নমো তস্স ভগৰতো অরহতো সম্মাসম্বুদ্ধস্স
সুত্তন্তপিটক
মজ্ঝিমনিকায
মূলপণ্ণাসপাল়ি
সংগাযনস্স পুচ্ছা ৰিস্সজ্জনা
পুচ্ছা – পঠমমহাসংগীতিকালে আৰুসো ধম্মসংগাহকা মহাকস্সপাদযো মহাথেরৰরা দীঘনিকাযং সংগাযিত্ৰা তদনন্তরং কিং নাম পাৰচনং সংগাযিংসু.
ৰিস্সজ্জনা – পঠমমহাসংগীতিকালে ভন্তে ধম্মসংগাহকা মহাকস্সপাদযো মহাথেরৰরা দীঘনিকাযং সংগাযিত্ৰা তদনন্তরং মজ্ঝিমং নাম নিকাযং সংগাযিংসু.
পুচ্ছা – মজ্ঝিমনিকাযো নাম আৰুসো মূলপণ্ণাসকো মজ্ঝিম পণ্ণাসকো উপরিপণ্ণাসকোতি পণ্ণাসকৰসেন তিৰিধো, তত্থ কতরং পণ্ণাসকং পঠমং সংগাযিংসু.
ৰিস্সজ্জনা – তীসু ভন্তে পণ্ণাসকেসু মূলপণ্ণাসকং নাম পাৰচনং ধম্মসংগাহকা মহাথেরৰরা পঠমং সংগাযিংসু.
পুচ্ছা – মূলপণ্ণাসকেপি আৰুসো পঞ্চৰগ্গা পণ্ণাস চ সুত্তানি, তেসু কতরং ৰগ্গং কতরঞ্চ সুত্তং পঠমং সংগাযিংসু.
ৰিস্সজ্জনা – মূলপণ্ণাসকে ভন্তে পঞ্চসু ৰগ্গেসু পঠমং মূলপরিযাযৰগ্গং পণ্ণাসকেসু চ সুত্তেসু পঠমং মূলপরিযাযসুত্তং সংগাযিংসু.
সাধু আৰুসো মযম্পি দানি ততোযেৰ পট্ঠায সংগীতিপুব্বঙ্গমানি পুচ্ছাৰিস্সজ্জনকিচ্চানি কাতুং সমারভাম.
মূলপরিযাযসুত্ত
পুচ্ছা – তেন আৰুসো ভগৰতা জানতা পস্সতা অরহতা সম্মাসম্বুদ্ধেন মূলপরিযাযসুত্তং কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – উক্কট্ঠাযং ভন্তে পঞ্চসতে ব্রাহ্মণকুলা পব্বজিতে আরব্ভ ভাসিতং, পঞ্চসতা ভন্তে ব্রাহ্মণকুলা পব্বজিতা ভিক্খূ পরিযত্তিং নিস্সায মানং উপ্পাদেসুং, তস্মিং ভন্তে ৰত্থুস্মিং ভাসিতং.
পুচ্ছা – তং পনাৰুসো সুত্তং ভগৰতা কতিহি ৰারেহি কতিহি চ অন্তোগধপদেহি ৰিভজিত্ৰা ভাসিতং.
ৰিস্সজ্জনা – তং পন ভন্তে মূলপরিযাযসুত্তং ভগৰতা অট্ঠহি চ ৰারেহি চতুৰীসতিযা চ অন্তোগধপদেহি ৰিভজিত্ৰা দেসিতং.
সব্বাসৰসুত্ত
পুচ্ছা – দুতিযং পনাৰুসো সব্বাসৰসুত্তং ভগৰতা কত্থ কং আরব্ভ ভাসিতং.
ৰিস্সজ্জনা – সব্বাসৰসুত্তং পন ভন্তে ভগৰতা সাৰত্থিযং সম্বহুলে ভিক্খূ আরব্ভ ভাসিতং.
পুচ্ছা – তত্থাৰুসো ভগৰতা আসৰা কতিহি পকারেহি ৰিভজিত্ৰা দস্সিতা.
ৰিস্সজ্জনা – সত্তহি ভন্তে পকারেহি ৰিভজিত্ৰা আসৰা ভগৰতা পকাসিতা.
ধম্মদাযাদসুত্ত
পুচ্ছা – ধম্মদাযাদসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং, ভগৰতো চ ভন্তে ভিক্খুসঙ্ঘস্স চ তদা মহালাভসক্কারো উদপাদি, তস্মিং ভন্তে ৰত্থুস্মিং ভাসিতং.
পুচ্ছা – তত্থাৰুসো দ্ৰে অনুসন্ধযো, তেসু পঠমে অনুসন্ধিম্হি কথং ভগৰতা ভিক্খূনং ওৰাদো দিন্নো.
