সক্কসংযুত্ত

ৰতপদসুত্ত

পুচ্ছা – সক্কসংযুত্তে পনাৰুসো ৰতপদসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ সক্কস্স ভিক্খৰে দেৰানমিন্দস্স পুব্বে মনুস্সভূতস্স সত্ত ৰতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগাতি এৰমাদিনা ভন্তে ভগৰতা ভাসিতং.

সক্কস্স ভিক্খৰে দেৰানমিন্দস্স পুব্বে মনুস্সভূতস্স ইমানি সত্ত ৰতপদানি সমত্তানি সমাদিন্নানি অহেসুং.

মাতাপেত্তিভরং জন্তুং, কুলে জেট্ঠাপচাযিনং;

সণ্হং সখিলসম্ভাসং, পেসুণেয্যপ্পহাযিনং;

মচ্ছেরৰিনযে যুত্তং, সচ্চং কোধাভিভুং নরং;

তং ৰে দেৰা তাৰতিংসা, আহু ‘‘সপ্পুরিসো’’ইতি.

দলিদ্দসুত্ত

পুচ্ছা – দলিদ্দসুত্তং পনাৰুসো কত্থ কং আরব্ভ কথঞ্চ ভাসিতং. ৰিস্সজ্জনা. রাজগহে ভন্তে সম্বহুলে ভিক্খূ আরব্ভ ‘‘ভূতপুব্বং ভিক্খৰে অঞ্ঞতরো পুরিসো ইমস্মিংযেৰ রাজগহে মনুস্সদলিদ্দো অহোসি মনুস্সকপণো মনুস্সৰরাকো, সো তথাগতপ্পৰেদিতে ধম্মৰিনযে সদ্ধং সমাদিযি, সীলং, সুতং, চাগং, পঞ্ঞং সমাদিযী’’তি এৰমাদিনা ভন্তে ভগৰতা ভাসিতং.

যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অরিযকন্তং পসংসিতং.

যজমানসুত্ত

পুচ্ছা – যজমানসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – রাজগহে ভন্তে সক্কং দেৰানমিন্দং আরব্ভ ভাসিতং. সক্কো ভন্তে দেৰানমিন্দো ভগৰন্তং গাথায অজ্ঝভাসি–

‘‘যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, কত্থ দিন্নং মহপ্ফল’’ন্তি.

তস্মিং ভন্তে ৰত্থুস্মিং–

‘‘চত্তারো চ পটিপন্না, চত্তারোচ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো;

যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, সঙ্ঘে দিন্নং মহপ্ফলং’’ন্তি.

এৰং খো ভন্তে ভগৰতা ভাসিতং.

যজমানানং মনুস্সানং, পুঞ্ঞপেক্খান পাণিনং,

করোতং ওপধিতং পুঞ্ঞং, কত্থ দিন্নং মহপ্ফলং–

চত্তারো চ পটিপন্না, চত্তারো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো;

যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, সঙ্ঘে দিন্নং মহপ্ফলং–

গহট্ঠৰন্দনাসুত্ত

পুচ্ছা – গহট্ঠৰন্দনাসুত্তং পনাৰুসো ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘ভূতপুব্বং ভিক্খৰে সক্কো দেৰানমিন্দো মাতলিং সঙ্গাহকং আমন্তেসী’’তি এৰমাদিনা ভন্তে ভগৰতা ভাসিতং.

তং নমস্সন্তি তেৰিজ্জা, সব্বে ভুম্মাচ খত্তিযা;

চত্তারো চ মহারাজা, তিদসাচ যসস্সিনো;

অথকো নাম সো যক্খো, যং ত্ৰং সক্ক নমস্সসি–

অহঞ্চ সীলসম্পন্নে, চিররত্তসমাহিতে;

সম্মাপব্বজিতে ৰন্দে, ব্রহ্মচরিযপরাযনে.

যে গহট্ঠা পুঞ্ঞকরা, সীলৰন্তো উপাসকা;

ধম্মেন দারং পোসেন্তি, তে নমস্সামি মাতলি.