নমো তস্স ভগৰতো অরহতো সম্মাসম্বুদ্ধস্স
সুত্তন্তপিটকে
দীঘনিকাযে
সীলক্খন্ধৰগ্গসুত্ত
সংগাযনস্স পুচ্ছা ৰিস্সজ্জনা
পুচ্ছা – পঠমমহাধম্মসংগীতিকালে আৰুসো ধম্মসংগাহকা মহাকস্সপাদযো মহাথেরৰরা পঠমং ৰিনযং সংগাযিত্ৰা তদনন্তরং কং নাম পাৰচনং সংগাযিংসু.
ৰিস্সজ্জনা – পঠমমহাধম্মসংগীতিযং ভন্তে ধম্মসংগাহকা মহাকস্সপাদযো মহাথেরৰরা পঠমং ৰিনযং সংগাযিত্ৰা তদনন্তরং ধম্মং সংগাযিংসু.
পুচ্ছা – ধম্মো নাম আৰুসো সুত্তন্তাভিধম্মৰসেন দুৰিধো, তত্থ কতরং ধম্মং পঠমং সংগাযিংসু.
ৰিস্সজ্জনা – দ্ৰীসু ভন্তে ধম্মেসু সুত্তন্তাভিধম্মপিটকেসু পঠমং সুত্তন্তং পিটকং ধম্মং সংগাযিংসু.
পুচ্ছা – সুত্তন্তপিটকে পি আৰুসো দীঘমজ্ঝিমসংযুত্তঅঙ্গুত্তরখুদ্দকনিকাযৰসেন পঞ্চ নিকাযা, তেসু পঠমং কতরং নিকাযং সংগাযিংসু.
ৰিস্সজ্জনা – পঞ্চসু ভন্তে নিকাযেসু পঠমং দীঘনিকাযং সংগাযিংসু.
পুচ্ছা – দীঘনিকাযেপি আৰুসো তযো ৰগ্গা চতুত্তিংসা চ সুত্তানি, তেসু কতরং ৰগ্গং কতরঞ্চ সুত্তং পঠমং সংগাযিংসু.
ৰিস্সজ্জনা – দীঘনিকাযেপি ভন্তে তীসু ৰগ্গেসু পঠমং সীলক্খন্ধৰগ্গং, চতুত্তিংসতিযা চ সুত্তেসু পঠমং ব্রহ্মজালসুত্তং সংগাযিংসু.
ব্রহ্মজালসুত্ত
পুচ্ছা – সাধু সাধু আৰুসো মযম্পি দানি ততোযেৰ পট্ঠায সংগাযিতুং পুব্বকিচ্চানি সমারভাম…, তেনাৰুসো ভগৰতা জানতা পস্সতা অরহতা সম্মাসম্বুদ্ধেন ব্রহ্মজালসুত্তং কত্থ ভাসিতং.
ৰিস্সজ্জনা – অন্তরা চ ভন্তে রাজগহং অন্তরা চ নাল়ন্দং অম্বলট্ঠিকাযং রাজাগারকে ভাসিতং.
পুচ্ছা – কং আৰুসো আরব্ভ ভাসিতং.
ৰিস্সজ্জনা – সুপ্পিযঞ্চ ভন্তে পরিব্বাজকং ব্রহ্মদত্তঞ্চ মাণৰং আরব্ভ ভাসিতং.
পুচ্ছা – কিস্মিং আৰুসো ৰত্থুস্মিং ভাসিতং.
ৰিস্সজ্জনা – ৰণ্ণাৰণ্ণে ভন্তে, সুপ্পিযো হি ভন্তে অনেকপরিযাযেন বুদ্ধস্স অৰণ্ণং ভাসতি ধম্মস্স অৰণ্ণং ভাসতি সঙ্ঘস্স অৰণ্ণং ভাসতি, সুপ্পিযস্স পন পরিব্বাজকস্স অন্তেৰাসী ব্রহ্মদত্তো মাণৰো অনেকপরিযাযেন বুদ্ধস্স ৰণ্ণং ভাসতি ধম্মস্স ৰণ্ণং ভাসতি সঙ্ঘস্স ৰণ্ণং ভাসতি, তস্মিং ভন্তে ৰত্থুস্মিং ভাসিতং.
অনুসন্ধে
পুচ্ছা – কতি আৰুসো তত্থ অনুসন্ধযো.
ৰিস্সজ্জনা – তযো ভন্তে তত্থ অনুসন্ধযো, একো অৰণ্ণানুসন্ধি, দ্ৰে ৰণ্ণানুসন্ধিযো.
পঠম অনুসন্ধে
পুচ্ছা – তত্থাৰুসো পঠমে অনুসন্ধিম্হি কথং ভগৰতা ভাসিতং, তং সংখেপতো কথেহি.
ৰিস্সজ্জনা – পঠমে ভন্তে অনুসন্ধিম্হি অৰণ্ণে মনোপদোসং নিৰারেত্ৰা, তত্থ চ আদীনৰং দস্সেত্ৰা, তত্থ পটিপজ্জিতব্বাকারো ভগৰতা ভাসিতো.
মমং ৰা ভিক্খৰে পরে অৰণ্ণং ভাসেয্যুং, ধম্মস্স ৰা অৰণ্ণং ভাসেয্যুং সঙ্ঘস্স ৰা অৰণ্ণং ভাসেয্যুং, তত্র তুম্হেহি ন আঘাতো অপ্পচ্চযো ন চেতসো অনভিরদ্ধি করণীযা…
দুতিয অনুসন্ধে
পুচ্ছা – সাধু সাধু আৰুসো, সাধু খো ভগৰা অত্তনা পরমুক্কং সাগতখন্তীগুণসমন্নাগতো অত্তনো সাৰকভূতে অম্হেপি তত্থ সমাদাপেসি, অত্তনা চ লোকধম্মেসু অনিঞ্জনসভাৰো অম্হাকম্পি তথত্তায ওৰাদমদাসি, দুতিযেপনাৰুসো অনুসন্ধিম্হি কথং ভগৰতা ভাসিতং, তম্পি সংখেপতো পকাসেহি.
