৬৩. পুব্বে+ককত্তুকানং

একো কত্তা যেসং ব্যাপারানং, তেসু যো পুব্বো, তদত্থতো ক্রিযত্থা তুনাদযো হোন্তি ভাৰে. ‘‘তুংতুনা’’ দিনা করস্স আ, সো কাতুন কম্মং গচ্ছতি, অকাতুন পুঞ্ঞং কিলিস্সন্তি. রলোপে কম্মং কত্ৰান ভদ্রকং, পুঞ্ঞানি কত্ৰা সগ্গং গচ্ছতি. অভিসঙ্খরণং কত্ৰা অভিসঙ্খরিত্ৰা করিত্ৰা ৰা. তথা সিব্বিত্ৰা ছাদযিত্ৰা জানিত্ৰা ধম্মং সুত্ৰা সুত্ৰান ধম্মং মোদতি, সুণিত্ৰা, পত্ৰা পাপুণিত্ৰা, কিনিত্ৰা, জেত্ৰা জিনিত্ৰা জিত্ৰা, চোরেত্ৰা চোরযিত্ৰা, পূজেত্ৰা পূজযিত্ৰা, তথা মেত্তং ভাৰেত্ৰা ভাৰযিত্ৰা, ৰিহারং কারেত্ৰা কারযিত্ৰা কারাপেত্ৰা কারাপযিত্ৰা সগ্গং গমিস্সন্তি+চ্চাদি. পুব্বেতি কিং, ভুঞ্জতি চ পচতি চ. ‘‘অপত্ৰা নদিং পব্বতো, অতিক্কম্ম পব্বতং নদী’’তিআদীসু ভূধাতুস্স সম্ভৰা এককত্তুকতা পুব্বকালতা চ গম্যতে. ‘‘ভুত্ৰা ভুত্ৰা গচ্ছতী’’তি ইমিনাৰ সিদ্ধং, আভিক্খঞ্ঞন্তু দ্ৰিব্বচনাৰ গম্যতে. কথং ‘‘জীৰগ্গাহং অগাহযি, কাযপ্পচালকং গচ্ছতী’’তি, ঘণন্তেন ক্রিযাৰিসেসনেন সিদ্ধং, যথা ওদনপাকং সযতীতি.