ৰিস্সজ্জনা – পঠমে ভন্তে অনুসন্ধিম্হি ধম্মদাযাদা মে ভিক্খৰে ভৰথ মা আমিসদাযাদা, অত্থি মে তুম্হেসু অনুকম্পা, কিন্তি মে সাৰকা ধম্মদাযাদা ভৰেয্যুং নো আমিসদাযাদাতি এৰমাদিনা ভগৰতা ভিক্খূনং ওৰাদো দিন্নো.
ধম্মদাযাদা মে ভিক্খৰে ভৰথ মা আমিসদাযাদা, অত্থি মে তুম্হেসু অনুকম্পা কিন্তি মে সাৰকা ধম্মদাযাদা ভৰেয্যুং, নো আমিসদাযাদা.
পুচ্ছা – দুতিযে পনাৰুসো অনুসন্ধিম্হি আযস্মতা সারিপুত্তত্থেরেন ধম্মসেনাপতিনা কীদিসী ধম্মদেসনা ৰিভজিত্ৰা পকাসিতা.
ৰিস্সজ্জনা – দুতিযে পন ভন্তে অনুসন্ধিম্হি আযস্মতা সারিপুত্তত্থেরেন ধম্মসেনাপতিনা সত্থু পৰিৰিত্তস্স ৰিহরতো সাৰকানং ৰিৰেকং অননুসিক্খতং তীহি ঠানেহি গারযুতং, অনুসিক্খন্তানঞ্চ তীহি ঠানেহি পাসংসতং, সোল়স চ পাপকে ধম্মে তেসঞ্চ পহানায মজ্ঝিমা পটিপদা ৰিভজিত্ৰা পকাসিতা.
ভযভেরৰসুত্ত
পুচ্ছা – ভযভেরৰসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে জাণুস্সোণিং ব্রাহ্মণং আরব্ভ ভাসিতং, জাণুস্সোণি ভন্তে ব্রাহ্মণো ভগৰন্তং উপসঙ্কমিত্ৰা এতদৰোচ ‘‘যে মে ভো গোতম কুলপুত্তা ভৰন্তং গোতমং উদ্দিস্স সদ্ধা অগারস্মা অনগারিযং পব্বজিতা, ভৰং তেসং গোতমো পুব্বঙ্গমো, ভৰং
তেসং গোতমো বহুকারো, ভৰং তেসং গোতমো সমাদপেতা, ভোতো চ পন গোতমস্স সা জনতা দিট্ঠানুগতিং আপজ্জতী’’তি, তস্মিং ভন্তে ৰত্থুস্মিং ভাসিতং.
অনঙ্গণসুত্ত
পুচ্ছা – অনঙ্গণসুত্তং পনাৰুসো কত্থ কং আরব্ভ কেন ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ আযস্মতা সারিপুত্তত্থেরেন ধম্মসেনাপতিনা ভাসিতং.
আকঙ্খেয্যসুত্ত
পুচ্ছা – আকঙ্খেয্যসুত্তং পনাৰুসো ভগৰতা কত্থ কং আরব্ভ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং.
ৰত্থসুত্ত
পুচ্ছা – ৰত্থসুত্তং পনাৰুসো ভগৰতা কত্থ কং আরব্ভ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং.
সল্লেখসুত্ত
পুচ্ছা – সল্লেখসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে আযস্মন্তং মহাচুন্দং আরব্ভ ভাসিতং, আযস্মা মহাচুন্দো ভন্তে ভগৰন্তং উপসঙ্কমিত্ৰা এতদৰোচ ‘‘যা ইমা ভন্তে অনেকৰিহিতা দিট্ঠিযো লোকে উপ্পজ্জন্তি, অত্তৰাদপটিসংযুত্তা ৰা লোকৰাদপটিসংযুত্তা ৰা, আদিমেৰ নু খো ভন্তে ভিক্খুনো মনসিকরোতো এৰমেতাসং দিট্ঠীনং পহানং হোতি, এৰমেতাসং দিট্ঠীনং পটিনিস্সগ্গো হোতী’’তি, তস্মিং ভন্তে ৰত্থুস্মিং ভাসিতং.
পুচ্ছা – তত্থ চ আৰুসো কতি পরিযাযা কতি চ অন্তোগধপদানি ভগৰতা ৰিভজিত্ৰা পকাসিতানি.
ৰিস্সজ্জনা – তত্থ ভন্তে পঞ্চ পরিযাযা চতুচত্তালীস চ অন্তোগধপদানি ভগৰতা ৰিত্থারেন ভাসিতানি.
সম্মাট্ঠিসুত্ত
পুচ্ছা – সম্মাদিট্ঠিসুত্তং পনাৰুসো কত্থ কং আরব্ভ কেন ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ আযস্মতা সারিপুত্তত্থেরেন ধম্মসেনাপতিনা ভাসিতং.