ৰিস্সজ্জনা – দুতিযে পন ভন্তে অনুসন্ধিম্হি ৰণ্ণে চেতসো উপ্পিলাৰিতত্তং নিসেধেত্ৰা, তত্থ চ আদীনৰং দস্সেত্ৰা, তত্থ চ পটিপজ্জনাকারং দস্সেত্ৰা, পুথুজ্জনস্স ৰণ্ণভূমিভূতানি তীণি সীলানি ৰিত্থারতো ভগৰতা ভাসিতানি.
মমং ৰা ভিক্খৰে পরে ৰণ্ণং ভাসেয্যুং, ধম্মস্স ৰা ৰণ্ণং ভাসেয্যুং, সঙ্ঘস্স ৰা ৰণ্ণং ভাসেয্যুং, তত্র তুম্হেহি ন আনন্দো ন সোমনস্সং ন চেতসো অভিরদ্ধি করণীযা –
ততিয অনুসন্ধে
পুচ্ছা – সাধু সাধু আৰুসো, সাধু খো ভগৰা অত্তনা পরমুক্কংসগতসুপরিসুদ্ধসীলসমন্নাগতো, তং অত্তনো সুপরিসুদ্ধসীলং দস্সেত্ৰা পরেপি তত্থ নিযোজেসি, ততিযে পনাৰুসো অনুসন্ধিম্হি কথং ভগৰতা ভাসিতং, তং সংখেপতো পকাসেহি.
ৰিস্সজ্জনা – ততিযে পন ভন্তে অনুসন্ধিম্হি দ্ৰাসট্ঠি দিট্ঠিযো সব্বঞ্ঞুত ঞাণেন ৰিত্থারতো ৰিভজিত্ৰা, তাসঞ্চ ছ ফস্সাযতনপদট্ঠানভাৰং ৰিভাৰেত্ৰা, মিচ্ছাদিট্ঠিগতিকাধিট্ঠা নঞ্চ ৰট্টং কথেত্ৰা, যুত্তযোগভিক্খুঅধিট্ঠানঞ্চ ৰিৰট্টং কথেত্ৰা, মিচ্ছাদিট্ঠিগতিকস্স দেসনাজালতো অৰিমুত্তভাৰং দেসনাজালতো ৰিমুত্তস্স নত্থিকভাৰঞ্চ ৰিভাৰেত্ৰা, অত্তনো চ কত্থচি অপরিযাপন্নভাৰং দস্সেত্ৰা, উপাদিসেসনিব্বানধাতুং পাপেত্ৰা দেসনা ভগৰতা নিট্ঠাপিতা.
উচ্ছিন্নভাৰনেত্তিকো ভিক্খৰে তথাগতস্স কাযো তিট্ঠতি, যাৰস্স কাযো ঠস্সতি তাৰ নং দক্খন্তি দেৰমনুস্সা, কাযস্স ভেদা উদ্ধং জীৰিতপরিযাদানা ন নং দক্খন্তি দেৰমনুস্সা.
সুত্তনিদেসনা
পুচ্ছা – সাধু সাধু আৰুসো, সাধু খো ভগৰা অত্তনা দ্ৰাসট্ঠি দিট্ঠিযো চ ছ ফস্সাযতনানি চ দ্ৰাদস পটিচ্চসমুপ্পাদঙ্গানি চ সব্বসো পরিজানিত্ৰা তেসং পরিজাননত্থায পরেসম্পি তথত্তায ধম্মং পকাসেতি, সুত্তঞ্চ নাম আৰুসো চতুন্নং সুত্তনিক্খেপানং অঞ্ঞতরৰসেনেৰ নিক্খিত্তং, তস্মা তেসু ইদং সুত্তং কতরেন সুত্তনিক্খেপেন ভগৰতা নিক্খিত্তং.
ৰিস্সজ্জনা – চতূসু ভন্তে সুত্তনিক্খেপেসু অট্ঠুপ্পত্তিনিক্খেপন ইদং সুত্তং নিক্খিত্তং.
পুচ্ছা – কস্স আৰুসো ৰচনং.
ৰিস্সজ্জনা – ভগৰতো ভন্তে ৰচনং অরহতো সম্মাসম্বুদ্ধস্স.
পুচ্ছা – কেনাৰুসো আভতং.
ৰিস্সজ্জনা – পরম্পরায ভন্তে আভতং.
পুচ্ছা – অত্থি নু খো আৰুসো এত্থ কোচি ৰিরদ্ধদোসা, যেন পচ্ছিমা জনা মিচ্ছাঅত্থং গণ্হেয্যুং.
ৰিস্সজ্জনা – নত্থি ভন্তে.
সামঞ্ঞফলসুত্ত
পুচ্ছা – তেনাৰুসো ভগৰতা…পে… সম্মাসম্বুদ্ধেন সামঞ্ঞফলসুত্তং কত্থ ভাসিতং.
ৰিস্সজ্জনা – রাজগহে ভন্তে জীৰকস্স কোমারভচ্চস্স অম্বৰনে ভাসিতং.
পুচ্ছা – কেনাৰুসো সদ্ধিং ভগৰতা ভাসিতং.
ৰিস্সজ্জনা – রঞ্ঞা ভন্তে মাগধেন অজাতসত্তুনা ৰেদেহিপুত্তেন সদ্ধিং ভাসিতং.
পুচ্ছা – তং পনাৰুসো সুত্তং চতুন্নং সুত্তনিক্খেপানং কতরেন সুত্তনিক্খেপেন ভগৰতা নিক্খিত্তং.
ৰিস্সজ্জনা – চতুন্নং ভন্তে সুত্তনিক্খেপানং পুচ্ছাৰসিকেন সুত্তনিক্খেপেন নিক্খিতং ভগৰতা.
অজাতসত্তু
পুচ্ছা – সা পনাৰুসো পুচ্ছা কেনাকারেন সমুপ্পন্না.
