১৫৯. ক্ৰিস্স

ক্রিযত্থা পরস্স ক্ৰিস্স লোপো হোতি. সম্ভৰতীতি সম্ভূ. এৰং ৰিভৰতীতি ৰিভূ, অভিভূ, সযম্ভূ. তথা ধু=কম্পনে, সন্ধুনাতীতি সন্ধু. ৰিভাতীতি ৰিভা. পভাতীতি পভা. সংগম্ম ভাসন্তি এত্থাতি সভা, ‘‘ক্ৰিম্হি লোপো+ন্তব্যঞ্জনস্সা’’তি অন্তব্যঞ্জনস্স লোপো. ভুজেন গচ্ছতীতি ভুজগো. এৰং উরগো. তুরং=সীঘং গচ্ছতীতি তুরঙ্গো. খেন গচ্ছতীতি খগো. ৰিহাযসে গচ্ছতীতি ৰিহগো, তদমিনাদিপাঠা ৰিহাদেসো. ন গচ্ছতীতি নগো. এৰং অগো, ‘‘নগো ৰা+প্পাণিনী’’তি ৰিকপ্পেন নঞসমাসে টাদেসনিসেধো. জন=জননে, কম্মতো জাতোতি কম্মজো, অমাদিসমাসো, কম্মজো ৰিপাকো, কম্মজা পটিসন্ধি, কম্মজং রূপং. এৰং চিত্তজং, উতুজং, আহারজং. অত্তজো পুত্তো, ৰারিম্হি জাতো ৰারিজো. এৰং থলজো. পঙ্কজং. জলজং. অণ্ডজং. সরসিজং, উপপদসমাসে বহুলংৰিধানা ৰিভত্যলোপে ‘‘মনাদীহী’’তিআদিনা সিআদেসো. দ্ৰিক্খত্তুং জাতো দ্ৰিজো, ‘‘তদমিনা’’ দিনা ক্খত্তুংলোপো. পচ্ছা জাতো অনুজো. সঞ্জানাতীতি সঞ্ঞা. পজানাতীতি পঞ্ঞা. এৰং পতিট্ঠাতীতি পতিট্ঠা. ঝা=চিন্তাযং, পরসম্পত্তিং অভিজ্ঝাযতীতি অভিজ্ঝা. হিতেসিতং উপট্ঠাপেত্ৰা ঝাযতীতি উপজ্ঝা. সো এৰ উপজ্ঝাযো, ‘‘সকত্থে’’তি যো. সম্মা ঝাযন্তি এত্থাতি সংঝা. ক্ৰিদন্তা ধাত্ৰত্থং ন জহন্তি, লিঙ্গত্থং পটিপাদযন্তি.