৰিনযো ঠানচঙ্কমং;

কপ্পেমি ৰিনযে ৰাসং,

ৰিনযো মম গোচরো.

মহাপজাপতিগোতমীথেরীৰত্থু

পুচ্ছা – এতদগ্গৰগ্গে আৰুসো আগতাসু তেরসসু থেরীসু মহাপজাপতি গোতমীথেরী কথং ভগৰতা এতদগ্গট্ঠানে ঠপিতা.

ৰিস্সজ্জনা – এতদগ্গৰগ্গে ভন্তে আগতাসু তেরসসু থেরীসু মহাপজাপতিগোতমীথেরী ‘‘এতদগ্গং ভিক্খৰে মম সাৰিকানং ভিক্খুনীনং রত্তঞ্ঞূনং যদিদং মহাপজাপতি গোতমী’’তি এৰং খো ভন্তে ভগৰতা এতদগ্গট্ঠানে ঠপিতা.

‘‘এতদগ্গং ভিক্খৰে মম সাৰিকানং ভিক্খুনীনং রত্তঞ্ঞূনং যদিদং মহাপজাপতিগোতমী’’ –

পুচ্ছা – খেমাথেরী পন আৰুসো অগ্গসাৰিকা ভগৰতা কথং এতদগ্গট্ঠানে ঠপিতা.

ৰিস্সজ্জনা – খেমাথেরী ভন্তে পঠমা অগ্গসাৰিকা ‘‘এতদগ্গং ভিক্খৰে মম সাৰিকানং ভিক্খুনীনং মহাপঞ্ঞানং যদিদং খেমা’’তি এৰং খো ভন্তে ভগৰতা এতদগ্গট্ঠানে ঠপিতা.

‘‘যে রাগরত্তানুপতন্তি সোতং,

সযংকতং মক্কটোৰ জালং,

এতম্পি ছেত্ৰান ৰজন্তি ধীরা;

অনপেক্খিনো সব্বদুক্খং পহায’’ –

‘‘এতদগ্গং ভিক্খৰে মম সাৰিকানং ভিক্খুনীনং মহাপঞ্ঞানং যদিদং খেমা’’ –

পুচ্ছা – উপ্পলৰণ্ণা পন আৰুসো থেরী দুতিযঅগ্গসাৰিকা ভগৰতা কথং এতদগ্গট্ঠানে ঠপিতা.

ৰিস্সজ্জনা – উপ্পলৰণ্ণা ভন্তে থেরী দুতিযঅগ্গসাৰিকা ‘‘এতদগ্গং ভিক্খৰে মম সাৰিকানং ভিক্খুনীনং ইদ্ধিমন্তীনং যদিদং উপ্পলৰণ্ণা’’তি এৰং খো ভন্তে ভগৰতা এতদগ্গট্ঠানে ঠপিতা.

‘‘এতদগ্গং ভিক্খৰে মম সাৰিকানং ভিক্খুনীনং ইদ্ধিমন্তীনং যদিদং উপ্পলৰণ্ণা’’ –

পটাচারাথেরীভিক্খুনীমৰত্থু

পুচ্ছা – তেনাৰুসো ভগৰতা…পে… সম্মাসম্বুদ্ধেন অঙ্গুত্তরনিকাযে এককনিপাতে এতদগ্গৰগ্গে আগতাসু তেরসসু থেরীসু পটাচারানাম থেরী কথং এতদগ্গট্ঠানে ঠপিতা.

ৰিস্সজ্জনা – এতদগ্গৰগ্গে ভন্তে আগতাসু তেরসসু থেরিকাসু পটাচারা থেরী ‘‘এতদগ্গং ভিক্খৰে মম সাৰিকানং ভিক্খুনীনং ৰিনযধরানং যদিদং পটাচারা’’তি এৰং খো ভন্তে ভগৰতা এতদগ্গট্ঠানে ঠপিতা.

‘‘উভো পুত্তা কালঙ্কতা,

পন্থে ময্হং পতী মতো;

মাতাপিতা চ ভাতা চ,

একচিতকস্মিং ডয্হরে’’ –

‘‘চতূসু সমুদ্দেসু জলং পরিত্তকং,

ততো বহুং অস্সুজলং অনপ্পকং;

দুক্খেন ফুট্ঠস্স নরস্স সোচনা,

কিং কারণা অম্ম তুৰং পমজ্জসি’’ –

‘‘ন সন্তি পুত্তা তাণায,

ন পিতা নাপি বন্ধৰা;

অন্তকেনাধিপন্নস্স,

নত্থি ঞাতীসু তাণতা;

এতমত্থৰসং ঞত্ৰা, পণ্ডিতো সীলসংৰুতো;

নিব্বানগমনং মগ্গং, খিপ্পমেৰ ৰিসোধযে’’ –

‘‘যো চ ৰস্সসতং জীৰে,

অপস্সং উদযব্বযং;

একাহং জীৰিতং সেয্যো,

পস্সতো উদযব্বযং’’ –

‘‘এতদগ্গং ভিক্খৰে মম সাৰিকানং ভিক্খুনীনং ৰিনযধরানং যদিদং পটাচারা’’ –

ধম্মদিন্নাথেরীভিক্খুনীমৰত্থু

পুচ্ছা – ধম্মদিন্না পন আৰুসো থেরী ভগৰতা কথং এতদগ্গট্ঠানে ঠপিতা.

ৰিস্সজ্জনা – ধম্মদিন্না ভন্তে থেরী ‘‘এতদগ্গং ভিক্খৰে মম সাৰিকানং ভিক্খুনীনং ধম্মকথিকানং যদিদং ধম্মদিন্না’’তি এৰং খো ভন্তে ভগৰতা এতদগ্গট্ঠানে ঠপিতা.

‘‘যস্স পুরে চ পচ্ছা চ,

মজ্ঝেচ নত্থি কিঞ্চনং;

অকিঞ্চনং অনাদানং,

তমহং ব্রূমি ব্রাহ্মণং’’ –