ৰিস্সজ্জনা – রাজা ভন্তে মাগধো অজাসত্তু ৰেদেহিপুত্তো তদহুপোসথে পন্নরসে কোমুদিযা চাতুমাসিনিযা পুণ্ণায পুণ্ণমায রত্তিযা যেন ভগৰা তেনুপসংকমি, উপসংকমিত্ৰা ভগৰন্তং দিট্ঠেৰ ধম্মে সংদিট্ঠিকং সামঞ্ঞফলং পুচ্ছি, এৰং খো সা ভন্তে পুচ্ছা উপ্পন্না.
রম্মণীযা ৰত ভো দোসিনা রত্তি, অভিরূপা ৰত ভো দোসিনা রত্তি, দস্সনীযা ৰত ভো দোসিনা রত্তি, পাসাদিকা ৰত ভো দোসিনা রত্তি, লক্খঞ্ঞা ৰত ভো দোসিনা রত্তি….
কং নুখ্ৰজ্জ সমণং ৰা ব্রাহ্মণং ৰা পযিরুপাসেয্যাম….
যং নো পযিরুপসতো চিত্তং পসীদেয্য….
ছরাজীৰক
ত্ৰং পন সম্ম জীৰক কিং তুণ্হীসি –
অযং দেৰ অম্হাকং ভগৰা অরহং সম্মাসম্বুদ্ধো অম্হাকং অম্বৰনে ৰিহরতি.
তং খো পন ভগৰন্তং এৰং কল্যাণো কিত্তিসদ্দো অব্ভুগ্গতো ‘‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরোপুরিসদম্মসারথি সত্থাদেৰমনুস্সানং বুদ্ধো ভগৰা’’তি.
তং দেৰো ভগৰন্তং পযিরুপাসতু, অপ্পেৰনাম দেৰস্স ভগৰন্তং পযিরুপাসতো চিত্তং পসীদেয্য.
তেন হি সম্ম জীৰক হত্থিযানানি কপ্পাপেহি.
কপ্পিতানি খো তে দেৰ হত্থিযানানি, যস্স দানি কালং মঞ্ঞসি.
অজাতসত্তু
কিচ্চি মং সম্ম জীৰক ন ৰঞ্চেসি, কচ্চি মং সম্ম জীৰক ন পলম্ভেসি….
মা ভাযি মহারাজ, মা ভাযি মহারাজ….
ন তং দেৰ ৰঞ্চেমি, ন তং দেৰ পলম্ভামি….
অজাতসত্ত
এসো মহারাজ ভগৰা, এসো মহারাজ ভগৰা মজ্ঝিমং থম্ভং নিস্সায পুরত্থাভিমুখো নিসিন্নো পুরক্খতো ভিক্খুসঙ্ঘস্স….
ইমিনা মে উপসমেন উদযভদ্দো কুমারো সমন্নাগতো হোতু…
অগমা খো ত্ৰং মহারাজ যথা পেমং.
পুচ্ছেয্যামহং ভন্তে ভগৰন্তং কিঞ্চিদেৰ দেসং সচে মে ভগৰা ওকাসং করোতি পঞ্হস্স ৰেয্যাকরণায.
পুচ্ছ মহারাজ যদাকঙ্খসি.
যথা নু খো ইমানি ভন্তে পুথুসিপ্পাযতনানি, সেয্যথিদং, হত্থারোহা অস্সারোহা রথিকা ধনুগ্গহা চেলকা চলকা পিণ্ডদাযকা (পেয্যাল) গণকা মুদ্দিকা, অঞ্ঞানিপি এৰং গতিকানি পুথুসিপ্পাযতনানি, তে তেন সিপ্পেন সন্দিট্ঠিকং সিপ্পফলং জীৰন্তি, তে তেন অত্তানং সুখেন্তি পীণেন্তি, মাতাপিতরো সুখেন্তি, পীণেন্তি, পুত্তদারং সুখেন্তি পীণেন্তি, মিত্তামচ্চে সুখেন্তি পীণেন্তি সমণব্রাহ্মণেসু উদ্ধগ্গিকং দক্খিণং পতিট্ঠপেন্তি সোৰগ্গিকং সুখৰিপাকং সগ্গসংৰত্তনিকং, সক্কা নু খো ভন্তে এৰমেৰ দিট্ঠেৰ ধম্মে সন্দিট্ঠিকং সামঞ্ঞফলং পঞ্ঞপেতুং.
পুচ্ছা – তদা আৰুসো কথং ভগৰতা রাজা অজাতসত্তু ৰেদেহি পুত্তো পটিপুচ্ছিতো কথঞ্চ তেন ভগৰতো আরোচিতং.
ৰিস্সজ্জনা – ‘‘অভিজানাসি নো ত্ৰং মহারাজ ইমং পঞ্হং অঞ্ঞে সমণব্রাহ্মণে পুচ্ছিতাতি, অভিজানামহং ভন্তে অঞ্ঞে সমণব্রাহ্মণে পুচ্ছিতাতি, যথাকথং পন তে মহারাজ ব্যাকরিংসু, সচে তে অগরু, ভাসস্সূতি ন খো মে ভন্তে গরু, যত্থস্স ভগৰা নিসিন্নো ভৰন্তরূপো ৰাতি, তেনেহি মহারাজ ভাসস্সূ’’তি, এৰং খো ভন্তে তদা ভগৰতা রাজা মাগধো অজাতসত্তু ৰেদেহি পুত্তো পটিপুচ্ছিতো, এৰং খো ভন্তে তেন তদা ভগৰতো আরোচিতং.
পূরণকস্সপ অযূৰাদ
পুচ্ছা – কথঞ্চাৰুসো পূরণকস্সপস্স সন্তিকে পুচ্ছাৰিস্সজ্জনা অহোসি.
