৫৮. ঠা+স ৰস সিলিস সী রুহ জর জনীহি

ঠাদীহি কত্তরি ক্তো হোতি যথাপত্তঞ্চ. উপট্ঠাসীতি উপট্ঠীতো ভৰং গুরুং. উপট্ঠীযিত্থাতি উপট্ঠিতো গুরু ভোতা, ‘‘ঠাস্সী’’তি ঠাস্স ই. এৰং উপাসীতি উপাসিতো. উপাসীযিত্থাতি উপাসিতো. ‘‘ঞি ব্যঞ্জনস্সা’’তি ঞি. অনুৰুসি অনুৰুসীযিত্থাতি ৰা অনুৰুসীতো. ‘‘অস্সূ’’তি অস্স উকারো. আপুব্বো সিলিস=আলিঙ্গনে, আসিলেসি আসিলেসীযিত্থাতি ৰা আসিলিট্ঠো. ‘‘সানন্তরস্স তস্স ঠো’’তি ঠে পররূপং পঠমক্খরঞ্চ. অধিসযি অধিসীযিত্থাতি ৰা অধিসযিতো খটোপিকং ভৰং, অধিসযিতা খটোপিকা ভোতা. এৰং আরুহি আরুহীযিত্থাতি ৰা আরুল়্হো রুক্খং ভৰং, আরুল়্হো রুক্খো ভোতা, ‘‘রুহাদীহি হো ল় চা’’তি তস্স হকারো পুব্বহকারস্স চ ল়ো. অনুজীরি অনুজীরীযিত্থাতি ৰা অনুজিণ্ণো ৰসলিং ভৰং, অনুজিণ্ণা ৰসলী ভোতা, ‘‘তরাদীহি রিণ্ণো’’তি ক্তস্স রিণ্ণাদেসো ‘‘রানুবন্ধে’’ত্যাদিনা অরভাগস্স লোপো চ. অন্ৰজাযি অন্ৰজাযিত্থাতি ৰা অনুজাতো মাণৰকো মাণৰিকং, অনুজাতা মাণৰিকা মাণৰকেন, ‘‘জনিস্সা’’তি নস্স আ.