৪৪. ভাৰকারকে স্ৰ+ঘণ ঘ কা

ভাৰে কারকে চ ক্রিযত্থা অ ঘণ ঘ কা হোন্তি বহুলং.

অপচ্চযো-পগ্গণ্হনং পগ্গহো, এৰং নিগ্গহো, ধম্মং ধারেতীতি ধম্মধরো, এৰং ৰিনযধরো. তথা তং করোতীতি তক্করো, দ্ৰিত্তং. এৰং হিতকরো, দিৰসকরো, দিনকরো, দিৰাকরো, নিসাকরো, ধনুং গণ্হীতি ধনুগ্গহো. এৰং কৰচগ্গহো. দদ=দানে, সব্বকামং দদাতীতি সব্বকামদদো, সব্বদদো. আতো ‘‘পরোক্খাযঞ্চা’’তি চগ্গহণেন দ্ৰিত্তে ‘‘রস্সো পুব্বস্সা’’তি রস্সে চ অন্নং দদাতীতি অন্নদদো, এৰং ধনদো. সংপুব্বো ধা=ধারণে, সব্বং সন্ধহতীতি সব্বসন্ধো. নী=পাপনে, ৰিপুব্বো, ৰিনেসি ৰিনেতি ৰিনেস্সতি এতেন এত্থাতি ৰা ৰিনযো, এ+অযাদেসা. নযনং নযো. সি=সেৰাযং, নিপুব্বো, নিস্সীযতীতি নিস্সযো. সি=সযে, অনুসযি অনুসেতি অনুসেস্সতীতি অনুসযো. ই=গতিম্হি, পতিপুব্বো, পটিচ্চ এতস্মা ফল+মেতীতি পচ্চযো. সং+উপুব্বো, দাগমে সমুদযো. চি=চযে, ৰিনিচ্ছযতে+নেন ৰিনিচ্ছযনং ৰা ৰিনিচ্ছযো, ‘‘নিতো চিস্স ছো’’তি চিস্স ছো. উচ্চযনং উচ্চযো, সংচযো. খি=খযে, খযনং খযো. জি=জযে, ৰিজযনং ৰিজযো, জযো. কী=দব্বৰিনীমযে, ৰিক্কযনং ৰিক্কযো, কযো. লী=সিলেসনে, অল্লীযন্তি এত্থাতি আলযো, লযো. (ইৰণ্ণন্তা).

আসুণন্তীতি অস্সৰা, আস্স রস্সো. পটিস্সৰনং পটিস্সৰো. সু=পস্সৰনে, আভৰগ্গা সৰন্তীতি আসৰা. রু=সদ্দো রৰতীতি রৰো. ভৰতীতি ভৰো. পভৰতি এতস্মাতি পভৰো. লূ=ছেদনে, লৰনং লৰো. (উৰণ্ণন্তা).

চর=চরণে, সংচরণং সংচরো. দর=ৰিদারণে, আদরনং আদরো. আগচ্ছতি আগমনংতি ৰা আগমো. সপ্প=গমনে, সপ্পতীতি সপ্পো. দিব্বতীতি দেৰো. পক্কমনং পক্কমতীতি ৰা পক্কমো, এৰং ৰিক্কমো. চর=চরণে, ৰনং চরতীতি ৰনচরো. কামো অৰচরতি এত্থাতি কামাৰচরো লোকো, কামাৰচরা পঞ্ঞা, কামাৰচরং চিত্তং. গাৰো চরন্তি এত্থাতি গোচরো. পাদেন পিৰতীতি পাদপো. এৰং কচ্ছপো. সিরস্মিং রুহতীতি সিরোরুহো, মনাদিত্তা ও. গুহাযং সযতীতি গুহাসযং চিত্তং, এৰং কুচ্ছিসযা ৰাতা. পব্বতে তিট্ঠতীতি পব্বতট্ঠো পুরিসো, পব্বতট্ঠা নদী, পব্বতট্ঠং ভস্মং. এৰং থলট্ঠং জলট্ঠং.

কিচ্ছত্থে দুম্হি অকিচ্ছত্থে সু+ঈসং+সুখ উপপদেসু-দুক্খেন করীযতি করণং ৰা দুক্করং. এৰং দুস্সযো, দুক্খেন ভরীযতীতি দুব্ভরো মহিচ্ছো. এৰং দুরক্খং চিত্তং, দুদ্দসো ধম্মো, দুরনুবোধো ধম্মো. ঈসং সযতীতি ঈসংসযো, এৰং সুখসযো. ঈসং করীযতীতি ঈসক্করং কম্মং. সুখেন করীযতীতি সুকরং পাপং বালেন. এৰং সুভরো অপ্পিচ্ছো, সুদস্সং পরৰজ্জং, সুবোধ+মিচ্চাদি. সব্বত্থ পাদিঅমাদিসমাসা.

ঘণ-ভৰতীতি ভাৰো, ও+আৰাদেসা. অয=ইতি দণ্ডকধাতু, অযতি ইতোতি আযো, আহরতীতি আহারো. উপহনতীতি উপঘাতো, ‘‘হনস্স ঘাতো ণানুবন্ধে’’তি ঘাতাদেসো. রঞ্জতীতি রাগো, ‘‘কগা চজানং ঘানুবন্ধে’’তি জস্স গো. রঞ্জন্তি অনেনাতি রাগো. ‘‘অস্সা ণানুবন্ধে’’তি আ, পজ্জতে+নেনাতি পাদো. তুদ=ব্যথনে, পতুজ্জতে+নেনাতি পতোদো. জরীযতি অনেনাতি জারো, এৰং দারো. ভজীযতীতি ভাগো. এৰং ভারো. লব্ভতীতি লাভো. ৰি+ওপুব্বো, ৰোহরীযতীতি ৰোহারো. দিয্যতীতি দাযো, যুক. ৰিহঞ্ঞতি এতস্মাতি ৰিঘাতো. ৰিহরন্তি এত্থাতি ৰিহারো. আরমন্তি এতস্মিন্তি আরামো. পচনং ৰা পাকো, চস্স কো. চজনং চাগো. যজনং যাগো. রজনং রাগো.