ৰিস্সজ্জনা – একমিদং ভন্তে সমযং রাজা মাগধো অজাতসত্তু ৰেদেহিপুত্তো যেন পূরণো কস্সপো তেনুপসঙ্কমি, উপসঙ্কমিত্ৰা পূরণং কস্সপং সন্দিট্ঠিকং সামঞ্ঞফলং পুচ্ছি, অথ খো ভন্তে পূরণো কস্সপো করোতো খো মহারাজ কারযতো, ছিন্দতো ছেদাপযতো, পচতো পাচাপযতো, সোচযতো সোচাপযতো (পেয্যাল) করোতো ন করীযতি পাপং ত্যাদিনা রঞ্ঞো মাগধস্স অজাতসত্তুস্স ৰেদেহিপুত্তস্স সংদিট্ঠি কং সামঞ্ঞফলং পুট্ঠো সমানো অকিরিযং ব্যাকাসি, এৰং খো ভন্তে পূরণস্স কস্সপস্স সন্তিকে পুচ্ছাৰিস্সজ্জনা অহোসি.
পূরণকস্সপৰাদ
নিস্সিরিকো ৰত আৰুসো পূরণস্স কস্সপস্স ৰাদো অনত্থসংহিতো জিগুচ্ছনীযো অতিৰিয ভযানকো, যে তস্স ৰচনং সোতব্বং সদ্ধাতব্বং মঞ্ঞেয্যুং, তেসং তং অস্স দীঘরত্তং অহিতায দুক্খায, এত্তকেনেৰ অজ্জ মযং পুচ্ছাৰিস্সজ্জনং থপেস্সাম.
মক্খলিগোসাল অযূৰাদ
পুচ্ছা – পুরিমদিৰসে আৰুসো মযা সামঞ্ঞফলসুত্তস্স নিদানপরিযাপন্নানি পুচ্ছিতব্বট্ঠানানি কানিচি কানিচি পুচ্ছিতানি, তযা চ সুট্ঠু ৰিস্সজ্জিতানি, অজ্জ পন যথানুপ্পত্তমক্খলিগোসায ৰাদতো পট্ঠায পুচ্ছিস্সামি, মক্খলি পন আৰুসো
গোসালো রঞ্ঞা মাগধেন অজাতসত্তুনা ৰেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.
ৰিস্সজ্জনা – একমিদং ভন্তে সমযং রাজা মাগধো অজাতসত্তু ৰেদেহিপুত্তো যেন মক্খলিগোসালো তেনুপসংকমি, উপসংকমিত্ৰা মক্খলিং গোসালং সন্দিট্ঠিকং সামঞ্ঞফলং পুচ্ছি, অথ খো ভন্তে মক্খলিগোসালো রাজানং মাগধং অজাতসত্তুং ৰেদেহিপুত্তং এতদৰোচ ‘‘নত্থি মহারাজ হেতু নত্থি পচ্চযো সত্তানং সংকিলেসায, অহেতূ অপচ্চযা সত্তা সংকিলিস্সন্তি. নত্থি মহারাজ হেতু নত্থি পচ্চযো সত্তানং ৰিসুদ্ধিযা, অহেতূ অপচ্চযা সত্তা ৰিসুজ্ঝন্তি, (পেয্যাল) চুল্লাসীতি মহাকপ্পিনো সতসহস্সানি, যানি বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তি, তত্থ নত্থি ‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা অপরিপক্কং ৰা কম্মং পরিপাচেস্সামি, পরিপক্কং ৰা কম্মং ফুস্স ফুস্স ব্যন্তিং করিস্সামী’তি হেৰং নত্থি. দোণমিতে সুখদুক্খে, পরিযন্তকতে সংসারে নত্থি হাযনৰড্ঢনে, নত্থি উক্কংসাৰকংসে. সেয্যথাপি নাম সুত্তপুট্ঠে খিত্তে নিব্বেঠিযমানমেৰ পলেতি, এৰমেৰ বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তী’’তি, ইত্থং খো ভন্তে রঞ্ঞো মাগধস্স অজাতসত্তুস্স ৰেদেহিপুত্তস্স মক্খলিগোসালো সন্দিট্ঠিকং সামঞ্ঞফলং পুট্ঠো সমানো সংসারসুদ্ধিং ব্যাকাসি.
মক্খলিগোসালৰাদ
অযম্পি আৰুসো ৰাদো নিস্সিরিকোযেৰ অনত্থসংহিতো জিগুচ্ছনীযো অতি ৰিয ভযানকো, যে তস্স ৰচনং সোতব্বং সদ্ধাতব্বং মঞ্ঞেয্যুং, তেসং তং অস্স দীঘরত্তং অহিতায দুক্খায.
অজিতকেসকম্বলৰাদ
পুচ্ছা – অথাপরম্পি পুচ্ছামি, অজিতো পন আৰুসো কেসকম্বলো রঞ্ঞা মাগধেন অজাতসত্তুনা ৰেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.
ৰিস্সজ্জনা – একমিদং ভন্তে সমযং রাজা মাগধো অজাতসত্তু ৰেদেহিপুত্তো যেন অজিতো কেসকম্বলো তেনুপসঙ্কমি, উপসঙ্কমিত্ৰা অজিতং কেসকম্বলং সন্দিট্ঠিকং সামঞ্ঞফলং পুচ্ছি, অথ খো ভন্তে অজিতো কেসকম্বলো রাজানং মাগধং অজাতসত্তুং ৰেদেহিপুত্তং এতদৰোচ ‘‘নত্থি মহারাজ দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৰিপাকো, নত্থি অযং লোকো, নত্থি পরো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা সম্মাপটিপন্না, যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তি. (পেয্যাল) বালে চ পণ্ডিতে চ কাযস্স ভেদা উচ্ছিজ্জন্তি ৰিনস্সন্তী’’তি. ইত্থং খো ভন্তে রঞ্ঞো মাগধস্স অজাতসত্তুস্স ৰেদেহিপুত্তস্স অজিতো কেসকম্বলো সন্দিট্ঠিকং সামঞ্ঞফলং পুট্ঠো সমানো উচ্ছেদং ব্যাকাসি.
অজিতকেসকম্বল
অযম্পি খো আৰুসো নিস্সিরিকোযেৰ, অনত্থসংহিতো জিগুচ্ছনীযো অতি ৰিয ভযানকো, যে তস্স ৰচনং সোতব্বং সদ্ধাতব্বং মঞ্ঞেয্যুং, তেসং তং অস্স দীঘরত্তং অহিতায দুক্খায.
