৫,১১৩. যজস্স যস্স টি+যীতি

যজস্স যস্স টি+যী হোন্তি কানুবন্ধেতি বহুলাধিকারা ত্যাদিৰিসযেপি ক্যে পুব্বরূপে চ ইজ্জতি যিজ্জতি মযা বুদ্ধো. সো যজিস্সতি, তেন ইজ্জিস্সতে যিজ্জিস্সতে. সো যজী, তেন ইজ্জি যিজ্জি. সো যজিস্সা, তেন ইজ্জিস্সা যিজ্জিস্সা. সো যজেয্য, তেন ইজ্জেয্য যিজ্জেয্য. সো যজতু, তেন ইজ্জতু যিজ্জতু ইচ্চাদি.

ৰদ=ৰচনে, ‘‘গমৰদা’’ দিনা ৰদস্স ৰজ্জাদেসো ৰা, লস্স ‘‘ঊলস্সে’’তি ক্ৰচি এ চ, ৰজ্জতি ৰদেতি ৰদতি, ৰজ্জেন্তি ৰদেন্তি ইচ্চাদি. কম্মে – ‘‘ক্যস্সা’’তি ঈঞ, ৰজ্জীযতি ৰজ্জতি ৰদীযতি, ৰজ্জীযন্তি ৰজ্জন্তি ৰদীযন্তি. ৰদিস্সতি, ৰদিস্সন্তি. অৰদী ৰদী, অৰদিংসু ৰদিংসু. অৰদিস্স ৰদিস্স. ৰজ্জে ৰজ্জেয্য ৰদে ৰদেয্য, ৰজ্জেয্যুং ৰদেয্যুং. ৰজ্জেতু ৰদেতু ৰদতু ইচ্চাদি যথাগমং ঞেয্যং.

কমু=পদৰিক্খেপে, ‘‘পরোক্খাযঞ্চা’’তি চগ্গহণেন কম কম ইতি দ্ৰিত্তে অনাদিব্যঞ্জনলোপে লৰিকরণে ‘‘কৰগ্গহা’’ দিনা কস্স চে নিগ্গহীতাগমে চ কতে চংকমতি কমতি ইচ্চাদি. চল=কম্পনে, চংচলতি. জল+দল=দিত্তিযং, দ্ৰিত্তে দদ্দল্লতি ইচ্চাদি. (সৰুদ্ধিকভূৰাদিনযো).

হূ+ভূ=সত্তাযং, ত্যাদীসু ‘‘কত্তরি লো’’তি লো, তস্স লোপে ‘‘যুৰণ্ণান+মেও পচ্চযে’’তি ওকারো. সো হোতি, তে হোন্তি. হোসি, হোথ. হোমি, হোম ইচ্চাদি. ভাৰে-তেন হূযতি হূযতে.