পুচ্ছা – কস্স আৰুসো ৰচনং.
ৰিস্সজ্জনা – ভগৰতো ভন্তে ৰচনং অরহতো সম্মাসম্বুদ্ধস্স.
পুচ্ছা – কেনাৰুসো আভতং.
ৰিস্সজ্জনা – পরম্পরায ভন্তে আভতং.
মহাসতিপট্ঠানসুত্ত
পুচ্ছা – মহাসতিপট্ঠানসুত্তং পনাৰুসো যোগাৰচরানং বহুপকারত্তা দীঘনিকাযে চ ইধ চাতি দ্ৰীসু নিকাযেসু পোরাণকেহি সংগীতিকারেহি দ্ৰিক্খত্তুং সংগাযিত্ৰা ৰিত্থারেন পতিট্ঠাপিতং, তং অম্হেহি দীঘনিকাযে যথানুপ্পত্তৰসেন পুচ্ছিতঞ্চ ৰিস্সজ্জিতঞ্চ. তথাপি যোগাৰচরানং বহুপকারত্তাযেৰ তং ইদানিপি যথানুপ্পত্তৰসেন পুন পুচ্ছিস্সামি, তং পনেতং আৰুসো মহাসতিপট্ঠানসুত্তং ভগৰতা কত্থ কং আরব্ভ ভাসিতং.
ৰিস্সজ্জনা – কুরূসু ভন্তে কম্মাসধম্মে নাম কুরূনং নিগমে সম্বহুলে ভিক্খূ আরব্ভ ভাসিতং.
পুচ্ছা – কথঞ্চাৰুসো তত্থ আনাপানস্সতি কাযানুপস্সনা ভগৰতা ৰিভজিত্ৰা পকাসিতা.
ৰিস্সজ্জনা – ইধ ভিক্খৰে ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা সো সতোৰ অস্সসতি, সতোৰ পস্সসতি, দীঘং ৰা অস্সসন্তো ‘দীঘং অস্সসামী’তি পজানাতি, দীঘং ৰা পস্সসন্তো ‘দীঘং পস্সসামী’তি পজানাতি, এৰমাদিনা ভন্তে তত্থ আনাপানস্সতি কাযানুপস্সনা ভগৰতা ৰিভজিত্ৰা পকাসিতা.
পুচ্ছা – কথঞ্চাৰুসো তত্থ ইরিযাপথকাযানুপস্সনা ভগৰতা ৰিভজিত্ৰা পকাসিতা.
ৰিস্সজ্জনা – পুন চপরং ভিক্খৰে ভিক্খু গচ্ছন্তো ৰা গচ্ছামীতি পজানাতি, ঠিতো ৰা ঠিতোম্হীতি পজানাতি, নিসিন্নো ৰা নিসিন্নোম্হীতি পজানাতি, সযানো ৰা সযানোম্হীতি পজানাতি, এৰমাদিনা ভন্তে ভগৰতা ইরিযাপথকাযানুপস্সনা ভাৰনা ৰিভজিত্ৰা পকাসিতা.
পুচ্ছা – কথঞ্চাৰুসো তত্থ সম্পজঞ্ঞকাযানুপস্সনা ভগৰতা ৰিভজিত্ৰা পকাসিতা.
ৰিস্সজ্জনা – পুন চপরং ভিক্খৰে ভিক্খু অভিক্কন্তে পটিক্কন্তে সম্পজানকারী হোতি, আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারী হোতি, এৰমাদিনা ভন্তে ভগৰতা তত্থ সম্পজঞ্ঞকাযানুপস্সনা ৰিভজিত্ৰা পকাসিতা.
পুচ্ছা – কথঞ্চাৰুসো তত্থ পটিকূলমনসিকারকাযানুপস্সনা ভগৰতা ৰিভজিত্ৰা পকাসিতা.
ৰিস্সজ্জনা – পুন চপরং ভিক্খৰে ভিক্খু ইমমেৰ কাযং উদ্ধং পাদতলা অধো কেসমত্থকা তচপরিযন্তং পূরং নানপ্পকারস্স অসুচিনো পচ্চৰেক্খতি অত্থি ইমস্মিং কাযে কেসালোমা নখা দন্তা তচো এৰমাদিনা ভন্তে তত্থ ভগৰতা পটিকূলমনসিকারকাযানুপস্সনা ৰিভজিত্ৰা পকাসিতা.
পুচ্ছা – কথঞ্চাৰুসো তত্থ ধাতুমনসিকারকাযানুপস্সনা ভগৰতা ৰিভজিত্ৰা পকাসিতা.