পকুধকচ্চাযনৰাদ
পুচ্ছা – অথাপরম্পি পুচ্ছামি, পকুধো পন আৰুসো কচ্চাযনো রঞ্ঞা মাগধেন অজাতসত্তুনা ৰেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.
ৰিস্সজ্জনা – একমিদং ভন্তে সমযং রাজা মাগধো অজাতসত্তু ৰেদেহিপুত্তো যেন পকুধো কচ্চাযনো তেনুপসঙ্কমি, উপসঙ্কমিত্ৰা পকুধং কচ্চাযনং সন্দিট্ঠিকং সামঞ্ঞফলং পুচ্ছি, অথ খো ভন্তে পকুধো কচ্চাযনো রাজানং মাগধং অজাসত্তুং ৰেদেহিপুত্তং এতদৰোচ ‘‘সত্তিমে মহারাজ কাযা অকটা অকটৰিধা অনিম্মিতা অনিম্মাতা ৰঞ্চা কূটট্ঠা এসিকট্ঠাযিতা, তে ন ইঞ্জন্তি, ন ৰিপরিণামেন্তি, ন অঞ্ঞমঞ্ঞং ব্যাবাধেন্তি, নালং অঞ্ঞমঞ্ঞস্স সুখায ৰা দুক্খায ৰা সুখদুক্খায ৰা. কতমে সত্ত, পথৰীকাযো, আপোকাযো, তেজোকাযো ৰাযোকাযো, সুখে, দুক্খে, জীৰে সত্তমে. ইমে সত্তকাযা অকটা অকটৰিধা অনিম্মিতা অনিম্মাতা ৰঞ্চ্যা কূটট্ঠা এসিকট্ঠাযিতা, তে ন ইঞ্জন্তি, ন ৰিপরিণামেন্তি, ন অঞ্ঞমঞ্ঞং ব্যাবাধেন্তি, নালং অঞ্ঞমঞ্ঞস্স সুখায ৰা দুক্খায ৰা সুখদুক্খায ৰা. তত্থ নত্থি হন্তা ৰা ঘাতেতা ৰা, সোতা ৰা সাৰেতা ৰা, ৰিঞ্ঞাতা ৰা ৰিঞ্ঞাপেতা ৰা, যোপি তিণ্হেন সত্থেন সীসং ছিন্দতি, ন কোচি কিঞ্চি জিৰিতা ৰোরোপেতি, সত্তন্নংত্ৰেৰ কাযানমন্তরেন সত্থং ৰিৰরমনুপততী’’তি. ইত্থং খো ভন্তে রঞ্ঞো মাগধস্স অজাতসত্তুস্স ৰেদেহিপুত্তস্স পকুধো কচ্চাযনো সামঞ্ঞফলং পুট্ঠো সমানো অঞ্ঞেন অঞ্ঞং ব্যাকাসি.
পকুধকচ্চাযনৰাদ
অযম্পি খো আৰুসো ৰাদো পুরিমৰাদোৰিয নিস্সিরিকোযেৰ অনত্থসংহিতো জিগুচ্ছনীযো অতিৰিয ভযানকো.
নিগণ্ঠনাটপুত্তৰাদ
পুচ্ছা – অথাপরম্পি পুচ্ছামি, নিগণ্ঠো পনাৰুসো নাটপুত্তো রঞ্ঞা মাগধেন অজাতসত্তুনা ৰেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.
ৰিস্সজ্জনা – একমিদং ভন্তে সমযং রাজা মাগধো অজাতসত্তু ৰেদেহিপুত্তো যেন নিগণ্ঠো নাটপুত্তো তেনুপসংকমি, উপসংকমিত্ৰা নিগণ্ঠং নাটপুত্তং সন্দিট্ঠিকং সামঞ্ঞফলং পুচ্ছি, অথ খো নিগণ্ঠো নাটপুত্তো রাজানং মাগধং অজাতসত্তুং ৰেদেহিপুত্তং এতদৰোচ, ‘‘ইধ মহারাজ নিগণ্ঠো চাতুযামসংৰরসংৰুতো হোতি, কথঞ্চ মহারাজ
নিগণ্ঠো চাতুযামসংৰরসংৰুতো হোতি, ইধ মহারাজ নিগণ্ঠো সব্বৰারিৰারিতো চ হোতি, সব্বৰারিযুত্তো চ, সব্বৰারিধুতো চ, সব্বৰারিফুটো চ. এৰং খো মহারাজ নিগণ্ঠো চাতুযামসংৰরসংৰুতো হোতি, যতো খো মহারাজ নিগণ্ঠো এৰং চাতুযামসংৰরসংৰুতো হোতি. অযং ৰুচ্চতি মহারাজ নিগণ্ঠো গতত্তো চ যতত্তো চ ঠিতত্তো চা’’তি. ইত্থং খো ভন্তে রঞ্ঞো মাগধস্স অজাতসত্তুস্স ৰেদেহিপুত্তস্স নিগণ্ঠো নাটপুত্তো সন্দিট্ঠিকং সামঞ্ঞফলং পুট্ঠো সমানো চাতুযামসংৰরং ব্যাকাসি.
নিগণ্ঠৰাদ
এতস্স পনাৰুসো ৰাদে কোচি সাসনানুলোমৰাদো অত্থি, অসুদ্ধলদ্ধিতায পন এসোপি ৰাদো জিগুচ্ছনীযোযেৰ, সেয্যথাপি ভোজনং গূথমিস্সং গারয্হোযেৰ আরকা পরিৰজ্জিতব্বোযেৰ, সেয্যথাপি ৰিসসংসট্ঠো আপানীযকংসো.
সিঞ্চঞ্ঞৰাদ
পুচ্ছা – অথাপরম্পি পুচ্ছামি, সঞ্চযো পনাৰুসো বেলট্ঠপুত্তো সন্দিট্ঠিকং সামঞ্ঞফলং পুট্ঠো কথং ব্যাকাসি.
