৪৯. ইত্থিয+ম+ণ+ক্তি+ক+যক+যা চ

ইত্থিলিঙ্গে ভাৰে কারকে চ ক্রিযত্থা অআদযো হোন্তি অনো চ বহুলং.

অ-জর=ৰযোহানিযং, জিরতি জিরণং ৰা জরা. ‘‘ইত্থিয+ম+ত্ৰা’’তি আপচ্চযো. পটিসম্ভিজ্জতীতি পটিসম্ভিদা. পটিপজ্জতি এতাযাতি পটিপদা. এৰং সম্পদা, আপদা. উপাদীযতীতি উপাদা. ইক্খ+চক্খ=দস্সনে, উপইক্খতীতি উপেক্খা. ‘‘যুৰণ্ণান+মেও লুত্তা’’তি একারো. চিন্তনং চিন্তা. সিক্খ=ৰিজ্জোপাদানে, সিক্খনং সিক্খীযন্তীতি ৰা সিক্খা. এৰং ভিক্খা. ইচ্ছনং ইচ্ছা. ‘‘গমযমি’’চ্চাদিনা চ্ছঙাদেসো. পুচ্ছ=পুচ্ছনে, পুচ্ছনং পুচ্ছা. মিধ+মেধ=সঙ্গমে, অপঠিতধাতু, মেধনং মেধা. এৰং গুধ=পরিৰেঠনে, গোধনং গোধা. তিতিক্খনং তিতিক্খা. এৰং ৰীমংসা, জিগুচ্ছা, পিপাসা, পুত্তিযা. ঈহনং ঈহা.

ণ-করণং কারা, ‘‘অস্সা ণানুবন্ধে’’তি আ হোতি, এৰ+মুপরিপি. হরণং হারা মুত্তাৰলি. তরণং তারা, ধরণং ধারা. অরণং আরা.

যথাকথঞ্চি সদ্দম্হি, রুল়্হিযা অত্থনিচ্ছযো.

ক্তি-সম্ভুৰনং সম্ভুতি. ‘‘ন তে’’চ্চাদিনা ন ৰুদ্ধি. সৰনং সুতি. নযনং নযতি এতাযাতি ৰা নীতি. মঞ্ঞতীতি মতি, ‘‘গমাদিরানং লোপোন্তব্যঞ্জনস্সা’’তি গমাদিত্তা নলোপো. গমনং গন্তব্বাতি ৰা গতি. উপহননং উপহতি. রমন্তি এতায রমনং ৰা রতি. তননং ততি. নিযমনং নিযতি. ভুঞ্জনং ভুত্তি. যুঞ্জনং যুত্তি, পররূপং. এৰং সমাপজ্জনং সমাপজ্জতেতি সমাপত্তি. সম্পত্তি. যজ=দেৰপূজাসঙ্গতিকরণদানেসু, যজনং ইট্ঠি, ‘‘যজস্স যস্স টিযী’’তি টিআদেসো, ‘‘পুচ্ছাদিতো’’তি তস্স ঠো, পররূপপঠমক্খরা চ. সাসনং সিট্ঠি, ‘‘সাসস্স সিস ৰা’’তি সিস, সানন্তরস্স তস্স ঠো’’তি ঠাদেসো. ভেদনং ভিজ্জতেতি ৰা ভিত্তি. ভজ=সেৰাযং, ভজনং ভত্তি. তন=ৰিত্থারে, তনোতীতি তন্তি, নস্স নিগ্গহীতাদি.

ক-গুহন্তী এত্থাতি গুহা, ওকারনিৰুত্তি. রুজতীতি রুজা. মোদন্তি এতাযাতি মুদা নাম মুদিতা.

যক-ৰিদ=ঞাণে, ৰিদনং ৰিদন্তি এতাযাতি ৰা ৰিজ্জা, দস্স জে পুব্বরূপং. যজনং ইজ্জা, টিআদেসো.

য-সযন্তি এত্থাতি সেয্যা, দ্ৰিত্তং. অজ=ৰজ=গমনে, সমজনং সমজন্তি এত্থাতি ৰা সমজ্জা. পপুব্বো, পব্বজনং পব্বজ্জা. তৰগ্গৰরণা’’দিম্হি ‘‘চৰগ্গবযঞা’’তি যোগৰিভাগেন ৰস্স বে দ্ৰিত্তং. ঊম্হি পরিচরণং পরিচরিযা. জাগরণং জাগরিযা.

অন-পযোজকে কারিযধাতুতো কত্তুং পযোজনং কারণং, একারনিসেধো নস্স ণো চ. এৰং হরিতুং পযোজনং হারণং. ৰিদ=অনুভৰে, ৰিত্তি ৰেদযতীতি ৰা ৰেদনা. ৰন্দ=অভিৰাদনথুতীসু, ৰন্দনং ৰন্দনা. উপাসনং উপাসনা. চিত=সংচেতনাযং, চেতযতীতি চেতনা. দেসিযতীতি দেসনা. ভাৰিযতীতি ভাৰনা.