ৰিস্সজ্জনা – পুন চপরং ভিক্খৰে ভিক্খু ইমমেৰ কাযং যথাঠিতং যথাপণিহিতং ধাতুসো পচ্চৰেক্খতি অত্থি ইমস্মিং কাযে পথৰীধাতু আপোধাতু তেজোধাতু ৰাযোধাতু এৰমাদিনা ভন্তে ভগৰতা ধাতুমনসিকারকাযানুপস্সনা ৰিভজিত্ৰা পকাসিতা.
পুচ্ছা – কথঞ্চাৰুসো তত্থ নৰ সিৰথিককাযানুপস্সনা ভগৰতা ৰিভজিত্ৰা পকাসিতা.
ৰিস্সজ্জনা – পুন চপরং ভিক্খৰে ভিক্খু সেয্যথাপি পস্সেয্য সরীরং সিৰথিকায ছড্ডিতং একাহমতং ৰা দ্ৰীহমতং ৰা তীহমতং ৰা উদ্ধুমাতকং ৰিনীলকং ৰিপুব্বকজাতং সো ইমমেৰ কাযং উপসংহরতি ‘‘অযম্পি খো কাযো এৰংধম্মো এৰংভাৰী এৰংঅনতীতো’’তি এৰমাদিনা ভন্তে তত্থ ভগৰতা নৰ সিৰথিককাযানুপস্সনা ভাৰনা ৰিভজিত্ৰা পকাসিতা.
পুচ্ছা – কথঞ্চাৰুসো তত্থ ৰেদনানুপস্সনা ভগৰতা ৰিভজিত্ৰা দেসিতা.
ৰিস্সজ্জনা – ইধ ভিক্খৰে ভিক্খু সুখং ৰা ৰেদনং ৰেদযমানো ‘‘সুখং ৰেদনং ৰেদযামী’’তি পজানাতি, দুক্খং ৰা ৰেদনং ৰেদযমানো ‘‘দুক্খ ৰেদনং ৰেদযামী’’তি পজানাতি, অদুক্খমসুখং ৰা ৰেদনং ৰেদযমানো ‘‘অদুক্খমসুখং ৰেদনং ৰেদযামী’’তি পজানাতি, এৰমাদিনা ভন্তে তত্থ ভগৰতা ৰেদনানুপস্সনা ৰিভজিত্ৰা পকাসিতা.
পুচ্ছা – কথঞ্চাৰুসো তত্থ চিত্তানুপস্সনা ভগৰতা ৰিভজিত্ৰা দেসিতা.
ৰিস্সজ্জনা – ইধ ভিক্খৰে ভিক্খু সরাগং ৰা চিত্তং ‘‘সরাগং চিত্ত’’ন্তি পজানাতি, ৰীতরাগং ৰা চিত্তং ‘‘ৰীতরাগং চিত্ত’’ন্তি পজানাতি, সদোসং ৰা ৰীতদোসং ৰা সমোহং ৰা ৰীতমোহং ৰা সংখিত্তং ৰা চিত্তং ‘‘সংখিত্তং চিত্ত’’ন্তি পজানাতি, ৰিক্খিত্তং ৰা চিত্তং ‘‘ৰিক্খিত্তং চিত্ত’’ন্তি পজানাতি, এৰমাদিনা তত্থ ভগৰতা চিত্তানুপস্সনা ৰিভজিত্ৰা পকাসিতা.
পুচ্ছা – কথঞ্চাৰুসো তত্থ ধম্মানুপস্সনা ভগৰতা ৰিভজিত্ৰা দেসিতা, তং সঙ্খেপমত্তেনেৰ ৰিস্সজ্জেহি.
ৰিস্সজ্জনা – ইধ ভিক্খৰে ভিক্খু ধম্মেসু ধম্মানুপস্সী ৰিহরতি, পঞ্চসু নীৰরণেসু এৰমাদিনা ভন্তে তত্থ ভগৰতা পঞ্চহি পব্বেহি ধম্মানুপস্সনা ৰিভজিত্ৰা পকাসিতা.
চূল়সীহনাদসুত্ত
পুচ্ছা – চূল়নসীহনাদসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে পরিহীনলাভসক্কারে নানাতিত্থিযে আরব্ভ ভাসিতং, নানাতিত্থিযা ভন্তে পরিহীনলাভসক্কারা তেসু তেসু ঠানেসু পরিদেৰিংসু, চতস্সো চ ভন্তে পরিসা ভগৰতো একমত্থং আরোচেসুং, তস্মিং ভন্তে ৰত্থুস্মিং ভাসিতং.