ৰিস্সজ্জনা – একমিদং ভন্তে সমযং রাজা মাগধো অজাতসত্তু ৰেদেহিপুত্তো যেন সঞ্চযো বেলট্ঠপুত্তো তেনুপসঙ্কমি, উপসঙ্কমিত্ৰা সঞ্চযং বেলট্ঠপুত্তং এতদৰোচ, ‘‘যথা নু খো ইমানি ভো সঞ্চয পুথুসিপ্পাযতনানি, সেয্যথিদং, হত্থারোহা অস্সরোহা…পে… সক্কা নু খো ভো সঞ্চয এৰমেৰ দিট্ঠেৰ ধম্মে সন্দিট্ঠিকং সামঞ্ঞফলং পঞ্ঞপেতু’’ন্তি, এৰং ৰুত্তে ভন্তে সঞ্চযো বেলট্ঠপুত্তো রাজানং মাগধং অজাতসত্তুং ৰেদেহিপুত্তং এতদৰোচ.
‘‘অত্থি পরোলোকোতি ইতি চে মং পুচ্ছসি, অত্থি পরো লোকোতি ইতি চে মে অস্স, অত্থি পরো
লোকোতি ইতি তে নং ব্যাকরেয্যং, এৰন্তিপি মে নো, তথাতিপি মে নো, অঞ্ঞথাতিপি মে নো, নোতিপি মে নো, নো নোতিপি মে নো…পে… নেৰ হোতি ন ন হোতি তথাগতো পরং মরণাতি ইতি চে মং পুচ্ছসি, নেৰ হোতি ন ন হোতি তথাগতো পরং মরণাতি ইতি চে মে অস্স, নেৰ হোতি ন ন হোতি তথাগতো পরং মরণাতি ইতি তে নং ব্যাকরেয্যং, এৰন্তিপি মে নো, তথাতিপি মে নো, অঞ্ঞথাতিপি মে নো, নোতিপি মে নো, নো নোতিপি মে নো’’তি. ইত্থং খো ভন্তে রঞ্ঞো মাগধস্স অজাতসত্তুস্স ৰেদেহিপুত্তস্স সঞ্চযো বেলট্ঠপুত্তো সন্দিট্ঠিকং সামঞ্ঞফলং পুট্ঠো সমানো ৰিক্খেপং ব্যাকাসি.
তিত্থিঅযূৰাদ
সব্বেপি আৰুসো এতে ছন্নং সত্থারানং ৰাদা নিস্সিরিকাযেৰ জিগুচ্ছনীযাযেৰ অনত্থসংহিতাযেৰ, বালানং ভিয্যোসো মত্তায সম্মোহায সংৰত্তন্তি অনত্থায.
অজ্জ পন আৰুসো কালো অতিক্কন্তো, স্ৰেযেৰ ভগৰতা ৰুত্তং পণীতং পসট্ঠং সন্দিট্ঠিকফলং পুচ্ছাম.
পুচ্ছা – পুরিমদিৰসেসু আৰুসো সামঞ্ঞফলসুত্তস্স পুব্বভাগে যাৰ ছসত্থারমিচ্ছাৰাদপরিযোসানং পুচ্ছনৰিস্সজ্জনং অম্হেহি কতং, অজ্জ পন যথানুপ্পত্তং ভগৰতা দেসিতসামঞ্ঞফলসুত্তাধিকারে পুচ্ছাৰিস্সজ্জনং করিস্সাম. ভগৰা পন আৰুসো রঞ্ঞা মাগধেন অজাতসত্তুনা ৰেদেহিপুত্তেন সন্দিট্ঠিকং সামঞ্ঞফলং পুট্ঠো কথং ব্যাকাসি.
ৰিস্সজ্জনা – ভগৰা ভন্তে তিধা ৰিভজিত্ৰা রঞ্ঞো মাগধস্স অজাতসত্তুস্স ৰেদেহিপুত্তস্স সন্দিট্ঠিকং সামঞ্ঞফলং পুট্ঠো ব্যাকাসি.
পুচ্ছা – কথঞ্চাৰুসো ভগৰা রঞ্ঞো মাগধস্স অজাতসত্তুনো ৰেদেহিপুত্তস্স পঠমং সন্দিট্ঠিকং সামঞ্ঞফলং দেসেসি.
ৰিস্সজ্জনা – দাসং ভন্তে পব্বজিতং উপমাভাৰেন নিদ্দিসিত্ৰা রঞ্ঞো মাগধস্স অজাতসত্তুস্স ৰেদেহিপুত্তস্স ভগৰা পঠমং সন্দিট্ঠিকং সামঞ্ঞফলং দেসেসি.
সোহং ভন্তে ভগৰন্তম্পি পুচ্ছামি, যথা নু খো ইমানি ভন্তে পুথুসিপ্পাযতনানি সেয্যথিদং…পে… সক্কা নু খো ভন্তে এৰ মেৰ দিট্ঠেৰ ধম্মে সন্দিট্ঠিকং সামঞ্ঞফলং পঞ্ঞপেতুং –
অচ্ছরিযং আৰুসো অব্ভুতং আৰুসো, যাৰ স্ৰাখাতস্স বুদ্ধসাসনস্স মহিদ্ধিকতা মহানুভাৰতা, যত্রহি নাম দাসোপি নিহীনজচ্চো এৰং স্ৰাখাতে বুদ্ধসাসনে পব্বজিত্ৰা অত্তনো ইস্সরভূতেন রঞ্ঞাপি ৰন্দনীযত্তং গরুকরণীযত্তং পাপুণিস্সতি, সুপঞ্ঞত্তমেতং ভগৰতা পঠমং সন্দিট্ঠিকফলং.
পুচ্ছা – কথং পনাৰুসো ভগৰা রঞ্ঞো মাগধস্স অজাতসত্তুনো ৰেদেহিপুত্তস্স দুতিযং সন্দিট্ঠিকং সামঞ্ঞফলং দেসেসি.
ৰিস্সজ্জনা – কস্সকং ভন্তে পব্বজিতং উপমাভাৰেন দস্সেত্ৰা ভগৰা রঞ্ঞো মাগধস্স অজাতসত্তুস্স ৰেদেহিপুত্তস্স সন্দিট্ঠিকং সামঞ্ঞফলং দেসেসি.
অচ্ছরিযং আৰুসো অব্ভুতং আৰুসো, যাৰ বুদ্ধসাসনস্স স্ৰাখাততা মহিদ্ধিকতা মহানুভাৰতা, যত্রহি নাম কস্স কোপি গুণরহিতো এৰং স্ৰাখাতে বুদ্ধসাসনে পব্বজিত্ৰা রট্ঠধিপতিনা মনুস্সলোকে দেৰভূতেন রঞ্ঞাপি গরুকরণীযতং ৰন্দনীযতং পাপুণিস্সতি, সুপঞ্ঞত্তমেতং আৰুসো ভগৰতা দুতিযং সন্দিট্ঠিকফলং.
পুচ্ছা – কথঞ্চা পনাৰুসো ভগৰা পুরিমেহি সন্দিট্ঠিকসামঞ্ঞফলেহি অভিক্কন্ততরঞ্চ পণীততরঞ্চ সন্দিট্ঠিকং সামঞ্ঞফলং রঞ্ঞো দেসেসি.
ৰিস্সজ্জনা – ভগৰা ভন্তে বুদ্ধুপ্পাদতো পট্ঠায কুলপুত্তস্স পব্বজিত ভাৰং, তস্স চ সীলসম্পদং, তস্স চ ইন্দ্রিযেসু গুত্তদ্ৰারতং, অরিযঞ্চসতিসম্পজঞ্ঞং, অরিযঞ্চ সন্তুট্ঠিং, পঞ্চন্নঞ্চ নীৰরণানং পহানং, চত্তারি চ ঝানানি, অট্ঠ চ ৰিজ্জাযো, তাহি তাহি উপমাহি ৰিত্থারতো ৰিভজিত্ৰা রঞ্ঞো মাগধস্স অজাতসত্তুস্স ৰেদেহিপুত্তস্স সন্দিট্ঠিকং সামঞ্ঞফলং পুরিমেহি সন্দিট্ঠিকেহি সামঞ্ঞফলেহি অভিক্কন্ততরঞ্চ পণীততরঞ্চ দেসেসি.
সক্কা পন ভন্তে দিট্ঠেৰ ধম্মে সন্দিট্ঠিকং সামঞ্ঞফলং, পুরিমেহি সন্দিট্ঠিকেহি সামঞ্ঞফলেহি অভিক্কন্ততরঞ্চ পণীততরঞ্চ পঞ্ঞপেতুং.
সক্কা মহারাজা, তেন হি মহারাজ সুণোহি সাধুকং মনসিকরোহি ভাসিস্সামি.
পুচ্ছা – কথঞ্চ পনাৰুসো ভিক্খু সীলসম্পন্নো হোতি, কথঞ্চ ভগৰা রঞ্ঞো মাগধস্স অজাতসত্তুনো ৰেদেহিপুত্তস্স চূল়সীলং ৰিভজিত্ৰা দেসেসি.
ৰিস্সজ্জনা – ‘‘কথঞ্চ মহারাজ ভিক্খু সীলসম্পন্নো হোতি. ইধ মহারাজ ভিক্খু পাণাতিপাতং পহায পাণাতিপাতা পটিৰিরতো হোতি নিহিতদণ্ডো নিহিতসত্থো লজ্জী দযাপন্নো, সব্বপাণভূতহিতানুকম্পী ৰিহরতি. ইদম্পিস্স হোতি সীলস্মিং’’ এৰমাদিনা ভন্তে ভগৰা রঞ্ঞো মাগধস্স অজাতসত্তুস্স ৰেদেহিপুত্তস্স ছব্বীসতিযা আকারেহি চূল়সীলং ৰিভজিত্ৰা দেসেসি.
সাধু সাধু আৰুসো, সাধু সাধু আৰুসো যং ভিক্খু এৰং স্ৰাখাতে বুদ্ধসাসনে সদ্ধাপব্বাজিতো ইমিনা চ চূল়সীলেন সমন্নাগতো ৰিহরেয্য.
ইদানি পন কালো অতিক্কন্তো.
সুৰে যথানুপ্পত্তট্ঠানতো পট্ঠায পুচ্ছাৰিস্সজ্জনং করিস্সাম.
পুচ্ছা – কথং পনাৰুসো রঞ্ঞো মাগধস্স অজাতসত্তুনো ৰেদেহিপুত্তস্স মজ্ঝিমসীলঞ্চ মহাসীলঞ্চ ৰিভজিত্ৰা দেসেসি.
ৰিস্সজ্জনা – ‘‘যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা তে এৰরূপং বীজগামভূতগামসমারম্ভং অনুযুত্তা ৰিহরন্তি. সেয্যথিদং. মূলবীজং খন্ধবীজং ফল়ুবীজং অগ্গবীজং বীজবীজমেৰ পঞ্চমং, ইতি এৰরূপা বীজগামভূতগামসমারম্ভা পটিৰিরতো হোতি. ইদম্পিস্স হোতি সীলস্মিং’’ এৰমাদিনা ভন্তে ভগৰা রঞ্ঞো মাগধস্স অজাতসত্তুস্স ৰেদেহিপুত্তস্স মজ্ঝিমসীলঞ্চ মহাসীলঞ্চ ৰিত্থারতো ৰিভজিত্ৰা দেসেসি.
সাধু সাধু আৰুসো, সাধু খো আৰুসো যং ভিক্খু এৰং স্ৰাখাতে বুদ্ধসাসনে সদ্ধাপব্বজিতো এৰং অরিযেন সীলেন সমন্নাগতো ৰিহরেয্য.