মহাসীহনাদসুত্ত
পুচ্ছা – তেনাৰুসো ভগৰতা জানতা পস্সতা অরহতা সম্মাসম্বুদ্ধেন মহাসীহনাদসুত্তং কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – ৰেসালিযং ভন্তে সুনক্খত্তং লিচ্ছৰিপুত্তং আরব্ভ ভাসিতং, সনুক্খত্তো ভন্তে লিচ্ছৰিপুত্তো অচিরপক্কন্তো হোতি ইমস্মা ধম্মৰিনযা, সো ৰেসালিযং পরিসতি এৰং ৰাচং ভাসতি ‘‘নত্থি সমণস্স গোতমস্স উত্তরিমনুস্সধম্মা অলমরিযঞাণদস্সনৰিসেসো, তক্কপরিযাহতং সমণো গোতমো ধম্মং দেসেতি ৰীমংসানুচরিতং সযং পটিভানং. যস্স চ খ্ৰাস্স অত্থায ধম্মো দেসিতো, সো নিয্যাতি তক্করস্স সম্মা দুক্খক্খযাযা’’তি, এতমত্থং ভন্তে আযস্মা সারিপুত্তো ভগৰতো আরোচেসি, তস্মিং ভন্তে ৰত্থুস্মিং ভাসিতং.
পুচ্ছা – কতি পনাৰুসো তত্থ ভগৰতা তথাগতস্স তথাগতবলানি ৰিভজিত্ৰা পকাসিতানি, যেহি বলেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.
ৰিস্সজ্জনা – দস ভন্তে তথাগতস্স তথাগতবলানি ভগৰতা ৰিভজিত্ৰা পকাসিতানি, যেহি বলেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.
পুচ্ছা – কথঞ্চাৰুসো তত্থ ভগৰতা চতুৰেরজ্জঞাণানি ৰিভজিত্ৰা পকাসিতানি, যেহি ৰেসারজ্জেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.
ৰিস্সজ্জনা – খীণাসৰস্স তে পটিজানতো ইমে আসৰা অপরিক্খীণাতি তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতীতি নিমিত্তমেতং সারিপুত্ত ন সমনুপস্সামি, এতমহং সারিপুত্ত নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি. এৰমাদিনা ভন্তে তত্থ চতুৰেসারজ্জঞাণানি ভগৰতা ৰিত্থারেন ৰিভজিত্ৰা পকাসিতানি.
পুচ্ছা – কথঞ্চাৰুসো তত্থ ভগৰতা পঞ্চগতিপরিচ্ছেদঞাণং ৰিভজিত্ৰা পকাসিতং.
ৰিস্সজ্জনা – পঞ্চ খো ইমা সারিপুত্ত গতিযো, কতমা পঞ্চ, নিরযো তিরচ্ছানযোনি পেত্তিৰিসযো মনুস্সা দেৰা, এৰমাদিনা ভন্তে ভগৰতা তত্থ পঞ্চগতিপরিচ্ছেদকঞাণং ৰিভজিত্ৰা পকাসিতং.
পুচ্ছা – কথঞ্চাৰুসো তত্থ তথাগতো অত্তনো পঞ্ঞাৰেয্যত্তিযা অপরিহানিং পকাসেসি.
ৰিস্সজ্জনা – সন্তি খো পন সারিপুত্ত একে সমণব্রাহ্মণা এৰংৰাদিনো এৰংদিট্ঠিনো যাৰদেৰাযং ভৰং পুরিসো দহরো হোতি, এৰমাদিনা ভন্তে তত্থ তথাগতো অত্তনো পঞ্ঞাৰেয্যত্তিযা অপরিহানিং পকাসেসি.
মহাদুক্খক্খন্ধসুত্ত
পুচ্ছা – মহাদুক্খক্খন্ধসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে অঞ্ঞতিত্থিযে আরব্ভ ভাসিতং, সম্বহুলা ভন্তে অঞ্ঞতিত্থিযা ভিক্খূ এতদৰোচুং ‘‘সমণো আৰুসো গোতমো কামানং পরিঞ্ঞং পঞ্ঞপেতি, মযম্পি কামানং পরিঞ্ঞং পঞ্ঞপেম, সমণো আৰুসো গোতমো রূপানং ৰেদনানং পরিঞ্ঞং পঞ্ঞপেতি, মযম্পি রূপানং ৰেদনানং পরিঞ্ঞং পঞ্ঞপেম, ইধ নো আৰুসো কো ৰিসেসো, কো অধিপ্পযাসো, কিং নানাকরণং সমণস্স ৰা গোতমস্স অম্হাকং ৰা যদিদং ধম্মদেসনায ৰা ধম্মদেসনং অনুসাসনিযা ৰা অনুসাসনি’’ন্তি, এতমত্থং ভিক্খূ ভগৰতো আরোচেসুং, তস্মিং ভন্তে ৰত্থুস্মিং ভাসিতং.