পুচ্ছা – কথং পনাৰুসো অরিযং ইন্দ্রিযসংৰরঞ্চ অরিযং সতিসম্পজঞ্ঞঞ্চ অরিযং সন্তোসঞ্চ ভগৰা রঞ্ঞো মাগধস্স অজাতসত্তুস্স ৰিভজিত্ৰা দেসেসি.
ৰিস্সজ্জনা – ইধ মহারাজ ভিক্খু চক্খুনা রূপং দিস্ৰা ন নিমিত্তগ্গাহী হোতি ননুব্যঞ্জনগ্গাহী, যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি চক্খুন্দ্রিযং, চক্খুন্দ্রিযে সংৰরং আপজ্জতি, এৰমাদিনা চ.
ইধ মহারাজ ভিক্খু সতিসম্পজঞ্ঞেন সমন্নাগতো হোতি, অভিক্কন্তে পটিক্কন্তে সম্পজনকারী হোতি,
আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারী হোতি, এৰং খো মহারাজ ভিক্খু সতিসম্পজঞ্ঞেন সমন্নাগতো হোতি.
কথঞ্চ মহারাজ ভিক্খু সন্তুট্ঠো হোতি, ইধ মহারাজ ভিক্খু সন্তুট্ঠো হোতি কাযপরিহারিকেন চীৰরেন কুচ্ছিপরিহারিকেন পিণ্ডপাতেন.
এৰমাদিনা ভন্তে ভগৰা রঞ্ঞো মাগধস্স অজাতসত্তুস্স ৰেদেহিপুত্তস্স অরিযঞ্চ ইন্দ্রিযেসুগুত্তদ্ৰারতং অরিযঞ্চ সতিসম্পজঞ্ঞং অরিযঞ্চ সন্তোসং ৰিভজিত্ৰা দেসেসি.
সাধু সাধু আৰুসো, সাধু খো আৰুসো যং ভিক্খু এৰং স্ৰাখাতে বুদ্ধসাসনে সদ্ধাপব্বজিতো ইমিনা চ অরিযেন ইন্দ্রিযসংৰরেন সমন্নাগতো, ইমিনা চ অরিযেন সতিসম্পজঞ্ঞেন
সমন্নাগতো, ইমায চ অরিযায সন্তুট্ঠিযা সমন্নাগতো ৰিহরেয্য.
পুচ্ছা – কথং পনাৰুসো ভগৰা রঞ্ঞো মাগধস্স অজাতসত্তুস্স ৰেদেহিপুত্তস্স নীৰরণপহানং ৰিভজিত্ৰা দেসেসি.
ৰিস্সজ্জনা – সো এৰং অরিযেন সীলক্খন্ধেন সমন্নাগতো, অরিযেন ইন্দ্রিযসংৰরেন সমন্নাগতো, অরিযেন সতিসম্পজঞ্ঞেন সমন্নাগতো, অরিযায সন্তুট্ঠিযা সমন্নাগতো, ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্তং অব্ভোকাসং পলালপুঞ্জং. সো পচ্ছাভত্তং পিণ্ডপাতপটিক্কন্তো নিসীদতি পল্লঙ্কং আভুঞ্জিত্ৰা উজুং কাযং পণিধায পরিমুখং সতিং উপট্ঠপেত্ৰা. সো অভিজ্ঝং লোকে পহায ৰিগতাভিজ্ঝেন চেতসা ৰিহরতি…পে… তস্সিমে পঞ্চ নীৰরণে পহীনে অত্তনি সমনুপস্সতো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেহি, সুখিনো চিত্তং সমাধিযতি. এৰং খো ভন্তে ভগৰা রঞ্ঞো মাগধস্স অজাতসত্তুস্স ৰেদেহিপুত্তস্স নীৰরণপ্পহানং ৰিভজিত্ৰা ৰিত্থারতো দেসেসি.
সাধু সাধু আৰুসো, সাধু খো আৰুসো যং ভিক্খু এৰং স্ৰাখাতে বুদ্ধসাসনে সদ্ধাপব্বজিতো এৰং পঞ্চনীৰরণে পজহিত্ৰা তেহি চিত্তং ৰিসোধেত্ৰা ৰিহরেয্য.
পুচ্ছা – কথঞ্চাৰুসো ভগৰা রঞ্ঞো মাগধস্স অজাতসত্তুস্স ৰেদেহিপুত্তস্স পঠমং সন্দিট্ঠিকং সামঞ্ঞফলং দেসেসি, পুরিমেহি সন্দিট্ঠিকেহি সামঞ্ঞফলেহি অভিক্কন্ততরঞ্চ পণীততরঞ্চ.
ৰিস্সজ্জনা – সো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি…পে… ইদম্পি খো মহারাজ সন্দিট্ঠিকং সামঞ্ঞফলং পুরিমেহি সন্দিট্ঠিকেহি সামঞ্ঞফলেহি অভিক্কন্ততরঞ্চ
পণীততরঞ্চ. এৰং খো ভন্তে ভগৰা রঞ্ঞো মাগধস্স অজাতসত্তুস্স ৰেদেহিপুত্তস্স পঠমং সন্দিট্ঠিকং সামঞ্ঞফলং পুরিমেহি সন্দিট্ঠিকেহি সামঞ্ঞফলেহি অভিক্কন্ততরঞ্চ পণীততরঞ্চ দেসেসি.
সাধু সাধু আৰুসো, সাধু খো আৰুসো যং ভিক্খু এৰং স্ৰাখাতে বুদ্ধসাসনসঙ্খাতে ধম্মৰিনযে পব্বজিত্ৰা এৰং পঠমং ঝানং
উপসম্পজ্জ ৰিৰেকজেন পীতিসুখেন অত্তনো কাযং অভিসন্দেয্য পরিসন্দেয্য পরিপূরেয্য.
পুচ্ছা – কথঞ্চাৰুসো ভগৰা দুতিযঞ্চ ততিযঞ্চ চতুত্থঞ্চ সন্দিট্ঠিকং সামঞ্ঞফলং দেসেসি, পুরিমেহি সন্দিট্ঠিকেহি সামঞ্ঞফলেহি অভিক্কন্ততরঞ্চ পণীততরঞ্চ.