চূল়দুক্খক্খন্ধসুত্ত
পুচ্ছা – চূল়দুক্খক্খন্ধসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সক্কেসু ভন্তে কপিলৰত্থুস্মিং মহানামং সক্কং আরব্ভ ভাসিতং, মহানামো ভন্তে সক্কো ভগৰন্তং উপসঙ্কমিত্ৰা এতদৰোচ ‘‘দীঘরত্তাহং ভন্তে ভগৰতা এৰং ধম্মং দেসিতং আজানামি ‘লোভো চিত্তস্স উপক্কিলেসো, দোসো চিত্তস্স উপক্কিলেসো, মোহো চিত্তস্স উপক্কিলেসো’তি, এৰঞ্চাহং ভন্তে ভগৰতা ধম্মং দেসিতং আজানামি ‘লোভো চিত্তস্স উপক্কিলেসো, দোসো চিত্তস্স উপক্কিলেসো, মোহো চিত্তস্স উপক্কিলেসো’তি. অথ চ পন মে একদা লোভধম্মাপি চিত্তং পরিযাদায তিট্ঠন্তি, দোসধম্মাপি চিত্তং পরিযাদায তিট্ঠন্তি, মোহধম্মাপি চিত্তং পরিযাদায তিট্ঠন্তি, তস্স ময্হং ভন্তে এৰং হোতি ‘কো সু নাম মে ধম্মো অজ্ঝত্তং অপ্পহিনো, যেন মে একদা লোভধম্মাপি চিত্তং পরিযাদায তিট্ঠন্তি, দোসধম্মাপি চিত্তং পরিযাদায তিট্ঠন্তি, মোহধম্মাপি চিত্তং পরিযাদায তিট্ঠন্তী’তি’’, তস্মিং ভন্তে ৰত্থুস্মিং ভাসিতং.
অনুমানসুত্ত
পুচ্ছা – অনুমানসুত্তং পনাৰুসো কত্থ কং আরব্ভ কেন ভাসিতং.
ৰিস্সজ্জনা – ভগ্গেসু ভন্তে সুসুমারগিরে ভেসকল়াৰনে আযস্মতা মহামোগ্গল্লানত্থেরেন সম্বহুলে ভিক্খূ আরব্ভ ভাসিতং.
চেতোখিলসুত্ত
পুচ্ছা – চেতোখিলসুত্তং পনাৰুসো ভগৰতা কত্থ কং আরব্ভ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং.
ৰনপত্থসুত্ত
পুচ্ছা – ৰনপত্থসুত্তং পনাৰুসো ভগৰতা কত্থ কং আরব্ভ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং.
মধুপিণ্ডিকসুত্ত
পুচ্ছা – মধুপিণ্ডিকসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সক্কেসু ভন্তে দণ্ডপাণিং সক্কং আরব্ভ ভাসিতং, দণ্ডপাণি ভন্তে সক্কো ভগৰন্তং উপসঙ্কমিত্ৰা এতদৰোচ ‘‘কিং ৰাদী সমণো কিমক্খাযী’’তি, তস্মিং ভন্তে ৰত্থুস্মিং ভাসিতং.
দ্ৰেধাৰিতক্কসুত্ত
পুচ্ছা – দ্ৰেধাৰিতক্কসুত্তং পনাৰুসো ভগৰতা কত্থ কং আরব্ভ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং.
ৰিতক্কসণ্ঠানসুত্ত
পুচ্ছা – ৰিতক্কসণ্ঠানসুত্তং পনাৰুসো ভগৰতা কত্থ কং আরব্ভ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং.
ককচূপমসুত্ত
পুচ্ছা – তেনাৰুসো ভগৰতা…পে… সম্মাসম্বুদ্ধেন ককচূপমসুত্তং কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে আযস্মন্তং মোল়িযফগ্গুনং আরব্ভ ভাসিতং, আযস্মা ভন্তে মোল়িযফগ্গুনো ভিক্খুনীহি সদ্ধিং অতিৰেলং সংসট্ঠো ৰিহরতি, তস্মিং ভন্তে ৰত্থুস্মিং ভাসিতং.
পুচ্ছা – অথ খো আৰুসো আযস্মতো মোল়িযফগ্গুনস্স তং ভগৰতো ওৰাদং সুত্ৰা কথং চিত্তং উপ্পন্নং, কথঞ্জ ভগৰা উত্তরি ভিক্খূন ওৰাদমদাসি.
ৰিস্সজ্জনা – অথ খো ভন্তে মোল়িযফগ্গুনস্স ভগৰতো ইমং ওৰাদং সুত্ৰা ভিক্খুনিসংসগ্গতো ওরমিস্সামি ৰিরমিস্সামীতিপি চিত্তং ন উপ্পন্নং, অসংৰরমেৰ ভন্তে চিত্তং উপ্পন্নং, ভগৰা চ ভন্তে আরাধযিংসু ৰত মে ভিক্খৰে ভিক্খূ একং সমযং চিত্তং, এৰমাদিনা উত্তরি ভিক্খূনং ওৰাদমদাসি.
উভতো দণ্ডকেন চেপি ভিক্খৰে ককচেন চোরা ওচরকা অঙ্গমঙ্গানি ওকন্তেয্যুং.
অলগদ্দূপমসুত্ত
পুচ্ছা – অলগদ্দূপমসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে অরিট্ঠং ভিক্খুং গদ্ধবাধিপুব্বং আরব্ভ ভাসিতং, অরিট্ঠস্স ভন্তে ভিক্খুনো গদ্ধবাধিপুব্বস্স এৰরূপং পাপকং দিট্ঠিগতং উপ্পন্নং ‘‘তথাহং ভগৰতা ধম্মং দেসিতং আজাদামি, যথা যেমে অন্তরাযিকা ধম্মা ৰুত্তা ভগৰতা, তে পটিসেৰতো নালং অন্তরাযাযা’’তি, তস্মিং ভন্তে ৰত্থুস্মিং ভাসিতং.
পুচ্ছা – অথ খো আৰুসো আযস্মতো অরিট্ঠস্স গদ্ধবাধিপুব্বস্স কথং চেতসো পরিৰিতক্কো উদপাদি, কথঞ্চ ভগৰা উত্তরি ভিক্খুনং ধম্মদেসনং পৰত্তেসি.
ৰিস্সজ্জনা – অথ খো ভন্তে অরিট্ঠস্স ভিক্খুনো গদ্ধবাধিপুব্বস্স ‘‘কিঞ্চাপি মং ভগৰা মোঘপুরিসৰাদেন ৰদেসি, ন খো পন মে মগ্গফলানং উপনিস্সযো ন হোতি, স্ৰাহং আরভিত্ৰা ঘট্টেত্ৰা মগ্গফলানি নিব্বত্তেস্সামী’’তি, এৰং খো ভন্তে চেতসো পরিৰিতক্কো উদপাদি, ভগৰা চ ভন্তে দুপ্পঞ্ঞস্স অলগদ্দূপমং দস্সেত্ৰা অলগদ্দূপমং পরিযত্তিঞ্চ দস্সেত্ৰা পঞ্ঞৰতো অলগদ্দূপমায চ কুল্লূপমায চ পঞ্ঞৰতো নিস্সরণপরিযত্তিং দস্সেত্ৰা ছ চ দিট্ঠিট্ঠানানি, তেসঞ্চ ছন্নং দিট্ঠিট্ঠানানং ৰিনিৰেঠনাকারং দস্সেত্ৰা পরিযোসানে চ খন্ধকম্মট্ঠানং অরহত্তনিকূটেন দস্সেত্ৰা উত্তরি ভিক্খূনং ধম্মকথং পৰত্তেসি.
ৰম্মিকসুত্ত
পুচ্ছা – ধম্মিকসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে আযস্মন্তং কুমারকস্সপং আরব্ভ ভাসিতং. আযস্মা ভন্তে কুমারকস্সপো ভগৰন্তং উপসঙ্কমিত্ৰা ৰম্মিকপঞ্হং পুচ্ছি, তস্মিং ভন্তে ৰত্থুস্মিং ভাসিতং.
রথৰিনীতসুত্ত
পুচ্ছা – রথৰিনীতসুত্তং পনাৰুসো কত্থ কেন ভাসিতং.
ৰিস্সজ্জনা – সাৰত্থিযং ভন্তে আযস্মতা চ সারিপুত্তত্থেরেন ধম্মসেনাপতিনা আযস্মতা চ পুণ্ণেন মন্তাণিপুত্তেন অঞ্ঞমঞ্ঞং পুচ্ছাৰিস্সজ্জনৰসেন ভাসিতং.
নিৰাপসুত্ত
পুচ্ছা – নিৰাপসুত্তং পনাৰুসো ভগৰতা কত্থ কং আরব্ভ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং.
পুচ্ছা – ইমস্মিং আৰুসো সুত্তে কো নিৰাপো কো নেৰাপিকো কা নেৰাপিকপরিসা কা মিগজাতা কথঞ্চেতিস্সা উপমায অত্থো দট্ঠব্বো.
ৰিস্সজ্জনা – ইমস্মিং ভন্তে সুত্তে নিৰাপোতি খো ভন্তে পঞ্চন্নেতং কামগুণানং অধিৰচনং, নেৰাপিকোতি খো ভন্তে মারস্সেতং পাপিমতো অধিৰচনং, নেৰাপিকপরিসাতি খো ভন্তে মারপরিসাযেতং অধিৰচনং, মিগজাতাতি খো ভন্তে সমণব্রাহ্মণানমেতং অধিৰচনং, ইমস্মিং ভন্তে সুত্তে এতস্স অত্থো এৰং দট্ঠব্বো.
পাসরাসিসুত্ত
পুচ্ছা – কেনাৰুসো ভগৰতা…পে… সম্মাসম্বুদ্ধেন পাসরাসিসুত্তং কত্থ কং আরব্ভ কিস্মিং ৰত্থুস্মিং ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ভাসিতং, সম্বহুলা ভন্তে ভিক্খূ রম্মকস্স ব্রাহ্মণস্স অস্সমে ভগৰন্তং আরব্ভ ধম্মিযা কথায সন্নিসীদিংসু, তস্মিং ভন্তে ৰত্থুস্মিং ভাসিতং.
পুচ্ছা – অথ খো আৰুসো তেসং সম্বহুলানং ভিক্খূনং ধম্মিযা কথায সন্নিসিন্নানং কীদিসং ধম্মকথং কথেসি.
ৰিস্সজ্জনা – সাধু ভিক্খৰে এতং খো ভিক্খৰে তুম্হাকং পতিরূপং কুলপুত্তানং সদ্ধা অগারস্মা অনগারিযং পব্বজিতানং, যং তুম্হে ধম্মিযা কথায সন্নিসীদেয্যাথ, সন্নিপতিতানং ৰো ভিক্খৰে দ্ৰযং করণীযং ধম্মী ৰা কথা অরিযো ৰা তুণ্হীভাৰো. দ্ৰেমা ভিক্খৰে পরিযেসনা অরিযা চ পরিযেসনা অনরিযা চ পরিযেসনা. এৰমাদিনা ভন্তে ভগৰা সন্নিপতিতানং তেসং ভিক্খূনং অরিযপরিযেসনঞ্চ অনরিযপরিযেসনঞ্চ ৰিভজিত্ৰা দেসেসি.
পুচ্ছা – কথঞ্চাৰুসো ভগৰা অত্তনাপি অনরিযপরিযেসনং পহায অরিযপরিযেসনায পরিযেসিতভাৰং পকাসেসি.
ৰিস্সজ্জনা – অহম্পি সুদং ভিক্খৰে পুব্বেৰ সম্বোধা অনভিসম্বুদ্ধো বোধিসত্তোৰ সমানো অত্তনা জাতিধম্মো সমানো জাতিধম্মংযেৰ পরিযেসামি, অত্তনা জরাধম্মো ব্যাধিধম্মো মরণধম্মো সোকধম্মো সংকিলেসধম্মো সমানো সংকিলেসধম্মংযেৰ পরিযেসামি. এৰমাদিনা ভন্তে ভগৰা অত্তনাপি অনরিযপরিযেসনং পহায অরিযপরিযেসনায পরিযেসিতভাৰং পকাসেসি.
পুচ্ছা – এৰং পঠমাভিসম্বুদ্ধস্স আৰুসো ভগৰতো অজপালনিগ্রোধরুক্খমূলে নিসিন্নস্স ধম্মদেসনায কতসন্নিট্ঠানস্স কীদিসো
চেতসো পরিৰিতক্কো উদপাদি, কথঞ্চ ধম্মদেসনায চারিকা অহোসি, কথঞ্চ পঠমা ধম্মদেসনা অহোসি.
ৰিস্সজ্জনা – ‘‘কস্স নু খো অহং পঠমং ধম্মং দেসেয্যং, কো ইমং ধম্মং খিপ্পমেৰ আজানিস্সতী’’তি এৰং খো ভন্তে ভগৰতো পঠমাভিসম্বুদ্ধস্স অজপালনিগ্রোধমূলে ধম্মদেসনায কতসন্নিট্ঠানস্স পরিৰিতক্কো উদপাদি, অথ ভন্তে ভগৰা উরুৰেলাযং যথাভিরন্তং ৰিহরিত্ৰা যেন বারাণসী, তেন পদসাযেৰ চারিকং পক্কামি ধম্মদেসনায, দ্ৰেমে ভিক্খৰে অন্তা পব্বজিতেন ন সেৰিতব্বা, কতমে দ্ৰে, যো চাযং কামেসু কামসুখল্লিকানুযোগো হীনো গাম্মো পোথুজ্জনিকো অনরিযো অনত্তসংহিতো, এৰমাদিনা ভন্তে ভগৰতো পঠমা ধম্মদেসনা অহোসি.
সব্বাভিভূ সব্বৰিদূহমস্মি,
সব্বধম্মেসু অনূপলিত্তো;
সব্বঞ্জহো তণ্হাক্খযে ৰিমুত্তো,
সযং অভিঞ্ঞায কমুদ্দিসেয্যং.